ലോല​മായ ചിറകു​ക​ളിൽമ​രണം

ഇതു വാർത്താ​ത​ല​ക്കെ​ട്ടു​കൾ കയ്യടക്കുന്ന ഒരു യുദ്ധമല്ല; എങ്കിൽപ്പോ​ലും ഇത്‌ എണ്ണമററ ലക്ഷക്കണ​ക്കി​നു മനുഷ്യ ജീവി​ത​ങ്ങളെ അപഹരി​ച്ചി​ട്ടുണ്ട്‌. ഇതു ബോം​ബു​ക​ളും വെടി​യു​ണ്ട​ക​ളും ഉപയോ​ഗി​ച്ചു നടത്തുന്ന ഒരു യുദ്ധമല്ല; എങ്കിലും യാതന​ക​ളും ജീവന​ഷ്ട​വും കണക്കാ​ക്കി​യാൽ അത്തരം യുദ്ധങ്ങ​ളോ​ടു കിട പിടി​ക്കു​ക​യോ അവയെ കവച്ചു വയ്‌ക്കു​ക​യോ ചെയ്യുന്നു. ഈ യുദ്ധത്തിൽ മരണം വരുന്നതു ശത്രു​വി​ന്റെ വൻ ബോംബർ വിമാ​ന​ങ്ങ​ളി​ലെ ബോം​ബ​റ​ക​ളി​ലല്ല, പിന്നെ​യോ ഒരു പെൺകൊ​തു​കി​ന്റെ ലോല​മായ ചിറകു​ക​ളി​ലാണ്‌.

നൈജീരിയയിലെഉണരുക! ലേഖകൻ

രാത്രി​യാണ്‌; വീട്ടി​ലു​ള്ള​വ​രെ​ല്ലാം ഉറങ്ങുന്നു. കിടക്ക​മു​റി​യി​ലേക്ക്‌ ഒരു കൊതു​കു ചിറക​ടി​ച്ചെ​ത്തു​ന്നു, അവളുടെ ചിറകു​കൾ ഒരു സെക്കൻറിൽ 200-നും 500-നുമി​ട​യ്‌ക്ക്‌ അടിക്കു​ന്നുണ്ട്‌. അവൾ മനുഷ്യ​ര​ക്ത​ത്തി​നാ​യി ദാഹി​ക്കു​ന്നു. അവൾ സാവധാ​നം ഒരു ബാലന്റെ കൈമേൽ വന്നിരി​ക്കു​ന്നു. അവളുടെ ഭാരം ഒരു ഗ്രാമി​ന്റെ 3⁄1,000 മാത്ര​മാ​യ​തു​കൊണ്ട്‌ അവൻ കിടക്ക​യിൽനിന്ന്‌ എഴു​ന്നേൽക്കു​ന്നില്ല. അപ്പോൾ അവൾ തന്റെ വായുടെ മുള്ളു​പോ​ലുള്ള അഗ്രഭാ​ഗത്തെ വാൾമു​ന​പോ​ലെ കൂർത്ത കൊമ്പ്‌ പുറ​ത്തേക്കു നീട്ടുന്നു, അത്‌ അവൾ രക്തക്കു​ഴ​ലി​നു​മീ​തെ കുട്ടി​യു​ടെ തൊലി​യിൽ കുത്തി​യി​റ​ക്കു​ന്നു. അവളുടെ തലയി​ലുള്ള രണ്ടു പമ്പുകൾ അവന്റെ രക്തം വലി​ച്ചെ​ടു​ക്കു​ന്നു. അതേസ​മ​യം​തന്നെ, കൊതു​കി​ന്റെ ഉമിനീർ ഗ്രന്ഥി​ക​ളിൽനി​ന്നുള്ള മലമ്പനി പരാദങ്ങൾ കുട്ടി​യു​ടെ രക്തധാ​ര​യി​ലേക്കു പ്രവേ​ശി​ക്കു​ക​യും ചെയ്യുന്നു. ഉദ്യമം പെട്ടെന്നു തീരുന്നു; അവൻ ഒന്നും അറിയു​ന്നില്ല. തന്റെ ശരീര​ഭാ​ര​ത്തി​ന്റെ മൂന്നു മടങ്ങോ​ളം അളവിൽ രക്തം കുടിച്ചു വീർത്ത കൊതുക്‌ പറന്നക​ലു​ന്നു. അധിക​നാൾ കഴിയു​ന്ന​തി​നു​മു​മ്പു കുട്ടി മരണാ​സ​ന്ന​മാം​വി​ധം രോഗി​യാ​യി​ത്തീ​രു​ന്നു. അവനു മലമ്പനി പിടി​ച്ചി​രി​ക്കു​ന്നു.

കോടി​ക്ക​ണ​ക്കി​നു പ്രാവ​ശ്യം ആവർത്തി​ച്ചി​ട്ടുള്ള ഒരു രംഗമാ​ണിത്‌. ഫലം ഭീമമായ അളവിൽ യാതന​യും മരണവു​മാ​യി​രു​ന്നി​ട്ടുണ്ട്‌. നിസ്സം​ശ​യ​മാ​യും മലമ്പനി മനുഷ്യ​വർഗ​ത്തി​ന്റെ ക്രൂര​നും നിർദ​യ​നു​മായ ഒരു ശത്രു​വാണ്‌.

ശത്രു​വി​നു​വേ​ണ്ടി​യുള്ള ക്ഷമാപൂർവ​ക​മായ അന്വേ​ഷ​ണം

മലമ്പനി​ക്കെ​തി​രായ പോരാ​ട്ട​ത്തിൽ സുപ്ര​ധാ​ന​മായ കണ്ടുപി​ടി​ത്ത​ങ്ങ​ളി​ലൊ​ന്നു നടത്തി​യതു യൂറോ​പ്പി​ലെ വലിയ ശാസ്‌ത്ര​ജ്ഞരല്ല, പിന്നെ​യോ ഇൻഡ്യ കേന്ദ്ര​മാ​ക്കി പ്രവർത്തിച്ച ഒരു ബ്രിട്ടീഷ്‌ പട്ടാള സർജനാ​യി​രു​ന്നു. പത്തൊ​മ്പ​താം നൂററാ​ണ്ടി​ലെ ശാസ്‌ത്ര​കാ​രൻമാ​രും ഡോക്ടർമാ​രും, കഴിഞ്ഞ രണ്ടായി​രം വർഷത്തെ ധാരണക്കു ചേർച്ച​യിൽ ആളുകൾക്കു മലമ്പനി പിടി​പെ​ടു​ന്നതു ചെളി​വെള്ളം കെട്ടി​നിൽക്കുന്ന സ്ഥലങ്ങളി​ലെ മലിന​വാ​യു ശ്വസി​ക്കു​ന്ന​തു​കൊ​ണ്ടാ​ണെന്നു നിഗമനം ചെയ്‌തു. അതിനു വിപരീ​ത​മാ​യി, ഒരാളിൽനി​ന്നു മറെറാ​രാ​ളി​ലേക്ക്‌ ഈ രോഗം പകരു​ന്നതു കൊതു​കു​കൾ വഴിയാ​ണെന്നു ഡോ. റൊണാൾഡ്‌ റോസ്‌ ഊഹിച്ചു. മമനു​ഷ്യ​ന്റെ രക്തവ്യൂ​ഹ​ത്തിൽ മലമ്പനി പരാദങ്ങൾ ഉണ്ടെന്ന്‌ അറിവാ​യ​ശേ​ഷം​പോ​ലും, ഗവേഷകർ ചതുപ്പു​നി​ല​പ്ര​ദേ​ശത്തെ വായു​വി​ലും വെള്ളത്തി​ലും രോഗ​ഹേ​തു​വി​നെ​പ്പ​റ​റി​യുള്ള തുമ്പു കിട്ടാൻ അന്വേ​ഷണം നടത്തു​ന്ന​തിൽ തുടർന്നു. ആ സമയത്തു റോസ്‌ കൊതു​കു​ക​ളു​ടെ വയറ്‌ പരി​ശോ​ധി​ച്ചു.

അദ്ദേഹ​ത്തി​നു പ്രവർത്തി​ക്കേ​ണ്ടി​യി​രുന്ന ഏററവും പ്രാകൃ​ത​മായ ലാബ്‌ സജ്ജീക​ര​ണ​ങ്ങ​ളു​ടെ കാര്യം പരിചി​ന്തി​ക്കു​മ്പോൾ, കൊതു​കു​ക​ളു​ടെ വയററി​ലേക്കു നോക്കു​ക​യെ​ന്നു​ള്ളത്‌ എളുപ്പ​മുള്ള ഒരു കാര്യ​മാ​യി​രു​ന്നില്ല. അദ്ദേഹം ജോലി ചെയ്‌തു​കൊ​ണ്ടി​രു​ന്ന​പ്പോൾ കൊതു​കി​ന്റെ​യും ഈച്ചയു​ടെ​യും കൂട്ടങ്ങൾ അദ്ദേഹ​ത്തി​നു ചുററും കൂടി, റോസ്‌ പറയു​ന്ന​ത​നു​സ​രിച്ച്‌, “തങ്ങളുടെ സ്‌നേ​ഹി​ത​രു​ടെ മരണത്തിന്‌” പ്രതി​കാ​രം ചെയ്യാൻ ദൃഢതീ​രു​മാ​നം ചെയ്‌ത​മ​ട്ടിൽ.

ഒടുവിൽ, 1897 ആഗസ്‌ററ്‌ 16-ാം തീയതി, അനോ​ഫി​ലിസ്‌ കൊതു​കി​ന്റെ ആമാശയ ഭിത്തി​ക​ളിൽ ഒററരാ​ത്രി​കൊ​ണ്ടു വലിപ്പം വച്ച ഗോളാ​കൃ​തി​യി​ലുള്ള സൂക്ഷ്‌മാ​ണു​ക്കളെ റോസ്‌ കണ്ടെത്തി. മലമ്പനി പരാദങ്ങൾ!

“ഒരായി​രം മനുഷ്യ​രെ” രക്ഷിക്കാൻ പോകുന്ന രഹസ്യം താൻ അനാവ​രണം ചെയ്‌ത​താ​യി സന്തോ​ഷാ​തി​രേ​ക​ത്തിൽ റോസ്‌ തന്റെ നോട്ടു​ബു​ക്കിൽ എഴുതി. അദ്ദേഹം കൊരി​ന്ത്യർക്കുള്ള ബൈബിൾ പുസ്‌ത​ക​ത്തിൽനി​ന്നുള്ള ഒരു വാക്യ​വും എഴുതി: “ഹേ മരണമേ, നിന്റെ ജയം എവിടെ? ഹേ മരണമേ, നിന്റെ വിഷമു​ള്ളു എവിടെ?”—1 കൊരി​ന്ത്യർ 15:55 താരത​മ്യ​പ്പെ​ടു​ത്തുക.

മലമ്പനി​യു​ടെ കെടു​തി​കൾ

മലമ്പനി​ക്കെ​തി​രായ പോരാ​ട്ട​ത്തിൽ റോസി​ന്റെ കണ്ടുപി​ടി​ത്തം ഒരു നാഴി​ക​ക്ക​ല്ലാ​യി​രു​ന്നു, ഈ രോഗ​ത്തി​നെ​തി​രെ​യും അതിനെ വഹിക്കുന്ന ജീവി​കൾക്കെ​തി​രെ​യും ഉള്ള മനുഷ്യ​വർഗ​ത്തി​ന്റെ പ്രമു​ഖ​മായ പ്രഥമ പോരാ​ട്ട​ത്തി​നു വഴിതു​റ​ക്കാൻ സഹായിച്ച ഒന്നായി​രു​ന്നു അത്‌.

ചരി​ത്ര​ത്തി​ന്റെ ഏറിയ കാലത്തു​ട​നീ​ളം മലമ്പനി നിമി​ത്ത​മുള്ള മനുഷ്യ​ജീ​വന്റെ നഷ്ടം വലുതും നീണ്ടു​നി​ന്ന​തു​മാ​യി​രു​ന്നു. ക്രിസ്‌തു ഭൂമി​യിൽ വരുന്ന​തിന്‌ 1,500 വർഷം മുമ്പത്തെ മലമ്പനി​യു​ടെ കൂട്ടസം​ഹാ​രത്തെ ഈജി​പ്‌ഷ്യൻ ചിത്ര​ലി​ഖി​ത​ങ്ങ​ളും പാപ്പി​റസ്‌ എഴുത്തു​ക​ളും സാക്ഷ്യ​പ്പെ​ടു​ത്തു​ന്നു. അതു പുരാതന ഗ്രീസി​ന്റെ മനോ​ജ്ഞ​മായ താഴ്‌വ​ര​ന​ഗ​ര​ങ്ങ​ളിൽ വിനാശം വിതച്ചു. നവയൗ​വ​ന​ത്തിൽ തന്നെ മഹാനായ അലക്‌സാ​ണ്ട​റി​നെ വെട്ടി​വീ​ഴ്‌ത്തി. അതു റോമൻ നഗരങ്ങൾ ശൂന്യ​ശു​ഷ്‌ക​മാ​ക്കു​ക​യും സമ്പന്നരെ പർവത​പ്രാ​ന്ത​ങ്ങ​ളി​ലേക്കു പലായനം ചെയ്യി​ക്കു​ക​യും ചെയ്‌തു. കുരി​ശു​യു​ദ്ധ​ങ്ങ​ളി​ലും അമേരി​ക്കൻ ആഭ്യന്ത​ര​യു​ദ്ധ​ത്തി​ലും രണ്ടു ലോക​മ​ഹാ​യു​ദ്ധ​ങ്ങ​ളി​ലും ഏററു​മു​ട്ട​ലു​ക​ളിൽ മരിച്ച​വ​രെ​ക്കാൾ കൂടു​ത​ലാ​ളു​കൾ മലമ്പനി ബാധിച്ചു മരിച്ചു.

അഫ്രി​ക്ക​യിൽ, “വെള്ളക്കാ​രന്റെ ശവക്കുഴി” എന്ന അപരനാ​മം പശ്ചിമാ​ഫ്രി​ക്ക​യ്‌ക്കു നേടി​ക്കൊ​ടു​ത്തതു മലമ്പനി​യാണ്‌. വാസ്‌ത​വ​ത്തിൽ ആഫ്രി​ക്കയെ സ്വന്തം കോള​നി​ക​ളാ​ക്കാ​നുള്ള യൂറോ​പ്യൻ കിടമ​ത്സ​രത്തെ ഈ രോഗം അതിശ​ക്ത​മാ​യി ചെറു​ത്ത​തു​കൊണ്ട്‌ ഒരു പശ്ചിമാ​ഫ്രി​ക്കൻ സർവക​ലാ​ശാല ഈ കൊതു​കി​നെ ഒരു ദേശീയ നായക​നാ​യി​വരെ പ്രഖ്യാ​പി​ച്ചു! മധ്യഅ​മേ​രി​ക്ക​യിൽ പനാമാ​ക​നാൽ പണിയാ​നുള്ള ഫ്രഞ്ച്‌ ഉദ്യമ​ങ്ങളെ പരാജ​യ​പ്പെ​ടു​ത്താൻ മലമ്പനി ഇടയാക്കി. തെക്കേ അമേരി​ക്ക​യി​ലെ ബ്രസ്സീ​ലിൽ മാം​മോ​റേ-മഡൈയ്‌റ റെയിൽപ്പാ​ത​യു​ടെ നിർമാ​ണ​ത്തിൽ പാളങ്ങ​ളു​ടെ കുറുകെ താങ്ങു​തടി ഇട്ടപ്പോ​ഴും മലമ്പനി ഒരു മാനു​ഷ​ജീ​വൻ അപഹരി​ച്ച​താ​യി പറയ​പ്പെ​ടു​ന്നു.

ജയിക്കാ​നുള്ള പോരാ​ട്ടം

എന്നാൽ മലമ്പനി​ക്കെ​തി​രെ​യാ​ണെ​ന്ന​റി​ഞ്ഞു​കൊ​ണ്ട​ല്ലാ​തുള്ള, കൊതു​കി​നെ​തി​രായ ആക്രമണം സഹസ്രാ​ബ്ദ​ങ്ങ​ളോ​ളം വ്യാപി​ച്ചു കിടക്കു​ന്നു. പൊ.യു.മു. (പൊതു​യു​ഗ​ത്തി​നു​മുമ്പ്‌) 16-ാം നൂററാ​ണ്ടിൽ ഈജി​പ്‌റ​റു​കാർ ബലാ​നൈ​റ​റ്‌സ്‌ വിൽസോ​ണി​യാന എന്ന വൃക്ഷത്തിൽനി​ന്നുള്ള എണ്ണ ഒരു കൊതുക്‌ പ്രതി​രോ​ധകം എന്ന നിലയിൽ ഉപയോ​ഗി​ച്ചി​രു​ന്നു. ആയിരം വർഷത്തി​നു​ശേഷം, പ്രാണി​കളെ അകററി​നിർത്താൻ ഈജി​പ്‌റ​റി​ലെ മീൻപി​ടു​ത്ത​ക്കാർ തങ്ങളുടെ വലകൾ രാത്രി​കാ​ല​ങ്ങ​ളിൽ കിടക്ക​യ്‌ക്കു​ചു​റ​റും ചുററി​യി​രു​ന്ന​താ​യി ഹെറോ​ഡോ​ട്ടസ്‌ എഴുതി. പതി​നേഴു നൂററാ​ണ്ടു​കൾ കഴിഞ്ഞ്‌, ഇൻഡ്യ​യി​ലെ സമ്പന്ന നിവാ​സി​കൾ രാത്രി​യിൽ ആസകലം മൂടാൻ കഴിയുന്ന സംരക്ഷക കർട്ടനു​കൾ ഉള്ള കിടക്ക​മേൽ ഉറങ്ങി​യി​രു​ന്ന​താ​യി മാർക്കോ പോളോ റിപ്പോർട്ടു ചെയ്‌തു.

മററി​ട​ങ്ങ​ളി​ലും യഥാർഥ മൂല്യ​മുള്ള സ്വാഭാ​വിക പ്രതി​വി​ധി​കൾ മനുഷ്യർ കണ്ടുപി​ടി​ച്ചു. സമീപ​വർഷ​ങ്ങ​ളിൽ വീണ്ടും കണ്ടെത്തി​യി​രി​ക്കുന്ന ഒരു ഔഷധ സസ്യമായ ചിംങ്‌ഹ്വാ​സു എന്ന ചെടി ഉപയോ​ഗി​ച്ചു ചൈന​യിൽ 2,000 വർഷത്തി​നു​മേൽ മലമ്പനി​യെ വിജയ​പ്ര​ദ​മാ​യി ചികി​ത്സി​ച്ചി​രു​ന്നു. തെക്കേ അമേരി​ക്ക​യിൽ പെറൂ​വി​യൻ ഇൻഡ്യാ​ക്കാർ കൊയി​നാ​മ​ര​ത്തി​ന്റെ [cinchona tree] തൊലി ഉപയോ​ഗി​ച്ചി​രു​ന്നു. പതി​നേ​ഴാം നൂററാ​ണ്ടിൽ കൊയി​നാ​മരം യൂറോ​പ്പിൽ എത്തി, 1820-ൽ പാരീ​സി​ലെ മരുന്നു വ്യാപാ​രി​കൾ അതിൽനി​ന്നു ക്വി​നൈൻ എന്നു വിളി​ക്ക​പ്പെ​ടുന്ന ഒരു ക്ഷാരവത്ത്‌ [alkaloid] വേർതി​രി​ച്ചെ​ടു​ത്തു.

പുതിയ ആയുധങ്ങൾ

മലമ്പനി​യെ തടയു​ന്ന​തി​ലും ചികി​ത്സി​ക്കു​ന്ന​തി​ലു​മുള്ള ക്വി​നൈന്റെ മൂല്യം താമസി​ച്ചേ വിലമ​തി​ക്ക​പ്പെ​ട്ടു​ള്ളു, എന്നാൽ അതിന്റെ മൂല്യം വിലമ​തി​ക്ക​പ്പെ​ടാൻ തുടങ്ങി​യ​പ്പോൾ, ഒരു ശതകക്കാ​ലം അതു ശുപാർശ ചെയ്യ​പ്പെ​ടുന്ന മരുന്നാ​യി മാറി. പിന്നീട്‌, രണ്ടാം ലോക​മ​ഹാ​യു​ദ്ധ​ത്തി​ന്റെ പ്രാരം​ഭ​ത്തിൽ, ജപ്പാൻ സൈന്യം വിദൂര പൂർവ​ദേ​ശത്തെ പ്രധാ​ന​പ്പെട്ട കൊയി​നാ​മ​ര​ത്തോ​ട്ടങ്ങൾ പിടി​ച്ചെ​ടു​ത്തു. തത്‌ഫ​ല​മാ​യി ഐക്യ​നാ​ടു​ക​ളി​ലു​ണ്ടായ ക്വി​നൈന്റെ രൂക്ഷമായ ക്ഷാമം, മലമ്പനി​യെ ചെറു​ത്തു​നിൽക്കുന്ന ഒരു കൃത്രി​മ​മ​രു​ന്നു വികസി​പ്പി​ച്ചെ​ടു​ക്കു​ന്ന​തി​നുള്ള തീവ്ര​മായ ഗവേഷ​ണ​ത്തിന്‌ ഉത്തേജനം നൽകി. അതിന്റെ ഫലം, സുരക്ഷി​ത​വും വളരെ ഫലപ്ര​ദ​വും ചെലവു കുറഞ്ഞ​വി​ധ​ത്തിൽ നിർമി​ക്കാൻ കഴിയു​ന്ന​തു​മായ ക്ലോ​റോ​ക്വിൻ എന്ന മരുന്നാ​യി​രു​ന്നു.

ക്ലോ​റോ​ക്വിൻ പെട്ടെ​ന്നു​തന്നെ മലമ്പനി​ക്കെ​തി​രായ ഒരു പ്രമുഖ ആയുധ​മാ​യി​ത്തീർന്നു. കൂടാതെ 1940-കളിൽ ശക്തി​യേ​റിയ കൊതു​കു സംഹാ​രി​യായ ഡിഡി​ററി [DDT] എന്ന കീടനാ​ശി​നി​യും അവതരി​പ്പി​ക്ക​പ്പെട്ടു. ഡിഡി​ററി ഡൈക്ലോറോഡൈഫിനൈൽട്രൈക്ലോറോഈഥേൻ എന്നതിന്റെ ഹ്രസ്വ​രൂ​പ​മാണ്‌. തളിക്കുന്ന സമയത്തു ഡിഡി​ററി കൊതു​കു​കളെ കൊല്ലുക മാത്രമല്ല, തളിച്ച ഭിത്തി​മേ​ലുള്ള അതിന്റെ അവശിഷ്ടം പിന്നീടു പ്രാണി​കളെ നശിപ്പി​ക്കു​ക​യും ചെയ്യുന്നു.

ശുഭാ​പ്‌തി​വി​ശ്വാ​സ​ത്തോ​ടെ​യുള്ള പ്രത്യാ​ക്ര​മ​ണം

രണ്ടാം ലോക​മ​ഹാ​യു​ദ്ധാ​ന​ന്തരം, ശാസ്‌ത്ര​ജ്ഞൻമാർ ഡിഡി​റ​റി​യും ക്ലോ​റോ​ക്വി​നും​കൊ​ണ്ടു സായു​ധ​രാ​യി മലമ്പനി​ക്കും കൊതു​കു​കൾക്കു​മെ​തി​രെ ഒരു പ്രത്യാ​ക്ര​മണം സംഘടി​പ്പി​ച്ചു. പോരാ​ട്ടം രണ്ടു വിധങ്ങ​ളിൽ നടത്തേ​ണ്ടി​യി​രു​ന്നു—മനുഷ്യ​ശ​രീ​ര​ത്തി​ലുള്ള പരാദ​ങ്ങളെ നശിപ്പി​ക്കാൻ മരുന്നു​കൾ ഉപയോ​ഗി​ച്ചും അതേസ​മയം കൊതു​കു​കളെ നശിപ്പി​ക്കാൻ കീടനാ​ശി​നി​കൾ ധാരാളം തളിച്ചു​കൊ​ണ്ടും.

ലക്ഷ്യം സമ്പൂർണ വിജയ​മാ​യി​രു​ന്നു. മലമ്പനി നിശ്ശേഷം തുടച്ചു​നീ​ക്ക​പ്പെ​ടാൻ പോവു​ക​യാ​യി​രു​ന്നു. ആക്രമ​ണ​ത്തി​നു നേതൃ​ത്വം നൽകി​യത്‌ നിർമാർജന പരിപാ​ടിക്ക്‌ ഉയർന്ന പരിഗണന നൽകിയ, പുതു​താ​യി സ്ഥാപി​ത​മായ ലോകാ​രോ​ഗ്യ​സം​ഘടന (WHO) ആയിരു​ന്നു. ലോകാ​രോ​ഗ്യ​സം​ഘ​ട​ന​യു​ടെ ദൃഢനി​ശ്ച​യ​ത്തി​നു സാമ്പത്തിക പിന്തുണ ലഭിച്ചു. ആഗോള യജ്ഞത്തിൽ 1957-നും 1967-നും ഇടയിൽ രാഷ്‌ട്രങ്ങൾ 140 കോടി ഡോളർ ചെലവ​ഴി​ച്ചു. പ്രാരം​ഭ​ഫ​ലങ്ങൾ ശ്രദ്ധേ​യ​മാ​യി​രു​ന്നു. യൂറോ​പ്പി​ലും വടക്കേ അമേരി​ക്ക​യി​ലും സോവി​യ​ററ്‌ യൂണി​യ​നി​ലും ആസ്‌​ട്രേ​ലി​യ​യി​ലും തെക്കേ അമേരി​ക്ക​യി​ലെ ചില രാജ്യ​ങ്ങ​ളി​ലും ഈ രോഗം കീഴടങ്ങി. മലമ്പനി​ക്കെ​തി​രെ പൊരു​തുന്ന ഒരു വിദഗ്‌ധ പ്രൊ​ഫ​സ്സ​റായ എൽ. ജെ. ബ്രൂഷ്വാ​ററ്‌ ഇപ്രകാ​രം അനുസ്‌മ​രി​ച്ചു: “സമാധാ​ന​പൂർണ​മായ ആ നാളു​ക​ളിൽ ലോക​ത്തു​ട​നീ​ളം നിർമാർജനം എന്ന ആശയം ഉളവാ​ക്കിയ വലിയ ഉത്സാഹത്തെ വർണി​ക്കുക ഇന്നു പ്രയാ​സ​മാ​യി​രി​ക്കും.” മലമ്പനി തളർന്ന​ടി​യു​ക​യാ​യി​രു​ന്നു! ലോകാ​രോ​ഗ്യ​സം​ഘടന ഇപ്രകാ​രം അഹങ്കരി​ച്ചു: “മലമ്പനി നിർമാർജനം നമ്മുടെ വരുതി​യി​ലൊ​തു​ങ്ങിയ യാഥാർഥ്യ​മാ​യി​ത്തീർന്നി​രി​ക്കു​ന്നു.”

മലമ്പനി​യു​ടെ പ്രത്യാ​ക്ര​മ​ണം

എന്നാൽ വിജയം പിന്നെ​യും വഴുതി​പ്പോ​യി. രാസവ​സ്‌തു​ക്ക​ളു​ടെ ആക്രമ​ണത്തെ അതിജീ​വിച്ച കൊതു​കു​ക​ളു​ടെ തലമു​റകൾ കീടനാ​ശി​നി​കൾക്കെ​തി​രെ കൂടുതൽ പ്രതി​രോ​ധ​ശേ​ഷി​യു​ള്ള​വ​രാ​യിത്തീർന്നു. മേലാൽ ഡിഡി​ററി മുമ്പ​ത്തെ​പ്പോ​ലെ അത്ര​യെ​ളു​പ്പം അവയെ കൊല്ലു​ന്നില്ല. അതു​പോ​ലെ​തന്നെ, മനുഷ്യ​രി​ലെ മലമ്പനി പരാദങ്ങൾ ക്ലോ​റോ​ക്വി​നെ​തി​രെ പ്രതി​രോ​ധ​ശേഷി ആർജി​ച്ചു​ക​ഴി​ഞ്ഞി​രു​ന്നു. ഇവയും മററു​ചില പ്രശ്‌ന​ങ്ങ​ളും വിജയം സുനി​ശ്ചി​ത​മെന്നു കരുതി​യി​രുന്ന ചില നാടു​ക​ളിൽ അതിന്റെ ഭയങ്കര​മായ തിരി​ച്ചു​വ​ര​വി​നു കാരണ​മാ​യി​ത്തീർന്നു. ദൃഷ്ടാ​ന്ത​ത്തിന്‌, 1963-ൽ മലമ്പനി അന്തിമ​മാ​യി തുടച്ചു​നീ​ക്കി എന്നു വിചാ​രി​ച്ചി​രുന്ന ശ്രീലങ്ക, കേവലം അഞ്ചു വർഷത്തി​നു​ശേഷം ലക്ഷങ്ങളെ ബാധി​ക്കുന്ന പകർച്ച​വ്യാ​ധി അനുഭ​വി​ച്ചു.

ആയിര​ത്തി​ത്തൊ​ള്ളാ​യി​ര​ത്ത​റു​പ​ത്തൊ​മ്പത്‌ ആയപ്പോ​ഴേക്കു മലമ്പനി ജയിച്ച​ട​ക്കാൻ കഴിയാത്ത ഒരു ശത്രു​വാ​ണെന്നു പരക്കെ അംഗീ​ക​രി​ക്ക​പ്പെട്ടു. “നിർമാർജനം” എന്ന വാക്കിനു പകരം “നിയ​ന്ത്രണം” എന്ന പദം പ്രയോ​ഗ​ത്തിൽ വന്നു. “നിയ​ന്ത്രണം” എന്നതി​നാൽ എന്താണ്‌ അർഥമാ​ക്കു​ന്നത്‌? ലോകാ​രോ​ഗ്യ​സം​ഘ​ട​ന​യു​ടെ മലമ്പനി വിഭാ​ഗ​ത്തി​ന്റെ തലവനായ ഡോ. ബ്രയൻ ഡോബർസ്‌റ​റിൻ ഇങ്ങനെ വിശദീ​ക​രി​ക്കു​ന്നു: “ഇപ്പോൾ നമുക്കു ചെയ്യാൻ കഴിയു​ന്നതു മരണവും ദുരി​ത​വും ഒരു ന്യായ​മായ പരിധി​യിൽ ഒതുക്കി നിർത്തുക എന്നതാണ്‌.”

ലോകാ​രോ​ഗ്യ​സം​ഘ​ട​ന​യു​ടെ മറെറാ​രു ഉദ്യോ​ഗസ്ഥൻ ഇവ്വണ്ണം വിലപി​ക്കു​ന്നു: “1950-കളിലെ മലമ്പനി നിർമാർജന ശ്രമങ്ങൾക്കും കീടങ്ങൾക്കെ​തി​രെ​യുള്ള ഡിഡി​റ​റി​യു​ടെ ഉപയോ​ഗ​ത്തി​നും ശേഷം അന്തർദേ​ശീയ സമൂഹ​ത്തിന്‌ ആലസ്യം ബാധി​ച്ചി​രി​ക്കു​ന്നു.” ദാരി​ദ്ര്യ​വും അടിസ്ഥാ​ന​സം​വി​ധാ​ന​ങ്ങ​ളു​ടെ [infrastructure] കുറവും മരുന്നു​ക​ളോ​ടും കീടനാ​ശി​നി​ക​ളോ​ടും ഉള്ള ചെറു​ത്തു​നിൽപ്പും രോഗ​ത്തി​ന്റെ മുന്നേ​റ​റ​ത്തി​ലേക്കു നയിച്ചി​രി​ക്കു​ന്നു. വാസ്‌ത​വ​ത്തിൽ, രോഗം നമ്മെ ജയിച്ച​ട​ക്കി​യി​രി​ക്കു​ന്നു.”

ഇനിയും മറെറാ​രു ഘടകം മരുന്നു​ക​മ്പ​നി​കൾ തങ്ങളുടെ ഗവേഷ​ണ​ത്തിൽനി​ന്നു പിൻമാ​റി​യി​രി​ക്കു​ന്നു എന്നതാണ്‌. ഒരു മലമ്പനി ശാസ്‌ത്രജ്ഞൻ ഇപ്രകാ​രം പറഞ്ഞു: “വളരെ​യ​ധി​കം മുതൽമു​ടക്കു വേണ്ടി​വ​രു​ന്നു എന്നതാണു പ്രശ്‌നം, എന്നാൽ ലാഭം പൂജ്യം, പ്രോ​ത്സാ​ഹനം ശൂന്യം.” അതേ, പല പോരാ​ട്ട​ങ്ങ​ളിൽ വിജയി​ച്ചി​ട്ടു​ണ്ടെ​ങ്കി​ലും മലമ്പനി​ക്കെ​തി​രെ​യുള്ള പോരാ​ട്ട​ത്തിൽ വിജയി​ച്ചി​ട്ടില്ല. എന്നുവ​രി​കി​ലും, “‘എനിക്കു രോഗ​മാണ്‌’ എന്ന്‌ ഒരു നിവാ​സി​യും പറയാത്ത,” വളരെ സമീപ​മാ​യി​രി​ക്കുന്ന ഒരു കാല​ത്തേക്കു ബൈബിൾ വിരൽ ചൂണ്ടുന്നു. (യെശയ്യാവ്‌ 33:24, NW) അതുവരെ പിന്നെ​യും രോഗ​വും മരണവും ലോല​മായ ചിറകു​ക​ളിൽ വന്നെത്തും. (g93 5⁄8)

[അടിക്കു​റി​പ്പു​കൾ]

“മലമ്പനി” [ഇംഗ്ലീഷ്‌, മലേറിയ] എന്ന പദം വരുന്നത്‌ മാലാ (മോശ​മായ) ഏറിയ (വായു) എന്ന ഇററാ​ലി​യൻ പദത്തിൽനി​ന്നാണ്‌.

ഡിഡിററി പരിസ്ഥി​തി​ക്കു ദോഷം ചെയ്യു​ന്നു​വെന്നു കണ്ടതി​നാൽ അത്‌ 45 രാജ്യ​ങ്ങ​ളിൽ നിരോ​ധി​ക്കു​ക​യോ ശക്തമായി നിയ​ന്ത്രി​ക്കു​ക​യോ ചെയ്‌തി​രി​ക്കു​ക​യാണ്‌.

[25-ാം പേജിലെ ചതുരം]

കൊതുക്‌ മനുഷ്യ​നെ​തി​രെ

നൂറു രാജ്യ​ങ്ങ​ളി​ലാ​യി അതു മാനവ​രാ​ശി​യു​ടെ ഏതാണ്ടു പകുതി​യെ​ത്തന്നെ ഭീഷണി​പ്പെ​ടു​ത്തു​ന്നു, ഏറെയും ഉഷ്‌ണ​മേ​ഖ​ലാ​പ്ര​ദേ​ശത്ത്‌. വിശേ​ഷിച്ച്‌ ആഫ്രിക്ക അതിന്റെ ശക്തിദുർഗ​മാണ്‌.

ഉഷ്‌ണ​മേ​ഖലാ പ്രദേ​ശ​ങ്ങ​ളിൽനി​ന്നുള്ള വിമാ​ന​ങ്ങ​ളിൽ കൊതു​കു​കൾ കയറി​ക്കൂ​ടു​ന്ന​താ​യും അന്തർദേ​ശീയ വിമാ​ന​ത്താ​വ​ള​ങ്ങൾക്കു സമീപം വസിക്കുന്ന അളുകളെ അതു ബാധി​ച്ച​താ​യും അറിവാ​യി​ട്ടുണ്ട്‌

രോഗം വിതച്ച വിപത്ത്‌. ഓരോ വർഷവും 20 ലക്ഷത്തോ​ളം ആളുകളെ കൊന്നു​കൊണ്ട്‌ അത്‌ 27 കോടി ആളുകളെ ബാധി​ക്കു​ന്നു. വിശേ​ഷി​ച്ചു ഗർഭി​ണി​കൾക്കും കുട്ടി​കൾക്കും അതു മാരക​മാണ്‌, ബാലജ​ന​ങ്ങളെ ഓരോ മിനി​റ​റി​ലും ശരാശരി രണ്ട്‌ എന്ന കണക്കിന്‌ അതു കൊല്ലു​ന്നു.

ഉഷ്‌ണ​മേ​ഖലാ പ്രദേ​ശങ്ങൾ സന്ദർശി​ക്കു​ന്ന​വരെ അത്‌ ആക്രമി​ക്കു​ന്നു. പ്രതി​വർഷം “ഇറക്കു​മതി ചെയ്യ​പ്പെ​ടുന്ന” മലമ്പനി​യു​ടെ ഏതാണ്ട്‌ 10,000 കേസുകൾ യൂറോ​പ്പി​ലും 1,000-ത്തിലധി​കം കേസുകൾ തെക്കേ അമേരി​ക്ക​യി​ലും റിപ്പോർട്ടു ചെയ്യ​പ്പെ​ടു​ന്നു.

തന്ത്രങ്ങൾ. പെൺ അനോ​ഫി​ലിസ്‌ കൊതു​കു​കൾ മുഖ്യ​മാ​യും രാത്രി​യി​ലാ​ണു മനുഷ്യ​രിൽ രോഗ​പ്പ​കർച്ച നടത്തു​ന്നത്‌. രക്തപ്പകർച്ച​യി​ലൂ​ടെ​യും ചില​പ്പോൾ മലിന​മായ സൂചി​ക​ളി​ലൂ​ടെ​യും മലമ്പനി പകരുന്നു.

അടുത്ത കാലത്തു മാത്ര​മാ​ണു പ്രത്യാ​ക്ര​മണം നടത്താൻ മനുഷ്യന്‌ അറിവും മാർഗ​വും ഉണ്ടായത്‌. ഈ ബാധയെ ജയിച്ച​ട​ക്കാൻ ശ്രമി​ക്കുന്ന 105 രാജ്യ​ങ്ങ​ളു​ടെ സംയു​ക്ത​ശ്ര​മങ്ങൾ ഉണ്ടായി​രു​ന്നി​ട്ടു​പോ​ലും മനുഷ്യ​വർഗം പോരാ​ട്ട​ത്തിൽ പരാജ​യ​മ​ട​യു​ക​യാണ്‌.

[26-ാം പേജിലെ ചതുരം/ചിത്രം]

കൊതുകുകടിക്കതിരെ ജാഗ്രത പാലി​ക്കു​ക

ഒരു വലയാൽ ആവരണം ചെയ്‌ത കിടക്ക​യിൽ ഉറങ്ങുക. കീടനാ​ശി​നി​കൾ തളിച്ച വലകൾ ഏററവും ഉചിത​മാണ്‌.

ലഭ്യ​മെ​ങ്കിൽ രാത്രി​യിൽ എയർ കണ്ടീഷണർ ഉപയോ​ഗി​ക്കുക അല്ലെങ്കിൽ വലകൾ തറച്ച ജനാല​ക​ളും വാതി​ലു​ക​ളു​മുള്ള മുറി​ക​ളിൽ ഉറങ്ങുക. വലകൾ ഇല്ലെങ്കിൽ വാതി​ലു​ക​ളും ജനാല​ക​ളും അടച്ചി​ടുക.

സൂര്യാ​സ്‌ത​മ​യ​ശേഷം നീണ്ട കൈയുള്ള ഉടുപ്പും ഇറക്കമുള്ള നിക്കറും ധരിക്കു​ന്നത്‌ കൊള്ളാം. ഇരുണ്ട നിറം കൊതു​കു​കളെ ആകർഷി​ക്കു​ന്നു.

തുണി​യാൽ സംരക്ഷി​ക്ക​പ്പെ​ടാത്ത ശരീര​ഭാ​ഗ​ങ്ങ​ളിൽ കീടങ്ങളെ അകററുന്ന പ്രതി​രോ​ധ​കങ്ങൾ പുരട്ടുക. ഡൈഈ​ഥേൽടൊ​ളു​വാ​മൈ​ഡോ [ഡീററ്‌] ഡൈമീ​ഥേൽ താലേ​റേറാ [താലിക്‌ ആസിഡി​ന്റെ ഉപ്പോ എസ്‌റ​റ​റോ] അടങ്ങിയ ഒരു പ്രതി​രോ​ധകം തിര​ഞ്ഞെ​ടു​ക്കുക.

കൊതു​കി​നെ​തി​രെ​യുള്ള സ്‌​പ്രേ​യോ കീടനാ​ശി​നി ഉപകര​ണ​മോ കൊതു​കു​തി​രി​യോ ഉപയോ​ഗി​ക്കുക.

ഉറവിടം: ലോകാ​രോ​ഗ്യ​സം​ഘടന

[കടപ്പാട്‌]

എച്ച്‌. ആംസ്‌​ട്രോങ്‌ റോബർട്ട്‌സ്‌

[27-ാം പേജിലെ ചതുരം]

“ഒരു ‘മാന്ത്രിക വെടി​യു​ണ്ട​യു​മില്ല’”

സമ്പൂർണ വിജയം എന്ന പ്രതീക്ഷ വിദൂ​ര​മെന്നു തോന്നു​മ്പോൾത്തന്നെ മലമ്പനി​ക്കെ​തി​രായ പോരാ​ട്ടം തുടരു​ന്നു. ആയിര​ത്തി​ത്തൊ​ള്ളാ​യി​ര​ത്തി​തൊ​ണ്ണൂ​റ​റി​യൊന്ന്‌ ഒക്‌ടോ​ബ​റിൽ കോം​ഗോ​യി​ലെ ബ്രസ്സവി​ല​യിൽ നടന്ന മലമ്പനി​യെ​ക്കു​റി​ച്ചുള്ള ഒരു അന്തർദേ​ശീയ ചർച്ചാ​സ​മ്മേ​ള​ന​ത്തിൽ ലോകാ​രോ​ഗ്യ​സം​ഘ​ട​ന​യു​ടെ പ്രതി​നി​ധി​കൾ രോഗം “ഒടുക്കി​യേ​തീ​രൂ” എന്ന മനോ​ഭാ​വ​ത്തിൽനിന്ന്‌ പിൻവാ​ങ്ങാൻ ആഹ്വാനം ചെയ്യു​ക​യും മലമ്പനി​യെ നിയ​ന്ത്രി​ക്കാ​നുള്ള ഗോള​വ്യാ​പ​ക​മായ പുതി​യോ​രു സംയു​ക്ത​യ​ജ്ഞ​ത്തി​നു ശുപാർശ ചെയ്യു​ക​യു​മു​ണ്ടാ​യി. അത്തരം ഉദ്യമങ്ങൾ എത്ര വിജയ​പ്ര​ദ​മാ​യി​രി​ക്കും?

“മലമ്പനി​ക്കെ​തി​രെ ഒരു ‘മാന്ത്രിക വെടി​യു​ണ്ട​യു​മില്ല’” എന്ന്‌ ലോകാ​രോ​ഗ്യ​സം​ഘ​ട​ന​യു​ടെ ഡയറക്ടർ ജനറൽ ഹിരോ​ഷി ഈ അടുത്ത​യി​ടെ പ്രസ്‌താ​വി​ച്ചു. “അതു​കൊ​ണ്ടു നാം അനേക​വി​ധ​ങ്ങ​ളിൽ ഇതി​നെ​തി​രെ പൊരു​തണം.” അടുത്ത​കാ​ലത്തു വളരെ​യേറെ പ്രചാരം ലഭിച്ചി​ട്ടുള്ള മൂന്നു പോരാ​ട്ട​വി​ധങ്ങൾ ഇവിടെ കൊടു​ത്തി​രി​ക്കു​ന്നു:

പ്രതി​രോ​ധ​മ​രു​ന്നു​കൾ. മലമ്പനി​ക്കെ​തി​രായ ഒരു മരുന്നു കണ്ടുപി​ടി​ക്കാൻ ശാസ്‌ത്ര​കാ​രൻമാർ വർഷങ്ങ​ളാ​യി പ്രവർത്തി​ച്ചു​കൊ​ണ്ടാ​ണി​രു​ന്നി​ട്ടു​ള്ളത്‌, ഗവേഷ​ണ​ത്തി​ലെ “പെട്ടെ​ന്നുള്ള വൻ മുന്നേ​റ​റത്തെ”ക്കുറിച്ചു വാർത്താ​മാ​ധ്യ​മങ്ങൾ ഇടക്കി​ട​യ്‌ക്കു റിപ്പോർട്ടു ചെയ്യാ​റു​മുണ്ട്‌. അനുചി​ത​മായ ശുഭാ​പ്‌തി​വി​ശ്വാ​സത്തെ അമർച്ച​ചെ​യ്‌തു​കൊണ്ട്‌, “സമീപ​ഭാ​വി​യിൽ മലമ്പനി​യെ ചെറു​ത്തു​നിൽക്കുന്ന ഒരു മരുന്നു [vaccine] ലഭിക്കും എന്ന മിഥ്യാ​ബോധ”ത്തിനെ​തി​രെ ലോകാ​രോ​ഗ്യ​സം​ഘടന മുന്നറി​യി​പ്പു നൽകുന്നു.

മലമ്പനി പരാദത്തെ നശിപ്പി​ക്കാ​നുള്ള മമനു​ഷ്യ​ന്റെ രോഗ​പ്ര​തി​രോധ വ്യവസ്ഥ​യു​ടെ ശ്രമങ്ങളെ ഒഴിഞ്ഞു​മാ​റു​ന്ന​തിൽ ഈ പരാദങ്ങൾ വളരെ സമർഥ​മാ​യി വിജയി​ക്കു​ന്നു എന്നതാണ്‌ ഒരു പ്രതി​രോ​ധ​മ​രു​ന്നു വികസി​പ്പി​ച്ചെ​ടു​ക്കു​ന്ന​തി​ലെ പ്രശ്‌ന​ങ്ങ​ളി​ലൊന്ന്‌. അനേക​വർഷത്തെ തുട​രെ​യുള്ള ആക്രമ​ണ​ത്തി​നു​ശേഷം പോലും അളുകൾ ഈ രോഗ​ത്തി​നെ​തി​രെ പരിമി​ത​മായ പ്രതി​രോ​ധ​ശേ​ഷി​യേ ആർജി​ക്കു​ന്നു​ള്ളു. അററ്‌ലാൻറ​യി​ലെ രോഗ​നി​യ​ന്ത്ര​ണ​ത്തി​നാ​യുള്ള യൂ.എസ്‌. കേന്ദ്ര​ത്തി​ലെ ഒരു സാം​ക്ര​മി​ക​രോ​ഗ​വി​ദ​ഗ്‌ദ്ധ​നായ ഡോ. ഹാൻസ്‌ ലോബെൽ ഇപ്രകാ​രം പറയുന്നു: “കേവലം കുറെ ആക്രമ​ണ​ങ്ങൾക്കു​ശേഷം നിങ്ങൾ രോഗ​പ്ര​തി​രോ​ധ​ശേഷി ആർജി​ക്കു​ന്നില്ല. അതു​കൊണ്ട്‌ [ഒരു പ്രതി​രോ​ധ​മ​രു​ന്നു വികസി​പ്പി​ച്ചെ​ടു​ക്കാ​നുള്ള ശ്രമത്തിൽ] നിങ്ങൾ സ്വഭാ​വത്തെ മെച്ച​പ്പെ​ടു​ത്താൻ ശ്രമി​ക്കു​ക​യാണ്‌.”

മരുന്നു​കൾ. ഇപ്പോ​ഴത്തെ മരുന്നു​കൾക്കെ​തി​രെ മലമ്പനി പരാദ​ത്തി​നു പ്രതി​രോ​ധ​ശേഷി ഏറിവ​രു​ന്ന​തു​കൊണ്ട്‌, ചൈനീസ്‌ ഔഷധ​ച്ചെ​ടി​യിൽനി​ന്നു പിഴി​ഞ്ഞെ​ടു​ക്കുന്ന ചിംങ്‌ഹ്വാ​സു​വിൽനിന്ന്‌ ലഭിക്കുന്ന ആർട്ടീഥർ എന്നു വിളി​ക്ക​പ്പെ​ടുന്ന ഒരു പുതിയ മരുന്ന്‌ ലോകാ​രോ​ഗ്യ​സം​ഘടന പ്രോ​ത്സാ​ഹി​പ്പി​ക്കു​ക​യാണ്‌. ലോക​സ​മൂ​ഹ​ത്തിന്‌ അടുത്ത പത്തു വർഷത്തി​നു​ള്ളിൽ ലഭ്യമാ​യേ​ക്കാ​വുന്ന പ്രകൃതി മരുന്നു​ക​ളു​ടെ തികച്ചും പുതിയ ഒരു വർഗത്തി​ന്റെ ഉറവി​ട​മാ​യേ​ക്കാം ചിംങ്‌ഹ്വാ​സു എന്നു ലോകാ​രോ​ഗ്യ​സം​ഘടന പ്രത്യാ​ശി​ക്കു​ന്നു.

കൊതു​കു​വ​ലകൾ. കൊതു​കി​നെ​തി​രെ​യുള്ള രണ്ടായി​രം വർഷം പഴക്കമുള്ള ഈ സംരക്ഷ​ണ​രീ​തി ഇപ്പോ​ഴും ഫലപ്ര​ദ​മാണ്‌. മലമ്പനി പരത്തുന്ന കൊതു​കു​കൾ സാധാ​ര​ണ​മാ​യി രാത്രി​യി​ലാണ്‌ ആക്രമി​ക്കു​ന്നത്‌, വല അവയെ അകററി​നിർത്തു​ന്നു. പെർമീ​ത്രിൻ പോലുള്ള കീടനാ​ശി​നി​യിൽ മുക്കിയ വലകൾ ഏറെ ഫലപ്ര​ദ​മാണ്‌. ലായനി​യിൽ മുക്കിയ വലകൾ ഉപയോ​ഗി​ക്കു​ന്നി​ടത്ത്‌ മലമ്പനി അത്യാ​ഹി​തങ്ങൾ 60 ശതമാ​ന​ത്തോ​ളം കുറഞ്ഞ​താ​യി ആഫ്രി​ക്ക​യിൽ നടത്തിയ പഠനങ്ങൾ വെളി​പ്പെ​ടു​ത്തു​ന്നു.

ചിംങ്‌ഹ്വാസു, ആർട്ടി​മി​സിയ അന്നുവ എന്ന ശാസ്‌ത്ര​നാ​മ​മുള്ള കാഞ്ഞി​ര​ത്തിൽനി​ന്നു വേർതി​രി​ച്ചെ​ടു​ക്കു​ന്ന​താണ്‌.

[28-ാം പേജിലെ ചതുരം/ചിത്രം]

ഉഷ്‌ണമേഖലാ പ്രദേ​ശ​ത്തേക്കു യാത്ര പോകു​ക​യാ​ണോ?

മലമ്പനി ഒരു ഭീഷണി​യാ​യി​രി​ക്കുന്ന ഒരു പ്രദേ​ശ​ത്തേക്കു യാത്ര​ചെ​യ്യാൻ നിങ്ങൾ ആസൂ​ത്രണം ചെയ്യു​ന്നെ​ങ്കിൽ പിൻവ​രു​ന്നതു ചെയ്യണം:

1. നിങ്ങളു​ടെ ഡോക്ട​റു​മാ​യി അല്ലെങ്കിൽ രോഗ​പ്ര​തി​രോധ കുത്തി​വെപ്പു കേന്ദ്ര​വു​മാ​യി ബന്ധപ്പെ​ടുക.

2. നിങ്ങൾക്കു ലഭിക്കുന്ന നിർദേ​ശങ്ങൾ കൃത്യ​മാ​യി പിൻപ​റ​റുക, മലമ്പനി​ക്കെ​തി​രായ ഒരു മരുന്നു നിങ്ങൾ ഉപയോ​ഗി​ക്കു​ന്നെ​ങ്കിൽ മലമ്പനി ബാധയുള്ള പ്രദേശം വിട്ട​ശേ​ഷ​വും നാലാ​ഴ്‌ച​ത്തേക്ക്‌ അതു തുടർന്നു കഴിക്കുക.

3. കൊതു​കു​കടി കൊള്ളാ​തെ സൂക്ഷി​ക്കുക.

4. മലമ്പനി​യു​ടെ ലക്ഷണങ്ങൾ അറിഞ്ഞി​രി​ക്കുക: പനി, തലവേദന, പേശീ​വേദന, ഛർദി, അല്ലെങ്കിൽ അതിസാ​രം അല്ലെങ്കിൽ ഇവയെ​ല്ലാം. മലമ്പനി​ക്കെ​തി​രായ മരുന്നു​കൾ ഉപയോ​ഗി​ച്ചി​രു​ന്നാൽപ്പോ​ലും മലമ്പനി ബാധയുള്ള പ്രദേ​ശ​ത്തു​നി​ന്നു നിങ്ങൾ പോയ​ശേഷം ഒരുവർഷം​വ​രെ​യുള്ള കാലയ​ള​വി​നു​ള്ളിൽ അതു വീണ്ടും പ്രത്യ​ക്ഷ​പ്പെ​ടാ​മെന്നു മനസ്സിൽ പിടി​ക്കുക.

5. നിങ്ങൾക്കു രോഗ​ല​ക്ഷ​ണങ്ങൾ ഉണ്ടെങ്കിൽ ഒരു ഡോക്ടറെ കാണുക. ആദ്യ ലക്ഷണങ്ങൾ പ്രത്യ​ക്ഷ​പ്പെ​ട്ട​ശേഷം മലമ്പനി വഷളാ​കാ​നും 48 മണിക്കൂ​റിൽക്കു​റഞ്ഞ സമയം​കൊ​ണ്ടു മരണത്തി​നി​ട​യാ​ക്കാ​നും കഴിയും.

ഉറവിടം: ലോകാ​രോ​ഗ്യ​സം​ഘടന.

[24-ാം പേജിലെ ചിത്ര​ത്തിന്‌ കടപ്പാട്‌]

H. Armstrong Roberts