Зошто Јеховините сведоци повторно зборуваат со луѓе што веќе рекле дека не се заинтересирани?

Поттикнати од љубов кон Бог и кон ближниот, Јеховините сведоци им ја пренесуваат библиската порака на сите луѓе, вклучувајќи ги и оние што претходно рекле дека не се заинтересирани (Матеј 22:37-39). Љубовта кон Бог нѐ поттикнува да бидеме послушни на заповедта на неговиот Син „да сведочиме темелно“ (Дела 10:42; 1. Јованово 5:3). За да можеме да го извршиме тој налог, им ја пренесуваме Божјата порака на луѓето повеќе од еднаш, исто како што правеле Божјите пророци во минатото (Еремија 25:4). Бидејќи ги сакаме нашите ближни, се трудиме да им ја пренесеме животоважната „добра вест за царството“ на сите луѓе, меѓу кои се и оние што претходно не биле заинтересирани (Матеј 24:14).

Кога повторно одиме онаму каде што некој нѐ одбил, честопати наидуваме на уво што сака да слуша. Тоа најчесто се случува од следниве три причини:

• Луѓето се селат.

• Некој друг од семејството покажува интерес за нашата порака.

• Луѓето се менуваат. Поради настаните на светската сцена или поради промена на некои лични околности, некои луѓе стануваат „свесни дека им е потребен Бог“ и почнуваат да се интересираат за пораката што ја пренесуваме (Матеј 5:3, фус.). Дури и оние што имаат негативен став кон библиската порака можат да се сменат, што било случај и со апостол Павле (1. Тимотеј 1:13).

Сепак, ние никого не присилуваме да ја прифати нашата порака (1. Петрово 3:15). Сметаме дека секој човек треба сам да одлучи во што ќе верува (5. Мојсеева 30:19, 20).