Глава 1
Обединетост во обожавање — Што треба тоа да значи за тебе?
1, 2. а) На што се темели вистинската обединетост на обожавањето во наше време? б) Како Библијата го опишува она што денес се исполнува?
ШИРУМ светот постои восхитувачко движење кон обединето обожавање. Тоа собира луѓе од сите народи и племиња и јазици. Нивната обединетост не е резултат на некакво прилагодување на верувањата. Исто така не е постигнато со тоа што се воздржуваат да не го критикуваат начинот на живот кој е спротивен на Божјата Реч. Тогаш, која е причината? Тоа е фактот дека луѓе од секакво потекло го запознаваат Јехова како единствен вистински Бог и радо ги доведуваат своите животи во склад со неговите праведни патишта. (Спореди Откровение 15:3, 4.)
2 На тој начин се исполнува едно пророштво кое го запишал Михеј пред околу 2.700 години. Во врска со ‚последните времиња‘, тој напишал: „И ќе одат многу народи говорејќи: ‚дојдете, да одиме на гората Господова [Јеховина, NW] и во домот на Богот Јаковлев, и ќе нѐ учи за своите патишта и ќе одиме по неговите патеки‘“ (Мих. 4:1, 2, ДК). Дали гледаш како тоа се исполнува?
3, 4. а) Во која мера „народите“ се обраќаат кон Јехова? б) Кои прашања би требало да си ги поставиме?
3 Нема сите „народи“ да се појават во Јеховиниот духовен дом за обожавање. Но поединци од сите тие нации го прават тоа. Додека учат за љубезната намера и за привлечната личност на Јехова Бог, нивните срца се длабоко поттикнати. Тие понизно сакаат да дознаат што Бог бара од нив. Нивните молитви се како онаа на Давид, човек од вера, кој рекол: „Научи ме да ја исполнувам волјата Твоја, зашто Ти си мојот Бог“ (Псал. 142:10).
4 Дали се гледаш себеси меѓу тоа огромно мноштво од Јеховини обожаватели? Дали твојот одговор на добиените поуки дава доказ дека вистински го цениш Јехова како нивни извор? До која мера ‚одиш по неговите патеки‘?
Како е постигнато?
5. а) Во колква мера конечно ќе се постигне обединетост во обожавањето? б) Зошто сега е итно да се стане обожавател на Јехова, и како можеме да им помагаме на другите во тоа?
5 За сите интелигентни суштества, Јеховината намера е да бидат обединети во обожавањето — никој да не биде заведен од лаги, никој да не тапка во темнина затоа што не ја спознал вистинската смисла на животот. Колку само копнееме по денот кога сите живи ќе го благословуваат единствениот вистинит Бог! (Псал. 102:19-22). Но за да биде тоа можно, Јехова мора да го исчисти своето творештво од оние кои презриво го одбиваат неговото љубезно царување и кои упорно им го отежнуваат животот на другите. Тој милостиво однапред дава предупредување за она што ќе го стори. Насекаде, луѓето имаат можност да го променат својот начин на живот. Така во наше време ширум светот се огласува овој итен повик: „Бојте се од Бога и подајте Му слава, зашто настапи часот на Неговиот суд, и поклонете Му се на Оној, Кој го создал небото и земјата, морето и водните извори!“ (Отк. 14:6, 7). Дали си ја прифатил таа покана? Ако е така, сега имаш предност да соработуваш со Јеховината организација за да им помагаш на другите да го прават истото.
6. Во кој правец треба сериозно да напредуваме откако сме ги научиле темелните библиски науки?
6 Бог нема намера во својата организација да доведе луѓе кои само велат дека веруваат во Јехова и дека сакаат да живеат во Рај, а кои истовремено продолжуваат да тежнеат по своите лични, себични интереси. Тој сака луѓето да дојдат до „точно спознание на неговата волја“, а тоа треба да се одрази во нивните животи (Кол. 1:9, 10, NW). Откако луѓето кои имаат ценење ќе ги научат темелните учења од Библијата, тие сакаат да напредуваат кон христијанска зрелост. Имаат желба присно да го запознаат Јехова, да го прошират и продлабочат своето разбирање на неговата Реч и во што поголема мера да го применат тоа во својот живот. Настојуваат да бидат слични на својот небесен Татко, одразувајќи ги неговите особини и гледајќи на работите како што тој ги гледа. Тоа ги поттикнува да изнаоѓаат начини да учествуваат, колку што е можно повеќе, во делото кое тој дава да се извршува на Земјата во наше време. Дали го правиш тоа и ти? (Еф. 5:1; Евр. 5:12-6:3, NW; 1. Тим. 4:15, ДК).
7. На кој начин е можна вистинска обединетост сега, и како е постигната?
7 Библијата покажува дека оние кои му служат на Јехова, мораат да бидат обединет народ (Еф. 4:1-3). Таа обединетост треба да владее денес и покрај тоа што живееме во разделен свет и сѐ уште се бориме со нашата лична несовршеност. Исус сериозно се молел сите негови ученици да бидат како еден и да се радуваат на вистинска обединетост. Што би значело тоа? Пред сѐ, дека ќе бидат во добар однос со Јехова и неговиот Син. Исто така дека ќе бидат меѓу себе обединети (Јован 17:20, 21, NW). Тоа денес се постигнува така што ги применуваат поуките што ги добиваат во Јеховиниот дом.
Кои фактори придонесуваат за обединетост?
8. а) Што развиваме ако лично ја користиме Библијата кога бараме одговор на прашањата кои се однесуваат на нас? б) Одговарајќи на горните прашања, анализирај ги факторите кои придонесуваат за христијанското единство.
8 Некои од клучните фактори кои придонесуваат за оваа обединетост се наброени подолу. Додека одговараш на прашањата што следат, размисли како секое од нив влијае на твојот однос со Јехова и со сохристијаните. Размислувањето за овие точки во светлината на наведените стихови ќе придонесе да ја развиеш твојата кон Бог насочена способност за размислување и разликување, особини кои на сите нам ни се потребни (1. Сол. 5:1, 2, ДК; Фил. 1:9-11). Затоа по ред разгледај ги овие фактори:
1) Сите ние го обожаваме Јехова и го признаваме неговото право да ги поставува мерилата за тоа што е добро и зло.
Како Јехова ќе гледа на тоа ако ние намерно ги омаловажуваме неговите совети за некоја работа која ни изгледа помалку важна? (Лука 16:10; спореди Малахија 1:6-8).
Влијае ли на другите, ако секогаш не ги слушаме Јеховните заповеди? (Спореди Римјаните 5:12; Исус Навин 7:20-26; 3. Царства 14:16.)
2) Сеедно во кој дел од светот живееме, како водич ја имаме Божјата Реч.
Каква опасност постои ако донесуваме одлуки според нашите чувства? (Ерем. 17:9, NW; Изр. 14:12, ДК).
Што треба да сториме ако не знаеме каков совет дава Библијата за извесна работа? (Изр. 2:3-5, ДК).
3) Сите извлекуваме корист од иста програма за духовно хранење.
Какви односи владеат меѓу оние кои не ги ценат Јеховините подготовки за духовно хранење? (Спореди Исаија 1:3; 9:16; 65:14).
4) Исус Христос, а не некој човек, е нашиот Водач преку кого сите ние му се приближуваме на Јехова при обожавањето.
Дали некој од нас има оправдана причина да мисли дека ние како личности сме подобри од другите? (Рим. 3:23, 24; 12:3; Мат. 23:8-10).
5) Без оглед каде живееме, Божјето Царство го сметаме за единствена надеж за човештвото.
Како тоа нѐ штити од разединувачките влијанија? (Мат. 6:9, 10; Мих. 4:3).
6) Кај Јеховините обожаватели светиот дух создава особини кои се од пресудна важност за христијанското единство.
Како му го овозможуваме на Божјиот дух да ги донесува своите плодови во нас? (Псал. 1:2; Изреки 22:4, NW; Отк. 3:6; Дела 5:32, NW).
Кога ги имаме плодовите на духот, како тоа влијае на нашиот однос со Јехова? Со нашите браќа? (Гал. 5:22, 23, NW).
7) Сите ние ја имаме одговорноста да ја проповедаме добрата вест за Божјето Царство.
Како нашето марливо учество во оваа проповедничка активност со сохристијаните влијае на нашето гледиште спрема нив? (Спореди Колосјаните 4:7, 11.)
9. Каков е резултатот кога вистински ги применуваме овие вистини во нашиот живот?
9 Добро е ако ги признаеме овие факти. Но да се живее во склад со нив потребно е многу повеќе. Ако така и постапуваме, доаѓаме во поблизок однос со Јехова. Тогаш нашето дружење со соверниците исто така станува извор на освежување. Како што вели Псалм 133:1: „Гледај! Колку е добро и колку е мило кога браќата живеат заедно во единство!“ (NW). Зарем лично не си доживеал колку е освежувачки да го оставиш зад себе светот со сите негови себичности, и да бидеш присутен на состаноците со другите кои навистина го љубат Јехова?
Избегнувај разединувачки влијанија
10. Зошто треба внимателно да се чуваме од духот на независност?
10 За да не се пореметува таа драгоцена обединетост, мораме да избегнуваме разединувачки влијанија. Едно од најсилните меѓу нив е духот на независност. Јехова ни помага да го избегнеме така што го разоткрива неговиот основач, Сатана Ѓаволот. Тој е оној кој ја навел Ева на помислата дека ќе биде за нејзина корист ако го омаловажи она што Бог го рекол и ако донесува свои сопствени одлуки. Адам ѝ се придружил на тој бунтовнички пат. Последицата била голема несреќа за нив и за нас (1. Мој. 2:16, 17; 3:1-6, 17-19). Живееме во свет кој е обземен со тој дух на независност, затоа не треба да нѐ изненадува ако мораме и самите да го потиснуваме таквиот дух. Јехова љубезно помага во тоа така што нѐ советува преку својата организација.
11. По што се познава дали искрено се подготвуваме за живот во Божјето праведно Ново уредување?
11 Преку таа организација сме научиле за Јеховиното величествено ветување дека ќе ја замени сегашната околина со ново небо и нова земја во кои „ќе се настани правда“ (2. Петр. 3:13). Восхитени сме од очекувањето дека наскоро овој зол свет ќе исчезне, а Земјата ќе биде претворена во Рај. Но дали со својот начин на живот покажуваме дека искрено се подготвуваме за живот во свет во којшто ќе преовладува праведноста? Библијата јасно ни кажува: „Не сакајте го светот и сѐ што е во него. Ако некој го сака светот, во него нема љубов од Отецот“ (1. Јов. 2:15). Навистина, постојат многу работи во светот кои никому не му се допаѓаат. Но дали не ни се допаѓаат воглавно оние гледишта во светот кои ѝ нанесуваат штета на нашата непосредна животна радост? Го избегнуваме ли неговиот дух — неговиот независен став, неговата прекумерна заинтересираност за себе? Дали искрено развиваме навика да го слушаме Јехова и да му бидеме послушни од срце, наспроти спротивните наклоности на телото? Целиот наш живот — сеедно каде сме или што работиме — треба да дава доказ дека нашето размислување и нашите мотиви се насочени кон Бог. (Изр. 3:5, 6).
12. а) Зошто е важно сега да ја искористиме приликата да научиме за Јеховините патишта и да ги следиме во нашиот живот? б) Што значат за нас лично стиховите наведени во пасусот?
12 Кога ќе дојде од Јехова одреденото време да го уништи овој зол систем на ствари и сите оние кои го љубат, тој нема да одолговлекува. Нема да го одложи тоа време или да ги промени своите мерила за да им излезе во пресрет на оние кои сѐ уште се обидуваат да се држат за овој свет, кои само со половина срце ја учат и вршат Божјата волја. Сега е време за акција! (Лука 13:23, 24; 17:32; 21:34-36). Затоа, колку е охрабрувачки да се види „големото мноштво“ луѓе кои ја прифаќаат оваа драгоцена прилика, кои желно ја бараат поуката што Јехова ја обезбедува преку својата љубезна организација и потоа обединето одат по неговите патеки!
За повторување
● Што е Јеховина намера во поглед на обожавањето?
● Во кој правец треба сериозно да напредуваме откако сме ги научиле темелните библиски науки?
● Што можеме лично да сториме за да можат обединувачките фактори за кои разговаравме, да влијаат на нашите животи?
[Слика на целата страница 4]