കാഹളം—രണഭൂ​മി​യിൽനി​ന്നു സംഗീ​ത​ശാ​ല​യി​ലേക്ക്‌

രാജാ​വായ അബീയാ​വി​ന്റെ കാലത്ത്‌ യഹൂദ്യ യോദ്ധാ​ക്കളെ ശത്രുക്കൾ ഒരിക്കൽ പതിയി​രു​ന്നാ​ക്ര​മി​ച്ചു. അവരുടെ രണ്ടിര​ട്ടി​യോ​ളം വരുന്ന 8,00,000 ശത്രു സൈനി​കർ അവരെ വളഞ്ഞു. രക്ഷപെടൽ അസാധ്യ​മെ​ന്ന​തു​പോ​ലെ തോന്നി. പെട്ടെന്ന്‌ കാഹള​ശബ്ദം മുഴങ്ങി​ക്കേട്ടു! സിരക​ളി​ലൂ​ടെ അഡ്രി​നാ​ലിൻ നുരച്ചു​ക​യ​റി​യ​പ്പോൾ, യഹൂദ്യ പുരു​ഷൻമാർ മാറെ​റാ​ലി​കൊ​ള്ളുന്ന പോർവി​ളി​യോ​ടെ യുദ്ധത്തി​നു കുതിച്ചു. പ്രതി​കൂല സാഹച​ര്യ​ങ്ങൾ ഉണ്ടായി​രു​ന്നെ​ങ്കിൽപ്പോ​ലും, യഹൂദ്യർ ശത്രു​വി​നെ തോൽപ്പി​ച്ചു.—2 ദിനവൃ​ത്താ​ന്തം 13:1-20.

ആ കാഹള​ധ്വ​നി​കൾ കേൾക്കു​ന്നത്‌ എത്ര ഉത്തേജ​നാ​ത്മ​ക​മാ​യി​രു​ന്നി​രി​ക്കണം! അതു യഹോ​വ​യു​ടെ ഈ വാഗ്‌ദത്തം യഹൂദ്യ​രു​ടെ മനസ്സി​ലേക്കു കൊണ്ടു​വന്നു എന്നതിനു സംശയ​മില്ല: “നിങ്ങളു​ടെ ദേശത്തു നിങ്ങളെ ഞെരു​ക്കുന്ന ശത്രു​വി​ന്റെ നേരെ നിങ്ങൾ യുദ്ധത്തി​ന്നു പോകു​മ്പോൾ ഗംഭീ​ര​ധ്വ​നി​യാ​യി കാഹളം ഊതേണം; എന്നാൽ നിങ്ങളു​ടെ ദൈവ​മായ യഹോവ നിങ്ങളെ ഓർത്തു ശത്രു​ക്ക​ളു​ടെ കയ്യിൽനി​ന്നു രക്ഷിക്കും.” (സംഖ്യാ​പു​സ്‌തകം 10:9) കാഹള​നാ​ദം യഹോ​വ​യി​ലുള്ള യഹൂദ്യ​യു​ടെ ആശ്രയത്തെ പ്രകട​മാ​ക്കി, ആ ആശ്രയ​ത്തി​നു പ്രതി​ഫലം ലഭിക്കു​ക​യും ചെയ്‌തു.

ഈ ബൈബിൾസം​ഭ​വ​ത്തി​നും വളരെ മുമ്പാണു കാഹള​ത്തി​ന്റെ ചരിത്രം തുടങ്ങു​ന്നത്‌. ക്രിസ്‌തു​വി​നും ഏതാണ്ട്‌ 2,000 വർഷങ്ങൾക്കു മുമ്പ്‌ ഈജി​പ്‌തിൽ ലോഹം​കൊ​ണ്ടുള്ള കാഹളം ഉണ്ടായി​രു​ന്നു. ഈ പുരാതന കാഹളങ്ങൾ നമുക്ക്‌ ഇന്നറി​യാ​വുന്ന കാഹള​ങ്ങ​ളിൽനി​ന്നു വളരെ വ്യത്യ​സ്‌ത​മാ​യി​രു​ന്നു. മനോ​ജ്ഞ​മായ ഈ ഉപകര​ണ​ത്തി​ന്റെ വികാ​സത്തെ സംബന്ധി​ച്ചു പരിചി​ന്തി​ക്കുക.

ആദ്യ ഘട്ടങ്ങൾ

ഇംഗ്ലീ​ഷി​ലെ “ട്രമ്പററ്‌” [കാഹളം] എന്ന പദം വന്നിരി​ക്കു​ന്നത്‌, ആനയുടെ തുമ്പി​ക്കൈയെ പരാമർശി​ക്കുന്ന ഒരു പഴയ ഫ്രഞ്ചു പദമായ ട്രോംമ്പ്‌ എന്ന വാക്കിൽനി​ന്നാണ്‌. ലഭ്യമായ തെളി​വ​നു​സ​രിച്ച്‌, ആദിമ കാഹളങ്ങൾ ആനയുടെ തുമ്പി​ക്കൈ പോലെ തോന്നി​യി​രു​ന്നു. ഗ്രീക്കു നാടക​കൃ​ത്തായ എസ്‌ക്ക​ലസ്‌ (പൊ.യു.മു. 525-456) കാഹള​ശ​ബ്ദത്തെ “തകർപ്പൻ” എന്നു വിളിച്ചു. അതു യുദ്ധമു​ന്ന​റി​യി​പ്പു​കൾക്കും കായി​ക​മ​ത്സ​ര​ങ്ങൾക്കും മററു പൊതു​പ​രി​പാ​ടി​കൾക്കും ശവസം​സ്‌കാ​ര​ത്തി​ന്റെ​യോ ആഘോ​ഷ​ങ്ങ​ളു​ടെ​യോ അവസര​ങ്ങ​ളി​ലും മാത്രമേ ഉപയോ​ഗി​ച്ചി​രു​ന്നു​ള്ളൂ.

ഇസ്രാ​യേ​ലി​ലെ കാഹളങ്ങൾ സൈനിക അടയാ​ള​ങ്ങ​ളാ​യി ഉപയോ​ഗി​ച്ചി​രു​ന്നു​വെ​ങ്കി​ലും, അവ ആലയത്തിൽ സംഗീത ഉപകര​ണ​ങ്ങ​ളു​മാ​യി​രു​ന്നു. ഉയർന്ന ഗുണനി​ല​വാ​ര​മുള്ള ഉപകര​ണങ്ങൾ വെള്ളി​കൊണ്ട്‌ നിർമി​ക്കു​ന്ന​തി​നു വേണ്ടി വിദഗ്‌ധ​രായ ശിൽപ്പി​കളെ ഏർപ്പെ​ടു​ത്തി​യി​രു​ന്നു. ആലയത്തിൽ കാഹള​മൂ​ത്തു​കാർ, “ഏകസ്വ​ര​മാ​യി [സമ്പൂർണ ഐക്യ​ത്തോ​ടെ, ററു​ഡേ​യ്‌സ്‌ ഇംഗ്ലീഷ്‌ വേർഷൻ] കേൾക്കു​മാ​റു” എന്നു വർണി​ക്ക​പ്പെ​ടു​വാൻ തക്കവണ്ണം വളരെ ഐക്യ​ത്തോ​ടെ കാഹള​മൂ​തി​യി​രു​ന്നു.—2 ദിനവൃ​ത്താ​ന്തം 5:13.

അതു​കൊണ്ട്‌ ഇസ്രാ​യേ​ലി​ലെ കാഹളങ്ങൾ ഒരു​പ്ര​കാ​ര​ത്തി​ലും, കാഴ്‌ച​ക്കോ കേൾവി​ക്കോ, അരോ​ച​ക​മാ​യി​രു​ന്നില്ല. എന്നിരു​ന്നാ​ലും ചുററു​മു​ണ്ടാ​യി​രുന്ന ജനതക​ളു​ടെ കാഹള​ങ്ങ​ളെ​പ്പോ​ലെ അവയ്‌ക്കു പരിമി​ത​മായ സ്വരങ്ങളേ പുറ​പ്പെ​ടു​വി​ക്കാൻ കഴിഞ്ഞു​ള്ളൂ. കാഹള​ത്തി​ന്റെ ഗുണ​മേൻമകൾ മെച്ച​പ്പെ​ടു​ന്ന​തി​നു നൂററാ​ണ്ടു​കൾതന്നെ കടന്നു​പോ​കേ​ണ്ടി​യി​രു​ന്നു.

ആധുനിക കാഹള​ത്തി​ന്റെ വികാസം

കാഹള​ത്തി​ന്റെ ശബ്ദവ്യാ​പ്‌തി വർധി​പ്പി​ക്കു​ന്ന​തിന്‌, അതിന്റെ രൂപഘ​ട​ന​യ്‌ക്ക്‌ ഭേദഗ​തി​കൾ വരു​ത്തേ​ണ്ട​തു​ണ്ടാ​യി​രു​ന്നു. ഒന്നാമ​താ​യി, അതിന്റെ നീളം കൂട്ടി. നീളം കൂടു​മ്പോൾ സ്വരസ​ഞ്ച​യ​വും വലുതാ​യി​രി​ക്കു​മെന്നു ന്യായ​വാ​ദം ചെയ്യ​പ്പെട്ടു. മധ്യയു​ഗ​ത്തി​ലെ (ബ്യൂസീൻ എന്നു വിളി​ക്ക​പ്പെ​ട്ടി​രുന്ന) ഒരിനം കാഹള​ത്തിന്‌ യഥാർഥ​ത്തിൽ 1.8 മീററർ നീളമു​ണ്ടാ​യി​രു​ന്ന​ത്രേ! സങ്കൽപ്പി​ക്കാൻ കഴിയു​ന്ന​തു​പോ​ലെ, ആ കാഹള​മൂ​തുക അത്ര സുഖമു​ള്ള​താ​യി​രു​ന്നില്ല. അതു​കൊണ്ട്‌, ഉപയോ​ഗി​ക്കാ​നുള്ള എളുപ്പ​ത്തി​നു വേണ്ടി 14-ാം നൂററാ​ണ്ടി​ലെ കാഹളം ട-ആകൃതി​യിൽ വളച്ചെ​ടു​ത്തു. ഒരു നൂററാ​ണ്ടു​കൂ​ടി കഴിഞ്ഞ​പ്പോൾ, മൂന്നു സമാന്തര ശാഖക​ളുള്ള ദീർഘ​വൃ​ത്താ​കാ​ര​ത്തി​ലുള്ള ഒരു വളയത്തി​ന്റെ രൂപം അതു കൈ​ക്കൊ​ണ്ടു.

ഈ പുതിയ കാഹള​ത്തിന്‌ കൂടുതൽ സ്വരങ്ങൾ പുറ​പ്പെ​ടു​വി​ക്കാൻ കഴിഞ്ഞു, എന്നാൽ ഒരു ഉയർന്ന പിച്ചിൽ മാത്രം. ഈ സ്വരങ്ങ​ളിൽ എത്തി​ച്ചേ​രുക പ്രയാ​സ​മാ​യി​രു​ന്നു. എന്നിരു​ന്നാ​ലും, 17-ാം നൂററാ​ണ്ടി​ലെ കാഹള​ത്തി​നു വേണ്ടി ചിലർ സംഗീതം രചിക്കാൻ തുടങ്ങി, ഉയർന്ന ശബ്ദനി​ദാ​ന​ത്തിന്‌ അനു​യോ​ജ്യ​മാ​യവ. ആ കാലഘ​ട്ട​ത്തി​ലെ ഒരു പ്രസിദ്ധ സംഗീ​ത​ര​ച​യി​താവ്‌ യോഹാൻ സെബാ​സ്‌റ​റ്യാൻ ബാക്ക്‌ (1685-1750) ആയിരു​ന്നു.

കാലാ​ന്ത​ര​ത്തിൽ, ക്രൂക്ക്‌സ്‌ എന്നു വിളി​ക്ക​പ്പെട്ട വളഞ്ഞ കുഴലു​കൾ കാഹള​ത്തോ​ടു കൂട്ടി​ച്ചേർത്തു. തത്ത്വം ലളിത​മാ​യി​രു​ന്നു: കുഴലു​കൾ കൂടു​ത​ലാ​യി ഉള്ളതു​കൊണ്ട്‌ വായു നിറഞ്ഞു​നിന്ന കുഴലി​ന്റെ നീളം കൂടി. അങ്ങനെ വിപു​ല​മായ സ്വരങ്ങൾ ഉളവായി. ക്രൂക്കു​കൾ കാഹള​ത്തി​ന്റെ സാധാരണ സ്വരനി​ദാ​നത്തെ എഫ്‌ സ്വരത്തിൽനി​ന്നു ബി ഫ്‌ളാ​ററ്‌ സ്വരം​വരെ താഴ്‌ത്തി.

അങ്ങനെ, വോൾഫ്‌ഗാങ്‌ ആമാഡി​യുസ്‌ മൊസ്സാർട്ടി​ന്റെ (1756-1791) കാലമാ​യ​പ്പോ​ഴേ​ക്കും ഉച്ചസ്ഥാ​യി​യി​ലുള്ള കാഹളം തിരോ​ധാ​നം ചെയ്‌തു​ക​ഴി​ഞ്ഞി​രു​ന്നു. താരത​മ്യേന അനായാ​സ​ത്തോ​ടെ ക്ലാർനെ​ററ്‌ ഉച്ചസ്ഥാ​യി​യി​ലുള്ള സ്വരങ്ങളെ കൈകാ​ര്യം ചെയ്യാൻ തുടങ്ങി, അതേസ​മയം കാഹളം മധ്യമ​സ്വ​ര​വി​ന്യാ​സം സ്വീക​രി​ച്ചു​ക​ഴി​ഞ്ഞി​രു​ന്നു.

ഈ പുതിയ കാഹളം ബഹുമുഖ ഉപയോ​ഗ​മു​ള്ള​താ​യി​രു​ന്നെ​ങ്കി​ലും അതു വായി​ക്കു​ന്നത്‌ അപ്പോ​ഴും അത്ര സുഖ​പ്ര​ദ​മാ​യി​രു​ന്നില്ല. കാരണം ക്രൂക്കു​കൾ ക്രമ​പ്പെ​ടു​ത്തു​ന്ന​തിന്‌ ഇരു കൈക​ളും ഉപയോ​ഗി​ക്കേ​ണ്ടി​യി​രു​ന്നു. അതു​കൊണ്ട്‌ കൂടുതൽ ഭേദഗ​തി​കൾ അനു​പേ​ക്ഷ​ണീ​യ​മാ​യി​രു​ന്നു.

കട്ടകളുള്ള കാഹളം

1760-നോട​ടുത്ത്‌ റഷ്യൻ സംഗീ​ത​ജ്ഞ​നായ കോൾബെൽ ശ്രദ്ധേ​യ​മായ ഒരു കണ്ടുപി​ടി​ത്തം നടത്തി. അദ്ദേഹം കാഹള​ത്തി​ന്റെ ബെല്ലി​ന​ടുത്ത്‌ ഒരു ദ്വാര​മു​ണ്ടാ​ക്കി സ്‌റേ​റാ​പ്പ​റാ​യി വർത്തി​ക്കുന്ന മൃദു​വായ കട്ടകൊണ്ട്‌ അതു മൂടി. ഈ കട്ടയുടെ തുറക്കൽ ഏതു സംഗീ​ത​സ്വ​ര​ത്തെ​യും പകുതി​കണ്ട്‌ ഉയർത്തി. 1801-ൽ വിയന്ന​യിൽനി​ന്നുള്ള ആന്റോൺ വൈഡി​ങ്ങർ എന്നു പേരുള്ള ഒരു കാഹള​മൂ​ത്തു​കാ​രൻ, അഞ്ചു കട്ടകളുള്ള ഒരു കാഹളം ഉണ്ടാക്കി​ക്കൊണ്ട്‌ കോൾബെ​ലി​ന്റെ രൂപഘ​ട​നയെ പരിഷ്‌ക​രി​ച്ചു. ഒടുവിൽ സ്വരങ്ങ​ളു​ടെ ആരോഹണ-അവരോ​ഹണ ക്രമത്തി​ലുള്ള എല്ലാ നാദങ്ങ​ളും ഉത്‌പാ​ദി​പ്പി​ക്കാൻ കഴിയുന്ന ഒരു കാഹളം നിലവിൽവന്നു. അതു വലിയ ക്ലേശ​മൊ​ന്നും കൂടാ​തെ​തന്നെ വായി​ക്കാ​നും കഴിയു​മാ​യി​രു​ന്നു.

എന്നിരു​ന്നാ​ലും, വൈഡി​ങ്ങ​റു​ടെ കാഹള​ത്തി​നു​പോ​ലും സാരമായ പരിമി​തി ഉണ്ടായി​രു​ന്നു. ഈ കട്ടകൾ തുറക്കു​ന്നത്‌ ഉപകര​ണ​ത്തി​ന്റെ അനുക​മ്പ​നത്തെ ബാധി​ക്കു​ക​യും കാഹള​ത്തി​ന്റെ തിരി​ച്ച​റി​യാൻ കഴിയുന്ന സ്വരത്തി​നു മാററം വരുത്തു​ക​യും ചെയ്യുന്നു. അതു​കൊണ്ട്‌ കട്ടകളുള്ള കാഹളം അധിക​കാ​ലം പിടി​ച്ചു​നി​ന്നില്ല. കാഹള​ത്തി​ന്റെ രൂപഘടന സംബന്ധിച്ച തികച്ചും പുതിയ ഒരു സമീപനം നിമിത്തം അത്‌ ഉപേക്ഷി​ക്ക​പ്പെട്ടു.

വാൽവുള്ള ആദ്യത്തെ കാഹളം

കാഹള​ത്തോട്‌ പിസ്‌റ​റ​ണു​കൾ അഥവാ വാൽവു​കൾ കൂട്ടി​ച്ചേർത്ത ഒരു കണ്ടെത്ത​ലി​നാ​യി 1815-ൽ സൈലി​ഷ്യ​യി​ലെ ഹൈൻറിക്‌ ഷ്‌റേ​റാൾസ​യ്‌ക്ക്‌ നിർമാ​ണാ​വ​കാ​ശ​ക്കു​ത്തക (patent) വാങ്ങി. സമർഥ​മാ​യി ഉണ്ടാക്കിയ ദ്വാരങ്ങൾ മുഖാ​ന്തരം, ഓരോ വാൽവും പ്രധാന കുഴലി​ലുള്ള വായു​വി​നെ, അതി​നോ​ടു ചേർത്തു പിടി​പ്പി​ച്ചി​ട്ടുള്ള ഒരു വളഞ്ഞ കുഴലി​ലേക്കു തിരി​ച്ചു​വി​ടു​മാ​യി​രു​ന്നു. അങ്ങനെ നീളം വ്യത്യാ​സ​പ്പെ​ട്ടി​രി​ക്കുന്ന അനേകം വളഞ്ഞ കുഴലു​കൾ ഒരേ സമയത്തു​തന്നെ ഏതു സംയോ​ജ​ന​ത്തി​ലും ഉപയോ​ഗി​ക്കാൻ കഴിഞ്ഞു. കൂടാതെ, വാൽവു​കൾ സ്‌പ്രി​ങ്ങു​കൊണ്ട്‌ നിറച്ചി​രു​ന്ന​തി​നാൽ ക്ഷണനേരം കൊണ്ടുള്ള പ്രതി​പ്ര​വർത്തനം സാധ്യ​വു​മാ​യി​രു​ന്നു.

സൂക്ഷ്‌മ​മാ​യ സ്വര​ഭേ​ദ​ങ്ങ​ളോ​ടു ബന്ധപ്പെട്ട പ്രശ്‌നങ്ങൾ ആദ്യം ഈ കാഹള​ത്തി​നു​ണ്ടാ​യി​രു​ന്നു. എന്നാൽ, വർഷങ്ങൾ കടന്നു​പോ​യ​പ്പോൾ, ഈ പോരാ​യ്‌മകൾ പരിഹ​രി​ച്ചു. അങ്ങനെ വാൽവുള്ള കാഹളം ഇന്നോളം നിലനി​ന്നി​രി​ക്കു​ന്നു.

വൈവി​ധ്യ​ത്തി​നു പേരു​കേ​ട്ടത്‌

ഫലത്തിൽ എല്ലാത്തരം സംഗീ​ത​രൂ​പ​ങ്ങ​ളി​ലും കാഹള​ത്തിന്‌ ഒരു സ്ഥാനമുണ്ട്‌. അതു സ്വര​ത്തോ​ടും മററ്‌ ഉപകര​ണ​ങ്ങ​ളോ​ടും നന്നായി ലയിക്കു​ന്നു. വീരോ​ചി​ത​വും യുദ്ധോ​ചി​ത​വു​മായ അതിന്റെ സ്വരം കാഹള​മേ​ള​ങ്ങൾക്കും പടനീ​ക്ക​ങ്ങൾക്കും അതിനെ ഫലപ്ര​ദ​മാ​ക്കു​ന്നു. അതേസ​മയം, സംഗീ​ത​ക്ക​ച്ചേ​രി​കൾക്കും ഓപ്പറ​കൾക്കും ആധുനിക ജാസ്സ്‌ സംഗീ​ത​ത്തി​നും വളരെ അനു​യോ​ജ്യ​മായ തീവ്ര​വും ശക്തവു​മായ സ്വര​ഭേ​ദ​വും അതിനുണ്ട്‌. മാത്ര​വു​മല്ല, ഗാനങ്ങൾക്കി​ണ​ങ്ങുന്ന സമ്പന്നമായ അതിന്റെ ഗുണങ്ങൾ നിമിത്തം കാഹളം കഥാ​പ്ര​സം​ഗ​ങ്ങൾക്കു വളരെ ഇണങ്ങി​യ​താണ്‌. തനിച്ചു പാടു​ന്ന​വ​രും അത്‌ ഉപയോ​ഗി​ക്കാ​റുണ്ട്‌.

അതേ, കാഹള​ത്തിന്‌ ഒരു നീണ്ട ചരിത്രം തന്നെയുണ്ട്‌. മേലാൽ മുന്നറി​യി​പ്പു കൊടു​ക്കു​ന്ന​തിന്‌ പട്ടാള​ക്കാ​രൻ മാത്രം ഏന്തുന്ന ഒരു ഉപകര​ണമല്ല അത്‌. ഇപ്പോൾ അതിനു യഥാർഥ​മായ സംഗീതം ഉളവാ​ക്കാൻ കഴിയും—ചുരു​ങ്ങി​യത്‌ കലാ​നൈ​പു​ണ്യ​മുള്ള ഒരുവന്റെ കയ്യിൽ കിട്ടു​മ്പോൾ. സംഗീ​ത​ത്തി​ലെ നിങ്ങളു​ടെ അഭീഷ്ടങ്ങൾ എന്തുത​ന്നെ​യാ​യി​രു​ന്നാ​ലും അതു നിങ്ങൾക്കു ശ്രവണ​സു​ഖം കൈവ​രു​ത്തി​യി​ട്ടുണ്ട്‌ എന്നതിനു സംശയ​മില്ല. കാഹളം പോ​ലെ​യുള്ള സംഗീ​തോ​പ​ക​ര​ണങ്ങൾ നിർമി​ക്കാ​നുള്ള പ്രാപ്‌തി മനുഷ്യർക്ക്‌ തന്നതിന്‌ നമ്മുടെ സ്രഷ്ടാ​വി​നോട്‌ നമുക്ക്‌ എത്ര നന്ദിയു​ള്ള​വ​രാ​യി​രി​ക്കാൻ കഴിയും!

[17-ാം പേജിലെ ചിത്ര​ത്തിന്‌ കടപ്പാട്‌]

Keyed Trumpet and Slide Trumpet: Encyclopædia Britannica/11th Edition (1911)