Млади — како ќе го искористите својот живот?

¹ Денес, вие млади се соочувате со најразлични видови притисоци. Како се соочуваш ти со нив? Како влијаат таквите притисоци врз твоето срце и врз одлуките што ги донесуваш во животот? Како ќе го искористиш преостанатото време пред да дојде крајот на овој систем на работи? (Посл. 4:23). На обласниот конгрес „Ревносни објавители на Царството“ добивме нов трактат со наслов „Млади — што ќе правите со својот живот?“ Тој ти дава можност сериозно да се преиспиташ.

² Сфаќаме дека понекогаш е предизвик да се задржи интегритетот. Честопати ќе се најдеш во ситуации што ја загрозуваат твојата духовност. Желбата да го доживееш она што Библијата го нарекува „привремено уживање на гревот“ може да биде силна (Евр. 11:24, 25). Сатана, нашиот заеднички непријател, би сакал да те исцрпи и да ја скрши твојата христијанска лојалност, дури и да те наведе да водиш двоен живот (1. Цар. 18:21).

³ Евреите 11:27 вели дека Мојсеј ‚останал цврст како да го гледа Оној кој е невидлив‘. Оние што имаат сличен однос со Јехова се поодлучни од кога и да било порано да го задржат интегритетот. Обиди се поблизу да го запознаеш Јехова, со што ќе ти станува сѐ пореален. Колку повеќе учиш за него толку попривлечен ќе се чувствуваш кон него (Псал. 27:4). Уште поважно е што чувствуваш за Него. Тоа што ќе развиеш близок личен однос со Јехова, ќе ти ја даде силата што ти е потребна за да донесуваш исправни одлуки — да го извлечеш најдоброто од животот (Псал. 73:28).

⁴ Можеш постојано да напредуваш така што ќе си поставиш духовни цели (1. Тим. 4:15). Кои точно се твоите цели? Си имаш ли поставено конкретни цели? Ако сѐ уште не си објавител на Царството, планираш ли да станеш објавител што е можно поскоро? Ако сѐ уште не си крстен, што мислиш за таа цел? Би сакал ли да имаш предности во собранието? Можеш ли да ја прифатиш прекрасната кариера на полновремена служба така што ќе станеш општ пионер, или ќе го користиш своето време во некој друг облик на специјална активност? Би сакал ли да станеш член на бетелската фамилија или да се преселиш да служиш таму каде што има поголема потреба? Би можел ли да научиш друг јазик и да служиш во собрание или група на странски јазик каде што има потреба? Нека желбата да му угодиш на Јехова и да ја добиеш неговата насмевка на одобрување секогаш ти биде мотивација во стремежот по таквите цели (Посл. 23:15).

⁵ Што можат да направат родителите: Како родители, без сомнение сакате вашите деца да го извлечат најдоброто од животот. Денес младите се изложени на многу поинакви услови од оние од пред само неколку години и честопати мораат да се соочат со проблеми и замки уште на рана возраст. Забележано е дека, додека се соочуваат со вакви опасности, некои се двоумат да посегнат по теократски цели што можеби им се достижни. Но, таквата склоност може да ги изложи младите на напад. Она што ќе им помогне на вашите деца да го сакаат Јехова е ако и самите вие сте доследни и ако им поставите соодветни духовни цели што можат да претставуваат заштита (Втор. 6:6, 7).

⁶ Што може да направи собранието: Има многу работи што младите можат да ги направат за да бидат од вистинска корист за своето собрание, но нормално, мораат да бидат вклучени во собраниските активности. Старешинското тело ќе направи добро ако внимателно разгледа на кои начини можат да се искористат духовно квалификуваните млади. И целото собрание може да игра улога. Интересот што го покажувате за младите е од непроценлива вредност и донесува трајни резултати. Посветете им време. Одете во служба на теренот со нив. Разговарајте отворено со нив. Уверете ги дека им го мислите најдоброто и дека искрено сте заинтересирани за нив.

⁷ Се радуваме што мнозина од вас млади му донесуваат фалба и чест на нашиот Бог (Псал. 110:3). Нека Јехова ви помогне да продолжите да ја вршите неговата волја и да го искористите својот живот за да го радувате неговото срце (Посл. 27:11).