Како да останеме ревносни
1 Жарот со кој Аполо ја извршувал својата служба нѐ потсетува на денешните сохристијани кои се особено ревносни во проповедничкото дело (Дела 18:24-28). Но, и за сите нас важи советот: „Не безделничете во работата. Зрачете со духот“ (Рим. 12:11). Што може да ни помогне да станеме и да останеме ревносни во христијанската служба?
2 Знаењето ја разгорува ревноста: Откако Исус им се појавил на двајца свои ученици и ‚им ги протолкувал работите што се однесувале на него во целото Писмо‘, тие забележале: „Зарем не ни гореа срцата додека ни зборуваше по патот?“ (Лука 24:27, 32). Слично на тоа, зарем и нам не ни горат срцата од возбуда кога уште подобро ја разбираме Божјата реч? Да, знаењето ја разгорува верата. Во Римјаните 10:17 се објаснува: „Верата доаѓа од она што се слуша“. Кога нашите срца се полни со доверба во Јеховините ветувања, едноставно не можеме а да не зборуваме за она што сме го слушнале (Пс. 145:7; Дела 4:20).
3 Она што сме го научиле кога сме проучувале порано не е доволно ако сакаме нашата љубов кон Бог и нашата ревност во службата да продолжи силно да гори. Мораме да се трудиме уште подобро да ја разбереме вистината и да ја продлабочуваме љубовта кон Јехова. Во спротивно, можеби со текот на времето ќе почнеме да му служиме на Бог механички (Откр. 2:4). Божјата реч нѐ поттикнува ‚и понатаму... да растеме во точното спознание за Бог‘ (Кол. 1:9, 10).
4 Какви ни се навиките за проучување: Затоа, добро е да ги преиспитаме нашите навики за проучување. На пример, можеби знаеме да ги потцртаме одговорите во статијата за проучување во Стражарска кула и да дадеме точни коментари. Но, дали ги читаме наведените стихови и дали размислуваме како можеме лично да го примениме тоа во нашиот живот? Дали се трудиме, доколку сме во можност, дополнително да истражуваме во врска со седмичното читање на Библијата, и дали размислуваме за она што го учиме од материјалот? (Пс. 77:11, 12; Посл. 2:1-5). Колку само е корисно длабоко да размислуваме и да бидеме задлабочени во Божјата реч! (1. Тим. 4:15, 16). Таквото смисловно проучување ќе го храни нашето срце и ќе ни дава сила да бидеме ‚ревносни за добри дела‘ (Тит 2:14).