„Приближете му се на Бог, и тој ќе ви се приближи вам“

Пред и потоа — како Библијата го променила овој човек

МУЗИКАТА му била животот на Ролф-Михаел. Дрогата му била опсесија. Како млад човек во Германија, пиел големи количини алкохол и обилно користел ЛСД, кокаин, хашиш и други дроги што влијаат на мозокот.

Во текот на еден обид да прошверцува дрога во една африканска земја, Ролф-Михаел бил уапсен и поминал 13 месеци в затвор. Таа затворска казна му дала доволно време да размисли за вистинската цел на животот.

Ролф-Михаел и неговата сопруга, Урсула, очајнички ја барале смислата во животот и вистината. И покрај лошите искуства со таканаречените христијански цркви, имале силна желба да го запознаат Бог. Но, имале прашања а не добиле никакви задоволувачки одговори од различни религиозни групи. Освен тоа, овие религии не им дале силен мотив што ќе ги натера да го променат својот живот.

Подоцна, Ролф-Михаел и Урсула дошле во контакт со Јеховините сведоци. Откако почнале да ја проучуваат Библијата, Ролф-Михаел бил длабоко трогнат од советот: „Приближете му се на Бог, и тој ќе ви се приближи вам“ (Јаков 4:8). Бил решен да ‚ја соблече старата личност која се приспособувала кон неговиот поранешен начин на однесување и да ја облече новата личност која е создадена по Божја волја во вистинска праведност и лојалност“ (Ефешаните 4:22—24).

Како можел Ролф-Михаел да ја облече новата личност? Од Библијата му било покажано дека „по пат на точно спознание личноста на еден човек може да биде ‚обновена според сликата на Оној кој ја создал‘, т.е. Јехова Бог (Колошаните 3:9—11).

Како што стекнувал точно спознание, Ролф-Михаел сакал да го доведе својот живот во склад со начелата од Божјата реч (Јован 17:3). Било тешко да се ослободи од дрогата, но увидел колку е вредно да му пристапи на Јехова во молитва и да ја искуси неговата помош (1. Јованово 5:14, 15). Дополнителна помош добил како резултат на блиското дружење со оние што веќе биле Јеховини сведоци, кои се труделе да ја вршат Божјата волја.

На Ролф-Михаел, исто така, му помогнало и спознанието дека овој свет поминува и дека оние што ја вршат Божјата волја ќе останат засекогаш. Тоа го оспособило да ја избере, не привремената љубов на светот, туку вечниот благослов од еден близок однос со љубезниот Бог, Јехова (1. Јованово 2:15—17). Ролф-Михаел бил длабоко трогнат од зборовите од Пословици 27:11: „Биди мудар, сине мој, и зарадувај ми го срцето, за да можам да му одговорам на оној, кој ме укорува“. Тој со благодарност забележува: „Овој стих ја покажува длабочината на Јеховината љубов, зашто тој им дава шанса на луѓето да го зарадуваат неговото срце“.

Како Ролф-Михаел, неговата сопруга и нивните три деца, стотици илјади извлекле корист од следењето на библиските начела. Такви поединци можат да се најдат во собранијата на Јеховините сведоци низ целиот свет. За жал, во некои земји Сведоците лажно се обвинети дека се опасна секта што ги растура семејствата. Искуството на Ролф-Михаел докажува нешто друго (Евреите 4:12).

Ролф-Михаел вели дека Матеј 6:33, кој нѐ поттикнува да им дадеме предност на духовните стремежи, претставува „компас“ за неговото семејство, упатувајќи ги во исправната насока. Тој и неговото семејство му се длабоко благодарни на Јехова за среќниот семеен живот што го уживаат како христијани. Тие ги делат чувствата на псалмистот кој пеел: „Што да му вратам на Господа, за сѐ што стори за мене?“ (Псалм 116:12).

[Истакната мисла на страница 9]

Бог им дава на луѓето шанса да го зарадуваат неговото срце

[Рамка на страница 9]

Библиски начела на дело

Меѓу библиските начела што мотивирале многумина да ги остават смртоносните зависности се следниве:

„О вие кои го љубите Јехова, мразете го злото“ (Псалм 97:10, NW). Откако ќе се увери во штетата од смртоносните практики и ќе развие искрена омраза кон нив, на човек му е полесно да го прави она што му е угодно на Бог.

„Дружи се со мудрите, и ќе станеш мудар, а кој другарува со безумниците станува лош“ (Пословици 13:20). За да ѝ рече ‚не‘ на дрогата и на други супстанции што создаваат зависност, човек траба внимателно да ги избере своите пријатели. Од вистинска корист е да се негува пријателство со христијани кои ќе го поддржат во неговата решеност.

„Не бидете тегобно загрижени за ништо, туку во сѐ со молитва и преколнување заедно со благодарење објавете му ги своите молби на Бог; и мирот Божји, кој ја надминува секоја мисла, ќе ги чува вашите срца и вашите умствени сили преку Христос Исус“ (Филипјаните 4:6, 7). Таков внатрешен мир не може да се постигне со ништо друго. А молитвената доверба во Бог му помага на човек да се справи со животните проблеми без да прибегне кон дрога.