Internet âpu pliska ra sin lilka nani kaikaia sip sa canal JW satélite bâk

Yawan liliakira bîla kaikisa, kati bani JW Broadcasting bâk aisanka bara lilka painkira nani kaikaia. Baha nani ba kasak wan kupia bukisa. Sakuna, Aprika kuntrika nani ra muihni lakri nani manis ba baha sât lilkika nani Internet bâk kaikaia sip apia sa. ¿Dîa muni?

Aprika ra Internet âpu pliska ailal bâra sa. Yus munaia sip kabia kra sin, Internet ba tawa pali sa, apia kaka yus munaia dukiara mana tara aibapaia nit sa. Madagascar kuntrika impaki pura kakaira kum ba ciber ra dis JW Broadcasting lilkika kumi baman alahban taim, 16 dalas aibapaia kan. ¡Baha pliska ra baha praiska ba upla aihkika mapara pede wik kum dukia sa!a

Sakuna nanara, Aprika muihni lakri nani milian milian ba Internet briras kabia kra sin JW Broadcasting kaikaia sip sa. ¿Nahki tnatka ra?

Mani 2017 wina, Sahara upla iwras tasbaya waupasa tani ra JW Broadcasting kaikaia sip sa tilivisan canal kum satélite bâk. Bîla aisanka 16 ra, piua sut ra mana luha kaikaia sip sa.

Satélite bâk tilivisan canalka yus munaia dukiara, Jehova witniska nani ba kampani kum wal kantrak daukan. Satélite bâk canal yus munaia dukiara kati bani 12.000 dalas aibapisa. Sahara upla iwras tasbaya waupasa tani 35 kuntrika nani ba baha yus munisa. Sam taim lalah kau aibapi canal wala kum lin takisa. Aidrubanka kau tara piua ra, apia kaka Tasba Aiska Apiska Kau Tara wina apis tara nani ra muihni kum wih kaikisa piua ra aisanka pranakira nani yabi ba, baha canal bâk sim piua ra kaikaia sip sa.

Jehova witniska nani kabia kra, apia kabia kra sin, upla manis ai watla kat tilivisan ku canal JW satélite bâk ba kaikaia sip sa. Sakuna baha canalka kaikaia dukiara, tilivisan apia kaka dukia wala nani atkaia sip apia muihni lakri nani sin bâra sa. Baha mita Asla Aidrubanka Watla kat kaikaia sip kabia dukiara, satélite wina señal alkaika ba Asla Aidrubanka Watla 3.670 kau purara mangkan. Baha masinka kum praiska ba 70 dalas baku sa, blikaia mana sin baha tilara sa. Asla Aidrubanka Watla ra tilivisan kum apia kaka proyector kum âpu sa kaka, baha dukia nani ridi daukaia dukiara 530 dalas baku nit sa.

Canal JW tâwan muihni lakri nani ba lilia banhwisa. Camerún kuntrika kangrigisan almukka kum ba naku aisisa: “Baha ba pamaliki mapara upla iwras tasbaya ra yaban manâ baku sa”. Nigeria kuntrika kristian waitna kum, nina Odebode ba naku aisisa: “Pamaliki aikuki wik bani aima yumhpa baha canal ba kaikisna. Luhpi nani ba baha kaikaia laik pali sa. Tilivisan ra canal wala kaikisa taim maikabisa canal JW ba mangkaia”. Sim Nigeria kuntrika wina, Rose ba naku wisa: “Tilivisan ra noticia nani baman kaiki kapri, kuna nanara satélite bâk canal JW ba kaikisna. Noticia nani baman kaiki kapri taim, isti lawi kapri bara presiónki uli kan. Sakuna JW Broadcasting kaikisna taim, âuyapah sna bara pain daira walisna. Baha sika canal kau laik sna ba. Jehova wina blisin tara kum sa”.

Mozambique kuntrika ra sin Asla Aidrubanka Watla nani ra satélite wina señal alkaika ba mangkan. Muihni lakri nani ba satélite bâk canal JW kaikaia laik banhwisa, baha mita JW Broadcasting kaikaia dukiara, awar kum kainara mahka Asla Aidrubanka Watla ra wisa.

Mani 2019 ra, Sudáfrica kuntrika Johannesburgo tawanka ra kuntri ailal aidrubanka kau tara daukan taim, Tâ Bri Daknika wina muihni kum baku, aisanka nani yaban ba baha canalka yus muni plis wala nani 9 ra laki yaban. Sudáfrica apiska tara Broadcasting Daknika ra wark taki Sphumelele ba naku aisisa: “Pas taim Internet bâk aisanka nani laki yabi kan, kuna baha dukiara Internet pain nit kan bara lalah aibapaia kan. Satélite bâk canal JW yus munisa kaka, kau sipar sa bara kakahwras pain plapisa”.

Tasba aiska smalkaia warkka ra man nani wilinkira lalah prisant yabi banhwisma ba mita, Aprika kuntrika nani muihni lakri nani ba satélite bâk JW Broadcasting kaikaia sip sa. Lalah prisant yabaia tnatka sât sât dukiara Internet donate.jw.org ra tânka marikisa. Man nani kupiam pihnikira lalah prisant yabi banhwisma ba ra yawan tingki mai wisa.