Оживеј си ги библиските настани

Библијата содржи голем број историски извештаи од кои можеме да извлечеме важни поуки. Кога си ги замислуваме овие настани, можеме подобро да го разбереме она што го читаме и да извлечеме поголема корист од тоа. Еве некои предлози што можат да ти помогнат да си ги оживееш библиските извештаи.

• Читај на глас. Тоа што ќе ја читаш Библијата на глас може да ти помогне подобро да си ги претставиш настаните. Ако ја читате Библијата како семејство, можете да си ги оживеете настаните така што секој од вас ќе ги чита зборовите на различен библиски лик.

• Замисли си ги настаните. Обиди се да си ги замислиш мислите и чувствата на ликовите. На пример, прашај се: „Зошто овој лик го кажал тоа или постапил на тој начин? Што би мислел и како би се чувствувал доколку јас бев во таа ситуација?“

• Нацртај го настанот. Тоа што ќе ги црташ библиските настани може да ти помогне подобро да си ги претставиш и запомниш, дури и ако она што си го нацртал не е ремек-дело.