Tringsar bîla aisi uplika ra plikaia sa

1. ¿Dîa muni kangrigisan nani ba ani bîla aisanka bahara aisi ba kat asla daukan sa?

¹ Yawan piua ra, Pentikus 33 manka ra, Jisas disaipilka sut ba spirit holikira ni aibanhwan ningkara, upla nani laih wina balan kan ba ra ‘bîla sât wala nani ra aisin’ (Ap.St 2:4). Baha mita, upla 3.000 baku aihtabi takan. Upla aihkika ba Hibru apia kaka Grik bîla aisi kan. Sakuna Jehova aitani lukan naha uplika nani ra ai bîla pali ra smalkaia. Bamna upla nani ba sturi yamni ba kau pain walisa ai bîla kat aisisa taim. Naiwa piua ra, kangrigisan nani ba smalkaia pliska kum brisa. Baku sin, bahara dîa bîla aisanka aisi ba kat smalkisa (Organizados bukka, wahia 107, baiki.s 1, 2). Tringsar bîla ra smalki daknika nani ba anira smalkaia pliska kum yabras, sakuna ai kangrigisanka smalkaia pliska bri ba ra wih upla bîla aisanka wala aisi nani ra plikaia sip sa.

2. a) ¿Tringsar bîla aisi nani ra pliki sakaia warkka ba dîa tânka sa? b) ¿Kangrigisan kum tringsar bîla aisisa kaka, kangrigisan wala nani mita nahki hilp munaia sip sa? c) Upla kum tringsar bîla aisi Baibil tânka ba nu takaia want sa kaka, ¿dîa daukaia sa?

² Yawan smalkisa pliska ra upla sut sim bîla aisisa kaka, utla utla ra smalkaia sa. Sakuna, plis kum ra upla tringsar bîla aisi manis iwisa kaka, sât wala smalkaia sa. Ban kra kangrigisan kum tringsar bîla aisi ba sim pliska ra smalkisa kangrigisan nani ba wal. Kangrigisan kum upla tringsar nani anira iwi ba mai wibia sin, tringsar bîla aisi kangrigisanka apia kaka daknika ba ai warkka sa baha uplika nani ra pliki sakaia (“Pana pana hilp muni” bakska ba kaiks). Baha mita, upla tringsar bîla aisi kangrigisanka nani ba pliki sakaia warkka ba tâ baikaia sa. Ban kra makabi walaia sip sa witin nani anira iwisa. Sakuna naha warkka ba, ¿nahki daukaia sip sa?

3. ¿Ani pliska ra upla tringsar nani ra plikaia sa, bara taim an yus munaia sa?

³ Warkka ba nahki daukaia. Tringsar bîla aisi uplika nani pliki sakaia dukiara, wan taimka sakaia sa. Bara upla wiria apia kaka ailal bâra sa kaka laki kaikaia sa. Sampla baku, yawan makabi walaia sip sa: ¿Smalkaia pliska ra upla an baha bîla aisisa? ¿Smalki tataukra an bâra sa? ¿Kangrigisan apia kaka daknika ba dairiksan an brisa? Tringsar bîla ra smalki kangrigisanka ba utla sut ra wih upla tringsar nani ra plikaia apia sa. Kau pain sa anira upla tringsar kau ailal bâra sa kaka baman wih plikaia. Baku sin plis kau lamara ba ra waia sip sa. Baha mita naha warkka ba pain pali daukaia sa. Baku upla sut ra sanska yabia Jehova tânka kasak ba lan takaia (Ro. 10:13, 14).

4. a) ¿Upla tringsar pliki sakaia warkka ba nahki daukaia sip sa? b) ¿Nahki natka ra upla tringsar bîla aisi nani ra pliki sakaia sip sa?

⁴ Sim pliska ra smalkaia apia dukiara, kangrigisan almukka nani, bara smalkaia warkka pura kaiki ba tringsar bîla aisi uplika nani ra plikaia warkka ba kau tâ briaia sa (1 Ko. 9:26). Dakni nani tringsar bîla ra smalki ba ra kangrigisan almukka nani mita kristian waitna kum spirit lâka ra pâwan ba apia kaka almukka kum baha warkka tâ briaia mangkaia sa. Kangrigisan manis upla tringsar nani ra pliki sakaia dukiara, telepon bukka ra plikisa, apia kaka Internet ra ani nina tringsar bîla ra ulban ba pliki sakisa. Baha wina, telepon bâk upla ra winisa apia kaka, ani dairiksanka upla tringsar kum iwi ba ra wih kaikisa. Bara sip sa kaka, kangrigisan kum ra dakni kum tringsar bîla ra smalkisa kaka, muihni lakri nani sut ra paiwaia sip sa baha warkka ba sam taim tâ baikaia (“Tringsar bîla aisi uplika ra nahki pliki sakaia” bakska ba kaiks).

5. a) ¿Smalki tataukra nani upla tringsar pliki ba dukiara dîa kupia kraukanka nani bâra sa? b) ¿Upla tringsar kum ra dîa wiaia sip sa?

⁵ Upla tringsar nani ra pliki sâkbia taim, dîa wibia ba pain nu kaia sa. Upla  tringsar bîla aisi pliki sakaia ba smalkaia  warkka ba tâ baikisa, baha mita wan kwalka dimra kum pain bri kaia sa. Pain kabia, dîa wibia ba praptis munaia bara smalkaia warkka ra wabia taim baha bîla ra aisaia ba hilp wan munbia kau pain lan takaia. Awar nani smalkbia ba kulkaia sip sa. Sakuna, map nani laki kaikisa taim apia kaka anira smalkbia pliki sakisa piua ba sip kulkras. Upla tringsar bîla aisi kum sâkbia taim, tânka kasak ba smalkaia sa. Bara smalkaia warkka pura kaiki ba ra apia kaka witin mita mangkan kristianka wala kum ra dîa daukan ba ulbi yabaia sip sa. Uplika ba walaia ai brinka apia kabia sin naha daukaia sa. Upla tringsar bîla aisi pliki sakaia warkka ba tara sa, sakuna smalkaia warkka ba sin tâ baikaia sa (“¿Dîa wiaia sa?” bakska ba kaiks).

6. ¿Dîa muni upla bîlas nani ra pliki sakaia ba wark kum tara sa?

⁶ Upla bîlas nani ra plikaia. Upla bîlas nani ra pliki sakaia ba wark kum tara sa. Baha mita ban trai munaia sa. Upla kum bîlas sapa ai nina nahki ulbi ba, dîa sât uplika sa, bara dîa kwalka dimi ba sin yawan nu kaia sip apia sa. Baku sin ban kra upla bîlas pamalika apia kaka pânika nani ba witin ra uba main kaikbia bara want apia kabia wan wiaia upla bîlas kum kaikisa sapa. Naha kupia kraukanka nani ba hilp wan munbia upla bîlas bara tringsar bîla aisi uplika nani ra pliki kabia piua ra.

7. a) ¿Watla dawanka nani ra dîa makabi walaia sip sma upla bîlas nani ra plikisa piua ra? b) ¿Utla dawanka kum sibrin âpu kabia dukiara, dîa wiaia sip sma?

⁷ Kangrigisan nani upla bîlas nani ra smalki ba ban kra utla utla nani ra smalki tauki kan taim makabi walan upla bîlas bâra sa sapa. Ban kra, utla dawanka kum ai lamara iwi uplika kum ra kaikan sain bîla yus munisa, apia kaka skul watla ra upla kum sain bîla yus munisa. Ban kra, kampani kum ra upla bîlas kum wark takisa. Utla dawanka kum ai tawanka ra kaikan ulbanka kum ra wisa baha tani ra tuktan bîlas kum iwisa. Baku sin ban kra utla dawanka kum ai pamalika tilara upla kum bîlas sa. Amya tiwbiara upla bîlas nani dukiara wali taukisma kaka, upla nani ba aihka kaikbia. Sakuna upla nani ba baku lukbia apia dukiara, man pâmnika lâka marikaia sip sma, bara lal kat wiaia upla tringsar bîla aisi ba plikisma. Muihni lakri kum kum Baibil ba uplika ra marikisa apia kaka DVD kum. Baha wina makabi walisa upla bîlas kum kaikisa sapa. Baku sin, utla dawanka ra wisa upla bîlas nani ra smalkaia want sa. Bara utla dawanka ba baha dukiara aisaia want apia sa kaka, ban kra man ninam ulbi yama, apia kaka kangrigisan aidrubanka nani ahkia dauki ba ulbi yama kaka, want kabia upla bîlas ra yabaia.

8. ¿Kangrigisan kum sain bîla yus muni ba ra kangrigisan wala mita nahki tâ baikaia sip sa?

⁸ Mani bilara, yu kum apia kaka  wâl, kangrigisan kum sain bîla ra smalki ba kangrigisan wala ra paiwaia sip sa aikuki upla bîlas nani pliki sakaia. Witin nani ba aidrubanka kum sain bîla ra daukaia sip sa. Baku sin marikanka nani daukaia sa. Bara muihni lakri nani ra wibia dîa daukaia. Bara truk kum ra smalki taukisa kaka, truk bani ra smalki tataukra kum sain bîla yus muni ba waia sa. Baku sin, witin nani ba map kum bri kaia sa anira upla bîlas nani bâra ba plikaia dukiara.

9. ¿Upla bîlas nani asla takisa pliska nani ra nahki smalkaia sip sa?

⁹ Upla bîlas nani asla takisa pliska ra wih plikaia sa. Baku sin upla bîlas nani hilpka kum sakaia dukiara anira wi ba yawan plikaia sa. Ya nani naha warkka dauki ba ai kwalka dimra ba pain kaia sa. Bara upla bîlas nani ra sâkbia taim, kau pain kabia upla kum ra apia kaka wâl ra baman smalkaia, dakni sut ra smalkaia ba wal. Bara uplika ba kau lan takaia want sa kaka, ban kra witin ra makabi walaia sip sa dîa natka ra witin wal kli asla takaia sip sa.

10. ¿Nahki bisnis pliska nani ra upla bîlas nani ra pliki sakaia sip sa?

¹⁰ Upla bîlas nani ra pliki sakaia dukiara, natka wala bâra sa. Sampla baku, map kum ra plikaia sip sa ani bisnis pliska nani ra upla bîlas nani bâra sa. Ningkara wih plikaia sa. Ban kra gias atki pliska nani ra, kwala tuski pliska ra, plun atki pliska ra, yapaia pliska, bara plis wala nani ra sin. Baha mapka ra sim bisnis pliska nani ba bâra sa kaka, aitani kabia muihni lakri nani ba sim natka ra smalkaia. Baku kau pain lan takbia. Sampla wala, ban kra yapaia pliska kum ra upla bîlas nani takaskisa, yawan ba dawanka ra DVD nani yabaia sip sa, dîa warkka dauki ba tânka marikaia. Bara witin upla bîlas nani ra yabia. Bisnis pliska kum kum ra makabi walaia sip sa bahara wark tatakra kum apia kaka upla kum sain bîla yus munisa sapa. Tuktan bîlas nani dukiara skul kum bâra sa kaka, waia sip sa bara DVD nani swiaia.

11. ¿Dîa muni upla tringsar plikaia ba smalkaia warkka ba tâ baikisa?

¹¹ Wark kum tara sa. Upla tringsar nani plikaia warkka ba karna sa. Baku sin, witin nani ba plis kum wina plis wala ra wih iwisa. Baha mita, smalkaia pliska ba ban laki kaikaia sa. Sakuna, plis ailal ra kangrigisan nani ba upla tringsar nani ra plikisa. Kan smalkaia warkka ba tâ baikisa. Smalkaia warkka ba Jehova wankan sa, bara Witin want sa upla sut lan takbia (Ap.St 10:34). Witin kupia lâka sa “upla sut ba swaki sakan kabia, kasak tânka ba sin witin nani kakaira taki banhbia” (1 Ti. 2:3, 4). Baha mita, Jehova warkka ba tâ baikaia sa bara tringsar nani “kupia pain” bri ba sut ra hilp munaia sa (Lk. 8:15).

[Wahya 5 Lilkika ba]

Pana pana hilp muni

Tringsar bîla ra smalki kangrigisanka apia kaka dakni kum tringsar uplika nani ra sakaia dukiara hilpka nit sa kaka, smalkaia warkka tâ bri uplika ba mita kangrigisan kau lamara almukka nani wal aisaia sip sa. Kau pain kabia kangrigisan kau lamara banhwi ba wal baman aisaia, apia kaka witin nani upla smalki ba pliska ra upla tringsar aitani brisa kaka, hilpka makabaia. Bara naha kangrigisanka ba muihni lakri nani ra wibia smalki tauki kabia taim, tringsar bîla aisi uplika kum wal prawbia kaka, dairiksanka ba ulbaia sa bara smalkaia warkka tâ bri kristianka waitna ra yabaia. Baha wina, witin ba hilpka makaban kangrigisanka ra yabia. Kangrigisan nani wâlsut ba pana pana wark takaia sa upla tringsar nani lan takaia want ba hilp munaia dukiara. Baku sin, witin nani wibia anira kangrigisan kum bâra sa tringsar bîla aisi ba.

Muihni lakri nani upla tringsar kum sâkbia kaka, bara uplika ba rait pali kau lan takaia want sa kaka (apia kaka upla bîlas kum sâkbia kaka), isti pali Sírvase visitar (S-43-S) wauhkataya ba ulbi banhkaia sa, bara kangrigisan âiulbra ba ra yabaia. Witin ba isti pali natka kum plikbia uplika ra hilp munaia dukiara (km 5/11 wah. 3 ba kaiks).

[Wahya 6 Lilkika ba]

Tringsar bîla aisi uplika ra nahki pliki sakaia

• Upla wala nani ra makabi wals. Ban kra, skul pânika nani, witin pamalika, wark pânika, bara upla wala nani ra sin.

• Upla telepon numbika taki bukka ra pliks. Internet ra, apia kaka telepon kampani bâk plikaia sip sma.

• Tânkira lâka wal makabi walaia sip sma buk nani suni pliska ra, gabamint apiska, apia kaka skul watla nani ra.

• Piriudiku nani ra pliks. Ban kra bahara takbia anira bara ahkia upla tringsar nani asla takbia.

• Bisnis pliska nani ra upla tringsar bîla aisi nani wi ba.

• Baku sin bisnis pliska apia kaka skul tara nani ra ulbi sakanka nani swiaia sip sma, bus takaski pliska ra, bara anira upla tringsar bîla aisi ba ra sin.

• Lâ kat sa kaka, upla tringsar anira ba plikaia sip sma, apia kaka Internet bâk sin plikaia.

[Wahya 7 Lilkika ba]

¿Dîa wiaia sa?

Pâna lâka mariks, baku upla nani ba saura lukbia apia. Bara kau pain sa wan ulbi sakanka nani pas marikaia.

Wan lakula wibia ningkara, sip sa wiaia: “Yawan ______ bîla aisi uplika nani ra plikisa Baibil tânka painkira kum dukiara smalkaia. ¿Upla kum naha bîla aisi ba kaikisma?”

Upla bîlas kum ra pliki kabia taim, sip sa wiaia: “Naksa. Diara kum mamrikaia want sna. [DVD masinka kum brih Baibil tikska kum sain bîla ra ba marikaia sip sma.] Naha borska ba sain bîla ra sa. Baku sin, yawan ba lilkika manis brisa bara naha nani ba paskan sa upla bîlas nani ra hilp munaia dukiara. ¿Upla kum bîlas ba apia kaka kiama prawan trabilka bri ba kaikisma?”. Bara utla dawanka ba ai kupia kraukras kaka, sip sma makabi walaia anira upla bîlas kum kaikan sapa. Sampla baku, wark ra, skul ra, apia kaka ai tawanka ra.