Yula kahbi uplika kum baman kaia apia sa
1. Muihni lakri nani wal smalkisa taim, ¿nahki apastil Pal samplika nina blîkbia?
1 Apastil Pal ba piu bani ra upla kum wal tauki kan taim, trai muni kan “pana pana hilp munaia” lâka ba bâra kabia (Ro. 1:12). Wan muihni lakri nani wal smalki tauki ba ra, baha piua lui ba yus munaia sip sa pana pana wan kupia bukaia dukiara. Yula kahbi uplika kum baman kaia apia dukiara, smalkaia warkka kau pain daukaia hilp mai munan ba dahra, ¿aisaia sip sma?
2. Wan yula kahbi uplika ra, ¿dîa muni pain kabia kupia bukaia, bara nahki daukaia sip sa?
2 Kupia bukaia. Smalki tataukra kum kum ba ai sringka brisa smalkisa taim, naha ba yawan kaikaia sip sa ai mawan ra bara ai bîla baikra ba ra sin. Wan kupia aiska ni witin nani ra kupia bukbia kaka, witin nani ai warkka pain daukaia sip kabia. ¿Ani hilpka wala yabaia sip sa kupia bukaia dukiara? Impaki pura kakaira kum yula kahbi uplika ra wisa witin sin ai sringka yabisa bara piu bani Jehova ra ai pura sunisa kupia kumi lâka briaia dukiara. Kristian waitna kum wisa: “Maiwan ba lilia daukaia sna upla ai kaikbia dukiara, sakuna piua kum kum ra sringka lâka ba kau karna sa, bara puri sunras kaka, maiwan ba sari kaikisa.” ¿Dîa ba hilp mai munan sa smalkaia warkka ra sibrin âpukira daukaia? ¿Man wal tauki uplika ra wiaia sip sma ki?
3. Smalkaia warkka ra wan yula kahbi uplika wal, ¿dîa sturka painkira ba wal aisaia sip sa?
3 Aisaia natka pain nani sir munaia. Ban kra diara kum takan ba dukiara, ¿upla nani wal aisaia natka pain kum brisma, apia kaka makabi walanka kum yus muni sma ki? Marikanka nani ridi ba wina wira chens munram taim, ¿rayaka ra takan sturka painkira brisma ki? Man wal tauki uplika wal aisaia sip sma (S.L 27:17). Upla kum ra kli wih kaikaia auya ba ra, wan yula kahbi uplika ra wibia dîa daukaia lukisa bara nahki daukaia luki ba. Baibil stadika kum wina takbia taim, wan yula kahbi uplika ra wibia dîa muni baha tânka apia kaka tikska ba yus munan. Baku sin, naha stadi tatakra wal smalkaia natka sât wala yus munan ba dukiara sin aisaia sip sa.
4. ¿Dîa muni smalkaia warkka ra wan yula kahbi uplika ra hilp munaia sa?
4 Patitara kristianka nani ba smalki kan uplika nani ra baman hilp munras kan; muihni lakri aikuki ai kupia bukaia trai muni kan (Ap.St 11:23; 15:32). Apastil Pal ba Timoti ra lan daukan, bara kupia bukan pana sin wala nani ra daukaia (2 Ti. 2:2). Yawan dîa lan takan ba wan muihni lakri nani ra marikbia kaka, witin nani smalkaia warkka ba kau pain bara lilia lâka ni daukbia. Baha sut purkara, wan Aisa heven ra ba yamni kaikbia (Hib. 13:15, 16).