Sturka yamni nani wauhkataya wal lan daukaia
1. ¿Sturka yamni nani wauhkataya ba nahki daukan sa?
1 Gâd Warkka Dauki, Pastara kati wauhkataya ra, yawan laki kaikan ¡Gâd sturka yamni nani ba! wauhkataya, tânka kasak ba upla nani ra smalkaia dukiara pain sa. Naha ulbi sakanka ra tikska ul ulbi mangkras sa, kan bîla kaikisa stadi tatakra nani ba Baibil wina pliki aisi kaikbia. Wan ulbi sakanka aihkika ba silp ai tânka marikisa, kuna naha wauhkataya ba maestru kum wal lan takaia sa. Baha mita, upla kum ra naha ulbi sakanka marikbia taim, trai muns uplika ra marikaia nahki Baibil stadika kum daukisa. Baku uplika kaikbia nahki painkira pali sa sturi yamni ba lan takaia (Mt. 13:44).
2. ¿Yawan nahki sip sa Sturka yamni nani wauhkataya ba uplika ra pas wih kaikbia taim yus munaia?
2 Upla ra pas wih kaikisma taim. Sip sma wiaia: “Upla manis ba wari takisa naha tasba na dîa takbia kaina piua ra, kan maisa pakanka nani bâk sturi pain nani ba wiras sa. ¿Man luki sma diara nani ba pain takbia? [Ansika maikbia swis.] Baibil ra bîla kaikanka wankaia sip sa. Naha sât makabi walanka nani Baibil ansika yabisa.” Wauhkataya ba uplika ra yas, bara wahia nina sait ra makabi walanka nani taki ba tila wina kum wahbi sâkbia. Baha wina lisinka wahbi sakan ba, Baibil stadika kum nahki dauki ba marikaia dukiara, pas baiki sakanka ba yus muns. Natka wala daukaia sip ba, man lisin kum wahbi saki, uplika ra mariks nahki naha wauhkataya ba witin ra hilp munaia sip sa Baibil ansika ba pliki sakaia. Internet jw.org pliska ra lilkika kum sim lisinka dukiara bâra sa kaka, marikaia sip sma.
3. Tânka mariks nahki Sturka yamni nani wauhkataya wal Baibil stadika daukaia sip sa
3 Nahki Baibil stadika daukaia. 1) Makabi walanka nani numbika letrika siksa ra taki ba aisi kaiks, baku uplika ba kaikbia ani tânka dukiara aisisa. 2) Baha wina baiki sakanka aisi kaiks. 3) Tikska nani kursiva ulbanka bri nani ba aisi kaiks, bara makabi walanka pain nani yus muns. 4) Sim makabi walanka dukiara baiki sakanka kumi wina kau bâra sa kaka, kupia kraukanka 2 bara 3 ba kaiks. Lilka kum baha ansika bri ba kau marikras kaka, stadi takisma tila bara dingks. 5) Lâs ra, uplika ra wis makabi walanka ansika maikbia, baku man kaikma pain ai tânka brin sapa.
4. ¿Dîa ba hilp wan munbia naha wauhkataya tara na pain yus munaia?
4 Naha hilpka ba pain kakaira taks bara ani sanska takbia wal baku yus muns. Stadika kum daukras kaina ra, stadi tatakrikam ra luks bara nahki lisinka bilara borska nani taki ba wal witin wal tânka luki sakaia (S.L 15:28; Ap.St 17:2, 3). Naha wauhkataya kau pain yus muni wama ba ra, kau yus munaia want kama upla nani ra tânka kasak ba smalkaia.