Wark kum yamnika tara wanki ba

Aidrubanka Kau Tara ba tâ krikras wik yumhpa kainara upla nani ra paiwaia warkka ba dauki kabia. ¿Dîa muni naha warkka tâ baikaia ba pain kabia? Naha aidrubanka ra mani luan nani ra wan uplika ba uba lilia ai dara walan Baibil wina sakan aisanka nani wal, muihni lakri nani nahki ai warkka pain dauki kan ba, baku sin daukanka pain nani marikan ba bara upla sut ba asla kan ba dukiara sin (Law. 110:3; 133:1; Ais. 65:13, 14). Bara naha paiwaia warkka ba, ¿yus takisa plis laihura wina impakaia sa kaka?

Mani 2011 Aidrubanka Kau Tara luan ba ra mairin kum Betel apiska ra wauhtaya kum blikan. Naha mairka ba Jehova Witniska nani wina yukuwi kan, sakuna ai watla durka kat paiwanka wauhkataya kum sakan. Bara wauhkataya ba ra ulban: “Utla tara kum brisna bara maritki ba sin pain sa, bara yang luki kapri lilia kaia dukiara diara wala nit apia kapri. Sakuna baku apia kan; rayaki ba sari kan. Baha mita yang aidrubanka ra satadi yua ba wari bara 320 kilumita truk ba wakri”. Naha mairka ba uba aidrubanka ba laik takan ba mita, ai maya ra winan bara maisa pakan baha yua ba utla ra wabia apia kan sandi yua ba sin aidrubanka ra takaskaia want kan. Mairka ba wisa: “Aisanka nani sut walri bara Jehova Witniska ailal ra kakaira takri. Danh takbia ba want apia kapri”. Mairka ba ai watla ra balan taim Baibil stadika kum brin bara smalki tataukra kum takan. Mairka win: “¡Uba yamni sa naha paiwanka waitla durka ra sakri ba! Nanara rayaki ba kau lilia sa”.

Upla kum kum naha paiwanka wauhkataya ba bribia ba aidrubanka ra waia sip sa. Baha mita, liliakira naha warkka ba tâ baikbia. Paiwanka wauhkataya ba takaskbia ba aidrubanka ra brih was, baku sip kama tawan bilara upla nani ra smalkaia.

[Wahya 5 lilkika ba]

¿Nahki upla ra paiwanka yabia?

Smalkaia pliska sut ba daukaia want sa kaka, bîla prahni ra aisaia sa. Sip sa naku upla ra wiaia: “Naksa. Tasba aiska ra naha paiwanka ba upla ra yabisa bara naha ba man ra maikaia want kapri. Aisi kaikma taim nu takma dîa dukiara sa”. Pânikam lâka ba mariks. Wik tnata ra naha warkka daukbia taim La Atalaya bara ¡Despertad! ba swiaia sapa laki kaikaia sip sa.