Писма од читателите

Младите прашуваат... Како да уживам во читањето на Библијата? (април 2009) Имам 24 години, и како сопруга и мајка секогаш морам да вложувам многу труд за редовно да ја читам Библијата. Ги применив предлозите од оваа статија и многу ми користи исечокот од неа. Сега уживам да ја читам Библијата. Гледам каков совршен склад постои меѓу библиските книги кои се испреплетуваат создавајќи една прекрасна таписерија. Никогаш порано читањето на Библијата не ми било толку интересно. Многу ви благодарам!

К. Т., САД

Книга во која можеш да имаш доверба — шести дел (април 2011) Во статијата „Рим во библиската историја“ стоеше: „Што се случило со Ерусалим? Римјаните се вратиле предводени од Веспазијан и неговиот син Тит — но овојпат со 60.000 војници“. Според ова излегува дека Веспазијан и Тит ја предводеле војската кога бил нападнат Ерусалим. Но, историските податоци покажуваат дека во тоа време Веспазијан бил во Рим.

Џ. О., Австралија

„Разбудете се!“ одговара: Според книгата „Josephus—The Essential Writings“ од Пол Маер, „Тит брзо дошол од Александрија заедно со Петнаесеттата легија и му се придружил во Птолемаида на својот татко Веспазијан, кој го чекал таму со Петтата и Десеттата легија“. Освен тоа, во книгата „Encyclopedia of the Roman Empire“ во врска со Веспазијан стои следново: „Заедно со својот син Тит, тој го задушил бунтот на Евреите и се подготвувал за опсада на храмот во Ерусалим во 68 год. од н.е. кога му јавиле дека Нерон бил симнат од престолот, а на негово место дошол Галба... Есента 70 год. од н.е., Веспазијан стигнал во Рим“. Од ова се чини дека на почетокот од нападот на Ерусалим, Веспазијан и Тит биле заедно. Сепак, во одреден момент Веспазијан се вратил во Рим и го оставил Тит да ја предводи војската.

Дали си поставуваш реални цели? (февруари 2011) Меѓу примерите што во оваа статија беа наведени како нереални цели се „слава, богатство, идеален брачен другар или совршено здравје“. Зошто е спомнато и „идеален брачен другар“? Зошто целта да се најде брачен партнер е „нереална“?

Ш. К., САД

„Разбудете се!“ одговара: Статијата не вели дека бракот е нереална цел. Во неа е спомната желбата за „идеален брачен другар“. Во контекст на статијата, „идеален“ брачен другар се однесува на сопружник што е безгрешен и кој нема ниту една негативна особина. Потрагата по таков брачен другар е залудна од две причини: Прво, таква личност не постои (Римјаните 3:23). Второ, оној што бара таков брачен другар се концентрира на тоа што ќе добие од бракот, а не што ќе даде. Дури и некои што се во брак имаат нереална цел — да го сменат својот сопружник за да одговара на нивната претстава за „идеален“ брачен другар. За разлика од тоа, во еден стабилен брак и двајцата се свесни за мааните на другиот, но се спремни ‚да се поднесуваат еден со друг и спремно да си простуваат еден на друг‘ (Колошаните 3:13).