“ദേശം വിഭജി​തം, ലോകം സംയോ​ജി​തം”—പനാമാ കനാൽ കഥ

പനാമയിലെ “ഉണരുക!” ലേഖകൻ

“ദേശം വിഭജി​തം, ലോകം സംയോ​ജി​തം” ഈ മുദ്രാ​വാ​ക്യം അനേകം ദശാബ്‌ദ​ങ്ങ​ളിൽ പാനാമാ കനാലി​ന്റെ ഒരു മുദ്ര​യിൽ പ്രത്യ​ക്ഷ​പ്പെ​ട്ടി​രു​ന്നു. രണ്ടു ശക്തമായ സമു​ദ്ര​ങ്ങളെ ബന്ധിപ്പി​ച്ച​തി​നാൽ കനാൽ ലോകത്തെ ഒരു പ്രത്യേ​ക​വി​ധ​ത്തിൽ സംയോ​ജി​പ്പി​ച്ചി​രി​ക്കു​ന്നു. അതിന്‌ നിങ്ങൾ തിരി​ച്ച​റി​ഞ്ഞേ​ക്കാ​വു​ന്ന​തിൽ കൂടുതൽ ഫലം നിങ്ങളു​ടെ ജീവി​ത​ത്തിൻമേൽ ഉണ്ടായി​ട്ടുണ്ട്‌. ഒരുപക്ഷേ നിങ്ങളു​ടെ കാറോ വീട്ടു​പ​ക​ര​ണ​ങ്ങ​ളോ നിങ്ങളു​ടെ തീൻമേ​ശ​യി​ലെ ഭക്ഷണം​പോ​ലു​മോ ആ വഴിയേ സഞ്ചരി​ച്ചി​ട്ടു​ണ്ടാ​യി​രി​ക്കാം!

ആയിര​ത്തി​ത്തൊ​ള്ളാ​യി​രത്തി എൺപ​ത്തൊൻപത്‌ ഓഗസ്‌ററ്‌ 15 ഈ മർമ്മ​പ്ര​ധാ​ന​മായ ജലപാ​ത​യി​ലൂ​ടെ​യുള്ള ആദ്യസ​ഞ്ചാ​ര​ത്തി​ന്റെ 75-ാം വാർഷി​ക​മാ​യി​രു​ന്നു. എന്നിരു​ന്നാ​ലും, ഈ 50 മൈൽ വരുന്ന ജലസഞ്ചാ​രം സാദ്ധ്യ​മാ​ക്കിയ സ്വപ്‌ന​ങ്ങ​ളും പദ്ധതി​ക​ളും അദ്ധ്വാ​ന​വും നൂററാ​ണ്ടു​കൾ പഴക്കമു​ള്ള​വ​യാണ്‌.

കൊളം​ബസ്‌ പുതി​യ​ലോ​കം എന്നു വിളി​ക്ക​പ്പെ​ടു​ന്നത്‌ കണ്ടുപി​ടി​ച്ച​ശേഷം സ്‌പാ​നീഷ്‌ ജേതാ​ക്ക​ളു​ടെ പര്യ​വേ​ക്ഷ​ണ​ത്തി​ന്റെ ഒരു യുഗം തുടങ്ങി. അങ്ങനെ, വാസ്‌കോ ന്യൂനിസ്‌ ഡി ബാൽബോ​വാ 1513-ാമാണ്ടിൽ ഇടുങ്ങിയ പനാമാ കരയി​ടു​ക്കി​ലൂ​ടെ സഞ്ചരിച്ചു. തദ്ദേശ​വാ​സി​കൾ പറഞ്ഞ മറെറാ​രു സമു​ദ്ര​ത്തി​ലേക്കു നയിക്കുന്ന ഒരു “ഇടുങ്ങിയ സ്ഥലത്തെ”ക്കുറി​ച്ചുള്ള കഥകളാൽ ഉത്തേജി​ത​നാ​യി ബാൽബോ​വാ അന്വേ​ഷണം നടത്തു​ക​യും വലിയ പശ്ചിമ​സ​മു​ദ്രത്തെ അഭിമു​ഖീ​ക​രി​ക്കു​ക​യും ചെയ്‌തു.

ഏതാനും വർഷം​ക​ഴിഞ്ഞ്‌ ഫെർഡി​നാൻഡ്‌ മഗല്ലൻ തെക്കേ അമേരി​ക്ക​യു​ടെ തെക്കേ അററം ചുററി ഇപ്പോൾ അയാളു​ടെ നാമം വഹിക്കുന്ന അപകട​ക​ര​മായ കടലി​ടു​ക്കി​ലൂ​ടെ കപ്പലോ​ടി​ക്കു​ക​യും അതേ മഹാസ​മു​ദ്ര​ത്തിൽ പ്രവേ​ശി​ക്കു​ക​യും​ചെ​യ്‌തു. മഗല്ലൻ അതിനെ പ്രക്ഷു​ബ്ധ​മായ അററ്‌ലാൻറി​ക്കിൽനി​ന്നു വ്യത്യ​സ്‌ത​മാ​യി ശാന്തമായ ഒന്ന്‌ എന്നർത്ഥ​മുള്ള എൽ പസഫി​ക്കോ എന്നു വിളിച്ചു. ഈ നീണ്ട അപകട​ക​ര​മായ സഞ്ചാരം പസഫി​ക്കി​ലേ​ക്കുള്ള കൂടുതൽ കാര്യ​ക്ഷ​മ​മായ ഒരു പാതക്കുള്ള അന്വേ​ഷ​ണ​ത്തി​നു വഴിമ​രു​ന്നി​ട്ടു.

സ്‌പെ​യി​നി​ലെ ചാൾസ്‌ I-ാമൻ രാജാവ്‌ 1534-ൽ ഒരു ശ്രദ്ധേ​യ​മായ നിർദ്ദേ​ശത്തെ പിൻതാ​ങ്ങി: ഈ രണ്ടു മഹാസ​മു​ദ്ര​ങ്ങളെ ബന്ധിപ്പി​ക്കാ​നുള്ള ഒരു കനാൽ! അദ്ദേഹം സർവേകൾ നടത്താൻ ആജ്ഞാപി​ച്ചു​വെ​ങ്കി​ലും പദ്ധതി അദ്ദേഹ​ത്തി​ന്റെ യുഗത്തി​ലെ സാങ്കേ​തിക പ്രാപ്‌തി​കൾക്ക്‌ വളരെ അതീത​മാ​യി​രു​ന്നു. സ്വപ്‌നം സാക്ഷാ​ത്‌ക്ക​രി​ക്ക​പ്പെ​ടു​ന്ന​തിന്‌ മൂന്നി​ല​ധി​കം നൂററാ​ണ്ടു​കൾ കൂടെ കഴിയു​മാ​യി​രു​ന്നു.

ആയിരത്തി എണ്ണൂറു​ക​ളിൽ ആവിശ​ക്തി​യു​ടെ​യും തീവണ്ടി​പ്പാ​ത​ക​ളു​ടെ​യും പുതിയ സാങ്കേ​തിക വിദ്യകൾ ആവേശ​ക​ര​മായ പുതിയ സാധ്യ​തകൾ ഉന്നയി​ച്ചു​തു​ടങ്ങി. പിന്നീട്‌ കാലി​ഫോർണി​യാ​യി​ലെ സ്വർണ്ണ​പ​ര്യ​വേ​ക്ഷ​ണ​തി​രക്ക്‌ ആഗതമാ​യി. പര്യ​വേ​ക്ഷകർ കാല​ഫോർണി​യാ​യി​ലേക്ക്‌ ഒരു കുറു​ക്കു​വഴി കണ്ടുപി​ടി​ച്ചു: ഐക്യ​നാ​ടു​ക​ളു​ടെ കിഴക്കൻതീ​ര​ത്തു​നിന്ന്‌ പനാമ​യി​ലേക്ക്‌ സമു​ദ്ര​യാ​ത്ര നടത്തു​ക​യും കാൽന​ട​യാ​യൊ കോവർക​ഴു​ത​പ്പു​റ​ത്തൊ കരയി​ടുക്ക്‌ കുറുകെ കടന്നിട്ട്‌ സാൻഫ്രാൻസി​സ്‌കോ​യി​ലേക്ക്‌ സമു​ദ്ര​യാ​ത്ര നടത്തു​ക​യും ചെയ്യുക! പനാമാ കരയി​ടു​ക്കി​നു കുറു​കെ​യുള്ള ഒരു തീവണ്ടി​പ്പാത 1855-ൽ പ്രവർത്ത​ന​ത്തി​ലാ​യി. പിന്നെ​യും കനാലി​ന്റെ ആശയം തങ്ങിനി​ന്നു.

ധീരമായ ഫ്രഞ്ച കനാൽ പദ്ധതി

കൗണ്ട്‌ ഫെർഡി​നാൻഡ്‌ ഡി ലെസ്സെ​പ്‌സ്‌ സൂയസ്‌ കനാൽനിർമ്മാ​ണ​ത്തി​ലെ തന്റെ വിജയത്തെ തുടർന്ന്‌ പനാമാ കനാൽ ഒരു യാഥാർത്ഥ്യ​മാ​ക്കി​ത്തീർക്കു​ന്ന​തിന്‌ നടപടി​കൾ സ്വീക​രി​ച്ചു. അയാൾ നേതൃ​ത്വം വഹിച്ച ഒരു കമ്മിററി പ്രാരംഭ സർവേക്കു മേൽനോ​ട്ടം വഹിക്കു​ക​യും കൊളം​ബി​യാ​യിൽനിന്ന്‌ 99 വർഷ​ത്തേക്ക്‌ ഒരു അനുമതി വാങ്ങു​ക​യും​ചെ​യ്‌തു. പനാമാ കരയി​ടുക്ക്‌ അന്ന്‌ കൊളം​ബി​യാ​യു​ടെ ഒരു ഭാഗമാ​യി​രു​ന്നു. കനാലി​ന്റെ പണി 1881-ൽ തുടങ്ങി. പ്രതീ​ക്ഷകൾ ഉയർന്നു​വന്നു. കാരണം ഈ കനാലിന്‌ സൂയസി​ന്റെ പകുതി ദൈർഘ്യ​മേ ഉണ്ടായി​രി​ക്കു​മാ​യി​രു​ന്നു​ള്ളു. വെള്ളത്തി​നും ദൗർല​ഭ്യ​മി​ല്ലാ​യി​രു​ന്നു. അല്ലെങ്കിൽ ഒടുങ്ങാത്ത മരു​പ്ര​ദേശ മണലി​നോട്‌ മല്ലടി​ക്കേ​ണ്ട​തി​ല്ലാ​യി​രു​ന്നു.

എന്നാൽ പുതിയ ശത്രുക്കൾ—ഉഷ്‌ണ​മേ​ഖ​ലാ​വ​നങ്ങൾ, വലിയ പാറക്കു​ന്നു​കൾ, അസ്ഥിര​മായ മണ്ണ്‌, എല്ലാറ​റി​ലും മോശ​മാ​യി മഞ്ഞപ്പനി​യും മലമ്പനി​യും—പണിക്കാർക്ക്‌ അസഹനീ​യ​മാ​യി​ത്തീർന്നു. തൽഫല​മാ​യുള്ള തൊഴി​ലാ​ളി​പ്ര​ശ്‌ന​ങ്ങ​ളും അപര്യാ​പ്‌ത​മായ ഉപകര​ണ​ങ്ങൾനി​മി​ത്ത​മുള്ള സാവധാ​ന​ത്തി​ലുള്ള പുരോ​ഗ​തി​യും ഫണ്ടുക​ളു​ടെ ദുർവി​നി​യോ​ഗ​വും 20 വർഷത്തെ പണിക്കു​ശേഷം ഫ്രഞ്ചു​കാർ തങ്ങളുടെ പദ്ധതി ഉപേക്ഷി​ക്കാൻ ഇടയാക്കി. ചെലവ്‌ 26 കോടി ഡോളർ ആയിരു​ന്നു. ഒട്ടേ​റെ​പ്പേ​രു​ടെ ജീവനും നഷ്ടപ്പെട്ടു.

വെല്ലു​വി​ളി ഏറെറ​ടു​ക്കു​ന്നു

നൂററാ​ണ്ടി​ന്റെ അവസാ​ന​ത്തോ​ടെ ഐക്യ​നാ​ടു​കൾ ഒരു ലോക​ശ​ക്തി​യെന്ന നിലയിൽ പ്രവർത്ത​ന​സ​ജ്ജ​മാ​യി​ത്തു​ട​ങ്ങു​ക​യും പെട്ടെ​ന്നു​തന്നെ പനാമ​യിൽ ശ്രദ്ധ കേന്ദ്രീ​ക​രി​ക്കു​ക​യും ചെയ്‌തു. സ്‌പാ​നീഷ്‌ അമേരി​ക്കൻ യുദ്ധകാ​ലത്ത്‌ ഓറ​ഗോൺ എന്ന യുദ്ധകപ്പൽ കാലി​ഫോർണി​യാ​യിൽനിന്ന്‌ മഗല്ലൻ കടലി​ടു​ക്കു​വഴി ഫ്‌ളോ​റി​ഡാ​യിൽ എത്തുന്ന​തിന്‌ 68 ദിവസ​മെ​ടു​ത്തി​രു​ന്നു. ഇത്‌ മെച്ചപ്പെട്ട ഒരു പൂർവ​പ​ശ്ചി​മ​പാ​ത​യു​ടെ ആവശ്യത്തെ നാടകീ​യ​മാ​ക്കി. പനാമാ കനാലി​ന്റെ പ്രാ​യോ​ഗി​കത തിരി​ച്ച​റി​ഞ്ഞു​കൊണ്ട്‌ ഐക്യ​നാ​ടു​കൾ അതു പണിയാ​നുള്ള അവകാ​ശങ്ങൾ വിലക്കു​വാ​ങ്ങി.

എന്നിരു​ന്നാ​ലും, കൊളം​ബി​യാ​യു​മാ​യുള്ള യു. എസ്സ്‌. ചർച്ചകൾ പെട്ടെന്നു തകർന്നു. പിന്നീട്‌ 1903-ൽ പനാമ കൊളം​ബി​യാ​യിൽനി​ന്നുള്ള സ്വാത​ന്ത്ര്യം പ്രഖ്യാ​പി​ക്കു​ക​യും പെട്ടെ​ന്നു​തന്നെ കനാൽ നിർമ്മി​ക്കു​ന്ന​തി​നുള്ള അവകാ​ശ​ങ്ങ​ളും അതിന്റെ ഗതിയി​ലുള്ള 10 മൈൽ വീതി​യുള്ള ഭാഗത്തിൻമേ​ലുള്ള ഭരണാ​ധി​കാ​ര​വും ഐക്യ​നാ​ടു​കൾക്ക്‌ അനുവ​ദി​ച്ചു​കൊ​ടു​ത്തു.

പിന്നെ​യും ഫ്രഞ്ചു​കാ​രെ ബാധിച്ച പഴയ പ്രശ്‌നങ്ങൾ നിലനി​ന്നു. മുൻകൂ​ട്ടി​ക്കാ​ണാത്ത പുതിയ പ്രശ്‌ന​ങ്ങ​ളു​മു​ണ്ടാ​യി. അവ പുതി​യ​താ​യി പണി തുടങ്ങി​യ​പ്പോൾ പണിക്കാ​രെ വെല്ലു​വി​ളി​ച്ചു. തക്കസമ​യത്ത്‌ ഓരോ​ന്നും തരണം​ചെ​യ്യ​പ്പെട്ടു:

രോഗം: മഞ്ഞപ്പനി​യും മലമ്പനി​യും ആ ഉഷ്‌ണ​മേ​ഖലാ രാജ്യത്ത്‌ വ്യാപി​ച്ചി​രു​ന്നു. എന്നിരു​ന്നാ​ലും കേണൽ വില്യം ക്രോ​ഫോർഡ്‌ ഗോർഗാസ്‌ കർശന​മായ ശുചി​ത്വ​ന​ട​പ​ടി​കൾ നടപ്പി​ലാ​ക്കി. അതോ​ടു​കൂ​ടെ രോഗ​വാ​ഹി​ക​ളായ കൊതു​കു​കൾക്കെ​തി​രായ സമഗ്ര​മായ യുദ്ധവും പ്രഖ്യാ​പി​ച്ച​തോ​ടെ ആ രോഗങ്ങൾ ഫലത്തിൽ നിർമ്മാർജ്ജനം ചെയ്യ​പ്പെട്ടു!

തൊഴിൽ: ഈ പദ്ധതി​ക്കാ​വ​ശ്യ​മാ​യി​ട്ടുള്ള വമ്പിച്ച തൊഴിൽസേ​നയെ പ്രദാനം ചെയ്യാൻ പനാമ അപ്രാ​പ്‌ത​യാ​യി​രു​ന്നു. പരിഹാ​രം? ആയിര​ക്ക​ണ​ക്കി​നു ജോലി​ക്കാർ വെസ്‌റ​റിൻഡീ​സിൽ നിന്ന്‌ റിക്രൂട്ട്‌ ചെയ്യ​പ്പെട്ടു.

ഖനനനിർമ്മാർജ്ജന പ്രശനങ്ങൾ: കടുപ്പ​മുള്ള പാറയും അസ്ഥിര​മായ മണ്ണും ഒരു പ്രശ്‌ന​മാ​യി​ത്തു​ടർന്നു. എന്നിരു​ന്നാ​ലും, സമു​ദ്ര​നി​ര​പ്പി​ലുള്ള ഒരു കനാലി​നു പകരം ഒരു ലോക്ക്‌​റൈ​റപ്പ്‌ കനാൽ നിർമ്മി​ക്കാ​നുള്ള തീരു​മാ​നം നീക്കം​ചെ​യ്യേണ്ട മണ്ണിന്റെ അളവ്‌ അതിയാ​യി കുറച്ചു. എന്നിരു​ന്നാ​ലും കുഴി​ച്ചെ​ടു​ക്കുന്ന മണ്ണ്‌ എവി​ടെ​യി​ടും? ഉൾനാടൻ ജലമാർഗ്ഗ​ത്തി​ന്റെ ഭാഗമാ​യി തടാകങ്ങൾ സൃഷ്ടി​ക്കാ​നുള്ള ഡാമു​ക​ളു​ടെ നിർമ്മാ​ണ​ത്തിന്‌ മണ്ണിന്റെ അധിക​ഭാ​ഗ​വും ഉപയോ​ഗി​ക്ക​പ്പെട്ടു. ശേഷിച്ചവ തരംഗ​രോ​ധ​ങ്ങ​ളും കടൽപാ​ല​ങ്ങ​ളും നിർമ്മി​ക്കാ​നും അനൂപ​ങ്ങ​ളും ചതുപ്പു​ക​ളും നികത്താ​നും ഉപയോ​ഗി​ക്ക​പ്പെട്ടു. നികത്തി​യെ​ടുത്ത സ്ഥലങ്ങൾ വ്യാവ​സാ​യിക കേന്ദ്ര​ങ്ങൾക്കും ഭവനനിർമ്മാ​ണ​ത്തി​നു​മുള്ള പ്രദേ​ശങ്ങൾ പ്രദാനം ചെയ്‌തു. പരിച​യ​സ​മ്പ​ന്ന​നാ​യി​രുന്ന ഒരു റെയിൽവേ ഉദ്യോ​ഗ​സ്ഥ​നാ​യി​രുന്ന ജോൺ എഫ്‌ സ്‌ററീ​വൻസ്‌ ആ നാളു​ക​ളിൽ സൂത്ര​ധാ​ര​ത്വം വഹിച്ചി​രു​ന്നു. മണ്ണ്‌ കൊണ്ടു​പോ​കു​ന്ന​തി​നുള്ള സംവി​ധാ​ന​ങ്ങ​ളും പണി പുരോ​ഗ​മി​ക്കു​ന്ന​തി​ന​നു​സ​രിച്ച്‌ മാററി​സ്ഥാ​പി​ക്കാൻ കഴിയു​മാ​യി​രുന്ന തീവണ്ടി​പ്പാ​ള​ങ്ങ​ളും വളരെ പ്രാ​യോ​ഗി​ക​മാ​ണെന്ന്‌ തെളിഞ്ഞു. സ്‌ററീ​വൻസ്‌ പിന്നീട്‌ രാജി​വെ​ച്ചെ​ങ്കി​ലും അദ്ദേഹം നടപ്പി​ലാ​ക്കിയ രീതികൾ പദ്ധതി പൂർത്തി​യാ​വു​ന്ന​തു​വരെ തുടർന്ന്‌ ഉപയോ​ഗി​ക്ക​പ്പെട്ടു.

പിന്നീട്‌ ഒരു യു. എസ്സ്‌. സൈനിക എഞ്ചിനീ​യ​റാ​യി​രുന്ന ലെഫ്‌റ​റ​നൻറ്‌ കേണൽ ജോർജ്‌ വാഷിം​ഗ്‌ടൻ ഗീഥോൾസ്‌ പ്രസി​ഡ​ണ്ടാ​യി​രുന്ന തിയോ​ഡർ റൂസ്‌വെൽറ​റി​നാൽ നിയമി​ക്ക​പ്പെട്ടു. ഒരു എഞ്ചിനീ​യർ എന്ന ഗീഥോൾസി​ന്റെ പശ്ചാത്തലം പദ്ധതി പൂർത്തീ​ക​രി​ക്കു​ന്ന​തിൽ അമൂല്യ​മെന്നു തെളിഞ്ഞു. 1914 ഓഗസ്‌ററ്‌ 15-ാംതീ​യതി കനാൽ തുറന്നു. ലോക്കു​ക​ളു​ടെ പദ്ധതി വിജയ​പ്ര​ദ​മെന്നു മാത്രമല്ല ഈടു​നിൽക്കു​ന്ന​താ​ണെ​ന്നും തെളിഞ്ഞു. നമുക്ക്‌ കനാലിൽക്കൂ​ടെ സഞ്ചരിച്ച്‌ പദ്ധതി​യു​ടെ പ്രവർത്ത​ന​വി​ധം നേരിട്ട്‌ നിരീ​ക്ഷി​ക്കാം. നിങ്ങൾ ഊഹി​ച്ചേ​ക്കാ​വു​ന്ന​തി​നു വിരു​ദ്ധ​മാ​യി നാം അററ്‌ലാൻറി​ക്കിൽനിന്ന്‌ കനാലി​ന്റെ പസഫി​ക്കി​ലെ അററ​ത്തേക്കു പോകു​മ്പോൾ നാം കിഴക്കു​നി​ന്നു പടിഞ്ഞാ​റോ​ട്ടല്ല പിന്നെ​യോ വടക്കു​പ​ടി​ഞ്ഞാ​റു​നിന്ന്‌ തെക്കു​കി​ഴ​ക്കോ​ട്ടാണ്‌ സഞ്ചരി​ക്കു​ന്നത്‌. (ഭൂപടം കാണുക) ആദ്യം നാം കരീബി​യൻ സമു​ദ്ര​ത്തി​ന്റെ കാലി​ക​പ്ര​ക്ഷു​ബ്ധ​ത​യിൽനിന്ന്‌ നമുക്കു സംരക്ഷണം നൽകുന്ന 3 മൈൽ ദൈർഘ്യ​മുള്ള തരംഗ​രോ​ധ​ങ്ങൾക്കു മദ്ധ്യേ​കൂ​ടെ കടക്കുന്നു. നമ്മുടെ കപ്പൽ കനാലിൽകൂ​ടി സഞ്ചരി​ക്കു​ന്ന​തി​നുള്ള അതിന്റെ ഊഴം കാത്ത്‌ ഈ സംരക്ഷി​ത​വെ​ള്ള​ങ്ങ​ളിൽ നങ്കൂര​മി​ടു​ന്നു. ഊഴം വരു​മ്പോൾ നാം ഗാട്ടൻലോ​ക്കു​ക​ളി​ലേക്കു പ്രവേ​ശി​ക്കു​ന്നു. ഇവ മൂന്നു ഘട്ടങ്ങളി​ലാ​യി നമ്മുടെ കപ്പലിനെ ഗാട്ടൻ തടാക​ത്തി​ന്റെ നിരപ്പി​ലേക്ക്‌ ഏതാണ്ട്‌ 85 അടി ഉയർത്തു​ന്നു. ഓരോ ലോക്ക്‌ ചേമ്പറും ബൃഹത്താണ്‌: 110 അടി വീതി​യും 1,000 അടി നീളവും ഉള്ളതി​നാൽ അവ മിക്കവാ​റും എല്ലാ വാണിജ്യ സൈനിക കപ്പലു​ക​ളെ​യും കടത്താൻ പര്യാ​പ്‌ത​മാണ്‌.

ലോക്കു​ക​ളു​ടെ പ്രവർത്തന വിധം ഇതാണ്‌: വെള്ളം ഗുരു​ത്വം മുഖേന ചേമ്പറു​ക​ളിൽ പ്രവേ​ശി​ക്കു​ക​യും കപ്പലു​കളെ ഉയർത്തു​ക​യും ചെയ്യുന്നു. വൈദ്യു​ത ശക്തിയാൽ പ്രവർത്തി​ക്കുന്ന തീവണ്ടി എഞ്ചിനു​കൾ അഥവാ മ്യൂൾസ്‌ (കോവർക​ഴു​തകൾ) ഓരോ ചേമ്പറി​ലും കപ്പലു​കളെ ശരിയായ നിലയി​ലേക്കു നീക്കുന്നു. അങ്ങനെ​യുള്ള ലോക്കു​കൾക്കി​ട​യിൽ കപ്പലുകൾ കനാലി​ലൂ​ടെ സ്വന്തം ശക്തിയിൽ ഗമിക്കു​ന്നു.

നാം ഒടുവി​ലത്തെ ഗാട്ടൻലോ​ക്കിൽനിന്ന്‌ ഗാട്ടൻ തടാക​ത്തി​ലേക്കു പോകു​ന്നു. അത്‌ അതിന്റെ പൂർത്തീ​ക​ര​ണ​ത്തി​ന്റെ സമയത്തെ ലോകത്തെ ഏററവും വലിയ മനുഷ്യ​നിർമ്മിത ജലാശ​യ​മാ​യി​രു​ന്നു. അത്‌ ജല​കൈ​കാ​ര്യ​ത്തി​ന്റെ ഒരു വിദഗ്‌ദ്ധ നേട്ടമാണ്‌. സമൃദ്ധ​മായ ഉഷ്‌ണ​മേ​ഖലാ മഴകൾ ജലപാ​ത​തന്നെ നിർമ്മി​ക്കാൻ മാത്രമല്ല കനാൽപ്ര​വർത്ത​ന​ത്തി​നുള്ള ജല​വൈ​ദ്യു​തി ഉൽപ്പാ​ദി​പ്പി​ക്കാ​നും ഉപയോ​ഗി​ക്ക​പ്പെട്ടു. ഗാട്ടൻത​ടാ​ക​ത്തി​ലൂ​ടെ സഞ്ചരി​ക്കു​മ്പോൾ നാം നിരവധി ദ്വീപു​കൾ കാണുന്നു. ഈ ഉഷ്‌ണ​മേ​ഖ​ലാ​വനം വെള്ളത്തിൽ മുങ്ങു​ന്ന​തി​നു മുമ്പ്‌ അവ കുന്നിൻ ശിഖര​ങ്ങ​ളാ​യി​രു​ന്നു!

ഭൂഖണ്ഡ​വി​ഭാ​ജ​ക​ത്തി​ലേക്ക്‌ പ്രദേശം കുത്തനെ ഉയരു​മ്പോൾ കനാലി​നു വീതി കുറയു​ന്നു. ഈ ഗെയ്‌ലാർഡ്‌ കട്ടിങ്കൽ ആണ്‌ അന്നുവരെ നിർമ്മി​ക്ക​പ്പെ​ട്ടി​ട്ടു​ള്ള​തി​ലേ​ക്കും ഏററവും വലിയ മണ്ണുനീ​ക്കൽ പദ്ധതി നിർവ​ഹി​ക്ക​പ്പെ​ട്ടത്‌. 20 കോടി​യിൽ പരം ഘനഗജം ചെളി​യും പാറയും നീക്കം​ചെ​യ്യേ​ണ്ട​തു​ണ്ടാ​യി​രു​ന്നു. നിരന്തരം ഉള്ള മണ്ണിടി​ച്ചിൽ പുരോ​ഗ​തി​യെ തടസ്സ​പ്പെ​ടു​ത്തി. മിക്ക​പ്പോ​ഴും തീവണ്ടി​പ്പാ​ള​ങ്ങ​ളെ​യും ഉപകര​ണ​ങ്ങ​ളെ​യും കുഴി​ച്ചു​മൂ​ടി​ക്കൊ​ണ്ടു​തന്നെ. ഇന്ന്‌ 500 അടി വീതി​യുള്ള ഈ ജലപാത കേടു​പോ​ക്കി സൂക്ഷി​ക്കു​ന്ന​തിന്‌ ആളുക​ളു​ടെ​യും ഉപകര​ണ​ങ്ങ​ളു​ടെ​യും സേവനം ക്രമമാ​യി ഉപയു​ക്ത​മാ​ക്കു​ന്നു.

നാം രണ്ടു ലോക്ക്‌പ​ദ്ധ​തി​ക​ളി​ലൂ​ടെ​യും കടന്നു​പോ​കു​ന്നു. ഒടുവിൽ കനാലി​ന്റെ പസഫിക്ക്‌ അററത്ത്‌ നാം സമു​ദ്ര​നി​ര​പ്പി​ലേക്ക്‌ ഇറങ്ങുന്നു. അവയുടെ പേർ പെദ്രോ മിഗ്വൽ എന്നും മിറാ​ഫ്‌ളോർസ്‌ എന്നും ആണ്‌. നമ്മുടെ സഞ്ചാരം അവസാ​നി​ച്ചി​രി​ക്കു​ന്നു. എന്നാൽ വിപരീത ദിശയിൽ കനാൽ കടക്കു​ന്ന​തിന്‌ കാത്തു​കി​ട​ക്കുന്ന നിരവധി കപ്പലു​കൾക്കു ഇനിയും യാത്ര തുട​ങ്ങേ​ണ്ടി​യി​രി​ക്കു​ന്നു.

ആധുനിക ഗതാഗത രീതികൾ സമീപ​വർഷ​ങ്ങ​ളിൽ സത്വരം പുരോ​ഗ​മി​ച്ചി​ട്ടു​ണ്ടെ​ങ്കി​ലും പനാമാ കനാൽ ഇപ്പോ​ഴും ലോക​വ്യാ​പാ​ര​ത്തി​ലെ ഒരു മർമ്മ​പ്ര​ധാന ചങ്ങലക്ക​ണ്ണി​യാ​യി സേവി​ക്കു​ന്നു. വാർഷി​ക​മാ​യി ഏതാണ്ട്‌ 14 കോടി 50 ലക്ഷം ടൺ ചരക്കു കയററി​ക്കൊണ്ട്‌ 12,000ത്തിലധികം കപ്പലുകൾ അതിലെ കടന്നു​പോ​കു​ന്നു. വരും​വർഷ​ങ്ങ​ളിൽ കനാൽ “ദേശം വിഭജി​തം, ലോകം സംയോ​ജി​തം” എന്ന്‌ ഒരുവന്‌ കണ്ടെത്താൻ കഴിയുന്ന ഒരു സ്ഥലമായി തുടരു​മെ​ന്ന​തി​നു സംശയ​മില്ല. (g89 12/8)

[21-ാം പേജിലെ ഭൂപടം]

(പൂർണ​രൂ​പ​ത്തിൽ കാണു​ന്ന​തി​നു പ്രസി​ദ്ധീ​ക​രണം നോക്കുക.)

വടക്കെ അമേരിക്ക

മദ്ധ്യ അമേരിക്ക

പനാമാ കനാൽ

തെക്കെ അമേരിക്ക

[21-ാം പേജിലെ ചിത്രം]

ഓഗസ്‌ററ്‌ 15, 1914-ന്‌ ആങ്കൺ എന്ന കപ്പൽ ഈ കനാലി​ലൂ​ടെ കടന്നു​പോ​യി