Младите прашуваат . . .

Предбрачен секс — како да се спротивставам на притисокот?

„Кога имав 19 години, спиев со еден дечко од училиштето. Не можам да ви опишам какви лоши чувства имав потоа. Се чувствував безвредно.“ (Ласи).a

„БЕГАЈТЕ од блуд“, заповеда Библијата (1. Коринќаните 6:18). Но, мал број млади денес се спремни да ги послушаат овие зборови од Библијата и да немаат интимни односи сѐ додека не стапат во брак. Некои, како Ласи, им попуштат на своите желби и жнеат болни последици, меѓу кои е и немирната совест.

Мора да се признае, не е лесно да се контролира половиот нагон. Како што стои и во прирачникот Adolescent Development (Развојот кај адолесцентите), хормонските промени во пубертетот неминовно водат до „посилен полов нагон“. Пол признава: „Понекогаш едноставно помислувам на секс без некој очигледен повод“.

Меѓутоа, професорот по педијатрија Хауард Кулин забележува: „Премногу едноставно е да се каже дека за однесувањето [на адолесцентите] се виновни само хормоните“. Тој објаснува дека и социјалните фактори играат улога во тоа. Всушност, тие фактори — а особено влијанието од врсниците — можат да бидат многу силни.

Во својата книга A Tribe Apart, писателката Патриција Херш вели дека „младите си создаваат свој сопствен свет . . . Не станува збор само за група врсници, туку за едно посебно општество, потполно отсечено [од светот на возрасните], кое си има свои сопствени вредности, морални мерила и правила“. Сепак, тие „морални мерила“ и „правила“ што ги имаат многу млади денес честопати ги поттикнуваат да им се препуштат на своите полови нагони, а не да ги контролираат. Затоа, мнозина можеби се под притисок да имаат односи пред да стапат во брак.

И покрај тоа, младите христијани мудро одлучуваат да не се впуштат во кој и да е облик на блуд, бидејќи знаат дека Бог ги осудува „делата на телото“b (Галатите 5:19). Тогаш, како можеш да останеш морално чист кога си изложен на таков силен притисок?

Барај мудри пријатели

Иако притисокот од друштвото може да има негативно влијание врз тебе, интересно е што и добрите пријатели можат да ти влијаат на позитивен начин. Ова е во склад со она што го вели и Библијата: „Дружи се со мудрите, и ќе станеш мудар“ (Пословици 13:20; 1. Коринќаните 15:33). Во еден извештај на Светската здравствена организација (СЗО) стоело дека за „адолесцентите што имаат добар однос со родителите, со други грижливи возрасни лица, и со врсниците“ и „кои имаат чувство на стабилност и јасни граници . . . постои помала веројатност да станат сексуално активни“.

Особено може да ти користи добриот однос со родителите. Џозеф си спомнува: „Мајка ми и татко ми навистина ми помогнаа да не му подлегнам на притисокот да имам интимни односи“. Нема сомнение, побожните родители можат да ти дадат чувство на стабилност и да ти постават ограничувања што се темелат на Божјата реч (Ефешаните 6:2, 3). Тие можат да ти дадат поддршка додека се трудиш да останеш морално чист.

Точно, можеби во почетокот ќе ти биде непријатно да зборуваш со нив за работи поврзани со сексот. Но, може да се изненадиш кога ќе сфатиш колку добро всушност те разбираат. На крајот на краиштата, и тие некогаш биле млади. Така, Соња им го дава следниот совет на другите млади: „Пристапете им на родителите и не срамете се да разговарате со нив во врска со сексот“.

Што ако твоите родители не се држат за Божјите мерила? Иако сѐ уште ги почитуваш, можеби ќе треба да побараш совет од некој што не е член на семејството. Пол, кој беше цитиран погоре, вели: „Во врска со оваа работа, многу ми помага советот на зрели христијански брачни двојки“. Кенџи, девојка чија мајка не е христијанка, кажува нешто слично: „Секогаш им се обраќам за совет на зрелите, духовни поединци“. Но, таа предупредува: „Ги избегнувам оние што немаат цврсти морални мерила, дури и ако тврдат дека ги имаат истите религиозни верувања како и јас.“

Понекогаш можеби ќе биде неопходно да внимаваме со кого се дружиме и во самото христијанско собрание. Библијата нѐ потсетува дека во која и да било поголема група, честопати ќе има некои што нема да се однесуваат чесно (2. Тимотеј 2:20). Што треба да правиш ако откриеш дека некои од младите во твоето собрание, всушност, „прикриваат какви се“? (Псалм 26:4, NW). Немој блиску да се дружиш со таквите и барај пријатели што ќе те поддржат во твојата одлука да останеш морално чист.

Чувај се од расипана пропаганда

Исто така, треба да преземеш чекори да се заштитиш од поплавата на слики на кои отворено се прикажува секс, како и од алудирањето на секс во книгите, списанијата, спотовите, видеоигрите, филмовите и на Интернет. Медиумите го прикажуваат предбрачниот секс како нешто примамливо, возбудливо, пријатно и безопасно. Какви се последиците од таквата пропаганда? Кенџи, која беше цитирана погоре, признава: „Гледав емисии во кои сексот — па дури и хомосексуалноста — беше презентиран на многу лежерен начин. Како резултат на тоа, почнав да заборавам колку сериозно гледа Јехова на оваа работа“.

Факт е дека индустријата за забава честопати вешто ги прикрива лошите последици од предбрачниот секс — несакана бременост, прерано стапување во брак и венерични болести. Затоа, не дозволувај да те измамат оние „што злото го наречуваат добро, а доброто зло“ (Исаија 5:20).

Имај ги на ум зборовите од Пословици 14:15: „Глупавиот верува на секој збор, а умниот внимава на својот чекор“. Ако случајно наидеш на слики што алудираат на секс или што ги подбудуваат сексуалните желби кога читаш, серфуваш на Интернет, или гледаш телевизија, веднаш преземи нешто! Затвори ја книгата, исклучи го компјутерот или смени ја програмата! Потоа сконцентрирај се на нешто друго — на нешто изградувачко (Филипјаните 4:8). Ако направиш така, во корен ќе ги исечеш погрешните желби и нема да им дозволиш да се развијат (Јаков 1:14, 15).

Внимавај да не се најдеш во ситуации кои ќе те наведат на компромис

Дали излегуваш со некого? Тогаш треба да бидеш внимателен. Библијата нѐ предупредува: „Поизмамливо од сѐ е срцето, и е страшно болно“ (Еремија 17:9). Изразите на наклоност лесно можат да прејдат во неморал. Преземи разумни мерки. На пример, земете некого со вас или излегувајте во добро друштво. Внимавајте да не се најдете сами во некоја искушувачка ситуација.

Но, можеби сте свршени и сметате дека некои физички изрази на наклоност би биле на место. Дури и во таков случај, еден извештај на СЗО предупредува: „Кога се сигурни дека скоро ќе се земат, поголем број од жените, дури и во конзервативните средини, се впуштаат во предбрачни односи“.c Затоа, поставете си граници во изразувањето нежност и на тој начин заштитете се од непотребна болка.

Колку и да звучи шокантно, многу млади — особено млади девојки — се принудени или присилени да имаат односи. Според едно истражување, „60 проценти од адолесцентките во САД кои имале односи пред да наполнат 15 години, го направиле тоа против своја волја“. Оние што ги принудуваат на секс, честопати користат сила за да ги совладаат своите жртви (Проповедник 4:1). На пример, Библијата кажува дека Амнон, син на цар Давид, ‚се вљубил‘ во својата полусестра Тамара и се послужил со лукавство за да ја присили на интимни односи (2. Самоил 13:1, 10—16).

Ова не значи дека е невозможно да се спречи силување или присилен секс. Ако внимаваш на опасностите, ако избегнуваш ситуации што можат да те наведат на компромис и ако брзо преземеш нешто кога постои некаква закана, можеш да сториш многу за да не дојде до такво нешто.d

Имај „неподелено“ срце

Се надеваме дека советите што беа изнесени овде ќе ти помогнат да се избориш да останеш морално чист. Но, на долги патеки, твоето однесување ќе зависи од она што е во твоето срце. Исус рекол дека „од срцето доаѓаат . . . блудства“ (Матеј 15:19). Затоа, во однос на ова важно прашање, мораш да се бориш против склоноста да бидеш или со „половично“ (млако), или со ‚двојно‘ (лицемерно) срце (Псалм 12:2; 119:113, обата NW).

Ако некогаш почувствуваш како решеноста ти слабее или се бориш во срцето, моли се како што преколнувал Давид: „Дај ми неподелено срце да се плаши од твоето име (Псалм 86:11, NW). Потоа постапувај во склад со твојата молитва проучувајќи ја Библијата и библиските публикации, и применувајќи го она што го учиш (Јаков 1:22). Лидија вели: „Мотивирана сум да не им подлегнам на искушенијата да направам неморал со тоа што секогаш ги имам на ум зборовите дека ‚блудник или нечист нема никакво наследство во Царството на Бог‘ “ (Ефешаните 5:5).

Не е секогаш лесно да му се спротивставиш на притисокот да имаш односи пред да стапиш во брак. Но, со Јеховина помош, можеш да останеш морално чист и да се поштедиш и себеси и другите од голема болка и страдање (Пословици 5:8—12).

[Фусноти]

[Слика на страница 23]

Разговорот со родителите во врска со тоа како се чувствуваш може да ти помогне да останеш морално чист

[Слика на страница 24]

Кога излегуваш со некого, доброто друштво може да биде заштита