Smalkaia warkka kau pain daukaia sip sa: upla yamnika ra luki bas

¿Dîa muni daukaia sa? Jisas ba upla yamnika ra luki kan. Witin piu kum ra waitna kiama prawan kum ra rakan, sakuna witin kaikan naha waitnika ba upla kaikbia ai swira bri kan, ba mita Jisas ba laihura brih wan (Mk. 7:31-35). Jisas ai disaipilka nani ra sin kulkanka yabi kan, disaipil nani ba isti tânka briras kan ba mita diara tânka ailal dukiara aisaras kan (Jn. 16:12). Baku sin, Jisas heven ra ai pliska tara bri ba wina yawan dukiara lukisa (2 Ti. 4:17). Yawan sin trai munisa Jisas baku kaia (1 Pi. 2:21; 1 Jn. 3:16, 18). Yawan smalkaia warkka ra pain kabia dukiara, upla nani ra rispik munbia, ai trabilka nani ra lukbia, baku sin dîa aisaia kau ai brinka ba ra lukbia. Upla nani ba ai tânka briaia sa yawan smalkaia apia kaka wan ulbi sakanka nani swiaia baman waras, sakuna witin nani yamnika ra luki ba mita, naha ba ai tânka bribia taim kau wilin kabia wan walaia.

Nahki daukaia:

Pain ridi takaia sa. Sringkam uya bripara, lilia lâka bara pânikam lâka sin mariks.
Diara sut laki kaiks. ¿Utla kum ra tuktan bâra sa? ¿Daiwan nani brisa apia kaka tangni nani mangkaia laik sa? ¿Ani rilidianka brisa? Ban kra man baha nitka nani ba laki kaiki wal aisankam ba daukma.
Uplika dîa luki ba dukiara makabi wals bara dîa aisi ba bîla dakbaia apia sa. Pana pana wan mawan kat kaiki marikisa witin dîa aisi ba yawan walisa. Uplika ra dîa aisan ba dukiara tingki wiaia sa bara diara kum tâwan lilia bîla kum wiaia sip sa kaka, dauks. Unsapara.
Wilinkira wal daukbia. Aitani kabia wan aisanka ridi bri kan ba sins munaia uplika dîa kau aisaia want ba dukiara. Naha daukaia ba karna apia sa, kan wauhkataya sirpi nani, wauhkataya tara, apia kaka La Atalaya bara ¡Despertad! ba ra ulbanka lalka nani sât sât bâra sa. Ban kra uplika ra winram piua ra pain apia kan, sampla baku, witin taim âpu sa kaka sip sma aisankam ba kunhku daukaia.

Kati kum bilkara daukaia trai muns:

Naha aisanka nani ba sip kabia Pamali Mayunra Tihmika ra apia kaka smalkaia warkka ra praptis munaia nahki sip sa watla dawanka dîa nu takaia ai brinka ba dukiara aisaia.
Smalki taki waia aidrubanka tâ bribia ba nahki upla wala nitka nani dukiara yawan lukaia sip ba dukiara aisaia sip sa, apia kaka marikanka kum daukaia.