Wahma tiara nani redes sociales yus munisa taim dîa sât trabilka nani briaia sip ba dukiara Stech kuntrika ra Wîna Tara Yamnika dukiara Wark Taki Apiska tâ bri uplika ba maisa pakisa | ¿Baibil dîa wisa?

Mayo kati yua 23, 2023 ra, Stech kuntrika ra Wîna Tara Yamnika dukiara Wark Taki Apiska ba maisa pakan, Internet ra pâna nani briaia, lilka nani sunaia bara kaikaia ba (redes sociales) wahma tiara ailal wîna tara bara sinska ra saura munisa.

•  “Internet ra pâna nani briaia, lilka nani sunaia bara kaikaia ba, tuktan bara wahma tiara nani mapara yamnika kum kum bâra sa. Kuna tânka ailal ba marikisa, ai wîna tara bara sinska ra kasak trabil tara nani yabisa, bara ai liliaka lâka tikisa” (Social Media and Youth Mental Health: The U.S. Surgeon General’s Advisory [Las redes sociales y la salud mental de los jóvenes: Informe del director general de Salud Pública de Estados Unidos], 2023).

Baha apiska ba trabilka laki kaiki, dîa nu takan ba dukiara naku aisisa:

•  Manka 12 wina 15 kat bri wahma tiara nani “yu bani awar 3 kau pura redes sociales yus muni taim luisa kaka, depresión sikniska apia kaka kupia turbanka baku, ai wîna tara bara sinska ra trabil briaia sip sa. Bara redes sociales yus munras nani wal praki kaikisa taim, dubil prais ailal takisa”.

•  Manka 14 bri wahma tiara nani tilara, “redes sociales taim ailal yus munisa piua ra naha trabilka nani bri ba kaikaia sip sa: pain sip yapras, ai wîna tara nahki ba wal pain ai dara walras, mâyara ai dara walisa, depresión sikniska saura pali alkisa, baku sin Internet ra wala nani mita saura munisa. Kau pali naha trabilka nani ba tiara nani ra taki ba kaikaia sip sa”.

¿Aisa yapti nani ba naha sât trabilka nani wina ai luhpia nani kaina kahbaia dukiara dîa daukaia sip sa? Baibil ba smalkanka painkira nani yabisa.

Aisa yapti nani dîa daukaia sip ba

Luhpiam ra yakan swipara. Luhpiam nani dîa sât trabilka nani ra dimaia sip sa sapa luki kaiks, bara wahbi sâks redes sociales yus munbia swima sapa.

•  Baibil smalkanka: “Tuktan ba ai rayaka yabalka lâka ba, pain smalki paki bas” (Sins Lâka 22:6).

•  Kau nu takaia want sma kaka, “¿Deberían mis hijos usar redes sociales?” ulbanka ba aisi kaiks.

Luhpiam redes sociales yus munbia swima kaka, trabil nani ra dimbia apia dukiara, witin Internet nahki yus muni ba aman kaikaia sma. ¿Nahki baha daukaia sip sma ki?

Internet pliska nani luhpiam ra saura munaia sip ba wina kaina kahs. Luhpiam silp tânka bribia lan dauks, ani Internet pliska ba saura sa bara dimaia apia sa.

•  Baibil smalkanka: “Rug lâka ba nina mâkaia apia sma, tâski lâka wala nani kra, gridi lâka kabia sin apia. Swira dukia nani aisapara, sins âpu bîla nani, bîla tâski nani sin aisapara” (Epesus 5:3, 4).

•  “Enséñele a su hijo adolescente a usar con seguridad las redes sociales” ulbanka ra smalkanka painkira kum kum pliki sakaia sip sma.

Lâ nani mangks. Tânka kum baku, ahkia bara piua an redes sociales yus munaia sip ba dukiara lâ nani mangks.

•  Baibil smalkanka: “Man nani nahki sma ba aman kaiki bas, sins aitani briras nani ba baku kapara, sakuna sinskira nani bas. Piua brisma na pain yus muni bas” (Epesus 5:15, 16).

•  Redes sociales yus munaia dukiara, dîa muni lâ kum kum mangkaia nit ba tânka bribia hilp munaia dukiara, “Tat pihni ra ulbi paskan lilkika” Internet ra pâna brisma kaka, dîa ba nu kaia sma lilkika ba luhpiam wal aikuki kaiks.