Да му го принесеме на Јехова нашето најдобро

¹ Јеховиниот закон за Израел пропишувал дека животните што нему му се принесувале како жртва морале да бидат „без недостаток“. Животно со недостаток не било прифатливо (Лев. 22:18—20; Мал. 1:6—9). Освен тоа, кога се принесувала жртва, целото сало — најдобриот дел — му припаѓало на Јехова (Лев. 3:14—16). Како Татко и Господар на Израел, Јехова го заслужувал најдоброто.

² Како во древни времиња, и денес Бог е силно заинтересиран за квалитетот на нашите приноси. Нашата служба треба да одразува соодветно длабоко почитување за Јехова. Се разбира, секој човек се наоѓа во различни околности. Сепак, имаме добра причина да се преиспитаме за да се увериме дали му го даваме нашето најдобро (Ефеш. 5:10).

³ Служба со сето срце: За да му донесе чест на Јехова и да допре до срцата на оние што нѐ слушаат, нашата служба не смее да биде механичка. Нашите изрази за Бог и за неговите величествени намери треба да извираат од нашето срце што се прелева од благодарност (Псал. 145:7). Ова нагласува колку е важно да одржуваме добра програма на лично читање и проучување на Библијата (Посл. 15:28).

⁴ Да му го даваме на Јехова нашето најдобро вклучува и да ја имитираме неговата љубов кон луѓето (Ефеш. 5:1, 2). Љубовта кон луѓето ќе нѐ мотивира да се обидеме да достигнеме колку што е можно повеќе луѓе со животодавната порака за вистината (Мар. 6:34). Таа нѐ поттикнува да покажеме личен интерес за оние со кои разговараме. Нѐ тера да продолжиме да размислуваме за нив откако првпат сме ги посетиле и нѐ поттикнува пак да се вратиме. Нѐ тера да правиме сѐ што можеме за да им помогнеме духовно да напредуваат (Дела 20:24; 26:28, 29).

⁵ „Жртва на фалба“: Друг начин на кој му го даваме на Јехова нашето најдобро е нашата марливост во службата. Кога сме добро организирани и сосредоточени на делото што е пред нас, можеме најмногу да направиме во времето што го имаме (1. Тим. 4:10). Добрата подготовка нѐ оспособува да зборуваме јасно и уверливо, со што се зголемува веројатноста за поволен одѕив (Посл. 16:21). Кога ја споделуваме добрата вест со другите, нашите искрени изрази со право можат да се наречат „жртва на фалба“ (Евр. 13:15).

Млади — читајте ја Божјата реч!

¹ Младоста е време на предизвици и тешки одлуки. Многумина од вас, христијански младинци, секојдневно се соочуваат со притисок да ги прекршат Божјите мерила на однесување. Кога ќе почнеш да донесуваш лични одлуки во врска со образование, вработување и брак, веќе треба да си имаш поставено духовни цели. Само на тој начин можеш да донесеш други одлуки што ќе го обликуваат остатокот од твојот живот на добро. Конкретните духовни цели ќе ти помогнат да постапуваш мудро и да бидеш успешен. Од читањето и медитирањето за Божјата реч ќе бидеш поттикнат да живееш во склад со нејзиниот инспириран совет, а твоите исправни стремежи ќе успеат (Ис. Нав. 1:8; Псал. 1:2, 3).

² Како ќе ти користи тоа? Светот на Сатана е полн со искушенија што наведуваат на престап (1. Јов. 2:15, 16). Можеби познаваш соученици или други на твоја возраст кои доживеале несреќа затоа што попуштиле на притисокот од врсниците. Придржувањето за библискиот совет ќе ти даде морална и духовна сила да го отфрлиш грешниот правец. Освен тоа, советот од Божјата реч може да ти помогне да ги избегнеш подмолните замки на Сатана (2. Кор. 2:11; Евр. 5:14). Одењето по Божјите патишта ќе ти донесе вистинска среќа — лично задоволство од твојот начин на живот (Псал. 119:1, 9, 11).

³ Непроменливите начела од Божјата реч ја надминуваат човечката мудрост (Псал. 119:98—100). Тоа што ќе ги знаеш библиските начела и ќе медитираш за намерите на Јехова што тој ни ги открил, заедно со искрена молитва, може да ти помогне да изградиш близок однос со семудриот Автор на Библијата, Јехова Бог. Тој ветува: „Ќе те учам, ќе ти го покажам патот по кој треба да одиш, ќе те советувам, Моето око ќе бдее над тебе“ (Псал. 32:8).

⁴ Одвој си време за да ја читаш: Една млада христијанка си поставила цел да ја прочита целата Библија и ја завршила за една година. Каква корист извлекла? Таа си спомнува: „Научив толку многу за Јехова — работи што ме зближија со него и поради кои сакам да се плашам од него до крајот на мојот живот“ (Јак. 4:8). Си ја прочитал ли целата Библијата? Ако не, зошто не си го поставиш тоа за цел? Јехова сигурно ќе ги благослови твоите напори и ќе пожнееш богати благослови.