Yakan ai dara wali trabilka ba piu bani upla kau ailal ra ambuk munisa | ¿Baibil dîa wisa?

Tasba aiska ra stadi kum daukan ba wina nu takan,a upla walhwal wina kumi ba yakan ai dara walisa.

• “Yakan ai dara walaia bara upla wina laihura takaia trabilka ba upla sât sât dîa manka bri kabia kra, apia kaka ani pliska wina kabia kra sin ambuk munaia sip sa” (Tasba aiska ra upla wina tara yamnika dukiara wark taki asla takanka tâ brabrira Chido Mpemba).

Kasak lukaia karna kabia kra sin, yakan ai dara walaia trabilka ba upla almuk nani ra baman ambuk munras sa, kan wahma nani, ai wîna tara pain bri nani ba, marit nani ra, apia kaka ai rayaka pain kum bri nani ra sin ambuk munisa. Yakan ai dara walaia, bara upla wina laihura takaia trabilka ba, upla wîna tara bara ai lukanka ra nahki ai dara wali ba ra, kasak pali ambuk munaia sip sa.

• “Yakan sa lukaia ba, dara walanka aihka kum baman apia sa [...]. kan naha trabilka tâka upla kum pruaia sip sa, naha ba yu bani cigaret 15 aubaia pitka wal praki kaikisa” (Stech kuntrika ra upla wîna tara yamnika dukiara wark taki apiska tâ brabrira Vivek Murthy).

Baibil dîa smalki ba

Wan papaskra want apia sa yawan upla nani wina laihura takbia. Gâd ba ai brinka sa yawan pâna pain nani aikuki lilia lâka bribia.

• Baibil tikska : “Gâd win: “Yamni apia sa upla ba yakan kabia.” (Blasi Sturka 2:18).

Gâd want sa yawan witin ai pânika kabia. Pramis wan munisa yawan ai lamara waia karna trai munisa kaka witin sin wan lamara balbia (Jems 4:8).

• Baibil tikska: “Lilia pali sa baha uplika spirit lainka ra ai nitka nani tânka bri ba” (Matiu 5:3 TNM).

Gâd want sa yawan upla wala nani aikuki witin ra mayunbia. Baku daukisa taim kau lilia wan dara walisa.

• Baibil tikska: “Bara yawan pana pana wan walka nani ra hilp munaia trai kaikaia sa, latwan lâka bri kaia bara diara yamni nani sin dauki kaia. Yawan asla aidrubi lâka dauki ba swiaia apia sa [...]. Baku daukaia watlika ra, yawan pana pana wan walka nani aikuki wan tâ baikaia sa” (Hibru Nani 10:24, 25).

Yakan wan dara walaia trabilka mapara aiklabaia dîa muni tânka tara bri ba dukiara kau nu takaia want sma kaka “Soledad en la era de la comunicación” ulbanka ba aisi kaiks.