Потребна е истрајност за да проповедаме
1 Повеќе од 30 години, апостол Павле со задоволство му бил посветен на проповедањето. Но, како што е случај со секоја цел за која вреди да се вложи труд, и тој наишол на проблеми додека проповедал (2. Кор. 11:23-29). Сепак, Павле не се откажал (2. Кор. 4:1). Сфатил дека Јехова ќе му даде сила за да може истрајно да ја врши службата (Фил. 4:13). Во врска со својот пример за верна истрајност, Павле можел да каже: „Угледајте се на мене, како што и јас се угледав на Христос“ (1. Кор. 11:1).
2 Како да истраеме во искушенијата денес: Секој ден, многу наши браќа и сестри се соочуваат со исмевање, противење или рамнодушност од роднините, колегите или соучениците (Мат. 10:35; Јован 15:20). Можеби и ти доживуваш нешто слично. Од друга страна, можеби се бориш со некој здравствен проблем или, пак, секојдневно се напрегаш да ги отфрлиш работите што ти го одвлекуваат вниманието и да им се спротивставиш на искушенијата што ја ставаат на испит твојата вера и истрајност. Можеме да добиеме сила со тоа што ќе размислуваме за примерите на верните Божји слуги од минатото, како и за оние верни христијани кои денес трпеле и надминале разни проблеми (1. Пет. 5:9).
3 За да имаме сила да продолжиме со нашата служба, треба да внимаваме постојано да ја носиме „сета Божја воена опрема“ (Еф. 6:10-13, 15). Освен тоа, многу е важно да се молиме за истрајност. Бог ни го дава својот свет дух за да можеме да истраеме кога имаме искушенија (2. Кор. 6:4-7). Ќе успееме да победиме во нашата духовна борба само ако им обрнеме внимание на потсетувањата што ни ги дава Бог (Пс. 119:24, 85-88). Едно дете кое си го сака таткото секогаш одново ќе го чита писмото што го добило од него. На сличен начин, и ние го зајакнуваме своето пријателство со Јехова со тоа што секојдневно ја читаме Библијата. Преку редовното проучување, Бог ни дава мудрост за да се справиме со искушенијата. Освен тоа, така дозволуваме неговото размислување да влијае врз нашите одлуки и ни се зајакнува решеноста да му останеме верни (Изр. 2:10, 11).
4 Истрајноста носи благослови: Исто како што било случај со Павле, кога верно истрајуваме додека ја извршуваме службата, го радуваме Јеховиното срце и имаме благослови и ние и другите (Изр. 27:11). Затоа, да бидеме одлучни да истраеме во службата, со што ќе докажеме дека нашата вера е цврста и „многу повредна од златото, кое пропаѓа иако се испитува со оган“ (1. Пет. 1:6, 7).