KRISTIAN RAYAKA KAT IWAIA

Asla wark takaia sa bîla sât sât aisi uplika nani ra smalkaia dukiara

Marit uplika kum smalkaia warkka ra sim bîla aisaras waitnika kum bara ai luhpia wal prawisa

Upla nani ba ai bîla kat King Lâka sturka smalkisa taim, kau lan takan daukisa. Baha mita kaia sa Pentikus 33 manka ra, Jehova yaban Ju uplika lalukra nani “tasba aiska wina” balan ba yapti bîla kat sturka yamni nani ba walbia, ban kra Hibru bara Grik bîla sin aisi kan, sim Jerusalem uplika nani aisi kan baku (Ap.St 2:5, 8). Naiwa piua ra, bîla wala aisi kangrigisanka nani ailal bâra sa sim tawanka ra smalki banhwi ba. Muihni, lakri nani baha kangrigisanka wina, ¿dîa daukaia sa upla sut ra asla smalkaia dukiara? baku sin ¿nahki sip sa ai warkka ba bahki ra daukaia apia bara lama iwi uplika nani ra ambuk munaia apia?

Pana pana aisaia sa (S.L 15:22): Smalkaia Warkka pura kakaira nani ba kupia kumi takaia sa bara smalkaia tnatka kum plikaia sa sut ra yamni munbia dukiara. Ban kra, kangrigisan nani bîla wala aisi ba smalkaia pliska ba sirpi sa, bara want apia kabia kangrigisan wala mita ai smalkaia pliska ra smalkbia. Ban sakuna, baha pliska ba uba tara sa kaka, bara piua bani sip smalkras sa kaka, ban kra want kabia utla bani smalkaia, kuna upla kum ai bîla kat lan takaia want sa kaka kangrigisan wala hilpka makabia (od-S wah. 93 baiki s. 37). Apia kaka wan kangrigisan hilpka ba makabia ai bîla kat aisi uplika nani ra plikaia, bara dairiksanka nani ba briaia (km 7/12 wah. 5, bakska). Wan kupia kraukaia sa, sim watla ra iwi uplika nani ba bîla kumi baman aisaras, ban kra wala sin aisisa. Smalkaia warkka ra nahki upla nina bara dairiksanka alki bri ba lâ nani wi ba kat kaia sa.
Pana pana hilpka ba briaia sa (Epe 4:16): Smalkaia warkka pura kaiki dîa wan wi ba kat alki daukaia sa. ¿Upla kum ra Baibil stadika yabisma kangrigisankam bîla aisaras ba? Ban kra baha uplika ba kau isti spirit lainka ra pâwbia, kangrigisan kum apia kaka dakni kum lamara ai bîla kat, smalki tataukra kum wal stadi takbia kaka.
Ridi takaia sa (S.L 15:28; 16:1): Smalkisma pliska ra bîlam aisaras uplika kum wal prawisma kaka, trai munaia sma witin ra smalkaia. Ridi kaia dukiara, smalkisma pliska ra dîa bîla nani upla aisi ba luks bara aplicación JW Language yus munaia sip sma lakula bîla kum lan takaia dukiara.