Објавителите на Царството известуваат

Во потрага по достојните во внатрешноста на Австралија

НЕКОИ зафрлени подрачја во огромниот внатрешен дел на австралиското копно не беа посетени од Јеховините сведоци цели 12 години. Затоа Сведоците од Дарвин, главниот град на Северната Територија, организираа интензивна деветдневна кампања со цел да ги пронајдат достојните лица (Матеј 10:11).

Дванаесет месеци пред почетокот на кампањата се започна со внимателно планирање. Притоа беа направени карти на територија со површина од 800.000 квадратни километри — област трипати поголема од Нов Зеланд. За да добиеш некоја претстава колку е големо ова изолирано подрачје, земи предвид дека должината на еден просечен приватен пат што води од главната капија на една фарма (ранч) до куќата изнесува повеќе од 30 километри! Освен тоа, растојанието помеѓу одделни ранчови понекогаш е поголемо од 300 километри.

Во оваа проповедничка кампања доброволно учествуваа вкупно 145 Сведоци. Некои од нив дојдоа дури од Тасманија. Некои пристигнаа со теренски возила натоварени со опрема за кампување, резервни делови и гориво. Други си ги носеа работите во приколки закачени на возилата. Освен тоа, за оние што немаа соодветни теренски возила беа изнајмени два мали автобуса со по 22 седишта. Сведоците што патуваа со автобусите главно им сведочеа на жителите во малите градови на подрачјето што беше избрано.

Пред да тргнат на пат, браќата подготвија говори и прикази со цел да дадат упатства за тоа како да им се пренесе добрата вест на луѓето што живеат на ова необично подрачје. На пример, за да може делотворно да се проповеда во местата населени со Абориџини, треба да се следат извесни формалности, а треба да се покаже обѕир и кон локалните обичаи. Освен тоа, се дискутираше и за работи поврзани со природната околина — како да не ѝ се наштети на природата.

Објавителите имаа еден куп извонредни искуства. На пример, во една населба во која живеат Абориџини, браќата организирале да се изнесе јавно библиско предавање. Жената што заземала положба на поглавар во заедницата лично ги известила луѓето за ова. Потоа, на присутните им биле оставени 5 книги и 41 брошура. Во една друга населба, браќата разговарале со еден Абориџин. Тој дури имал и своја сопствена Библија, превод King James, но таа била стара и испокината. Кога го прашале дали го знае Божјето име, рекол дека го знае и потоа извадил од џебот на палтото една стара Стражарска кула. Им го прочитал од списанието цитираниот стих од Марко 12:30, каде што стои: „Љуби го Јехова, својот Бог, со сето свое срце“. Потоа им рекол: „Многу го сакам овој стих“. Откако подолго разговарале за Библијата, зел нова Библија и друга библиска литература.

Во близина на Карпентарискиот Залив, надзорникот на една фарма со површина од 400.000 хектари се заинтересирал за пораката за Царството. Кога браќата му ги покажале публикациите Моја книга со библиски приказни и Спознание кое води до вечен живот,a ги прашал дали имаат литература на криолски јазик. Ова било чудно затоа што, иако многу Абориџини зборуваат криолски, малкумина можат да читаат на тој јазик. Излегло дека сите 50 работници на таа фарма знаеле да читаат криолски. Надзорникот со задоволство зел библиска литература на овој јазик и спремно го дал својот телефонски број за да може повторно да се контактира со него.

Во текот на деветте дена на интензивно сведочење, беа дадени вкупно 120 Библии, 770 книги, 705 списанија, и 1.965 брошури. Освен тоа, беа направени 720 повторни посети и беа започнати 215 библиски студии.

Навистина, духовниот глад на мнозина достојни лица расеани низ ова огромно подрачје конечно беше заситен (Матеј 5:6).

[Фуснота]

[Карта на страница 30]

(Види во публикацијата)

АВСТРАЛИЈА

СЕВЕРНА ТЕРИТОРИЈА

Дарвин

Карпентариски Залив

Сиднеј

ТАСМАНИЈА