Една историска посета предизвикува радост на еден остров

Куба, еден прекрасен остров на Карибите, неодамна доживеа една сезона на духовно освежување која е без преседан. Крајот на 1998 година го донесе долгоочекуваниот благослов за Јеховините сведоци кои живеат во оваа земја на Западноиндиските Острови. За првпат по повеќе од 30 години дојдоа во посета членови на Водечкото тело на Јеховините сведоци кои беа придружувани од 15 други делегати. Посетителите беа државјани на Австралија, Австрија, Белгија, Велика Британија, Италија, Нов Зеланд и Порторико

ТОА беше историски настан за тамошните 82.258 објавители на Царството и за 87.890-те лица кои им се придружија во одбележувањето на Господовата вечера, пролетта 1998.

Од 1 до 7 декември 1998, Лојд Бери, Џон Бар и Герит Лош беа во посета на бетелскиот дом во Хавана и присуствуваа на некои од Обласните конгреси „Божјиот пат на живот“, кои се одржаа во Куба. Ним им беше драго што можеа да се сретнат со патувачките старешини и подобро да се запознаат со кубанските државни службеници.

„За мене и за мојата сопруга ова беше теократска врвна точка на сите времиња“, рече Џон Бар. „Нашите драги браќа и сестри во Куба се толку полни со ревност за вистината! Јас си заминав со чувството дека нашето светско братство е навистина скапоцено!“ „Оваа значајна седмица ми помогна да имам подобро разбирање за ситуацијата на нашите тамошни браќа“, додаде Лојд Бери.

Во текот на изминативе пет години, на Јеховините сведоци им беше дадена поголема слобода на обожавање на Куба, а коментарите на кубанските власти наведоа да се верува дека тие сакаат овој тренд да продолжи.

Во септември 1994 во бетелскиот дом во Хавана беше воведено печатење. Јеховините сведоци повторно можеа слободно да се состануваат и да сведочат од куќа до куќа. Потоа, во 1998, властите ја дозволија оваа посета на меѓународна делегација од 18 Јеховини сведоци, вклучувајќи и тројца членови на Водечкото тело.

Среќно повторно обединување

Кога делегацијата пристигна на аеродромот Хосе Марти во Хавана, беше гостољубиво пречекана од делегација државни службеници и една група од бетелскиот дом. Во таа група имаше еден брат кој се сеќава на последната посета на Куба од еден член од Водечкото тело — Милтон Хеншел — во 1961 година. Тогаш братот имал 12 години; сега е патувачки надгледник.

Кога делегатите пристигнаа во бетелскиот дом, беа пречекани со букети од гладиоли, трендафили, јасмини, како и жолти и црвени маргаритки кои ги одгледал еден брат специјално за оваа прилика. Многу солзи потекоа додека бетелската фамилија ги пречекуваше делегатите. Подоцна, присуствуваа на еден оброк од кубанско печено свинско месо, ориз и грав, салата, јука со мојо (сос направен од лук и маслиново масло) и свежо овошје. После оброкот, секој член на Водечкото тело одржа по еден охрабрувачки говор за богатството на бетелската служба. Особено беа трогателни коментарите на брат Лош бидејќи им зборуваше на браќата на шпански. Бетелската фамилија се состои од 48 редовни доброволни работници и 18 привремени помошници.

Иако книгите и Библиите за браќата во Куба се печатат во Италија, црно-белите изданија на списанијата Стражарска кула и Разбудете се! се произведуваат во самата земја на два шапирографа. Потребни се долги часови и повторлива рачна работа во тесни простории за да се произведат сите списанија кои се потребни. Доброволците длабоко го ценат своето богатство на службата за Јехова на еден многу посебен начин (2. Коринтјаните 4:7, 8).

Конгресни врвни точки

Делегацијата од 18 члена се подели на три групи за да присуствува на обласните конгреси кои се одржаа на три локации — Хавана, Камагуеј и Холгин. На секој од овие три дена, на секоја локација беше поканувана и една голема група браќа и сестри, меѓу кои имаше многу старешини и пионери. На локалните Сведоци им беше кажано дека тоа ќе биде посебна прилика, но не знаеја дека меѓу присутните ќе има и членови на Водечкото тело. Замисли си го нивното изненадување кога ги видоа овие драги браќа и нивните сопруги како се симнуваат од изнајмените автобуси во петок наутро!

Конгресите се одржаа во објекти под отворено небо кои ги изградија браќата со дозвола на властите. Во хаванскиот конгресен град, на еден од камењата при влезот беше изгравиран стихот „Псалм 132:1“. Тој ги потсетуваше браќата на зборовите кои се наоѓаат во овој текст: „Колку е убаво и колку е мило кога браќата живеат заедно!“ Секако, за време на конгресот беше убаво и мило христијанското дружење на таа локација.

Посетителите правеа забелешки од прекрасно изнесените предавања и интервјуа, и беа импресионирани од презентацијата на драмата која се темелеше на библиската приказна од Даниил, поглавје 3, која се одиграла во древниот Вавилон. Една сестра коментираше: „Сите актери беа сјајни, синхронизацијата на гласовите беше толку добра што дури не бевме ни свесни дека гласот бил претходно снимен . . . Вавилонското зло навистина изгледаше зло, а тројцата Евреи беа цврсти и одлучни“.

Претставниците на Канцеларијата за верски прашања и другите владини службеници кои дојдоа да ги видат конгресите ги пофалија браќата за нивната организација и добро однесување. Брат Бери ја изрази својата благодарност за одличното постапување на кубанските власти со гостувачките делегати. Преку овации со стоење, кои често траеја по неколку минути, браќата го изразија своето ценење за говорите, како и за тоа што властите ги дозволија овие конгреси. „Ова е повеќе од она што го очекувавме — мини меѓународен конгрес!“ — рече едно христијанско семејство. „Беше прекрасно, зашто тоа даде доказ за Јеховината голема моќ да ги обистинува своите ветувања.“

Исто така, конгресите им дадоа можност на другите подобро да ги запознаат Сведоците. Еден од возачите на автобусите присуствуваше на конгресот во сабота и повторно во недела. Рече дека имал чуено многу работи за Јеховините сведоци, но дека сега знае дека тие се добри, мирољубиви луѓе.

„Нешта кои никогаш нема да ги заборавиме“

Кубанскиот народ ги воодушеви делегатите со срдечноста и пријателството. Кубанците се трудољубиви, принципиелни и љубезни. „Во повеќе наврати, потполно непознати луѓе се понудија да ни помогнат“, рече еден делегат.

Делегатите беа длабоко импресионирани од верата, среќата и љубовта кои ги покажуваат Сведоците на Куба. И покрај огромните препреки, тие го направиле Јехова свое прибежиште (Псалм 91:2, NW). Џон Бар рече: „Има толку многу работи кои пријатно ме изненадија при оваа моја прва посета на Куба: убавината на земјата, пријатниот темперамент на луѓето кои ги запознав, а најмногу од сѐ, вистинската живост на кубанските Сведоци. Никогаш во животот не сум чул такво срдечно пеење на нашите песни на Царството и таков долготраен аплауз кога духовните работи ги допираа нивните срца! Тоа се работи кои никогаш нема да ги заборавиме. Секогаш ќе ни бидат драги“.

Псалм 96:1 вели: „Нека се веселат многубројните острови“. Навистина, Јеховините сведоци на островот Куба се радуваат на својата зголемена слобода да го обожаваат својот Бог и на историската посета на оваа меѓународна делегација.

[Слики на страница 8]

Членовите на Водечкото тело ги потпишуваат Библиите кои беа подароци за државните службеници

[Слика на страница 8]

Многу семејства присуствуваа на специјалните Обласни конгреси на Куба — „Божјиот пат на живот“

[Слика на страница 8]

Бетелскиот дом во Хавана беше повторно отворен во 1994