Драги постари — вие сте скапоцени за собранието

Можеби и ти не можеш да правиш толку многу како порано поради староста. И покрај тоа што долги години верно му служиш на Јехова, можеби се чувствуваш обесхрабрено поради твоите сегашни околности. Можеби имаш склоност да го споредуваш она што го правиш сега со она што си го правел во минатото. Ако ова е случај и со тебе, што може да ти помогне да се справиш со таквото негативно размислување?

ШТО ОЧЕКУВА ЈЕХОВА ОД ТЕБЕ

Прашај се: „Што очекува Јехова од мене?“ Можеш да најдеш утеха во зборовите од 5. Мојсеева 6:5 каде што пишува: „Сакај го Јехова, својот Бог, со сето свое срце, со сета своја душа и со сета своја сила“.

Според овој стих, Јехова очекува да му служиш со сето свое срце, душа и ум. Овој факт може да ти помогне да не се споредуваш со другите, ниту пак да го споредуваш она што го правиш сега со она што си можел да го правиш во минатото.

Размисли за следново: Кога си бил помлад, што си давал за Јехова? Повеќето слуги на Јехова би рекле дека му го давале своето најдобро. Во твојот случај, твоето најдобро било во склад со околностите што си ги имал тогаш. А што даваш за Јехова сега? Веројатно, сѐ уште го правиш она што можеш да го правиш во склад со околностите што ги имаш сега. Ако вака гледаш на работите, ќе дојдеш до заклучок дека сѐ уште правиш многу за Јехова исто како што си правел во минатото. Ти си му го давал своето најдобро тогаш, а му го даваш своето најдобро и денес.

МОЖЕШ ДА БИДЕШ ОД ГОЛЕМА ПОМОШ ЗА ДРУГИТЕ

Еве како уште можеш да гледаш на твојата ситуација: Наместо да гледаш на староста како на нешто што те ограничува, потруди се да гледаш на неа како на нешто што ти пружа нови можности. Всушност, како постар слуга на Јехова, сега можеш да правиш работи кои не си можел да ги правиш како помлад. На пример:

Споделувај го со другите твоето животно искуство. Размисли за следниве изјави запишани во Библијата:

Цар Давид: „Бев млад и остарев, но никогаш не видов праведник да биде оставен, ниту неговите деца да просат за леб“ (Пс. 37:25).

Исус Навин: „Еве, денес одам таму каде што одат сите на земјата. Вие добро знаете со сето ваше срце и со сета ваша душа дека не остана неисполнето ниту едно ветување од сите добри ветувања што ви ги даде Јехова, вашиот Бог. Сѐ ви се исполни. Ниту едно ветување не остана неисполнето“ (Ис. Нав. 23:14).

Можеби и ти си кажал нешто слично кога си бил помлад за да ги охрабриш другите. Давид и Исус Навин ги кажале овие работи од лично искуство и затоа тоа имало поголема тежина.

Ако му служиш на Јехова долги години, и ти можеш да кажеш од лично искуство кои благослови произлегуваат од тоа. Дали се сеќаваш на некоја ситуација во која Јехова на посебен начин ти помогнал тебе или на некој друг? Ако да, раскажи им го тоа на другите. Тоа може многу да ги охрабри, како што си увидел и порано кога си споделил нешто охрабрувачко со другите. Според тоа, кога ќе го чујат твоето искуство, можеш да бидеш извор на охрабрување за нив (Рим. 1:11, 12).

Уште еден начин со кој можеш да ги охрабриш другите е така што ќе бидеш присутен на собраниските состаноци секогаш кога тоа е возможно. Со тоа ќе ги охрабриш соверниците, а ќе бидеш охрабрен и самиот. Кони, која беше цитирана погоре, вели: „Тоа што одам на состаноците ми помага да не се обесхрабрам. Како може да бидам тажна кога браќата и сестрите во салата за состаноци ми пружаат толку голема љубов? Сакам да им покажам на другите колку ги ценам со тоа што им давам мали подароци. И се трудам да учествувам во духовните активности заедно со моите браќа и сестри“.

ЈЕХОВА ГО ЦЕНИ ОНА ШТО ГО ПРАВИШ ЗА НЕГО

Во Библијата читаме за луѓе кои, поради околностите, не можеле да прават за Јехова онолку колку што сакале, но тој многу ги ценел. Еден од нив бил Симеон, постар Израелец кој сѐ уште бил жив кога се родил Исус. Кога одел во храмот, тој забележувал како млади момчиња извршуваат важни задачи таму. Од човечка гледна точка, Симеон можел да си мисли дека она што го прави на негови години не е толку вредно за Јехова. Но, Јехова гледал поинаку. За него, Симеон бил „праведен и богобојазлив“ човек и го благословил со тоа што му ја дал честа да го види Исус како новороденче. Јехова дури и го искористил Симеон да прорече дека Исус е идниот Месија (Лука 2:25-35). Очигледно, Јехова не гледал на Симеон како на стар и изнемоштен човек, туку како на човек со силна вера врз кого бил светиот дух.

И ти можеш да бидеш сигурен дека Јехова го цени она што го правиш за него и покрај ограничувањата што можеби ги имаш. Тој цени кога го даваме она што го имаме, а не она што го немаме (2. Кор. 8:12).

Затоа, концентрирај се на она што можеш да го правиш. На пример, во кои гранки од службата сѐ уште можеш да учествуваш, макар и на кратко? Дали би можел да охрабриш некого така што ќе му се јавиш или ќе му напишеш картичка? Еден мал гест поттикнат од љубов може многу да им значи на твоите соверници, особено кога доаѓа од еден долгогодишен слуга на Јехова.

И покрај физичките ограничувања, вие, драги постари, можете многу да правите за Јехова. Од едно искуство од Источна Африка раскажано во рамката со наслов „Тоа значело живот за неа“ се гледа како Јехова ги користи постарите браќа и сестри.

Имајте на ум дека со вашата вера и лојалност можете да ги охрабрите другите. Вие сте жив пример за истрајност и можете да бидете уверени дека „Бог не е неправеден, па да го заборави вашето дело и љубовта што ја покажавте кон неговото име, така што им служевте на светите и продолжувате да им служите“ (Евр. 6:10).

ОСТАНИ АКТИВЕН

Истражувањата покажуваат дека, општо земено, постарите лица кои им помагаат на другите имаат подобро здравје, побистар ум и подолго живеат.

Се разбира, тоа што ќе правиш добри работи за другите, нема да го спречи стареењето. Единственото решение за тоа е Божјето Царство кое ќе ја отстрани причината за стареењето и смртта — гревот (Рим. 5:12).

Но и сега, кога го правиш она што Јехова го очекува од тебе, во што спаѓа да им помагаш на другите да го запознаат, си ја зајакнуваш надежта, а дури може да имаш и подобро здравје. Драги постари, Јехова многу го цени она што го правите за него, а на собранието многу му значи примерот што го оставате со својата вера.