Дали штедите струја или ја трошите напразно?

ОД ДОПИСНИКОТ НА РАЗБУДЕТЕ СЕ! ВО БРИТАНИЈА

СЕ ПРОЦЕНУВА дека секоја година во Соединетите Држави напразно се троши струја во вредност од една милијарда долари, доволно за да се снабди еден град кој е голем колку Чикаго. На кој начин? Апаратите како што се компјутерите, факс машините, видео рекордерите, телевизорите, ЦД плеерите па дури и автоматите за кафе се оставаат во стенд-бај позиција. Тоа се прави за да продолжат да работат нивните часовници, да се зачува меморијата и да се гледаат бројките — или едноставно за да бидат спремни за брза употреба.

Се смета дека во Британија, струјата што секоја година ја трошат апаратите кои се во мирување создава половина милион тони гасови на стаклена градина при нејзиното производство во електричните централи. Овие гасови одат во атмосферата и можат да ги зголемат последиците од глобалното загревање. „Колку и да изгледа модерна зелената идеологија меѓу младите потрошувачи, малкумина ја увидуваат поврзаноста помеѓу производството на електрична енергија и загревањето на планетава“, вели лондонскиот весник The Times.

Не е општо познато дека многу електрични апарати користат речиси исто толку енергија кога се во стенд-бај позиција колку и кога работат со полн капацитет. Еден сателитски ТВ систем, на пример, може да користи 15 вати додека работи, а само 1 ват помалку кога е на стенд-бај. И лошото производство игра улога. Еден ЦД плеер кој бил тестиран користел 28 вати на стенд-бај, а некој друг модел со слични карактеристики користел само 2 вата. Но, сега е произведен еден нов компјутерски чип кој, како што се тврди, може да ја намали потрошувачката при стенд-бај од 10 вати на 1 ват, па дури и на само 0,1 ват. Постои надеж дека во постојаната борба против загадувањето, произведувачите ширум светот ќе го користат како стандардна компонента овој чип кој чини 2,5 долари. Во меѓувреме, што можете да направите Вие?

Британскиот министер за природна средина истакнува: „Количеството електрична енергија што го користи секој апарат можеби изгледа сосема мало. Но, поради тоа што на овој остров [Британија] нѐ има 60 милиони, тоа станува прилично големо“. Сосема е јасно дека не можат да се исклучат апаратите за домаќинството како што се фрижидерите. Но, добро е да стекнете навика да ги исклучувате сијалиците кога не се потребни, како и другите апарати, наместо да ги оставате на стенд-бај. Со тоа не само што ќе заштедите пари туку и ќе помогнете да се поштеди нашата планета од непотребно загадување.