ഒരു പേര്‌ ഉണ്ടായിരിക്കാനുള്ള അവകാശം
ഒരു പേര്‌ ഉണ്ടായിരിക്കുക എന്നത്‌ ഏതൊരു വ്യക്തിയുടെയും അവകാശമാണ്‌. തഹീതിയിൽ, ഉപേക്ഷിക്കപ്പെട്ട, മാതാപിതാക്കൾ ആരെന്നറിയാത്ത, ഒരു നവജാതശിശുവിനുപോലും പേരിടാറുണ്ട്‌. അവിടത്തെ രജിസ്റ്റർ ഓഫീസ്‌ അത്തരം കുഞ്ഞുങ്ങൾക്ക്‌ ഒരു പേരും കുടുംബപ്പേരും നൽകുന്നു.
എന്നിരുന്നാലും, മിക്കവാറും എല്ലാ മനുഷ്യർക്കുമുള്ള മൗലിക അവകാശം, അതായത്‌ പേര്‌ ഉണ്ടായിരിക്കുകയെന്ന അവകാശം ഒരർഥത്തിൽ നിഷേധിക്കപ്പെട്ടിരിക്കുന്ന ഒരു വ്യക്തിയുണ്ട്‌. വൈരുദ്ധ്യമെന്നു പറയട്ടെ, ആ വ്യക്തിയാണ്‌ “സ്വർഗ്ഗത്തിലും ഭൂമിയിലുമുള്ള സകല കുടുംബത്തിന്നും പേർ വരുവാൻ കാരണമായ പിതാവ്‌.” (എഫെസ്യർ 3:14, 15) സ്രഷ്ടാവായ അവന്റെ പേര്‌ ബൈബിളിലുണ്ടെങ്കിലും അത്‌ ഉപയോഗിക്കാൻ മിക്കവരും കൂട്ടാക്കുന്നില്ല. അതിനു പകരം “ദൈവം,” “കർത്താവ്‌,” “നിത്യൻ” എന്നിങ്ങനെയുള്ള സ്ഥാനപ്പേരുകൾ ഉപയോഗിക്കാനാണ്‌ അവർ ഇഷ്ടപ്പെടുന്നത്‌. അങ്ങനെയെങ്കിൽ അവന്റെ പേര്‌ എന്താണ്‌? സങ്കീർത്തനക്കാരൻ ആ ചോദ്യത്തിന്‌ ഉത്തരം നൽകുന്നു: “അങ്ങനെ അവർ യഹോവ എന്നു നാമമുള്ള നീ മാത്രം സർവ്വഭൂമിക്കുംമീതെ അത്യുന്നതൻ എന്നു അറിയും.”—സങ്കീർത്തനം 83:18.
19-ാം നൂറ്റാണ്ടിന്റെ ആദ്യ പകുതിയിൽ ലണ്ടൻ മിഷനറി സൊസൈറ്റിയുടെ മിഷനറിമാർ തഹീതിയിൽ എത്തിച്ചേർന്നപ്പോൾ, പോളിനേഷ്യക്കാർ നിരവധി ദൈവങ്ങളെ ആരാധിച്ചിരുന്നു. അവയ്‌ക്ക്‌ ഓരോന്നിനും വ്യത്യസ്‌ത പേരുകളുമുണ്ടായിരുന്നു, പ്രധാനപ്പെട്ട ദൈവങ്ങളാകട്ടെ ഓരോയും റ്റാറോയയും ആയിരുന്നു. ബൈബിളിൽ പറഞ്ഞിരിക്കുന്ന ദൈവത്തെ മറ്റു ദൈവങ്ങളിൽനിന്നു വേർതിരിച്ചു കാണിക്കേണ്ടതിന്‌ ആ മിഷനറിമാർ ദിവ്യനാമം യഥേഷ്ടം ഉപയോഗിച്ചു. തഹീതിയൻ ഭാഷയിൽ ദിവ്യനാമത്തിന്റെ ലിപ്യന്തരീകരിച്ച രൂപം യെഹോവാ എന്നാണ്‌.
ആ നാമം പ്രചാരംനേടുകയും സാധാരണ സംഭാഷണങ്ങളിലും കത്തിടപാടുകളിലും സ്ഥാനംപിടിക്കുകയും ചെയ്‌തു. 19-ാം നൂറ്റാണ്ടിന്റെ ആരംഭത്തിൽ തഹീതി ഭരിച്ചിരുന്ന പോമാരേ രണ്ടാമൻ രാജാവ്‌ തന്റെ വ്യക്തിപരമായ കത്തിടപാടുകളിൽ ദൈവനാമം കൂടെക്കൂടെ ഉപയോഗിച്ചിരുന്നു. മ്യൂസിയം ഓഫ്‌ തഹീതി ആൻഡ്‌ ഇറ്റ്‌സ്‌ ഐലൻഡ്‌സിൽ പ്രദർശിപ്പിച്ചിരിക്കുന്ന ഇംഗ്ലീഷിലുള്ള അദ്ദേഹത്തിന്റെ ഒരു കത്തിൽ ഈ വസ്‌തുതയുടെ തെളിവ്‌ കാണാൻ സാധിക്കും. അതിന്റെ ചിത്രമാണ്‌ ഇവിടെ കൊടുത്തിരിക്കുന്നത്‌. അക്കാലത്തെ ആളുകൾ യാതൊരു മടിയും കൂടാതെ ദിവ്യനാമം ഉപയോഗിച്ചിരുന്നുവെന്ന്‌ ഈ കത്ത്‌ സാക്ഷ്യപ്പെടുത്തുന്നു. എന്തിനധികം, 1835-ൽ പൂർത്തീകരിച്ച തഹീതിയൻ ഭാഷയിലുള്ള ആദ്യത്തെ ബൈബിൾ ഭാഷാന്തരത്തിൽ ദൈവത്തിന്റെ വ്യക്തിപരമായ നാമം ആയിരക്കണക്കിനു പ്രാവശ്യം കാണാം.
[32-ാം പേജിലെ ചിത്രങ്ങൾ]
പോമാരേ രണ്ടാമൻ രാജാവ്‌
[32-ാം പേജിലെ ചിത്രത്തിന്‌ കടപ്പാട്‌]
രാജാവും കത്തും: Collection du Musée de Tahiti et de ses Îles, Punaauia, Tahiti