За време на сушата, Јехова му кажал на Илија: „Оди во Сарепта. Таму една вдовица ќе ти даде да јадеш“. Кога стигнал до градската порта, Илија видел како една сиромашна жена собира дрва. Тој ѝ побарал малку вода. Кога тргнала да му донесе, ѝ довикнал: „Те молам, дај ми и малку леб“. Но вдовицата му рекла: „Извини, ама немам леб. Имам малку брашно и масло, само колку да направам нешто за да каснеме со син ми“. Илија ѝ рекол: „Јехова ветува дека, ако ми дадеш малку леб, твоето брашно и твоето масло нема да се потрошат додека трае сушата“.

Затоа, вдовицата отишла дома и направила едно лепче за пророкот на Јехова. Токму како што ветил Јехова, вдовицата и нејзиниот син имале што да јадат додека траела сушата. За сето тоа време имале доволно брашно и масло.

Еден ден, се случило нешто многу жално. Синчето на вдовицата се разболело и умрело. Таа го молела Илија да ѝ помогне. Тогаш Илија го зел детето во раце и го однел во горната соба во куќата. Го ставил на креветот и почнал да се моли: „Јехова, те молам врати му го животот на ова дете“. Тоа што го барал Илија било доста необично бидејќи никој дотогаш не се вратил од мртвите. Освен тоа, вдовицата и нејзиниот син не биле ни Израелци.

Сепак, Јехова го оживеал детенцето! Илија го однел кај мајка му и ѝ рекол: „Син ти е жив!“ Таа била пресреќна и му рекла на Илија: „Сега знам дека навистина си Божји човек затоа што го зборуваш само тоа што Јехова ќе ти го каже. И сѐ што ќе кажеш, се исполнува“.

Од палатата на цар Ахав во Језраел се гледало лозјето на еден човек по име Навутеј. Бидејќи Ахав сакал тоа лозје да биде негово, му рекол на Навутеј да му го продаде. Но, Навутеј не сакал да го направи тоа бидејќи според законот на Јехова било забрането да се продава земја која била добиена во наследство. Дали Ахав го пофалил Навутеј што постапил исправно? Не. Напротив, Ахав многу се налутил. Толку бил лут што не сакал да излегува од својата соба ниту, пак, да јаде.

Жената на Ахав, злобната царица Језавела, му рекла: „Ти си цар на Израел. Можеш да имаш сѐ што ќе посакаш. Јас ќе се погрижам да го добиеш лозјето“. Таа им пратила писма на старешините во градот. Во нив им пишала да го обвинат Навутеј дека зборувал против Бог и да го каменуваат до смрт. Откако старешините го направиле тоа, Језавела му рекла на Ахав: „Навутеј е мртов. Сега лозјето е твое“.

Освен Навутеј, Језавела убила и многу други невини луѓе кои го сакале Јехова. Таа им служела на лажни богови, а правела и други лоши работи. Јехова видел што сѐ направила Језавела. Дали презел нешто во врска со тоа?

По смртта на Ахав, цар станал неговиот син Јорам. Јехова испратил еден човек по име Јуј да ја казни Језавела, како и нејзиното семејство.

Јуј се качил на својата коњска кола и отишол во Језраел, каде што живеела Језавела. Јорам тргнал со својата кола да го пресретне Јуј, и го прашал: „Дали има мир меѓу нас?“ Јуј му одговорил: „Не може да има мир сѐ додека твојата мајка, Језавела, прави злобни работи“. Тогаш Јорам се обидел да ја сврти својата кола за да побегне. Но, Јуј го застрелал Јорам и тој умрел.

Потоа Јуј отишол во палатата на Језавела. Кога оваа злобна царица чула кој дошол, се нашминкала, си направила фризура и го чекала крај прозорецот. Кога Јуј пристигнал, таа му се обратила со зајадливи зборови. Тогаш Јуј им викнал на нејзините слуги кои стоеле до неа: „Фрлете ја долу!“ Тие ја фрлиле низ прозорецот и таа умрела.

По ова, Јуј ги убил сите 70 синови на Ахав и уништил сѐ што било поврзано со обожавањето на Ваал. Дали овој настан од Библијата те уверува дека Јехова гледа сѐ и дека во вистинско време ќе ги казни оние што прават лоши работи?