Uplika kat paiwaia

1. Aidrubanka Kau Tara ba ra upla ra paiwaia warkka ba, ¿ahkia wina tâ krikbia?

¹ Wan pânika apia kaka pamali nani dukiara plun auhni kum daukisa taim, wan taimka bara dîa sut bri ba yus munisa mita liliakira baha nani ra paiwisa. Sim baku spirit pata tara kum ridi daukan sa bara naha ba Aidrubanka Kau Tara aula ba ra bribia. Wik yumhpa kaina ra Jehova sanska wankbia upla nani ra paiwaia warkka daukaia. ¿Dîa ba hilp wan munbia liliakira upla nani ra paiwaia?

2. ¿Dîa ba hilp wan munbia paiwaia warkka wan kupia aiska tâ baikaia?

² Aidrubanka Kau Tara ba ra spirit pata bri ba wan rayaka ra nahki hilp wan munbia ba ra lukbia kaka, paiwaia warkka ba liliakira daukbia (Ais. 65:13, 14). Baku sin lukaia sa paiwaia warkka ba yamnika ailal brisa (“Yamni takisa” bakska ba kaiks). Ban kra, upla manis yawan paiwan ba Aidrubanka ra balaia sip sa, apia kaka balras kaia. Upla an balbia, balras kabia sin, karna wark takbia ba Jehova ra kulkanka tara yabia bara dîa yamni muni ba upla kaikbia (Law. 145:3, 7; Par.M 22:17).

3. ¿Paiwaia wauhkataya ba nahki upla mihta ra swibia ki?

³ Kangrigisan almuk daknika bani laki kaikbia nahki paiwaia wauhkataya ba upla mihta ra swibia. Sampla baku, kangrigisan smalkisa pliska ra upla âpu watla nani ra swibia sapa, apia kaka upla ailal bâra pliska nani ra yabia. Wik tnata ra wauhkataya nani bara paiwanka wal sip sa kaka upla nani ra swibia. Paiwaia warkka danh takbia taim, lilia wan dara walbia kan upla ailal ra wan kupia aiska ni paiwan, spirit pata Jehova ridi daukan ba briaia dukiara.

Yamni takisa

Mani kum kum luan ra, kristian mairin kum Aidrubanka Kau Tara dukiara upla nani ra paiwaia ba uya nit apia sa lukan. Witin luki kan: “¿Upla nani paiwanka yaban ba aidrubanka ra balbia ki?”. Satadi titan aidrubanka ra, sij rilidianka wina uplika kum bâra kan. Ai lamara iwi kan ba mita, kristian mairin ba uplika wal aisan. Baha waitna ba paiwanka kum brin ba mita balan kan. Makabi walanka ailal daukan bara kristian mairin ba wilinkira ansika yaban. Waitnika ba win aidrubanka ba uba painkira kaikisa. Baku sin upla nani daukanka bara kwalka dimra ba yamni sa. Baha sim yua ra, kristian mairin ba ai tnaya ra marit kum bara kan ba wal aisan. Witin nani sin paiwanka brin ba mita bus kum ra uli aidrubanka ra balan. Baha yua ra dîa kaikan ba sut yamni kan ba mita, sandi yua ba sin kli balaia lukan. Baha piua ba wina, kristian mairin ai tânka brin paiwaia warkka ba kulkanka tara brisa.
Bisi pali, Aidrubanka Kau Tara kum ra, marit kum tâura smasmalkra baku wark taki ba marit kum witin nani wina kau almuk kan ba wal pana pana lakula win. Maritka kau almuk kan ba win aima pas witin nani naha sât aidrubanka kum ra balan sa. Tâura smalki tataukra nani ba witin nani ra makabi walan: “¿Ya mita mai paiwan ki? Witin nani win: “Yu kum, utla ra balri taim, waitla durka mununhtara paiwanka kum swin kan”. Paiwanka aisi kaikisi, nina sait ba ulbi banhkan. Aidrubanka ra muihni lakri kum kum dinar pata ba witin nani wal sir munan. Naha maritka ba diara sut yamni kaikan ba mita yua wala ba sin balan. Baha maritka nani ra kli wih kaikan tânka kasak ba kau smalkaia dukiara.