¿Kau pain daukaia want sma?

1. Naha tasba chens taki ba mita, ¿dîa laki kaikaia sa?

¹ Baibil ba 1 Korint 7:31 ra wisa naha tasba chens takisa. Baha mita, yawan sin piu kum kum ra nahki smalki ba, wan taimka ba, bara nahki upla lamara wabia ba sin laki kaikaia sa. ¿Naha warkka ba kau pain daukaia want sma?

2. ¿Dîa daukaia sip sa Jehova asla takanka ban lamara kaia dukiara?

² Nahki smalki ba. Kristian nani ba nahki wark taki ba patitara piua wina laki kaikan sa. Jisas ai disaipilka nani ra smalkaia blikan taim, witin nani ra win surunka tara nani bara lalah sin brih taukaia apia kan (Mt. 10:9, 10). Sakuna, piu luan ningkara, witin dîa win ba chens munan. Witin ai tânka brin ai disaipilka nani ra nina bliki saura munan kabia bara smalkaia warkka ba kuntri wala nani ra sin daukbia (Lk. 22:36). Mani 100 luan ra, Jehova asla takanka ba nahki smalki ba natka ailal brin sa: wauhkataya lupia nani, radio bara truk nani bâk grabar munan dukia nani aisi smalki kan. Naiwa piua ra, plis kum kum ra upla nani ba uya ai watla ra takaskras ba tâwan, utla utla ra smalkaia warkka ba daukisa. Sakuna yabal nani bara natka wala nani yus munisa kau smalkaia dukiara. Baku sin, wan kupia bukan sa upla nani ba kakna ra wark takisa kaka, tihmia saihwan ra wih kaikaia sa. Jehova asla takanka ba isti auya sa. Baha mita, yawan sin lamara kaia sa (Isi. 1:20, 21).

3. Wan aisanka nani chens munisa kaka, ¿nahki hilp wan munbia smalkaia warkka ba kau pain daukaia?

³ Dîa smalki ba. Smalkisma pliska ra upla nani ba, ¿dîa sât trabilka brisa? ¿Lalah, pamali apia kaka war aiklabanka trabilka? Yawan naiwa piua ra dîa sât trabilka nani bâra ba, baku sin upla nani dîa luki ba nu kaia sa. Baku natka ra sip kabia aisanka pain kum daukaia (1 Ko. 9:20-23). Upla nani ba dîa luki ba aisabia taim, minitka ra ansika kum yabaia watlika ra, apia kaka ban yawan dîa ridi daukan ba dukiara aisaia sirka ra, kau pain kabia witin nani dîa aisi ba yus muni wan aisanka daukaia.

4. ¿Dîa muni nahki smalki ba chens munaia sa?

⁴ Tisku pali, naha tasba saurakira na sauhki tikan kabia, bara pât tara piua ba aula. “Yawan kau piu wiria baman brisa.” (1 Ko. 7:29.) Baha mita, yamni pali sa yawan nahki smalki ba chens munbia. Baku natka ra naha warkka dauki ba aitani daukbia, naha piua kunhku na tilara.