Raya nani ra hilp muns ai kasakka lukan lâka ba karna briaia

¡Uba lilia pali sa kaikaia nahki Jehova mâ dâkaia piua ba blisin muni ba! Mani bani 250.000 pura upla nani aihtabi takisa (Kli.S 28:2). Upla kum aihtabi takisa taim, ban kra smasmalkra ba lukbia danh Baibil stadika yabaia apia bara kau pain sa upla wala nani ra hilp munaia. Baku sin, stadi tatakra ba lukbia kau smalkaia warkka daukaia dukiara stadika ba swiaia. Ban sakuna, aihni pali sa stadi tatakra ba spirit lâka ra bapanka kum pain bribia. Witin nani ba Kraist ra ai wakia nani ba karna alki bribia bara kasak lukan lâka ra nikras kira karna bapi buaia (Kol. 2:6, 7; 2 Ti. 3:12). Bamna, raya nani aihtabi takbia ningkara, ban Baibil stadika ba yabaia nit sa Baibil Smalkisa bukka bara “Gâd Latwanka Laka” bukka, danh takbia ba kat (Lih Wainhka kati 2011, Gâd Warkka Dauki wauhkataya, wahia 2 ba kaiks).