КАКО ДА СЕ ПРЕКИНЕ КРУГОТ НА ОМРАЗАТА

4 | Победи Ја Омразата Со Помош Од Бог

Библиско учење:

„Плодовите на духот се: љубов, радост, мир, долготрпеливост, љубезност, доброта, вера, благост, самосовладување“ (ГАЛАТИТЕ 5:22, 23).

Што значи ова:

Кругот на омразата може да го прекинеме со помош од Бог. Со помош на неговиот свет дух може да развиеме особини кои инаку сами не би можеле да ги стекнеме. Затоа, наместо да се трудиме да ја победиме омразата со сопствени сили, да бараме помош од Бог. Тогаш, и ние ќе се чувствуваме како апостол Павле, кој рекол: „Сѐ можам со помош на оној што ми дава сила“ (Филипјаните 4:13). Да, ќе можеме да кажеме: „Мојата помош е од Јехова“ (Псалм 121:2).

Како може ова да ти помогне:

„Јехова ми помогна да се променам и од насилен да станам мирољубив човек“ (ВАЛДО)

Од срце моли го Јехова да ти дава свет дух (Лука 11:13). Барај да ти помага да ги покажуваш неговите особини. Проучувај што вели Библијата за особините со кои може да ја победиме омразата, како што се љубов, мир, стрпливост и самосовладување. Труди се да ги развиваш овие особини. И дружи се со луѓе кои, исто така, се трудат да ги покажуваат. Таквите пријатели може да те поттикнат „кон љубов и кон добри дела“ (Евреите 10:24).

Животно искуство — ВАЛДО

Ги победил насилството и омразата

Валдо имал тешко детство поради што чувствувал голема омраза. Тој вели: „Постојано бев вмешан во улични тепачки со дилерите на дрога... Еднаш, една банда дури и најми платен убиец, но успеав да се извлечам само со убод од нож“.

На Валдо воопшто не му било мило кога жена му почнала да ја проучува Библијата со Јеховините сведоци. Тој додава: „Ги мразев Сведоците и честопати ги пцуев на сет глас. Но, тие секогаш остануваа смирени“.

По некое време, и Валдо почнал да ја проучува Библијата. „Не ми беше лесно да го применам она што го учев. Мислев дека никогаш нема да успеам да го контролирам мојот насилен темперамент“, вели тој. Но, нешто што дознал од Библијата извршило силно влијание врз него.

Валдо објаснува: „Еден ден, Алехандро, кој проучуваше со мене, ми рече да прочитам во Галатите 5:22, 23... Алехандро ми објасни дека не можам само со свои сили да ги стекнам овие особини, туку дека мора да се потпрам на Божјиот свет дух. Тоа ми помогна поинаку да гледам на работите“.

Со помошта од Бог, Валдо успеал да го прекине кругот на омразата. Тој вели: „На роднините и поранешните пријатели не им се верува колку многу се променив“. Уште додава: „Јехова ми помогна да се променам и од насилен да станам мирољубив човек“.