‚Вознесени да се сретнат со Господ‘ — како?

ОДБРОЈУВАЊЕТО до крајот на сегашниот зол систем продолжува неповратно. Со одминувањето на секој час, секоја минута, секоја секунда, се приближуваме кон значајни настани кои биле проречени многу одамна. Дали екстазата е една од нив? Ако да, кога и како ќе се случи?

Зборот „восхитување“ не се појавува во Библијата. Но, оние кои веруваат во неа, за темел за нивното верување ги цитираат зборовите на апостол Павле од 1. Солунјаните 4:17. Да го испитаме овој библиски стих во неговиот контекст. Павле напишал:

„Нема да ви затајам, браќа, за оние кои умреа, да не жалите како и останатите кои немаат надеж. Зашто, ако веруваме дека Исус умре и воскресна, така Бог и оние кои умреа во Исус ќе ги доведе со него. Зашто, ова ви го кажуваме со речта Господова дека ние кои живееме и кои ќе останеме живи за доаѓањето [присутноста, New World Translation of the Holy Scriptures] Господово, нема да ги претекнеме оние кои изумреа. Зашто самиот Господ со заповед, со глас архангелов, и со труба Божја ќе слезе од небото; и мртвите во Христос ќе воскреснат најпрво; А по тоа ние живите кои сме останале, заедно со него ќе бидеме земени [вознесени, NW] во облаци во пресрет на Господ на небото, и така постојано ќе бидеме со Господинот. Така утешувајте се еден со друг со овие зборови“ (1. Солунјаните 4:13-18, ДК).

Собранието во Солун било релативно ново кога Павле околу 50. г. н. е, им го упатил своето прво писмо на тамошните христијани. Членовите на собранието биле нажалени бидејќи извесен број од нив ‚умреле‘ [,заспале во смрт‘, NW]. Меѓутоа, она што Павле го напишал ги утешило Солунјаните кои имале надеж во воскресение.

Христовата „присутност“

Иако тврдел дека верните христијани кои тогаш биле мртви ќе бидат воскреснати, Павле исто така рекол: „Ние живите кои ќе останеме живи за доаѓањето [присутноста, NW] Господово, нема да ги претекнеме оние кои изумреа“ (стих 15, ДК). Навистина, вредно е да се забележи тоа што апостолот се осврнал на Господовото ‚доаѓање‘ [,присутност‘, NW]. Овде, јазикот на оригиналниот текст го употребува грчкиот збор паруси́ан, кој дословно значи „да биде близу“.

Кога некој странски државен лидер посетува некоја земја, датумите на неговата присутност обично се најавени. Тоа било случај со присутноста на Господ Исус Христос. Стражарска кула доследно им пружала докази на оние кои со искрени срца ги истражувале библиските пророштва дека Исусовата присутност во небесна моќ на Царството започнала во 1914. Настаните од таа година наваму сведочат за Исусовата невидлива присутност (Матеј 24:3-14). Така, кога рекол дека извесни христијани коишто ќе живеат за време на Господовата присутност ќе бидат „земени [вознесени, NW] во облаци во пресрет на Господ на небото“, Павле мислел дека тие преживеани ќе се сретнат со Христос не во Земјината атмосфера, туку во невидливото небесно подрачје каде што Исус седи од десната страна на Бог (Евреите 1:1-3). Но кои се тие?

‚Израил Божји‘

Библијата многу зборува за телесните Израелци, но исто така зборува и за духовниот ‚Израил Божји‘. Верници од Евреите и од народите требало да го сочинуваат потполниот број на оваа група на помазани со Божји свет дух, или активна сила (Галатјаните 6:16; Римјаните 11:25, 26; 1. Јованово 2:20, 27). Книгата Откровение покажува дека вкупниот број на духовниот Израел е 144.000, од кои сите се опишани дека се со Јагнето, Исус Христос, на небесната гора Сион. Заедно со Христос, тие ќе бидат цареви и свештеници на небото (Откровение 7:1-8; 14:1-4; 20:6). Меѓу нив требало да бидат вклучени поединци кои припаѓале на собранијата во Солун и на сите други места, без оглед на нивното расно или национално потекло (Дела на св. апостоли 10:34, 35).

Пред да може кој и да е член на духовниот Израел да добие небесна награда, тие требало да имаат извесно искуство. Токму како што Исусовата смрт на маченичкиот столб му претходела на неговото воскресение во живот на небесата, така и христијаните со небесна надеж мораат да умрат пред да ја добијат својата награда (1. Коринтјаните 15:35, 36). Тоа требало да се случи со членовите на духовниот Израел кои живееле во првиот век н. е. како и со таквите поединци кои се живи денес.

Откако ја споменал ‚Господовата присутност‘, (NW), Павле укажал на времето кога верните духовни Израелци коишто умреле ќе ја добијат нивната небесна награда. Тој напишал: „Самиот Господ со заповед, со глас архангелов, и со труба Божја ќе слезе од небото; и мртвите во Христос ќе воскреснат најпрво“ (стих 16, ДК). Затоа, штом еднаш настапила Исусовата присутност како Цар, би требало да очекуваме да почне небесното воскресение кое започнува со оние од духовниот Израел кои веќе умреле како чувари на беспрекорноста (1. Коринтјаните 15:23). Тие сега служат заедно со Исус на небото. Но, што е со сразмерно малкуте помазани христијани кои сѐ уште живеат на Земјата? Дали тие очекуваат екстаза?

„Вознесени“ — Како?

Откако се осврнал на помазаните христијани кои биле мртви, Павле додал: „А по тоа ние живите кои сме останале, заедно со него ќе бидеме земени [вознесени, NW] во облаци во пресрет на Господ на небото, и така постојано ќе бидеме со Господ“ (стих 17, ДК). „Живите“ требало да бидат оние кои се живи за време на Христовата присутност. Тие требало да бидат „вознесени“ (NW) за да се сретнат со Господ Исус. Како во случајот со верните први христијани, човечката смрт е неопходна за нив за да бидат обединети со Христос на небото (Римјаните 8:17, 35-39).

Кога им напишал на христијаните во Коринт, Павле навел: „Ова ви го велам, браќа, дека телото и крвта не можат да го наследат царството Божјо, ниту распадливоста ја наследува нераспадливоста. Еве, тајна ви кажувам; сите нема да умреме, но сите ќе се измениме, одеднаш, во еден миг, при последната труба; ќе затруби, и мртвите ќе воскреснат нераспадливи, а ние ќе се измениме“ (1. Коринтјаните 15:50-52). При умирањето на верните за време на Христовата присутност, секој еден од остатокот на духовниот Израел моментално ја добива својата небесна награда. „Во еден миг“ тој воскреснува како духовна творба и ‚се вознесува‘ за да се сретне со Исус и да служи како совладетел во небесното Царство. Но, што е со сите други кои го обожаваат Јехова? Додека се приближува крајот на овој зол систем, дали и тие ќе бидат вознесени на небо?

Преживување — но не со екстаза

Со оглед на тоа што Исусовата царска присутност започнала во 1914, ние сега сме длабоко навлезени во „последното време“ (Даниил 12:4). Павле предупредил: „А за времињата и годините, браќа, нема потреба да ви се пишува, бидејќи вие самите многу добро знаете дека денот Господов ќе дојде така, како крадец во ноќно време. Оти, кога ќе речат: „Мир и безопасност!“, тогаш ненадејно ќе ги стигне погибел, како што ја напаѓаат родилни маки секоја непразна жена, и нема да избегнат [да се спасат, NW]“ (1. Солунјаните 5:1-3). Но будните христијани ќе се спасат. Како?

Повикот „Мир и безбедност!“ (NW) му претходи на периодот којшто Исус го нарекол „голема неволја“. Опишувајќи едно „големо мноштво“ од верници кои ја имаат надежта да живеат вечно во земски рај, книгата Откровение вели: „Тие се што дојдоа од големи маки [голема неволја, ДК]; тие ги испраа облеките свои и ги избелија со крвта на Агнецот“ (Откровение 7:9, 14; Лука 23:43). Не, тие го немаат изгледот за екстаза. Наместо тоа, ја имаат надежта да преживеат токму овде на Земјава. За да се подготват за тоа, мораат да останат духовно будни. Како можеш да го постигнеш тоа и да го преживееш крајот на овој систем?

Треба да ‚бидеш трезвен и облечен во оклопот на верата и љубовта и шлем на надежта за спасение‘ (1. Солунјаните 5:6-8). Сега е времето да ѝ се обрне внимание на Божјата пророчка Реч, Библијата. Додека отчукуваат секундите до крајот на овој систем, обрни внимание на Павловиот совет: „Пророштвата не ги унижувајте! Сѐ испитувајте, за доброто држете се!“ (1. Солунјаните 5:19б, 20). Затоа Јеховините сведоци те покануваат во нивната Царска сала каде што можеш да учествуваш со нив во проучувањето на библиските пророштва и на другите карактеристики на Божјата инспирирана Реч.

Додека растеш во точно спознание и вера, ќе ја распознаеш надмоќноста на намерата на Јехова Бог да ја ослободи вселената од своите противници и да ја обнови Земјата во рај. Ако покажуваш вера, и ти можеш да бидеш меѓу оние кои ќе ја преживеат големата неволја и да имаш предност да ги пречекаш милионите кои ќе бидат воскреснати за живот на Земјата. И каква радост ќе биде да се живее во Божјето Царство под надзор на Исус Христос и неговите совладетели кои ќе бидат ‚вознесени да се сретнат со Господ‘ така што ќе бидат воскреснати за живот во небесното подрачје!

Тогаш, каква е вистинската библиска надеж за послушното човештво во целина? Тоа не е екстаза, туку вечен живот на Земјата под владата на Божјето Царство.

[Слика на страница 7]

Преживеаните од големата неволја ќе ги пречекаат воскреснатите за живот на рајска Земја под владата на Исус и оние кои ќе бидат „вознесени“ на небото