¡Gâd sturka yamni nani ba! wauhkataya nahki yus munaia
Naha wauhkataya paskan sa upla ra kli wih kaikaia bara Baibil stadika tâ krikaia
1. “Protejamos el corazón” Aidrubanka ra, ¿ani wauhkataya takan upla ra kli wih kaikaia bara Baibil stadika tâ krikaia dukiara hilp wan muni ba?
1 “Protejamos el corazón” Aidrubanka Kau Tara ba ra, yawan uba lilia wan dara walan kan wauhkataya raya kum brin, bara naha ba hilp wan munisa upla ra kli wih kaikaia bara Baibil stadika tâ krikaia dukiara. ¡Gâd sturka yamni nani ba! wauhkataya ba Gâd dia wan makabisa ki? wauhkataya sirka ra takan sa, kan lisin nani ba kau lal kat aisisa. Bara Baibil stadika nani utla durka kat tâ krikaia hilp wan munisa. Sakuna, Gâd dia wan makabisa ki? wauhkataya ba nahki kristian takaia sip ba dukiara aisisa bara lisin kum kum ba ban kra stadi tatakra mapara karna kan. Nanara naha wauhkataya raya ba Baibil sturka yamni nani dukiara aisisa (Ap.St 15:35).
2. ¿Gâd sturka yamni wauhkataya dîa muni paskan sa ki?
2 Naha wauhkataya, ¿dîa muni paskan sa? Muihni lakri manis tasba aiska ra makaban sa diara kum upla ra hilp munaia sip ba bara Smalkisa bukka ra brih waia. Kan naha bukka wal Baibil stadika nani tâ brisa. Upla manis bâra sa buk kum uba karna kaikisa aisi kaikaia, wauhkataya kum stadi takaia sirka ra. Baku sin, wauhkataya kum kau isi bîla aisanka wala nani ra lakaia sip sa.
3. ¿Naha wauhkataya ba nahki sât wala sa ulbi sakanka wala nani ba wal?
3 Nahki paskan sa. Wan ulbi sakanka nani paskan sa upla nani ba naha nani aisi kaikbia taim, upla hilpka âpu wal tânka kasak ba lan takbia. Naha wauhkataya raya sât wala sa. Naha ba smasmalkra kum wal stadi takaia sa. Baha mita, upla kum ra yama taim, kau pain kabia baiki sakanka kum apia kaka wâl laki kaikaia. Baiki sakanka nani ba kunhku sa. Baha mita, utla durka stadi takaia sip sa apia kaka uplika wark taki pliska kat. Lisin pas ba wina tâ krikaia sip sa, sakuna lisin wala nani wina sin aitani sa tâ krikaia.
4. ¿Nahki muni naha wauhkataya raya hilp wan munisa Baibil pali wina lan takaia?
4 Wan ulbi sakanka ailal ra, ansika ba makabi walanka tilara sa. Sakuna, naha wauhkataya ra ansika aihkika ba Baibil tikska nani ra sa. Upla manis Baibil pali wina lan takaia want sa wan ulbi sakanka nani aisi kaikaia watlika ra. Baku sin, tikska aihkika ba bâra ulbras sa. Tiks nani ba Baibil ra aisi kaikaia sa. Baku natka ra stadi tatakra ba kaikisa Gâd Bîla wina lan takisa (Ais. 54:13).
5. ¿Dîa muni smasmalkra ba pain ridi takaia sa?
5 Naha wauhkataya tikska nani sut tânka smalkras ¿Dîa muni? Kan naha ba paskan sa upla ra kupia bukaia makabi walanka daukaia. Baku natka ra smasmalkra ba sip sa kau pain smalkaia lan takaia. Baha mita, yawan stadika dukiara pain pali ridi takaia sa. Sakuna kupiam kraukisa: Uba sturi aisapara. Baibil wina smalkaia wan brinka sa. Sakuna kau pain kabia stadi tatakra ra kupia bukaia witin silp wibia tikska nani dukiara dîa luki ba. Makabi walanka nani pain yus munaia sa. Baku natka ra uplika ra hilp munbia tikska nani tânka briaia (Ap.St 17:2 Lâ Raya Wauhkataya, 1986).
6. ¿Naha wauhkataya nahki yus munaia sip sa: a) upla nani ba Baibil ra uya kasak lukras piua ra b) utla utla ra smalkisa piua ra? c) utla durka kat Baibil stadika kum tâ krikaia dukiara? d) upla ra kli wih kaikisa piua ra?
6 Ulbi sakanka wala nani baku, naha wauhkataya ba piua sut ra upla mihta ra swiaia sip sa. Baha kati ra ulbi sakanka wala upla mihta ra yabi kabia sin. Muihni lakri manis painkira kabia naha wauhkataya yus munaia utla durka kat stadika tâ krikaia dukiara. Bara, Aidrubanka Kau Tara ra aisan baku, upla nani kau lan takaia want ba wal yus munisa kaka, “¡upla ra kli wih kaikaia warkka ba rait pali liliakira kabia!” (Wahia 5-7 ba kat laki kaiks.)
7. ¿Nahki stadika kum tâ briaia sip sa naha wauhkataya raya ba wal?
7 Nahki stadika tâ krikaia. Wan aisanka tâ krikaia sip sa makabi walanka nani letrika siksa nani ra taki ba. Baha wina, baiki sakanka bara tikska ba aisi kaiks naha nani ba cursivas ra sa. Makabi walanka tânkira nani yus muns utla dawanka ba tikska nani ai tânka bribia dukiara. Ningkara, lisin wala ra tawaia sirka ra uplika ra makas makabi walanka letrika siksa ra taki ba ansika yabia. Baku nu takma ai tânka brin sapa. Pas yua nani ra aitani kabia makabi walanka siksa ra taki ba wina kumi baman laki kaikaia. Piu lubia ningkara, aisanka nani ba kau yari daukaia sip sa lisin sut ba stadi takaia dukiara.
8. ¿Nahki tikska nani dukiara aisaia want kabia taim, nahki daukaia sa bara dîa muni?
8 Tikska nani “aisi kaikaia” bîla tnaya ra ulbi bri ba makabi walanka letrika siksa ra taki ba ansika yabisa. Bara tiks kum dukiara aisi kaikaia want kama taim, wiaia apia sa: “Apastil Pal naku ulban” apia kaka, “Jirimaya kaina manis aisan.” Kan baku daukisa kaka, uplika ba lukbia yawan upla lukanka smalkisa. Kau pain sa naku wiaia: “Gâd Bîla ba naku wisa” apia kaka, “Baibil ba naku kaina manis aisan”.
9. ¿Tikska nani sut aisi kaikaia sa ki?
9 ¿Tiks nani sut aisi kaikaia sa, apia kaka “aisi kaiks” bîla bri nani ba baman? Stadika rayaka laki kaikaia sa. Bahara taki tikska kumi sin âpu sa dis Baibil dîa luki ba anira pliki sakaia dukiara baman. Tikska nani sut sanska wankisa laki kaikaia dukiara. Sakuna, stadika ba uya taim âpu sa kaka, apia kaka kau lan takaia want apia, uya pain aisi kaikras kaka, ban kra “aisi kaiks” bîla bri nani ba baman aisi kaikaia sip sa.
10. ¿Ahkia taim Smalkisa bukka ra tawaia sip sa?
10 Ahkia Smalkisa bukka ba ra waia. Aisanka kum kum bri kabia ningkara, apia kaka stadika ba pat pat daukisa piua ra, Smalkisa bukka ra tawaia sip sa, apia kaka Gâd sturka yamni wauhkataya ra ban kaia, naha ba stadi taki danh takbia kat. Smalki tataukra nani ba laki kaikaia sa ahkia buk ra tawaia sip sa. Bara daukbia taim, ¿Smalkisa bukka ba sapta pas ba wina tâ krikaia sa? Yawan sip lâ kum mangkras. Upla bani sât sât sa. Sakuna, stadi tatakra aihkika ba kau yamnika sakisa sim tânka nani wina lan takbia kaka Smalkisa bukka ra.
11. ¿Dîa muni naha wauhkataya ba yus munaia sa?
11 Naha tasba ra sturi yamni uya âpu sa, sakuna yawan sturi yamni bara painkira brisa: Gâd Kingka lâka pat iwisa bara tasba na kupia kumi lâka ra bâra kabia (Mt. 24:14; 2 Pi. 3:13). Yawan kasak lukisa upla manis naha bîla nani aisabia: “Kaiks nahki pranakira ba, baha mina nani il nani purak lilia sturka nani brih aula ba, baha kupia kumi sturka maisa paki ba baha sturi yamni brih aula ba, bara swaki sakan sturka ba maisam paki ba, bara witin nani Saion ra wisa: ‘¡Man Gâdkam ba king sa!’” (Ais. 52:7). ¡Naha wauhkataya yus munaia sip sa Gâd sturka yamni nani upla ra smalkaia dukiara!
[Wahya 7 lilkika ba]
Upla nani Gâd bara Baibil ra uya kasak lukras kaka:
● Plis ailal ra, muihni lakri nani ba kaikisa “Gâd” bara “Baibil” bîla nani yus munisa kaka, upla nani ba minitka ra kau aisaia want apia sa. Baha piua nani ra, ¿dîa daukaia sip sa? Kau pain kabia bahara iwi uplika nitka nani dukiara aisaia, sampla baku, gabamint pain kum briaia, pamali nani nahki hilpka kum pliki sakaia sip sa, bara naika piua ra dîa takbia ba dukiara aisaia sa. Ban kra Gâd sturka yamni wauhkataya yus munaia sip sa, pat uplika wal aima kum kum aisan sa kaka. Baha wina, yawan nahki nu sa Gâd rait pali bâra sa, baku sin dîa muni Baibil ra kasak lukaia sip ba dukiara aisaia.
[Wahya 8 lilkika ba]
Utla utla ra smalkisa taim:
● “Upla ra wapi kaiki taukisna, kan marikaia want sna Gâd upla nani dukiara dîa luki ba. ¿Man lukisma yu kum Gâd wan pât wahwanka wina pri wan sâkbia? [Ansika maikbia swis.] Naha wauhkataya ba tânka marikisa ani Baibil tikska ra takisa ansika ba [Uplika ra wauhkataya kum yas, bara lisin 1 ra baiki sakanka pas ba aikuki laki kaiks, baku sin Jirimaya 29:11 aisi kaiks]. Naha aisi kaikram ba mita, ¿rait apia yawan kaikisa Gâd upla nani dukiara diara pain nani want sa? [Ansika maikbia swis.] Man want sma kaka, naha wauhkataya briaia sip sma. Kli aisabia taim, baiki sakanka wala ba laki kaikaia sip sa bara Baibil ra naha makabi walanka ansika yabia: ‘¿Nahki Gâd upla nani pât wahwanka âpu daukbia?’”. Utla dawanka ba kau taim brisa kaka, man sip kama baiki sakanka wala ba aikuki laki kaikaia bara tiks yumhpa bahara taki ba sin. Ningkara, makabi walanka wala laki kaikaia dukiara ahkia kli balma yua ba wis.
● “Upla manis ai pura sunaia laik sa. Trabil brisa piua ra kau ai pura sunisa. ¿Man sam taim puram sunisma ki? [Ansika maikbia swis.] ¿Man lukisma Gâd pura sunra nani ba sut walisa? ¿Apia kaka pura sunra kum kum bâra sa Witin pain kaikras ba? [Ansika maikbia swis.] Nahara wauhkataya kum brisna bara tânka marikisa nahki Baibil ra naha makabi walanka nani ansika pliki sakaia sip sa. [Uplika ra wauhkataya kum yas, bara lisin 12 pas baiki sakanka ba laki kaiks bara “aisi kaiks” bîla bri tikska nani sin.] ¿Rait apia uba painkira sa Gâd wan pura sunra nani ba walisa? Sakuna pura sunra nani wina yamnika sut briaia dukiara, Gâd ra pain kakaira takaia sa. [Lisin 2 ra wih ulbanka lalka ba mariks.] Man brinkam sa kaka, naha wauhkataya maikaia sip sna, bara piu wala ra naha makabi walanka painkira nani ansika yabaia.”
● “Upla manis ba makabi walisa naha tasba uplika nani ba anira auya. ¿Man lukisma diara nani taki ba kau pain takbia? [Ansika maikbia swis.] Upla manis ba uba lilia ai dara walisa Baibil ra sturi yamni nani bâra ba bîla kaikanka lâka kum wanki ba dukiara. Nahara makabi walanka kum kum takisa bara Baibil ra ansika sakaia sip sa.” Uplika ra wauhkataya kum yas, bara witin ra kupia buks wauhkataya nina tani ra makabi walanka taki ba wina kum wahbi sâkbia. Baha wina, lisinka ra was, bara nahki stadi takaia sip ba mariks. Baha lisinka ra makabi walanka wala taki ba laki kaikaia dukiara ahkia kli balma yua ba wis.
[Wahya 9 lilkika ba]
Lal kat aisi uplika ra wis Baibil stadika dukiara:
● “Naiwa yua ra balri Baibil stadika kum nahki briaia sip ba dukiara. Naha wauhkataya lisin 15 brisa bara tânka marikisa nahki Baibil ra naha makabi walanka ansika pliki sakaia sip sa. [Uplika ra wauhkataya mawan bara nina tani mariks.] ¿Baibil tânka briaia pat trai kaikram ki? [Ansika maikbia swis.] Mai marikaisna nahki natka isi kum ra naha lisinka nani stadi takaia sip sa. [Lisin 3, baiki sakanka 1, makabi walanka 3 laki kaiks, bara Param Marikanka 21:4, 5 aisi kaiks. Bara sip sa kaka, baiki sakanka wala bara tikska nani “aisi kaikaia” bîla bri ba laki kaiks.] Man want sma kaka, naha wauhkataya maikaia sip sna. Man sip sma naiwa wina Baibil ba stadi takaia. Piu wala ra, lisin pas ba laki kaikaia sip sa. Kaiks nahki naha lisinka ba wahia kumi baman brisa.”
[Wahya 9 lilkika ba]
Upla ra kli wih kaikma taim:
● Upla kum kau lan takaia want ba sakan taim, yawan sip sa wiaia: “Uba lilia mai kaikisna. Naha wauhkataya maikaia want sna. Kan Baibil wal makabi walanka painkira ailal ra ansika kum yabisa. [Uplika ra wauhkataya kum yas, bara nina tani makabi walanka nani bâra ba mariks.] ¿Naha nani wina ani ba kau brinkam sa nu takaia? [Ansika maikbia swis. Baha wina, uplika mita lisinka wahbi sakan ba ra was.] Mai marikaisna nahki naha wauhkataya wal Baibil makabi walanka nani ansika pliki sakaia sip sa.” Stadika nahki dauki ba mariks bara baiki sakanka bara tikska nani “aisi kaikaia” bîla bri ba laki kaiks. ¡Baibil stadika kum tâ krikram! Uplika ra wauhkataya ba yas, bara ahkia kli balma yua ba wis. Lisin sut danh takma taim, lisin wala uplika mita wahbi sakan ba laki kaiks apia kaka wauhkataya tâ wina stadi takaia.