നമ്മുടെ അന്തരീ​ക്ഷ​ത്തി​നു ഹാനി​ത​ട്ടു​മ്പോൾ

ആയിര​ത്തി​ത്തൊ​ള്ളാ​യി​ര​ത്തെ​ഴു​പത്തൊ​ന്നിൽ അപ്പോ​ളോ 14-ൽ ചന്ദ്രനി​ലേ​ക്കുള്ള യാത്രാ​മ​ധ്യേ ഭൂമിയെ നോക്കി​ക്കൊണ്ട്‌ എഡ്‌ഗർ മിഷെൽ ഇപ്രകാ​രം പറഞ്ഞു: “ഇത്‌ വെട്ടി​ത്തി​ള​ങ്ങുന്ന ഒരു നീലവെള്ള രത്‌നം പോ​ലെ​യുണ്ട്‌.” എന്നാൽ ബാഹ്യാ​കാ​ശ​ത്തു​നിന്ന്‌ ഇന്ന്‌ ആരെങ്കി​ലും നോക്കി​യാൽ എന്തു കാണും?

പ്രത്യേക കണ്ണടക​ളു​ടെ സഹായ​ത്തോ​ടെ അദ്ദേഹ​ത്തി​നു ഭൗമാ​ന്ത​രീ​ക്ഷ​ത്തി​ലെ അദൃശ്യ വാതകങ്ങൾ വീക്ഷി​ക്കാൻ കഴിഞ്ഞാൽ വളരെ വ്യത്യ​സ്‌ത​മായ ഒരു ചിത്ര​മാ​യി​രി​ക്കും കാണുക. ഇന്ത്യാ ടുഡേ മാസി​ക​യിൽ രാജ്‌ ചെങ്കപ്പ ഇപ്രകാ​രം എഴുതി: “അൻറാർട്ടി​ക്ക​യു​ടെ​യും വടക്കേ അമേരി​ക്ക​യു​ടെ​യും മീതെ​യുള്ള ഓസോൺ സംരക്ഷണ പാളി​ക​ളിൽ അദ്ദേഹം വൻ ദ്വാരങ്ങൾ കാണു​ന്ന​താ​യി​രി​ക്കും. വെട്ടി​ത്തി​ള​ങ്ങുന്ന ഒരു നീലവെള്ള രത്‌ന​ത്തി​നു പകരം അദ്ദേഹം കാണുക കാർബ​ണി​ന്റെ​യും സൾഫറി​ന്റെ​യും ഡയോ​ക്‌​സൈ​ഡു​ക​ളു​ടെ ഇരുണ്ട മേഘച്ചു​രു​ളു​കൾ നിറഞ്ഞ ഒളിമ​ങ്ങി​യ​തും വൃത്തി​കെ​ട്ട​തു​മായ ഭൂമി​യെ​യാ​യി​രി​ക്കും.”

നമ്മുടെ മേലന്ത​രീ​ക്ഷ​ത്തി​ന്റെ ഓസോൺ സംരക്ഷക പാളി​യിൽ ദ്വാര​ങ്ങ​ളി​ട്ടി​രി​ക്കു​ന്നത്‌ എന്താണ്‌? അന്തരീക്ഷ മാലി​ന്യ​ങ്ങ​ളു​ടെ വർധനവ്‌ യഥാർഥ​ത്തിൽ അത്രകണ്ട്‌ അപകട​ക​ര​മാ​ണോ?

ഓസോൺ നശിച്ചു​കൊ​ണ്ടി​രി​ക്കുന്ന വിധം

60-ലധികം വർഷങ്ങൾക്കു​മുമ്പ്‌ ശാസ്‌ത്രജ്ഞർ വിഷക​ര​വും നാററം പുറ​പ്പെ​ടു​വി​ക്കു​ന്ന​തു​മായ ശീതീ​കരണ വസ്‌തു​ക്കൾക്കു പകരം സുരക്ഷി​ത​മായ ഒരു ശീതീ​ക​ര​ണ​വ​സ്‌തു കണ്ടുപി​ടി​ച്ച​താ​യി പ്രഖ്യാ​പി​ച്ചു. ഈ പുതിയ രാസവ​സ്‌തു​വിന്‌ ഒരു കാർബൺ ആററവും രണ്ടു ക്ലോറിൻ ആററങ്ങ​ളും രണ്ടു ഫ്‌ളൂ​റിൻ ആററങ്ങ​ളും (CCl₂F₂) അടങ്ങുന്ന തൻമാ​ത്ര​ക​ളാ​ണു​ള്ളത്‌. ഇതും സമാന​മായ മനുഷ്യ​നിർമിത രാസവ​സ്‌തു​ക്ക​ളും ക്ലോ​റോ​ഫ്‌ളൂ​റോ​കാർബ​ണു​കൾ (CFCs) എന്നറി​യ​പ്പെ​ടു​ന്നു.

1970-കളുടെ ആരംഭ​ത്തോ​ടു​കൂ​ടി സിഎഫ്‌സി​ക​ളു​ടെ ഉത്‌പാ​ദനം ഒരു വൻ ലോക​വ്യാ​പക വ്യവസാ​യ​മാ​യി വളർച്ച​പ്രാ​പി​ച്ചു. ഫ്രിഡ്‌ജു​ക​ളിൽ മാത്രമല്ല, ഏറോ​സോൾ സ്‌പ്രേ കാനു​ക​ളി​ലും എയർ കണ്ടീഷ​ന​റു​ക​ളി​ലും ശുചീ​കരണ വസ്‌തു​ക്ക​ളി​ലും ഫാസ്‌ററ്‌-ഫുഡ്‌ കണ്ടെയ്‌ന​റു​ക​ളു​ടെ​യും കനംകു​റഞ്ഞ മററു പ്ലാസ്‌റ​റിക്‌ ഉത്‌പ​ന്ന​ങ്ങ​ളു​ടെ​യും നിർമാ​ണ​ത്തി​ലും അവ ഉപയോ​ഗി​ക്ക​പ്പെ​ട്ടി​രി​ക്കു​ന്നു.

എന്നാൽ, സിഎഫ്‌സി​കൾ ക്രമേണ സ്‌ട്രാ​റേ​റാ​സ്‌ഫി​യ​റി​ലേക്ക്‌ ഉയരു​ക​യും അവി​ടെ​വെച്ച്‌ ക്ലോറി​നെ പുറത്തു​വി​ടു​ക​യും ചെയ്യു​ന്നു​വെന്ന്‌ 1974 സെപ്‌റ​റം​ബ​റിൽ, ഷെർവുഡ്‌ റോളണ്ട്‌, മരിയോ മോളിന എന്നീ രണ്ടു ശാസ്‌ത്ര​ജ്ഞൻമാർ വിശദ​മാ​ക്കി. ഓരോ ക്ലോറിൻ ആററത്തി​നും ആയിര​ക്ക​ണ​ക്കിന്‌ ഓസോൺ തൻമാ​ത്ര​കളെ നശിപ്പി​ക്കാൻ കഴിയു​മെന്ന്‌ ഈ ശാസ്‌ത്ര​ജ്ഞൻമാർ കണക്കാക്കി. എന്നാൽ ഓസോ​ണിന്‌ മേലന്ത​രീ​ക്ഷ​ത്തിൽ എല്ലായി​ട​ത്തു​മൊ​രു​പോ​ലെ നാശം സംഭവി​ക്കു​ന്ന​തി​നു പകരം ധ്രുവ​ങ്ങൾക്കു മീതെ​യാണ്‌ അതിന്റെ നാശം വളരെ​യ​ധി​ക​മു​ണ്ടാ​യി​രു​ന്നി​ട്ടു​ള്ളത്‌.

1979 മുതലുള്ള ഓരോ വസന്തത്തി​ലും ഓസോൺ വലിയ അളവു​ക​ളിൽ അൻറാർട്ടി​ക്ക​യു​ടെ മീതെ​നി​ന്നും അപ്രത്യ​ക്ഷ​മാ​യി അവിടെ വീണ്ടും പ്രത്യ​ക്ഷ​മാ​കു​ന്നു. ഓസോ​ണി​ന്റെ കാലി​ക​മാ​യി ഉണ്ടാകുന്ന ഈ നഷ്ടത്തെ ഓസോൺ ദ്വാരം എന്നു പറയുന്നു. മാത്രമല്ല, അടുത്ത​കാ​ല​ത്താ​യി ഇപ്പറയുന്ന ദ്വാരം വലുതാ​യി​ക്കൊ​ണ്ടി​രി​ക്കു​ക​യാണ്‌, ഈ അവസ്ഥ ദീർഘ​നാ​ള​ത്തേക്കു തുടരു​ക​യും ചെയ്യുന്നു. 1992-ൽ ഉപഗ്ര​ഹ​ത്തിൽനി​ന്നെ​ടുത്ത അളവുകൾ റെക്കോർഡ്‌ വലിപ്പ​ത്തി​ലുള്ള ഒരു ഓസോൺ ദ്വാരം വെളി​പ്പെ​ടു​ത്തി—വടക്കേ അമേരി​ക്ക​യെ​ക്കാൾ വലിപ്പ​മുള്ള ഒന്ന്‌. അതിൽ അധികം ഓസോൺ ബാക്കി​യി​ല്ലാ​യി​രു​ന്നു. ബലൂൺ യന്ത്രോ​പ​ക​ര​ണ​ങ്ങ​ളിൽനി​ന്നെ​ടുത്ത അളവുകൾ ഓസോ​ണി​ന്റെ 60 ശതമാ​ന​ത്തി​ല​ധി​കം നഷ്ടമാ​യി​രി​ക്കു​ന്ന​താ​യി വെളി​പ്പെ​ടു​ത്തി—രേഖ​പ്പെ​ടു​ത്തി​യി​ട്ടു​ള്ള​തിൽവെച്ച്‌ ഏററവും കുറഞ്ഞ അളവ്‌.

അതേസ​മ​യം, ഭൂമി​യു​ടെ മററു ഭാഗങ്ങ​ളു​ടെ മേലന്ത​രീ​ക്ഷ​ത്തി​ലും ഓസോ​ണി​ന്റെ അളവ്‌ കുറഞ്ഞു​വ​രു​ക​യാ​യി​രു​ന്നു. ന്യൂ സയൻറി​സ്‌ററ്‌ എന്ന മാഗസിൻ ഇപ്രകാ​രം റിപ്പോർട്ടു​ചെ​യ്യു​ന്നു: “വടക്കൻ യൂറോപ്പ്‌, റഷ്യ, കാനഡ എന്നിവി​ട​ങ്ങ​ളി​ലൂ​ടെ കടന്നു​പോ​കുന്ന 50-ഉം 60-ഉം ഡിഗ്രി വടക്കേ അക്ഷാം​ശ​ങ്ങൾക്കി​ട​യിൽ 1992-ൽ ഓസോ​ണി​ന്റെ അളവ്‌ അസാധാ​ര​ണ​മാം​വി​ധം കുറവാ​യി​രു​ന്നു​വെന്ന്‌ . . . ഏററവും പുതിയ കണക്കുകൾ പ്രകട​മാ​ക്കു​ന്നു. ഓസോ​ണി​ന്റെ അളവ്‌ സാധാരണ ഉണ്ടായി​രി​ക്കേ​ണ്ട​തി​നെ​ക്കാൾ 12 ശതമാനം കുറവാ​യി​രു​ന്നു. 35 വർഷത്തെ തുടർച്ച​യായ നിരീക്ഷണ കാലയ​ള​വിൽ ഉണ്ടായി​ട്ടു​ള്ള​തിൽ ഏററവും താഴ്‌ന്നത്‌.”

സയൻറി​ഫിക്‌ അമേരി​ക്കൻ എന്ന ജേർണൽ ഇപ്രകാ​രം പ്രസ്‌താ​വി​ക്കു​ന്നു: “ഏററവും ദാരു​ണ​മായ മുന്നറി​യി​പ്പു​കൾ പോലും ക്ലോ​റോ​ഫ്‌ളൂ​റോ​കാർബ​ണു​കൾ മൂലമുള്ള ഓസോൺ നഷ്ടത്തെ താഴ്‌ത്തി​മ​തി​ച്ചി​രി​ക്കു​ന്ന​താ​യി ഇപ്പോൾ പ്രകട​മാ​യി​രി​ക്കു​ന്നു. . . . എന്നിട്ടും അന്ന്‌ ഗവൺമെൻറി​ലെ​യും വ്യവസാ​യ​രം​ഗ​ത്തെ​യും സ്വാധീ​ന​ശ​ക്തി​യുള്ള ആളുകൾ നിയ​ന്ത്ര​ണ​ങ്ങളെ ശക്തമായി എതിർത്തു. കാരണം പറഞ്ഞതോ ശാസ്‌ത്രീയ തെളി​വു​കൾ പോ​രെ​ന്നും.”

രണ്ടു​കോ​ടി ടൺ സിഎഫ്‌സി​കൾ ഇപ്പോൾത്തന്നെ അന്തരീ​ക്ഷ​ത്തി​ലേക്കു പോയി​രി​ക്കു​ന്ന​താ​യി കണക്കാ​ക്ക​പ്പെ​ടു​ന്നു. സിഎഫ്‌സി​കൾക്ക്‌ സ്‌ട്രാ​റേ​റാ​സ്‌ഫി​യ​റി​ലേക്കു പ്രവഹി​ക്കാൻ വർഷങ്ങൾ വേണ്ടി​വ​രു​ന്ന​തു​കൊണ്ട്‌ ലക്ഷക്കണ​ക്കി​നു ടണ്ണുകൾ മേലന്ത​രീ​ക്ഷ​ത്തിൽ ഹാനി​വ​രു​ത്താ​നാ​യി ഇനിയും എത്തിയി​ട്ടില്ല. എന്നിരു​ന്നാ​ലും, ഓസോൺ നാശകാ​രി​യായ ക്ലോറി​ന്റെ ഉറവിടം സിഎഫ്‌സി​കൾ മാത്രമല്ല. “ഒരു ഷട്ടിൽ ഓരോ പ്രാവ​ശ്യം വിക്ഷേ​പി​ക്ക​പ്പെ​ടു​മ്പോ​ഴും ഏതാണ്ട്‌ 75 ടൺ ക്ലോറിൻ ഓസോൺ പാളി​യിൽ നിക്ഷേ​പി​ക്ക​പ്പെ​ടു​ന്നു​വെന്ന്‌ നാസാ കണക്കാ​ക്കുന്ന”തായി പോപ്പു​ലർ സയൻസ്‌ എന്ന മാഗസിൻ റിപ്പോർട്ടു​ചെ​യ്യു​ന്നു.

ഭവിഷ്യ​ത്തു​കൾ എന്തെല്ലാം?

മേലന്ത​രീ​ക്ഷ​ത്തിൽ ഓസോ​ണി​ന്റെ അളവു കുറഞ്ഞാ​ലുള്ള പരിണ​ത​ഫ​ലങ്ങൾ മുഴു​വ​നും മനസ്സി​ലാ​യി​ട്ടില്ല. എന്നിരു​ന്നാ​ലും, ഉറപ്പായി കാണ​പ്പെ​ടുന്ന ഒരു സംഗതി ഭൂമി​യി​ലെ​ത്തുന്ന ഉപദ്ര​വ​കാ​രി​ക​ളായ യുവി (അൾട്രാ​വ​യ​ല​ററ്‌) കിരണ​ങ്ങ​ളു​ടെ അളവ്‌ വർധി​ക്കു​ന്നു എന്നതാണ്‌. ഇത്‌ വലിയ അളവിൽ ചർമാർബു​ദ​ത്തിന്‌ ഇടയാ​ക്കു​ന്നു. “ഉത്തരാർധ​ഗോ​ള​ത്തിൽ പതിക്കുന്ന ഉപദ്ര​വ​കാ​രി​യായ യുവി​യു​ടെ വാർഷിക അളവ്‌ കഴിഞ്ഞ ദശകത്തിൽ ഏതാണ്ട്‌ 5 ശതമാനം വർധി​ച്ച​താ​യി” എർത്ത്‌ എന്ന ജേർണൽ റിപ്പോർട്ടു​ചെ​യ്യു​ന്നു.

യുവി കിരണ​ങ്ങ​ളു​ടെ വെറും ഒരു ശതമാനം വർധനവ്‌ ചർമാർബു​ദ​ത്തി​ന്റെ 2 മുതൽ 3 വരെ ശതമാനം വർധന​വി​നു കാരണ​മാ​കു​മെന്നു കണക്കാ​ക്ക​പ്പെ​ടു​ന്നു. ആഫ്രിക്കൻ മാസി​ക​യായ ഗെറെ​റവേ ഇപ്രകാ​രം പ്രസ്‌താ​വി​ക്കു​ന്നു: “ദക്ഷിണാ​ഫ്രി​ക്ക​യിൽ ഓരോ​വർഷ​വും ചർമാർബു​ദ​ങ്ങ​ളു​ടെ 8 000-ത്തിലധി​കം പുതിയ കേസുകൾ ഉണ്ടാകു​ന്നു . . . ഓസോൺ സംരക്ഷണം ഏററവും കുറവും ചർമാർബു​ദം ഏററവും കൂടു​ത​ലു​ള്ള​തു​മായ രാജ്യ​ങ്ങ​ളി​ലൊ​ന്നാണ്‌ ഞങ്ങളു​ടേത്‌ (ഇവ തമ്മിലുള്ള ബന്ധം യാദൃ​ച്ഛി​കമല്ല).”

മേലന്ത​രീ​ക്ഷ​ത്തി​ലെ ഓസോൺ നാശം ചർമാർബു​ദത്തെ വർധി​പ്പി​ക്കു​മെന്ന്‌ റോളണ്ട്‌, മൊളിന എന്നീ ശാസ്‌ത്ര​ജ്ഞൻമാർ വർഷങ്ങൾക്കു​മുമ്പ്‌ പ്രവചി​ച്ച​താണ്‌. ഏറോ​സോ​ളു​ക​ളി​ലെ സിഎഫ്‌സി​ക​ളു​ടെ ഉപയോ​ഗം ഐക്യ​നാ​ടു​ക​ളിൽ ഉടൻതന്നെ നിരോ​ധി​ക്കാൻ അവർ ശുപാർശ​ചെ​യ്‌തു. അപകടം മനസ്സി​ലാ​ക്കി​ക്കൊണ്ട്‌ പല രാജ്യ​ങ്ങ​ളും 1996 ജനുവ​രി​യോ​ടു കൂടി സിഎഫ്‌സി​ക​ളു​ടെ ഉത്‌പാ​ദനം നിർത്ത​ലാ​ക്കാ​മെന്നു സമ്മതിച്ചു. എന്നാൽ, സിഎഫ്‌സി​ക​ളു​ടെ ഉപയോ​ഗം ഇതിനി​ടെ ഭൂമി​യി​ലെ ജീവന്‌ അപകട​മു​യർത്തി​ക്കൊ​ണ്ടി​രി​ക്ക​യാണ്‌.

നമ്മുടെ ജീവ​ലോ​കം (ഇംഗ്ലീഷ്‌) ഇപ്രകാ​രം റിപ്പോർട്ടു​ചെ​യ്യു​ന്നു: അൻറാർട്ടി​ക്ക​യു​ടെ​മേ​ലുള്ള ഓസോൺ നാശം “മുമ്പു സംശയി​ച്ചി​രു​ന്ന​തി​നെ​ക്കാൾ ആഴത്തിൽ അൾട്രാ​വ​യ​ല​ററ്‌ റേഡി​യേഷൻ സമു​ദ്ര​ത്തി​ലേക്കു കടന്നു​ചെ​ല്ലാൻ ഇടയാ​ക്കി​യി​രി​ക്കു​ന്നു. . . . ഇത്‌ സമു​ദ്ര​ത്തി​ലെ ആഹാര​ശൃം​ഖ​ല​യു​ടെ അടിസ്ഥാ​ന​ക​ണ്ണി​യാ​യി​രി​ക്കുന്ന ഏകകോശ ജീവി​ക​ളു​ടെ ഉത്‌പാ​ദ​ന​ത്തിൽ കാര്യ​മായ കുറവു വരുത്തി​യി​രി​ക്കു​ന്നു.” ഗോള​വ്യാ​പ​ക​മായ ആഹാര​വി​ത​ര​ണ​ത്തി​നു ഭീഷണി​യു​യർത്തി​ക്കൊണ്ട്‌ യുവി കിരണ​ങ്ങ​ളു​ടെ വർധനവു പല വിളക​ളു​ടെ​യും ഉത്‌പാ​ദനം കുറയ്‌ക്കു​ന്ന​താ​യി പരീക്ഷ​ണങ്ങൾ പ്രകട​മാ​ക്കു​ന്നു.

തീർച്ച​യാ​യും സിഎഫ്‌സി​ക​ളു​ടെ ഉപയോ​ഗം തികച്ചും വിപത്‌ക​ര​മാണ്‌. നമ്മുടെ അന്തരീ​ക്ഷത്തെ ആക്രമി​ക്കുന്ന മററു പല മാലി​ന്യ​ങ്ങ​ളു​മുണ്ട്‌. ഭൂമി​യി​ലെ ജീവന്‌ നാമമാ​ത്ര അളവു​ക​ളിൽ മർമ​പ്ര​ധാ​ന​മാ​യി​രി​ക്കുന്ന ഒരു അന്തരീക്ഷ വാതക​മാണ്‌ അവയി​ലൊന്ന്‌.

മലിനീ​ക​ര​ണ​ത്തി​ന്റെ ഫലം

19-ാം നൂററാ​ണ്ടി​ന്റെ മധ്യത്തിൽ മനുഷ്യർ എന്നത്തേ​തി​ലു​മ​ധി​ക​മാ​യി കൽക്കരി​യും വാതക​വും എണ്ണയും കത്തിച്ചു​തു​ടങ്ങി. ഇത്‌ അന്തരീ​ക്ഷ​ത്തി​ലേക്കു വലിയ അളവിൽ കാർബൺഡൈ ഓക്‌​സൈ​ഡി​നെ കടത്തി​വി​ട്ടു. അന്ന്‌ ഈ നാമമാ​ത്ര അന്തരീക്ഷ വാതക​ത്തി​ന്റെ അളവ്‌ പത്തു ലക്ഷത്തിന്‌ ഏതാണ്ട്‌ 285 എന്ന തോതി​ലാ​യി​രു​ന്നു. എന്നാൽ മനുഷ്യൻ ഫോസിൽ ഇന്ധനങ്ങളെ കൂടു​ത​ലാ​യി ഉപയോ​ഗി​ച്ച​തോ​ടെ കാർബൺഡൈ ഓക്‌​സൈ​ഡി​ന്റെ അളവ്‌ പത്തു ലക്ഷത്തിന്‌ 350 എന്ന തോതി​ല​ധി​ക​മാ​യി​ത്തീർന്നു. താപത്തെ തടഞ്ഞു​നിർത്തുന്ന ഈ വാതകം അന്തരീ​ക്ഷ​ത്തിൽ കൂടു​ത​ലു​ണ്ടാ​യി​രി​ക്കു​ന്ന​തു​കൊണ്ട്‌ ഉണ്ടായി​ട്ടുള്ള ഭവിഷ്യ​ത്തു​കൾ എന്താണ്‌?

കാർബൺഡൈ ഓക്‌​സൈ​ഡി​ന്റെ അളവി​ലുള്ള വർധന​വാ​ണു ഭൂമി​യു​ടെ താപവർധ​ന​യ്‌ക്കു കാരണ​മെന്നു പലരും വിശ്വ​സി​ക്കു​ന്നു. എന്നാൽ ഗോള​ത​പ​ന​ത്തി​നു കാരണം പ്രത്യേ​കി​ച്ചും നമ്മുടെ സൂര്യന്റെ വ്യതി​യാ​ന​മാ​ണെന്ന്‌—അതായത്‌ അടുത്ത​കാ​ല​ത്താ​യി സൂര്യൻ വലിയ അളവിൽ ഊർജം നിർഗ​മി​പ്പി​ച്ചി​രു​ന്ന​താ​ണെന്ന്‌—മററു ചില ഗവേഷകർ പറയുന്നു.

സംഗതി എന്തായാ​ലും, 19-ാം നൂററാ​ണ്ടി​ന്റെ മധ്യത്തിൽ റെക്കോർഡ്‌ സൂക്ഷി​ക്കാൻ തുടങ്ങി​യ​തിൽപ്പി​ന്നെ ഏററവും ചൂടു​ണ്ടാ​യി​രുന്ന ദശകം 1980-കളു​ടേ​താ​യി​രു​ന്നു. ദ സ്‌ററാർ എന്ന ദക്ഷിണാ​ഫ്രി​ക്കൻ പത്രം ഇപ്രകാ​രം റിപ്പോർട്ടു​ചെ​യ്യു​ന്നു: “ഈ പ്രവണത നമ്മുടെ ദശകത്തി​ലേക്കു തുടർന്നി​രി​ക്കു​ന്നു. അതായത്‌, 140 വർഷത്തെ റെക്കോർഡ​നു​സ​രിച്ച്‌ 1990 രേഖ​പ്പെ​ടു​ത്തി​യി​ട്ടു​ള്ള​തിൽവെച്ച്‌ ഏററവും ചൂടുള്ള വർഷവും 1991 ഏററവും ഊഷ്‌മാ​വുള്ള മൂന്നാ​മത്തെ വർഷവും 1992 . . . ഏററവും ഊഷ്‌മാ​വുള്ള പത്താമത്തെ വർഷവു​മാണ്‌.” 1991-ൽ പിനറ​റൂ​ബോ പർവതം പൊട്ടി​ത്തെ​റി​ച്ച​പ്പോൾ അന്തരീ​ക്ഷ​ത്തി​ലേക്കു പൊടി നിർഗ​മി​ച്ച​താണ്‌ കഴിഞ്ഞ രണ്ടു വർഷത്തി​ല​ധി​ക​മാ​യി താപത്തി​ലെ നേരിയ കുറവി​നു കാരണ​മെന്നു പറയ​പ്പെ​ട്ടി​രി​ക്കു​ന്നു.

ഭൂമി​യി​ലെ താപവർധ​ന​വി​ന്റെ ഭാവി ഫലങ്ങൾ സംബന്ധിച്ച്‌ ചൂടു​പി​ടിച്ച വാദം നടക്കു​ന്നുണ്ട്‌. എന്നാൽ കാലാ​വസ്ഥാ പ്രവച​ന​മെന്ന ഇപ്പോൾത്തന്നെ പ്രയാ​സ​ക​ര​മാ​യി​രി​ക്കുന്ന ജോലി​യെ സങ്കീർണ​മാ​ക്കു​ക​യാണ്‌ ആഗോള തപനം സത്യത്തിൽ ചെയ്‌തി​രി​ക്കുന്ന ഒരു സംഗതി. “ആഗോള തപനം കാലാ​വ​സ്ഥ​യ്‌ക്കു വ്യതി​യാ​നം സൃഷ്ടി​ക്കു​ന്ന​ത​നു​സ​രിച്ച്‌” തെററായ പ്രവച​ന​ങ്ങൾക്കുള്ള “സാധ്യത വർധി​ച്ചേക്കാ”മെന്ന്‌ ന്യൂ സയൻറി​സ്‌ററ്‌ സൂചി​പ്പി​ക്കു​ന്നു.

ആഗോള തപനം തങ്ങളുടെ പോളി​സി​കളെ നഷ്ടത്തി​ലാ​ക്കു​മെന്ന്‌ പല ഇൻഷ്വ​റൻസ്‌ കമ്പനി​ക​ളും ഭയപ്പെ​ടു​ന്നു. “ദൗർഭാ​ഗ്യ​ങ്ങ​ളു​ടെ [ഒരു] പ്രളയത്തെ അഭിമു​ഖീ​ക​രി​ക്കുന്ന ചില റിഇൻഷ്വ​റൻസു​കാർ പ്രകൃ​തി​വി​പ​ത്തു​കൾക്ക്‌ ഇരയാ​കാ​തെ സൂക്ഷി​ക്കു​ന്നു. വിപണി​യോ​ടു​തന്നെ വിടപ​റ​യു​ന്ന​തി​നെ​പ്പ​ററി ചിലരു​ടെ​യി​ട​യിൽ സംസാ​ര​മുണ്ട്‌. . . . അനിശ്ചി​ത​ത്ത്വം സംബന്ധിച്ച്‌ അവർ ഭയമു​ള്ള​വ​രാണ്‌,” ദി ഇക്കണോ​മി​സ്‌ററ്‌ സമ്മതി​ക്കു​ന്നു.

യഥാർഥ​ത്തിൽ, രേഖ​പ്പെ​ടു​ത്തി​യി​ട്ടു​ള്ള​തിൽവെച്ച്‌ ഏററവും ചൂടു​ണ്ടാ​യി​രുന്ന വർഷമായ 1990-ൽ ആർട്ടിക്ക്‌ ഹിമ​ശേ​ഖ​ര​ത്തി​ന്റെ ഒരു വലിയ ഭാഗം മുമ്പൊ​രി​ക്ക​ലും ഉണ്ടായി​ട്ടി​ല്ലാത്ത അളവിൽ ഉരുകി​പ്പോ​യി. ഇത്‌ നൂറു​ക​ണ​ക്കി​നു ധ്രുവ​ക്ക​ര​ടി​കൾ റങ്കൽ ദ്വീപിൽ ഒരു മാസത്തി​ല​ധി​കം അലഞ്ഞു​തി​രി​യാൻ ഇടയാക്കി. “ആഗോള തപനത്തി​ന്റെ ഫലമായ ഈ അവസ്ഥകൾ . . . ഒരു നിത്യ​സം​ഭ​വ​മാ​യി​ത്തീർന്നേ​ക്കാം” എന്ന്‌ ബിബിസി വന്യജീ​വി​തം (ഇംഗ്ലീഷ്‌) എന്ന മാഗസിൻ മുന്നറി​യി​പ്പു നൽകുന്നു.

“അൻറാർട്ടി​ക്ക​യിൽനി​ന്നു വടക്കോട്ട്‌ ഒഴുകു​ന്ന​തും തെക്കൻ അററ്‌ലാൻറി​ക്കിൽ കപ്പലു​കൾക്ക്‌ അപകടം സൃഷ്ടി​ക്കു​ന്ന​തു​മായ ഹിമാ​നി​ക​ളു​ടെ നാടകീയ വർധന​വി​നു കാലാ​വസ്ഥാ വിദഗ്‌ധർ ആഗോള തപനത്തെ കുററ​പ്പെ​ടു​ത്തുന്ന”തായി 1992-ൽ ഒരു ആഫ്രിക്കൻ പത്രം റിപ്പോർട്ടു​ചെ​യ്‌തു. എർത്തിന്റെ ജനുവരി 1993 ലക്കമനു​സ​രിച്ച്‌ തെക്കൻ കാലി​ഫോർണി​യ​യു​ടെ സമു​ദ്രാ​ന്തർഭാ​ഗത്ത്‌ സമു​ദ്ര​നി​ര​പ്പി​ന്റെ ക്രമേ​ണ​യുള്ള വർധന​വി​നു കാരണം ഭാഗി​ക​മാ​യി ജലത്തിന്റെ തപനമാണ്‌.

നിർഭാ​ഗ്യ​ക​ര​മെന്നു പറയട്ടെ, മനുഷ്യർ അന്തരീ​ക്ഷ​ത്തി​ലേക്കു വിഷവാ​ത​കങ്ങൾ ഞെട്ടി​ക്കുന്ന അളവിൽ പിന്നെ​യും പിന്നെ​യും തള്ളിവി​ട്ടു​കൊ​ണ്ടി​രി​ക്ക​യാണ്‌. “ഓരോ വർഷവും 9,00,000 ടണ്ണില​ധി​കം വിഷരാ​സ​വ​സ്‌തു​ക്കൾ വായു​വി​ലേക്കു തള്ളിവി​ട​പ്പെ​ടു​ന്ന​താ​യി യു.എസ്‌.എ.-യിൽ പരിസ്ഥി​തി സംരക്ഷണ ഏജൻസി​യു​ടെ 1989-ലെ ഒരു റിപ്പോർട്ട്‌ വിലയി​രു​ത്തി”യതായി ദ എർത്ത്‌ റിപ്പോർട്ട്‌ 3 എന്ന പുസ്‌തകം പ്രസ്‌താ​വി​ക്കു​ന്നു. ലക്ഷക്കണ​ക്കി​നു വരുന്ന മോ​ട്ടോർ വാഹന​ങ്ങ​ളിൽനി​ന്നു വമിക്കുന്ന പുകയു​ടെ കാര്യം ഇതിലുൾപ്പെ​ടാ​ത്ത​തു​കൊണ്ട്‌ ഈ കണക്ക്‌ ഒരു താഴ്‌ത്തി​മ​തി​ക്ക​ലാ​യി കണക്കാ​ക്ക​പ്പെ​ട്ടി​രി​ക്കു​ന്നു.

വായു മലിനീ​ക​ര​ണ​ത്തി​ന്റെ ഞെട്ടി​ക്കുന്ന റിപ്പോർട്ടു​കൾ മററു പല വ്യവസാ​യ​വ​ത്‌കൃത രാജ്യ​ങ്ങ​ളിൽനി​ന്നും വരുന്നുണ്ട്‌. കമ്മ്യു​ണി​സ്‌ററ്‌ ഭരണത്തി​ന്റെ ദശകങ്ങ​ളിൽ കിഴക്കൻ യൂറോ​പ്യൻ ദേശങ്ങ​ളിൽ ഉണ്ടായ അനിയ​ന്ത്രി​ത​മായ വായു മലിനീ​ക​ര​ണ​ത്തി​ന്റെ അടുത്ത​കാ​ലത്തെ വെളി​പ്പെ​ട​ലു​കൾ പ്രത്യേ​കി​ച്ചു ഭീതി​പ്പെ​ടു​ത്തു​ന്ന​വ​യാ​യി​രു​ന്നു.

കാർബൺഡൈ ഓക്‌​സൈ​ഡി​നെ വലി​ച്ചെ​ടു​ക്കു​ക​യും ഓക്‌സി​ജനെ പുറത്തു​വി​ടു​ക​യും ചെയ്യുന്ന ഭൂവൃ​ക്ഷങ്ങൾ വിഷവാ​ത​ക​ത്തി​ന്റെ ഇരകളിൽ പെടുന്നു. ന്യൂ സയൻറി​സ്‌ററ്‌ ഇപ്രകാ​രം റിപ്പോർട്ടു​ചെ​യ്‌തു: “വായു മലിനീ​ക​രണം വനത്തിന്റെ ആരോഗ്യ നഷ്ടത്തി​നുള്ള മുഖ്യ കാരണ​ങ്ങ​ളിൽ ഒന്നായി തുടരു​ന്നെന്ന്‌ [പറഞ്ഞ] കാർഷിക മന്ത്രി​യു​ടെ . . . അഭി​പ്രാ​യ​മ​നു​സ​രിച്ച്‌ ജർമനി​യി​ലെ വൃക്ഷങ്ങൾ കൂടുതൽ അനാ​രോ​ഗ്യ​ക​ര​മാ​യി വളർന്നു​കൊ​ണ്ടി​രി​ക്ക​യാണ്‌.”

ദക്ഷിണാ​ഫ്രി​ക്ക​യി​ലെ ട്രാൻസ്‌വാൾ ഉന്നതപീ​ഠ​ഭൂ​മി​യി​ലെ അവസ്ഥ സമാന​മാണ്‌. “ആസിഡ്‌ മഴയു​ണ്ടാ​ക്കുന്ന നാശത്തി​ന്റെ ആദ്യ ലക്ഷണങ്ങൾ ഇപ്പോൾ കിഴക്കൻ ട്രാൻസ്‌വാ​ളിൽ പ്രത്യ​ക്ഷ​പ്പെ​ടു​ന്നുണ്ട്‌. അവിടെ പൈൻ മുള്ളു​ക​ളു​ടെ നിറം ആരോ​ഗ്യ​ക​ര​മായ കടും​പ​ച്ച​യിൽനിന്ന്‌ രോഗ​പ്ര​കൃ​തി​യുള്ള പുള്ളി​ക​ളോ​ടു​കൂ​ടിയ ഇളം ചാരമ​ഞ്ഞ​യാ​യി​ത്തീ​രു​ന്നു” എന്ന്‌ ഭൂമി​യി​ലേക്കു തിരികെ (ഇംഗ്ലീഷ്‌) എന്ന തന്റെ പുസ്‌ത​ക​ത്തിൽ ജെയിംസ്‌ ക്ലാർക്ക്‌ റിപ്പോർട്ടു​ചെ​യ്യു​ന്നു.

അത്തരം റിപ്പോർട്ടു​കൾ ലോക​ത്തി​ന്റെ നാനാ​ഭാ​ഗ​ത്തു​നി​ന്നും വരുന്നുണ്ട്‌. ഒരു രാജ്യ​വും ഇതിൽനി​ന്നു വിമു​ക്തമല്ല. ആകാശം മുട്ടെ പുകത്തൂ​ണു​കൾ നിൽക്കെ വ്യവസാ​യ​വ​ത്‌കൃത രാജ്യങ്ങൾ തങ്ങളുടെ മലിനീ​ക​ര​ണത്തെ അയൽദേ​ശ​ങ്ങ​ളി​ലേക്കു കയററു​മതി ചെയ്യുന്നു. മമനു​ഷ്യ​ന്റെ അത്യാർത്തി​പൂണ്ട വ്യവസായ വികസ​ന​ത്തി​ന്റെ ചരിത്രം പ്രത്യാശ നൽകു​ന്നില്ല.

എന്നിരു​ന്നാ​ലും ശുഭാ​പ്‌തി​വി​ശ്വാ​സ​ത്തിന്‌ അടിസ്ഥാ​ന​മുണ്ട്‌. നമ്മുടെ അമൂല്യ അന്തരീക്ഷം നാശത്തിൽനി​ന്നു സംരക്ഷി​ക്ക​പ്പെ​ടു​മെന്ന്‌ നമുക്കു ശുഭാ​പ്‌തി​വി​ശ്വാ​സ​മു​ള്ള​വ​രാ​യി​രി​ക്കാം. ഇത്‌ സാധ്യ​മാ​കുന്ന വിധം സംബന്ധിച്ച്‌ അടുത്ത​ലേ​ഖ​ന​ത്തിൽനി​ന്നു മനസ്സി​ലാ​ക്കുക.

[7-ാം പേജിലെ ചിത്രം]

മേലന്തരീക്ഷത്തിലെ ഓസോ​ണി​ന്റെ നാശം ചർമാർബു​ദ​ത്തി​ന്റെ വർധന​വി​ലേക്കു നയിച്ചി​രി​ക്കു​ന്നു

[9-ാം പേജിലെ ചിത്രം]

അത്തരം മലിനീ​ക​ര​ണ​ത്തി​ന്റെ ഭവിഷ്യ​ത്തു​കൾ എന്തെല്ലാ​മാണ്‌?