Tratado kum wal nahki sip sa upla ra smalkaia

Enero 2018 katka ba wina, Ridi takaia wauhkataya mawanra tânka kum kum yaban sa upla ra smalkaia dukiara. Wan kupia bukan sa upla wal kau turi aisi smalkaia ulbi sakanka nani baman yabaia watlika ra. Baku bamna, nahki upla ra smalkaia lilkika nani ba wal yawan lan takan sa Baibil baman yus munaia upla ra smalkaia dukiara. Sakuna, ¿yawan utla utla ra smalki taukisa taim wauhtaya kumi sin yus munbia apia? Âu, yus munaia sip sa. Luki kaiks, tratados nani ba yawan yus munaia sip sa upla ra smalkaia dukiara. Tratados nani yawan yus munisa taim naha daukaia sip sa:

1. Wauhkataya mawanra makabi walanka bâra ba aisi kaikaia sip sma bara upla ra chans yama dîa wiaia want ba baha ansika nani tilara kum wahbi sâkbia.

2. Wahia sekan pura tani ra Baibil tikska taki ba marikaia sip sma. Upla ba taim brisa kaka, ulbanka tânka wala nani ba aisi kaiki bara laki kaikaia sip sa.

3. Upla ra tratadoka ba yabaia, bara kupia bukaia sa baha ulbi sakanka ba aiska aisi kaikbia, witin sip kabia taim.

4. Man kau taki waras kaina ra, uplika ra makabi walanka ba mariks “Luki kaiks” wi ba munhtara takisa, bara yu wala kli balaia wima Baibil wal laki kaikaia dukiara.

Kli balma taim, makabi walanka swiram kata ba laki kaikaia sip sma, bara yu wala kli balaia dukiara kau makabi walanka kum swima. Internet wan pliska wina makabi walanka kum sakaia sip sma, apia kaka tratado las wahia ra ulbi sakanka kum dukiara aisi ba, baha wina sâkma. Taim wala, pain kaikisma kaka, ¡Gâd sturka yamni nani ba! apia kaka smalkaia hilpka nani tila wina Baibil stadika yabaia wauhkataya kum upla mihta ra swis.