Nu Takan Daukisa
◼ ¿Ya nani wauhtaya nina tani ra ulbi banhkaia bara Internet bâk Baibil stadika kum makabaia sip sa?
Wan ulbi sakanka nani nina tani ra ulbi banhkaia dukiara plis kum bâra sa. Naha ulbi banhki muni Jehova Witniska apiska ra blikisa ulbi sakanka nani makabaia, apia kaka Baibil stadika kum briaia dukiara. Baku sin Internet ra www.watchtower.org pliska bâk Baibil stadi takaia want sa kaka makabaia sip sa. Naha sut ba hilpka tara kum sa upla nani ra tânka kasak ba smalkaia dukiara. Sakuna, trabil ailal takan sa, kan muihni lakri kum kum ba naha hilpka nani ba yus muni ai pamalika kum, apia kaka upla wala sirka ra ulbi banhkisa.
Upla kum kum ulbi sakanka nani makabras kan Betel apiska wina brisi yaban ba aihka ai dara walan. Kan witin nani lukan Jehova Witniska nani ba mita taibi munisa witin nani rilidianka ra tawbia dukiara, apia kaka lukan wan asla takanka ba adar makabras upla nina nani bara ai dairiksanka nani ba brisa. Muihni lakri kum kum ba Betel wina adarka brin upla kum ra telepon bâk winaia, sakuna uplika ba makabras kan tâwan ai kupia sauhkan sa. Baha mita, naha sât wauhtaya nina tani ulbi banhkaia apia kaka Internet bâk bliki ba uplika pali ba daukaia sa yawan upla wala dukiara blikaia apia sa. Betel apiska ba naha sât makabanka nani kaiki, smalki tataukra kum upla wala dukiara blikan kaka, witin nani dîa makaban ba laki kaikbia apia.
¿Nahki muni wan kakairika nani ra spirit lâka ra hilp munaia sip sa? Baha uplika nani wan ulbi sakanka nani aisi kaikisa kaka, ¿dîa muni prisantka kum baku uplika ra blikras? Bara uplika ba Jehova Witniska kum wih kaikbia brinka brisa, sakuna kangrigisan almukka kum kau lamara ba nahki pliki sakaia nu âpu sma kaka, Sírvase visitar (S-43-S) wauhkataya lupia kum ulbi banhki, kangrigisankam ra kristian waitna aîulbra baku warkka dauki ba ra yas, witin laki kaikbia taim Betel apiska ra blîkbia. Sakuna uplika ba silak watla ra, apia kaka druga yus muni ba tâwan hilp muni pliska kum ra takaskisa, bara aspital kum ra sa kaka, baha uplika ra hilp munaia dukiara Betel apiska ra winaia apia sma. Sakuna uplika ra kupia bukaia sip sma witin silp muihni lakri nani ra plikbia, apia kaka Betel apiska ra wauhtaya kum ulbi blîkbia.