Нашиот живот и служба — работни листови
Превод на референци кои ги нема на македонски
5-11 ЈУНИ
ОД РИЗНИЦАТА НА БОЖЈАТА РЕЧ | ЕРЕМИЈА 51-52
„Јеховината Реч се исполнува до најситен детаљ“
it-2-E 360, пас. 2-3
Медијци, Медија
Го поразуваат Вавилон заедно со Персијците. Во 8 век пр.н.е, пророкот Исаија претскажал дека Јехова ќе ги подигне против Вавилон „Медијците, на кои среброто не им значи ништо и кои не му се радуваат на златото“. За нив Исаија рекол: „Со своите лакови ќе ги разбијат младичите“ (Иса 13:17-19; 21:2). Овде називот „Медијци“ веројатно ги вклучува и Персијците. И древните грчки историчари честопати го користеле називот Медијци, иако зборувале и за Персијците. Тоа што Медијците и Персијците го презирале среброто и златото покажува дека нивната главна цел била да го освојат Вавилон, а не да соберат плен. Тие биле толку решени во својата намера што никаков данок ниту поткуп немало да ги спречи. Главно оружје на Медијците и Персијците биле лакот и стрелата. Дрвените лакови понекогаш биле обложени со бронза или бакар. (Спореди со Пс 18:34.) Зборовите „со своите лакови ќе ги разбијат младичите“ укажуваат на дождот од стрели со кои биле засипани младите Вавилонци. Секоја стрела била добро наострена за да продира подлабоко (Ере 51:11).
Меѓу оние кои го нападнале Вавилон се спомнати и „цареви на Медијците“ (Ере 51:11, 28). Веројатно ова значи дека, дури и кога Кир бил на власт, сѐ уште имало и вазален медиски цар или цареви, што било вообичаено во тоа време. (Спореди со Ере 25:25.) Ова објаснува зошто Медиецот Дариј бил „поставен за цар над царството на Халдејците“ кога Вавилон бил поразен од страна на здружените сили на Медијците, Персијците, Еламците и други соседни племиња. Тој најверојатно бил поставен за цар од страна на Кир Персиецот (Да 5:31; 9:1).
Најди духовни бисери
it-2-E 444, пас. 9
Гора, планина
Претставуваат влади. Во Библијата, планините може да претставуваат влади или царства (Да 2:35, 44, 45; спореди со Иса 41:15; От 17:9-11, 18). Во своите воени походи, Вавилон уништувал други земји и затоа е наречен „погубна планина“ (Ере 51:24, 25). Псалм 76 опишува што ќе направи Јехова против оние што војуваат. Во истиот псалм, за Јехова се вели: „Ти си обвиен со светлина, повеличествен од планините полни со плен“ (Пс 76:4). „Планините полни со плен“ веројатно се воинствените царства. (Спореди со На 2:11-13.) За Јехова, Давид рекол: „Ти ја утврди мојата планина“. Веројатно со тоа сакал да каже дека Јехова го возвишил и го утврдил неговото царство (Пс 30:7; спореди со 2Са 5:12). Тоа што зборот планини понекогаш може да укажува на царства ни помага да го сфатиме значењето на Откровение 8:8, каде се спомнува „нешто слично на голема гора запалена со оган“. Запалената гора укажува на влада со разорна моќ како оган.
it-2-E 882, пас. 3
Море
Војски како надојдени води. Еремија рекол дека викотницата на оние што ќе го нападнат Вавилон „ќе биде како бучавата од морето“ (Ере 50:42). Според тоа, кога Еремија прорекол дека морето ќе се издигне над Вавилон, очигледно мислел на воениот поход под водство на Медијците и Персијците што ќе бил како надојдени води (Ере 51:42; спореди со Да 9:26).