ദൈവത്തെ കണ്ടെത്താൻ അവൻ ഞങ്ങളെ അനുവ​ദി​ച്ചു

ദാവീദ്‌ രാജാവു രാജത്വം തന്റെ മകനായ ശലോ​മോ​നെ ഏൽപ്പി​ക്കാൻ തയ്യാറാ​യ​പ്പോൾ അവന്‌ ഈ ബുദ്ധ്യു​പ​ദേശം നൽകി: “നിന്റെ അപ്പന്റെ ദൈവത്തെ അറിക​യും അവനെ പൂർണ്ണ​ഹൃ​ദ​യ​ത്തോ​ടും നല്ലമന​സ്സോ​ടും കൂടെ സേവി​ക്ക​യും ചെയ്‌ക; യഹോവ സർവ്വഹൃ​ദ​യ​ങ്ങ​ളെ​യും പരി​ശോ​ധി​ക്ക​യും വിചാ​ര​ങ്ങ​ളും നിരൂ​പ​ണ​ങ്ങ​ളും എല്ലാം ഗ്രഹി​ക്ക​യും ചെയ്യുന്നു; നീ അവനെ അന്വേ​ഷി​ക്കു​ന്നു എങ്കിൽ അവനെ കണ്ടെത്തും; [“തന്നെ കണ്ടെത്താൻ അവൻ നിന്നെ അനുവ​ദി​ക്കും,” NW] ഉപേക്ഷി​ക്കു​ന്നു എങ്കിലോ അവൻ നിന്നെ എന്നേക്കും തള്ളിക്ക​ള​യും.”—1 ദിനവൃ​ത്താ​ന്തം 28:9.

ഞങ്ങളുടെ കാര്യ​ത്തിൽ ഇതു സത്യമാ​ണെന്നു ഞങ്ങൾ കണ്ടു. ഞങ്ങൾ ദൈവത്തെ അന്വേ​ഷി​ച്ചു, അവനെ കണ്ടെത്തു​ക​തന്നെ ചെയ്‌തു—എന്നാൽ തെറ്റായ പല വഴിക​ളി​ലൂ​ടെ വ്യതി​ച​ലി​ക്ക​പ്പെ​ട്ട​തി​നു​ശേ​ഷ​മാ​യി​രു​ന്നെന്നു മാത്രം. ഞങ്ങളുടെ ചായ്‌വു​കൾ എത്ര ശക്തമായി അവനി​ലും അവന്റെ വേലയി​ലും കേന്ദ്രീ​ക​രി​ക്ക​പ്പെ​ട്ടി​രി​ക്കു​ന്നു എന്നു യഹോവ തിരി​ച്ച​റി​ഞ്ഞ​താ​യി ഞങ്ങൾ വിശ്വ​സി​ക്കു​ന്നു. അവനെ​ത്തന്നെ കണ്ടെത്താൻ അവൻ ഞങ്ങളെ അനുവ​ദി​ച്ചു. അതു സംഭവി​ച്ചത്‌ ഇപ്രകാ​ര​മാണ്‌.

ഞങ്ങൾ നാലു സഹോ​ദ​ര​ന്മാ​രാ​യി​രു​ന്നു, യു.എസ്‌.എ.-യിലെ ഫ്‌ളോ​റി​ഡാ​യി​ലാ​ണു വളർന്നു​വ​ന്നത്‌. ഞങ്ങളുടെ പിതാവ്‌ ഒരു വെപ്പു​കാ​ര​നാ​യി​രു​ന്നു. കുടും​ബത്തെ പോറ്റു​ന്ന​തി​നു​വേണ്ടി നീണ്ട ഷിഫ്‌റ്റു​കൾ അദ്ദേഹം പണി​യെ​ടു​ത്തി​രു​ന്നു. ഗൃഹ​ജോ​ലി നോക്കി​യി​രു​ന്നത്‌ അമ്മയാണ്‌. ഞങ്ങൾ നാല്‌ ആൺകു​ട്ടി​ക​ളും പുല്ലു​വെ​ട്ടി​യോ പത്രങ്ങൾ വിതരണം ചെയ്‌തോ—കുടും​ബ​വ​രു​മാ​നം വർധി​പ്പി​ക്കാൻ കഴിയുന്ന എന്തും ചെയ്‌തു​കൊണ്ട്‌—ജോലി കണ്ടെത്തി​യി​രു​ന്നു. മാതാവ്‌ ഒരു കത്തോ​ലി​ക്ക​യും പിതാവ്‌ ഒരു ബാപ്‌റ്റി​സ്റ്റു​കാ​ര​നു​മാ​യി​രു​ന്നു. ഞങ്ങൾ ദൈവ​ത്തി​ലും ബൈബി​ളി​ലും വിശ്വ​സി​ച്ചി​രു​ന്നെ​ങ്കി​ലും അതു സംബന്ധിച്ച്‌ ഒന്നും ചെയ്‌തി​രു​ന്നില്ല. കൂടാതെ, അപൂർവ​മാ​യി മാത്രമേ ഞങ്ങൾ പള്ളിയിൽ പോയി​രു​ന്നു​ള്ളൂ. ’70’-കളുടെ ആരംഭ​ത്തി​ലാ​യി​രു​ന്നു സമാധാ​നം, ബെൽബോ​ട്ടം ജീൻസ്‌, നീണ്ട മുടി, റോക്ക്‌ സംഗീതം എന്നിവ ഏറെ പ്രചാ​ര​ത്തിൽ വന്നത്‌. ഇവയെ​ല്ലാം ഞങ്ങളുടെ ജീവി​തത്തെ സ്വാധീ​നി​ച്ചി​രു​ന്നു.

ഞങ്ങൾ രണ്ടു​പേ​രും, അതായത്‌ സ്‌കോ​ട്ടും സ്റ്റീവും—യഥാ​ക്രമം 24-ഉം 17-ഉം വയസ്സ്‌—ബൈബി​ളിൽ ഗൗരവ​മാർന്ന താത്‌പ​ര്യ​മെ​ടു​ത്തത്‌ 1982-ലായി​രു​ന്നു. അധഃപ​തി​ച്ചു​കൊ​ണ്ടി​രി​ക്കുന്ന ലോകാ​വ​സ്ഥ​ക​ളിൽ ഞങ്ങൾക്കു വർധിച്ച താത്‌പ​ര്യം ജനിച്ച​തും അപ്പോ​ഴാ​യി​രു​ന്നു. സ്‌കോ​ട്ടിന്‌ അദ്ദേഹ​ത്തി​ന്റെ സ്വന്തം കെട്ടി​ട​നിർമാണ ബിസി​നസ്‌ ഉണ്ടായി​രു​ന്നു. അത്‌ ആദായ​ക​ര​മാ​യി​രു​ന്ന​തി​നാൽ ഞങ്ങളൊ​ന്നിച്ച്‌ ഒരു അപ്പാർട്ടു​മെൻറി​ലേക്കു താമസം​മാ​റി. ആ പഴയ മുഷിപ്പൻ മദ്യശാ​ല​യി​ലെ തൊഴി​ലും ജീവി​ത​രീ​തി​യും മൂലം ഞങ്ങൾ ആകെ വശം​കെ​ട്ടി​രു​ന്നു. എങ്കിലും കൂടുതൽ സന്തുഷ്ട​ദാ​യ​ക​മായ ഒരു ജീവി​ത​രീ​തി എവി​ടെ​യെ​ങ്കി​ലും കണ്ടെത്തു​മെന്ന്‌ ഞങ്ങൾക്ക​റി​യാ​മാ​യി​രു​ന്നു. ഞങ്ങൾക്ക്‌ ആത്മീയ കാര്യ​ങ്ങൾക്കു വേണ്ടി വിശപ്പു​തോ​ന്നാൻ തുടങ്ങി​യി​രു​ന്നു. ദൈവ​വ​ച​ന​ത്തിൽ കൂടുതൽ അറിവും ഉൾക്കാ​ഴ്‌ച​യും കാംക്ഷി​ക്കു​ന്ന​തി​നു ബൈബി​ളി​ന്റെ ക്രമമായ വായന ഞങ്ങളെ സഹായി​ച്ചു.

ഞായറാ​ഴ്‌ച​ക​ളിൽ ഞങ്ങൾ വിവിധ പള്ളിക​ളിൽ പോകാൻ തുടങ്ങി. ഫ്‌ളോ​റി​ഡാ​യി​ലെ ലേയ്‌ക്ക്‌ വർത്തി​ലുള്ള ഞങ്ങളുടെ വീടി​ന​ടു​ത്താ​യി ഞങ്ങൾ പൊയ്‌ക്കൊ​ണ്ടി​രുന്ന പള്ളിക​ളിൽ ഞായറാഴ്‌ച പ്രഭാ​ഷ​ണ​ത്തി​ന്റെ 25 മിനി​റ്റും പണം നൽകു​ന്ന​തി​നെ സംബന്ധി​ച്ചാ​യി​രി​ക്കും പറയു​ന്നത്‌. “ഔദാ​ര്യ​മാ​യി നൽകുക, കൈ അയച്ചു സംഭാവന ചെയ്യുക,” പ്രസം​ഗ​പീ​ഠ​ത്തി​ന്മേൽ ഊന്നി​ക്കൊ​ണ്ടു പകുതി മുന്നോ​ട്ടാ​ഞ്ഞു ശുശ്രൂ​ഷകൻ പറയും. പലരു​ടെ​യും പോക്ക​റ്റു​കൾ കാലി​യാ​കു​ന്ന​തു​വരെ ഒരു യോഗ​ത്തിൽതന്നെ മിക്ക​പ്പോ​ഴും മൂന്നു തവണ​യെ​ങ്കി​ലും അവർ പിരി​വു​പാ​ത്രങ്ങൾ കൊണ്ടു​ന​ട​ക്കും. ഞങ്ങൾ പല പള്ളിക​ളി​ലും പോയി. എന്നാൽ കൂടുതൽ പിരി​വു​പാ​ത്രങ്ങൾ കൊണ്ടു​ന​ട​ക്കു​ന്ന​തും സാമൂ​ഹിക കൂടി​വ​ര​വു​ക​ളും മാത്രമേ ഞങ്ങൾ അവിടെ കണ്ടുള്ളൂ.

യഹോ​വ​യു​ടെ സാക്ഷി​ക​ളെ​ക്കു​റി​ച്ചു മുന്നറി​യി​പ്പു ലഭിക്കു​ന്നു

അടിസ്ഥാന ബൈബിൾസ​ത്യ​ങ്ങ​ളെന്നു ഞങ്ങൾ കരുതി​യ​വ​യാൽ ഞങ്ങൾ പ്രബോ​ധി​പ്പി​ക്ക​പ്പെ​ടു​ക​തന്നെ ചെയ്‌തു. ഉപദേ​ഷ്ടാ​ക്ക​ളെ​ല്ലാം പ്രഗൽഭ​രായ ദൈവ​ശാ​സ്‌ത്ര​ജ്ഞ​ന്മാ​രാ​യി​രു​ന്നു​വെന്ന കാരണ​ത്താ​ലാ​ണു ഞങ്ങൾ അവ സ്വീക​രി​ച്ചത്‌. ക്ലാസ്സു​ക​ളി​ലൊന്ന്‌ അമേരി​ക്ക​യി​ലെ വ്യക്തി​പൂ​ജാ​പ്ര​സ്ഥാ​ന​ങ്ങ​ളെ​ക്കു​റി​ച്ചാ​യി​രു​ന്നു. പട്ടിക​യിൽ ആദ്യ​ത്തേതു യഹോ​വ​യു​ടെ സാക്ഷി​ക​ളാ​യി​രു​ന്നു. അവർ യേശു​വിൽ വിശ്വ​സി​ച്ചി​രു​ന്നി​ല്ലെ​ന്നും അവർക്ക്‌ അവരു​ടേ​തായ ബൈബി​ളു​ണ്ടെ​ന്നും അവർ സ്വർഗ​ത്തിൽ പോകു​ന്നി​ല്ലെ​ന്നും നരകമി​ല്ലെന്നു വിശ്വ​സി​ക്കു​ന്നു​വെ​ന്നു​മുള്ള മുന്നറി​യി​പ്പു ഞങ്ങൾക്കു ലഭിച്ചു. തീർച്ച​യാ​യും ഇവയെ​ല്ലാം ഞങ്ങളെ സാക്ഷി​ക​ളു​ടെ പഠിപ്പി​ക്ക​ലു​കൾ തെറ്റാ​ണെന്ന നിഗമ​ന​ത്തിൽ കൊ​ണ്ടെ​ത്തി​ച്ചു.

ഇതി​നോ​ട​കം, ഞങ്ങൾക്കു ശക്തമായ തീക്ഷ്‌ണ​ത​യു​ണ്ടാ​യി​രു​ന്നു. എന്നാൽ സൂക്ഷ്‌മ​പ​രി​ജ്ഞാ​ന​പ്ര​കാ​രം അല്ലായി​രു​ന്നെന്നു മാത്രം. (റോമർ 10:2) നാം സുവാർത്ത പ്രസം​ഗി​ക്കു​ക​യും ശിഷ്യരെ ഉളവാ​ക്കു​ക​യും ചെയ്യണ​മെന്നു മത്തായി 28:19, 20-ൽ യേശു പറഞ്ഞകാ​ര്യം ഞങ്ങൾക്ക്‌ അറിയാ​മാ​യി​രു​ന്നു. ആ സമയത്തു ബൈബിൾ ടൗൺ എന്നു​പേ​രായ, 2,000 അംഗങ്ങ​ളുള്ള ഒരു പള്ളിയി​ലാ​ണു ഞങ്ങൾ പൊയ്‌ക്കൊ​ണ്ടി​രു​ന്നത്‌. അവിടെ ഞങ്ങൾ 17-നും 30-നും ഇടയ്‌ക്കു പ്രായ​മുള്ള ഏതാണ്ട്‌ 100 പേരട​ങ്ങിയ ഒരു യുവസം​ഘ​ത്തി​ന്റെ ഭാഗമാ​യി​രു​ന്നു. സ്‌കോട്ട്‌ അവരെ​ക്കൊണ്ട്‌ ഏതെങ്കി​ലും തരത്തി​ലുള്ള ഒരു പ്രസം​ഗ​വേല ചെയ്യി​ക്കാൻ ശ്രമി​ച്ചു​നോ​ക്കി—എന്നാൽ പ്രയോ​ജ​ന​മൊ​ന്നു​മു​ണ്ടാ​യില്ല.

അതു​കൊ​ണ്ടു ഞങ്ങൾ ഞങ്ങളു​ടേ​തായ ഒരു പ്രസം​ഗ​പ​ര്യ​ടനം ആരംഭി​ച്ചു. ഉപയോ​ഗിച്ച സാധനങ്ങൾ വിൽക്കുന്ന കമ്പോ​ള​ത്തിൽ (flea market) ലഘു​ലേ​ഖ​ക​ളും ബൈബി​ളു​ക​ളും വിതരണം ചെയ്യു​ന്ന​തി​നു​വേണ്ടി ഒരു തട്ടു പണിയു​ക​യെന്ന ആശയം സ്‌ക്കോ​ട്ടി​ന്റെ മനസ്സി​ലു​ദി​ച്ചു. അതുത​ന്നെ​യാ​ണു ഞങ്ങൾ ചെയ്‌ത​തും. സ്ഥലത്തുള്ള ഒരു “ക്രിസ്‌തീയ” പുസ്‌ത​ക​ക്ക​ട​യിൽ പോയി ലഘു​ലേ​ഖ​ക​ളു​ടെ​യും ബൈബി​ളു​ക​ളു​ടെ​യും നല്ലൊരു ശേഖരം ഞങ്ങൾ കൊണ്ടു​വന്നു. അതിനു​ശേഷം, ഉപയോ​ഗിച്ച സാധനങ്ങൾ വിൽക്കുന്ന ഒരു കമ്പോ​ള​ത്തിൽ പോയി രണ്ടു മരക്കാ​ലു​കൾ നാട്ടി അതിന്മേൽ പ്ലൈവു​ഡി​ന്റെ ഒരു പലക നിരത്തി ലഘു​ലേ​ഖ​ക​ളും ബൈബി​ളും അവയു​ടെ​മേൽ വെയ്‌ക്കും. അങ്ങനെ ‘വചനം കേൾക്കുക മാത്രം ചെയ്യാതെ അതിനെ ചെയ്യു​ന്ന​വ​രാ​യും ഇരിപ്പാൻ’ ഞങ്ങൾ ശ്രമിച്ചു.—യാക്കോബ്‌ 1:22

ഓരോ ആഴ്‌ച​യും കടന്നു​പോ​കു​ന്തോ​റും ഉപയോ​ഗിച്ച സാധനങ്ങൾ വിൽക്കുന്ന കമ്പോ​ള​ത്തി​ലെ ശുശ്രൂ​ഷ​യും വർധി​ച്ചു​വന്നു. ഇംഗ്ലീ​ഷി​ലും സ്‌പാ​നി​ഷി​ലു​മുള്ള സാഹി​ത്യ​ങ്ങൾ ഞങ്ങൾ സമർപ്പി​ച്ചി​രു​ന്നു. ബൈബി​ളു​ക​ളും വിവി​ധ​ത​ര​ത്തി​ലുള്ള 30 ലഘു​ലേ​ഖ​ക​ളും, “ദൈവം നിങ്ങളെ സ്‌നേ​ഹി​ക്കു​ന്നു” എന്നെഴു​തിയ തൊപ്പി​പ്പി​ന്നു​കൾ പോലും, ഞങ്ങളുടെ പക്കലു​ണ്ടാ​യി​രു​ന്നു. കുറച്ചു​സ​മ​യ​ത്തി​നു​ശേഷം, “നിങ്ങൾ ഇന്നു ബൈബിൾ വായി​ച്ചു​വോ?,” “ഞാൻ പുഞ്ചി​രി​ക്കു​ന്നത്‌ എന്തു​കൊ​ണ്ടാ​ണെന്ന്‌ അത്ഭുത​പ്പെ​ടു​ന്നു​വോ? എന്റെ ഹൃദയ​ത്തിൽ യേശു​വുണ്ട്‌” എന്നിവ കൂടാതെ സമാന​മായ മറ്റു പല വചനങ്ങ​ളും, ചെറിയ ബൈബിൾ സന്ദേശ​ങ്ങ​ളും ടി-ഷർട്ടു​ക​ളി​ന്മേൽ അച്ചടി​ക്കാൻ സ്‌കോട്ട്‌ ഒരു ഡീകൽ മെഷീൻ കൊണ്ടു​വന്നു. നാലു കുതി​ര​പ്പ​ട​യാ​ളി​ക​ളു​ടെ പടമുള്ള ഒരെണ്ണം “വെളി​പ്പാട്‌” എന്നെഴു​തി​യ​താ​യി​രു​ന്നു.

ആ ഷർട്ടുകൾ ധരിക്കു​ന്ന​തു​വഴി, ഞങ്ങൾ ഒരു നിശബ്ദ സാക്ഷ്യം നൽകു​ന്ന​താ​യാ​ണു ഞങ്ങൾക്കു തോന്നി​യത്‌. അതു​കൊണ്ട്‌ എല്ലായി​ട​ത്തും ഞങ്ങൾ ആ ഷർട്ടുകൾ ധരിച്ചി​രു​ന്നു. ഉപയോ​ഗിച്ച സാധനങ്ങൾ വിൽക്കുന്ന കമ്പോ​ള​ത്തിൽ, എല്ലാ ശനിയാ​ഴ്‌ച​യും ഞായറാ​ഴ്‌ച​യും രാവിലെ എട്ടുമ​ണി​മു​തൽ ഉച്ചക്ക്‌ ഒരുമ​ണി​വരെ ഞങ്ങളുടെ ശുശ്രൂഷ പ്രകട​മാ​യി​രു​ന്നു. വണ്ടികൾ പാർക്കു ചെയ്‌തി​രുന്ന സ്ഥലത്തു​കൂ​ടി നിങ്ങൾ നടന്നു​പോ​കവേ കാറു​ക​ളി​ന്മേൽ ലഘു​ലേ​ഖകൾ കണ്ടിരു​ന്നെ​ങ്കിൽ, കൊള്ളാം ഞങ്ങളാ​യി​രു​ന്നു അതു വെച്ചത്‌. വളരെ കുറച്ചു പണമേ ലഭിച്ചി​രു​ന്നു​ള്ളൂ​വെ​ങ്കി​ലും, എല്ലാ സാഹി​ത്യ​ങ്ങ​ളും ഒരു സംഭാ​വ​ന​യു​ടെ അടിസ്ഥാ​ന​ത്തി​ലാ​യി​രു​ന്നു നൽകി​യി​രു​ന്നത്‌. ഒരു വർഷം ഞങ്ങൾ ചെലവു​ക​ളെ​ല്ലാം കൂട്ടി​നോ​ക്കി​യ​പ്പോൾ അവ 10,000 ഡോള​റു​കൾക്കു മേലാ​യി​രു​ന്നു.

ഞങ്ങൾ ഒരു യഹോ​വ​യു​ടെ സാക്ഷിയെ കണ്ടുമു​ട്ടു​ന്നു

ഒരിക്കൽ ഞങ്ങൾ ബോണി​റ്റാ സ്‌പ്രിം​ഗ്‌സി​ലുള്ള ബീച്ചു​ക​ളി​ലൊ​ന്നിൽ നീന്തി​ക്കൊ​ണ്ടി​രി​ക്കവേ പ്രായം​ചെന്ന ഒരു മനുഷ്യൻ ഞങ്ങളെ സമീപിച്ച്‌ ഞങ്ങളുടെ ട്രക്കി​ന്മേ​ലുള്ള വൻ സ്റ്റിക്കറു​ക​ളും ഞങ്ങളുടെ ടി-ഷർട്ടു​ക​ളും ശ്രദ്ധി​ച്ച​താ​യി അഭി​പ്രാ​യ​പ്പെട്ടു. അദ്ദേഹം ബൈബി​ളി​നെ​ക്കു​റി​ച്ചു സംസാ​രി​ക്കാ​നും തിരു​വെ​ഴു​ത്തു​ക​ളിൽനി​ന്നു ന്യായ​വാ​ദം ചെയ്യാ​നും ആരംഭി​ച്ചു. പ്രവൃ​ത്തി​കൾ 2:31-ലെ വിഷയം പരാമർശി​ച്ചു​കൊണ്ട്‌ അദ്ദേഹം ഇപ്രകാ​രം ചോദി​ച്ചു: “ഒരു തീനരകം ഉണ്ടായി​രു​ന്നെ​ങ്കിൽ, കൊള്ള​രു​താത്ത ആളുകൾ മാത്രമേ അവിടെ പോകു​ന്നു​ള്ളു​വെ​ന്നി​രി​ക്കെ യേശു അവി​ടെ​യാ​യി​രു​ന്ന​താ​യി ബൈബിൾ എന്തു​കൊ​ണ്ടു പറയുന്നു?” മറ്റു പല തിരു​വെ​ഴു​ത്തു​ക​ളും അദ്ദേഹം തുടർന്നു ചർച്ച​ചെ​യ്‌തു. “നിങ്ങൾ യഹോ​വ​യു​ടെ സാക്ഷി​ക​ളി​ലൊ​രാ​ളാ​യി​രി​ക്കണം,” അവസാനം സ്‌ക്കോട്ട്‌ പറഞ്ഞു. “ശരിയാണ്‌,” അദ്ദേഹം പ്രതി​വ​ചി​ച്ചു. “നിങ്ങൾ യേശു​വിൽ വിശ്വ​സി​ക്കു​ന്നി​ല്ല​ല്ലോ,” എന്നായി സ്‌ക്കോട്ട്‌. പിന്നീട്‌ 20 മിനിറ്റ്‌ ആ സാക്ഷി യേശു​വി​നെ​ക്കു​റി​ച്ചു സംസാ​രി​ച്ചു. എന്നാൽ എന്തു​കൊ​ണ്ടോ, അതൊ​ന്നും ഞങ്ങളിൽ മതിപ്പു​ള​വാ​ക്കി​യില്ല.

ഉപയോ​ഗി​ച്ച സാധനങ്ങൾ വിൽക്കുന്ന കമ്പോ​ള​ത്തി​ലെ ശുശ്രൂഷ ഞങ്ങൾ തുടർന്നു​പോ​ന്നു. മൂന്നു വർഷമാ​യി ഞങ്ങൾ ഇതു ചെയ്‌തു​കൊ​ണ്ടി​രി​ക്കു​ക​യാ​യി​രു​ന്നു. ഞങ്ങളുടെ പക്കൽ സത്യമു​ണ്ടെ​ന്നും ഞങ്ങൾ ശരിയായ കാര്യ​മാ​ണു ചെയ്‌തി​രു​ന്ന​തെ​ന്നും എല്ലായ്‌പോ​ഴും വിശ്വ​സി​ക്കു​ക​യും ചെയ്‌തി​രു​ന്നു. എല്ലാ ഞായറാഴ്‌ച രാത്രി​യും ഞങ്ങൾ ഓരോ​രോ​പ​ള്ളി​കൾ സന്ദർശി​ച്ചു​കൊ​ണ്ടി​രു​ന്നു. എന്നാൽ സംബന്ധിച്ച ഒരു പള്ളിയി​ലും ഞങ്ങൾ സംതൃ​പ്‌ത​രാ​യി​രു​ന്നില്ല. ഞങ്ങൾക്കു സന്ദർശി​ക്കാൻ പള്ളിക​ളൊ​ന്നും​തന്നെ അവശേ​ഷി​ച്ചി​രു​ന്നില്ല. അതു​കൊണ്ട്‌ ഒരു രാത്രി​യിൽ “യഹോ​വ​യു​ടെ സാക്ഷി​ക​ളു​ടെ പള്ളികൾ” എന്നു ഞങ്ങൾ വിശേ​ഷി​പ്പിച്ച ഒന്നിൽ പോകാൻ തീരു​മാ​നി​ച്ചു. ഞങ്ങൾ അവരോ​ടു യേശു​വി​നെ​ക്കു​റി​ച്ചു പ്രസം​ഗി​ക്കാൻ പോവു​ക​യാ​യി​രു​ന്നു. ടെല​ഫോൺ ഡയറക്ട​റി​യിൽനി​ന്നും ഞങ്ങൾ മേൽവി​ലാ​സം കണ്ടെത്തി ഒരു ഞായറാഴ്‌ച വൈകിട്ട്‌ അവിടെ ചെന്നു. മറ്റു പള്ളിക​ളെ​പ്പോ​ലെ അവർക്കു ഞായറാഴ്‌ച വൈകി​ട്ടു യോഗ​മി​ല്ലെന്നു മനസ്സി​ലാ​ക്കി​യ​പ്പോൾ അവർ തീർച്ച​യാ​യും യേശു​വിൽ വിശ്വ​സി​ച്ചി​രു​ന്നി​ല്ലെ​ന്നു​തന്നെ ഞങ്ങൾ നിഗമനം ചെയ്‌തു. യോഗ​ങ്ങ​ളു​ടെ സമയം കാണി​ച്ചി​രുന്ന പട്ടിക​യിൽ തിങ്കളാഴ്‌ച വൈകിട്ട്‌ പുസ്‌ത​കാ​ധ്യ​യ​ന​മു​ള്ള​താ​യി ഞങ്ങൾ കണ്ടു. അങ്ങനെ ഞങ്ങളുടെ ടി-ഷർട്ടുകൾ ധരിച്ച്‌ ബൈബി​ളു​ക​ളു​മാ​യി ഞങ്ങൾ തിരി​ച്ചു​ചെന്നു. ടി-ഷർട്ടു​ക​ളിൽ ഏതു ധരിക്ക​ണ​മെന്നു ചർച്ച​ചെ​യ്‌തു​കൊണ്ട്‌ ഏതാനും മിനി​റ്റു​കൾ ചെലവ​ഴി​ച്ച​താ​യി ഞങ്ങളോർക്കു​ന്നു—ഏതായി​രി​ക്കും നല്ലൊരു സാക്ഷ്യം. സ്വൽപ്പം നേര​ത്തെ​തന്നെ ഞങ്ങൾ അവിടെ എത്തി​ച്ചേർന്നു. ചില സഹോ​ദ​രങ്ങൾ ഞങ്ങളെ സമീപി​ച്ചു. അവർ ഊഷ്‌മ​ള​ത​യും സൗഹൃ​ദ​വു​മു​ള്ള​വ​രാ​യി​രു​ന്നു. ഉടനടി ഞങ്ങൾ വെളി​പാ​ടി​നെ സംബന്ധി​ച്ചു ഗഹനമായ ഒരു ചർച്ചയി​ലാ​ണ്ടു. യോഗ​ത്തി​നു തങ്ങാൻ അവർ ഞങ്ങളോട്‌ ആവശ്യ​പ്പെട്ടു. അവർ ഞങ്ങൾക്ക്‌ ആരാധ​ന​യിൽ ഏകീകൃ​തർ എന്ന പുസ്‌തകം നൽകി.a അങ്ങനെ ഞങ്ങൾ അവിടെ ഇരിപ്പു​റ​പ്പി​ച്ചു. ഒരു സഹോ​ദരൻ പ്രാർഥ​ന​യോ​ടെ അധ്യയനം തുടങ്ങി.

ഞങ്ങൾ ഏകാ​ഗ്ര​ത​യോ​ടെ ശ്രദ്ധിച്ചു. ഉപസം​ഹാ​ര​ത്തിൽ അദ്ദേഹം ഇപ്രകാ​രം പറഞ്ഞു: “യേശു​വി​ന്റെ നാമത്തിൽ ആമേൻ” അമ്പര​പ്പോ​ടെ ഞങ്ങൾ പരസ്‌പരം നോക്കി. “അദ്ദേഹം പറഞ്ഞതു നമ്മൾ ശരിക്കു കേട്ടോ? യേശു​വി​ന്റെ നാമത്തി​ലാണ്‌ അദ്ദേഹം പ്രാർഥി​ച്ചത്‌!” ആ സമയം ഞങ്ങളുടെ കണ്ണുകൾ തുറക്കു​ക​യും കട്ടി​യേ​റിയ ചെതുമ്പൽ വീഴു​ക​യും ചെയ്‌ത​തു​പോ​ലെ​യാ​യി​രു​ന്നു അത്‌. ഞങ്ങളുടെ ഹൃദയങ്ങൾ പരമാർഥ​മാ​ണെ​ങ്കിൽ അതു ശ്രദ്ധി​ക്കു​വാ​നുള്ള സമയമാ​യി​രു​ന്നു. ആരാധ​ന​യിൽ ഏകീകൃ​തർ പുസ്‌ത​ക​ത്തി​ന്റെ 21-ാം അധ്യാ​യ​ത്തി​ലേക്കു തിരി​യാൻ സഹോ​ദരൻ എല്ലാവ​രോ​ടും ആവശ്യ​പ്പെട്ടു. അതു യേശു​വി​നെ​ക്കു​റി​ച്ചും ലോക​ത്തി​ന്റെ ഭാഗമല്ലാതിരിക്കുന്നതിനെക്കുറിച്ചുമായിരുന്നു. സംബന്ധി​ക്കാൻ പറ്റിയ ഇതിലും നല്ലൊരു അധ്യയനം വേറെ​യി​ല്ലാ​യി​രു​ന്നു. അത്‌ യേശു​വി​ന്റെ ജീവി​ത​ത്തെ​യും ശുശ്രൂ​ഷ​യെ​യും അതു​പോ​ലെ അന്ത്യനാ​ളു​ക​ളെ​യും നിഷ്‌പ​ക്ഷ​ത​യെ​യും കുറി​ച്ചു​ള്ള​താ​യി​രു​ന്നു. ഞങ്ങൾക്ക്‌ അപരി​ചി​ത​മായ പല ആശയങ്ങ​ളെ​പ്പ​റ്റി​യും ചെറിയ കുട്ടികൾ അഭി​പ്രാ​യം പറയു​ന്നതു ഞങ്ങൾ കേട്ടു. പിന്നീട്‌, യോഗ​ത്തി​ന്റെ സമാപ​ന​ത്തിൽ സഹോ​ദരൻ യേശു​വി​ന്റെ നാമത്തിൽ വീണ്ടും പ്രാർഥി​ച്ചു!

ഞങ്ങൾ ആത്മീയ​മാ​യി പരി​പോ​ഷി​പ്പി​ക്ക​പ്പെ​ടു​ന്നു

സത്യത്തി​നു​വേണ്ടി ദാഹി​ച്ചു​വ​ല​ഞ്ഞാ​ണു ഞങ്ങൾ ഹാളി​ലെ​ത്തി​യത്‌. അപ്പോ​ഴതാ ഞങ്ങളിൽനിന്ന്‌ ഒട്ടും അകലത്തി​ല​ല്ലാ​തെ അത്‌ അവി​ടെ​യു​ണ്ടാ​യി​രു​ന്നു. ആത്മീയ​മാ​യി പരി​പോ​ഷി​പ്പി​ക്ക​പ്പെ​ട്ടെന്നു മനസ്സി​ലാ​ക്കി​ക്കൊ​ണ്ടു ഞങ്ങൾ അവി​ടെ​നി​ന്നു പോന്നു. അതിൽപ്പി​ന്നെ ഞങ്ങൾ ഒരു പള്ളിയു​ടെ​യും പടി ചവിട്ടി​യി​ട്ടില്ല. പിറ്റേന്നു രാത്രി ഞങ്ങൾ ഒരു അലക്കു​ശാ​ല​യിൽ തുണി​യ​ല​ക്കി​ക്കൊ​ണ്ടി​രി​ക്കെ സോഡ മെഷീ​ന​രി​കി​ലാ​യി വീക്ഷാ​ഗോ​പു​ര​ത്തി​ന്റെ​യും ഉണരുക!യുടെ​യും വലി​യൊ​രു കെട്ടു കണ്ടു—അവ ചുരു​ങ്ങി​യത്‌ 150-ങ്കിലും ഉണ്ടായി​രു​ന്നു. മുമ്പാ​യി​രു​ന്നെ​ങ്കിൽ ഞങ്ങൾ ഒരിക്ക​ലും അവ വായി​ക്ക​യി​ല്ലാ​യി​രു​ന്നു. എന്നാൽ ഇപ്പോൾ വളരെ​യ​ധി​കം വിഷയ​ങ്ങ​ളിൽ തത്‌പ്പ​ര​രാ​യി​രു​ന്ന​തി​നാൽ ഞങ്ങൾ അവയെ​ല്ലാം പെറു​ക്കി​ക്കെട്ടി.

“നിങ്ങൾ ത്രിത്വ​ത്തിൽ വിശ്വ​സി​ക്കു​ന്നു​വോ” എന്നതാ​യി​രു​ന്നു ഒരു ലേഖനം. “യഥാർത്ഥ​ത്തിൽ ഒരു നരകമു​ണ്ടോ?” എന്നു മറ്റൊ​രെണ്ണം. ഒരു ഉണരുക!യിൽ വിഗ്ര​ഹ​ങ്ങ​ളെ​ക്കു​റിച്ച്‌ ഒരു ലേഖന​മു​ണ്ടാ​യി​രു​ന്നു. ആ രാത്രി സ്റ്റീവ്‌ ത്രിത്വ​ത്തെ​ക്കു​റി​ച്ചുള്ള ലേഖനം വായിച്ചു. കൂടാതെ, വളരെ​യ​ധി​കം ഗവേഷണം നടത്തു​ക​യും എല്ലാ തിരു​വെ​ഴു​ത്തു​ക​ളും നോക്കു​ക​യും ചെയ്‌തു. എന്നിട്ട്‌ താൻ പഠിച്ച കാര്യങ്ങൾ അറിയി​ക്കാൻ രാത്രി 12:30-ന്‌ സ്‌ക്കോ​ട്ടി​നെ വിളി​ച്ചെ​ഴു​ന്നേൽപ്പി​ക്കു​ക​യും ചെയ്‌തു. പിറ്റേന്ന്‌, ബുധനാഴ്‌ച, ജോലി​ക്കു​ശേഷം സ്റ്റീവ്‌ നരകത്തെ സംബന്ധിച്ച ലേഖനം വായിച്ചു. ലാസർ ഉറങ്ങു​ക​യാ​ണെന്ന്‌ യേശു പറഞ്ഞ യോഹ​ന്നാൻ 11:11-നെക്കു​റി​ച്ചു ന്യായ​വാ​ദം ചെയ്യു​ന്ന​താ​യി​രു​ന്നു അത്‌. സ്‌ക്കോ​ട്ടി​നെ കണ്ടപ്പോൾ സ്റ്റീവ്‌ ഇപ്രകാ​രം പറഞ്ഞു: “തീനര​ക​ത്തെ​ക്കു​റിച്ച്‌ എന്റെ ബൈബിൾ പഠിപ്പി​ക്കു​ന്നില്ല.” വിഗ്ര​ഹ​ങ്ങ​ളെ​യും വിവി​ധ​ത​ര​ത്തി​ലുള്ള കുരി​ശു​ക​ളെ​യും സംബന്ധിച്ച ഉണരുക! വായി​ച്ച​ശേഷം, ഞങ്ങളുടെ പക്കലു​ണ്ടാ​യി​രുന്ന വിഗ്ര​ഹ​ങ്ങ​ളെ​ല്ലാം ചവറ്റു​വ​ണ്ടി​യി​ലേക്കു വലി​ച്ചെ​റിഞ്ഞ്‌ അവ വഹിച്ചു​കൊ​ണ്ടു വണ്ടി പോകു​ന്ന​തും നോക്കി​നി​ന്നു. ഞങ്ങൾ പരസ്‌പരം നോക്കി സംതൃ​പ്‌ത​സൂ​ച​ക​മാ​യി തലക്കു​ലു​ക്കി മന്ദഹസി​ച്ചു. വളരെ ശ്രേഷ്‌ഠ​മായ ഒന്ന്‌—സത്യം—കണ്ടെത്തി​യെന്നു ഞങ്ങൾക്കു ബോധ്യ​മാ​യി​രു​ന്നു.

ഒരു ദിവസം കഴിഞ്ഞ​പ്പോൾ രണ്ടു പെട്ടികൾ ലഭിച്ചു. മാനസാ​ന്ത​ര​പ്പെ​ട്ടി​ല്ലെ​ങ്കിൽ നിങ്ങൾ നരകത്തി​ലാ​യി​രി​ക്കും പോകു​ന്നത്‌ എന്നു പറയുന്ന 5,000 ലഘു​ലേ​ഖകൾ അവയിൽ ഉണ്ടായി​രു​ന്നു. ബൈബിൾ പഠിപ്പി​ക്ക​ല​നു​സ​രിച്ച്‌ ഇവയിൽ പല ലഘു​ലേ​ഖ​ക​ളും ശരിയ​ല്ലെന്നു ഞങ്ങൾക്ക​റി​യാ​മാ​യി​രു​ന്നു. അൽപ്പം ആശയക്കു​ഴ​പ്പ​ത്തി​ലാ​യെ​ങ്കി​ലും ഞങ്ങൾ വീണ്ടും തിങ്കളാഴ്‌ച രാത്രി​യിൽ പുസ്‌ത​കാ​ധ്യ​യ​ന​ത്തിൽ സംബന്ധി​ച്ചു. ഞങ്ങളുടെ പക്കലു​ണ്ടാ​യി​രുന്ന പല ലഘു​ലേ​ഖ​ക​ളും കൊണ്ടു​വന്നു. “ഈ ഒരെണ്ണം കൊള്ളാ​മോ?,” ഞങ്ങൾ ചോദി​ച്ചു. ഒരു രാത്രി ഞങ്ങൾ അവയെ​ല്ലാം പരി​ശോ​ധി​ച്ചു. താമസി​യാ​തെ ഒരു കെട്ട്‌ ലഘു​ലേ​ഖകൾ തറയിൽ കിടക്കു​ക​യാ​യി​രു​ന്നു; അവയിൽ ഒന്നു​പോ​ലും ബൈബിൾ പഠിപ്പി​ക്ക​ലി​നു ചേർച്ച​യി​ല​ല്ലാ​യി​രു​ന്നു. ഞങ്ങൾ അവയെ​ല്ലാം നീക്കം​ചെ​യ്‌തു. പുതു​താ​യി കണ്ടെത്തിയ വിശ്വാ​സം ഞങ്ങളു​ടെ​യും ഞങ്ങൾ പ്രസം​ഗി​ക്കു​ന്ന​വ​രു​ടെ​യും ജീവനെ അർഥമാ​ക്കു​ന്നു​വെ​ന്നതു ഞങ്ങൾക്ക​റി​യാ​മാ​യി​രു​ന്നു. യാതൊ​രു പ്രതി​ബ​ന്ധ​ങ്ങ​ളു​മി​ല്ലാ​തെ ബൈബിൾ പഠിക്കാൻ ഞങ്ങൾ ആഗ്രഹി​ച്ചു.

ഞങ്ങൾ അലാസ്‌ക്ക​യി​ലേക്കു താമസം മാറ്റി. അവിടെ ഞങ്ങളുടെ ആദ്യത്തെ യോഗ​ത്തിൽവെച്ച്‌, ഞങ്ങൾക്കു ദിവസ​വും അധ്യയനം എടുക്കാ​മോ​യെന്ന്‌ ഒരു മൂപ്പ​നോ​ടു ചോദി​ച്ചു. അവിടെ കൂടി​യി​രുന്ന എല്ലാവ​രും​തന്നെ അതു കേട്ടതാ​യി എനിക്കു തോന്നു​ന്നു. ഞങ്ങൾ നല്ല പുരോ​ഗതി കൈവ​രി​ക്കു​ക​യും എന്നേക്കും ജീവി​ക്കാൻ പുസ്‌തകം പൂർത്തി​യാ​ക്കു​ക​യും ചെയ്‌തു. ദ്വിദിന സമ്മേള​ന​ങ്ങ​ളി​ലൊ​ന്നിൽ സ്‌നാ​പ​ന​മേൽക്ക​ണ​മെ​ന്നും ഞങ്ങൾക്കു​ണ്ടാ​യി​രു​ന്നു.* എന്നാൽ ഞങ്ങൾക്ക്‌ അൽപ്പം കാത്തി​രി​ക്കേ​ണ്ടി​വന്നു. പയനി​യ​റിങ്‌ ആയിരു​ന്നു ഞങ്ങളുടെ ലക്ഷ്യം. അവിചാ​രി​ത​മാ​യി പിതാ​വി​നു സുഖമി​ല്ലാ​താ​യി, സഹായ​മേ​കു​ന്ന​തി​നു വേണ്ടി ഞങ്ങൾക്കു ഫ്‌ളോ​റി​ഡാ​യി​ലേക്കു മടങ്ങേ​ണ്ട​താ​യും വന്നു.

ഞങ്ങൾ ആത്മീയ പക്വത​യി​ലേക്കു മുന്നേ​റു​ന്നു

ഫ്‌ളോ​റി​ഡാ​യിൽ ഞങ്ങൾ നന്നായി പുരോ​ഗ​മി​ക്കു​ക​യും ആരാധ​ന​യിൽ ഏകീകൃ​തർ എന്ന പുസ്‌തകം പൂർത്തി​യാ​ക്കു​ക​യും ചെയ്‌തു. എന്നിട്ട്‌, 1987-ൽ സ്‌നാ​പ​ന​മേറ്റു. ഞങ്ങൾ പഠനമാ​രം​ഭി​ച്ചിട്ട്‌ 11 മാസമാ​യി​രു​ന്നു. ഉടനെ ആറു മാസ​ത്തേക്കു ഞങ്ങൾ സഹായ​പ​യ​നി​യർമാ​രാ​വു​ക​യും അതിനു​ശേഷം നിരന്ത​ര​പ​യ​നി​യർമാ​രാ​വു​ക​യും ചെയ്‌തു. വെറും ഒന്നര വർഷത്തി​നു​ള്ളിൽ ഞങ്ങളി​രു​വ​രും ശുശ്രൂ​ഷാ​ദാ​സ​ന്മാ​രാ​യി നിയമി​ക്ക​പ്പെട്ടു. സ്‌നാ​പ​ന​മേറ്റ്‌ രണ്ടുവർഷം കഴിഞ്ഞ​പ്പോൾ ഞങ്ങൾ ബ്രുക്ക്‌ളിൻ ബെഥേ​ലിൽ സേവി​ക്കാൻ തുടങ്ങി. സ്‌ക്കോട്ട്‌ ഇപ്പോ​ഴും അവിടെ സേവന​മ​നു​ഷ്‌ഠി​ച്ചു​കൊണ്ട്‌, രണ്ടു വർഷ​ത്തോ​ള​മാ​യി ചൈനീസ്‌ പഠിക്കു​ന്നു. സ്റ്റീവ്‌ ഇപ്പോൾ റഷ്യയി​ലെ മോസ്‌ക്കോ​യിൽ നിരന്ത​ര​പ​യ​നി​യ​റാ​യി സേവന​മ​നു​ഷ്‌ഠി​ക്കു​ന്നു. ഞങ്ങൾ ഇരുവ​രും സത്യം കണ്ടെത്തി. അതിനു വേണ്ടി​യുള്ള അന്വേ​ഷണം സദൃശ​വാ​ക്യ​ങ്ങൾ 2:1-5 വർണി​ക്കു​ന്ന​തു​പോ​ലെ​യാ​ണെ​ന്നും ഞങ്ങൾ കണ്ടെത്തി. അത്‌ ഇപ്രകാ​രം പറയുന്നു: “മകനേ, ജ്ഞാനത്തി​ന്നു ചെവി​കൊ​ടു​ക്ക​യും ബോധ​ത്തി​ന്നു നിന്റെ ഹൃദയം ചായി​ക്ക​യും ചെയ്യേ​ണ്ട​തി​ന്നു എന്റെ വചനങ്ങളെ കൈ​ക്കൊ​ണ്ടു എന്റെ കല്‌പ​ന​കളെ നിന്റെ ഉള്ളിൽ സംഗ്ര​ഹി​ച്ചാൽ, നീ ബോധ​ത്തി​ന്നാ​യി വിളിച്ചു വിവേ​ക​ത്തി​ന്നാ​യി ശബ്ദം ഉയർത്തു​ന്നു എങ്കിൽ, അതിനെ വെള്ളി​യെ​പ്പോ​ലെ അന്വേ​ഷി​ച്ചു നിക്ഷേ​പ​ങ്ങ​ളെ​പ്പോ​ലെ തിരയു​ന്നു എങ്കിൽ, നീ യഹോ​വാ​ഭക്തി ഗ്രഹി​ക്ക​യും ദൈവ​പ​രി​ജ്ഞാ​നം കണ്ടെത്തു​ക​യും ചെയ്യും.”

സ്റ്റീവ്‌ മോസ്‌ക്കോ​യിൽ ചെന്നു​പെട്ട വിധം

ന്യൂ​യോർക്കിൽ ഒരു ഭാഷ കൂടുതൽ അറിയു​ന്നത്‌ പ്രസം​ഗ​വേല കൂടുതൽ രസപ്ര​ദ​മാ​ക്കി​ത്തീർക്കും. ഇക്കാര​ണ​ത്താ​ലും, ഒരുപക്ഷേ പെട്ടെ​ന്നു​തന്നെ റഷ്യയി​ലേ​ക്കുള്ള വാതിൽ യഹോവ തുറന്നു​ത​രു​മെന്ന ചിന്തയാ​ലും റഷ്യൻഭാഷ പഠിക്കാൻ തീരു​മാ​നി​ച്ചു. ആ സമയത്ത്‌ ബ്രുക്ക്‌ളിൻ ബെഥേ​ലിൽ സേവി​ച്ചു​കൊ​ണ്ടി​രി​ക്കെ ഞാൻ റഷ്യൻ പുസ്‌ത​കാ​ധ്യ​യ​ന​ത്തിൽ സംബന്ധി​ക്കാൻ തുടങ്ങി. വെള്ളി​യാ​ഴ്‌ച​ക​ളിൽ കൂടിവന്ന, ഒരൊറ്റ റഷ്യൻ പുസ്‌ത​കാ​ധ്യ​യ​ന​ക്കൂ​ട്ടമേ അവി​ടെ​യു​ണ്ടാ​യി​രു​ന്നു​ള്ളൂ. സമയം കടന്നു​പോ​കവേ ഞാൻ റഷ്യൻകൂ​ട്ട​ത്തിൽ കൂടു​ത​ലാ​യി ഉൾപ്പെ​ടാൻ തുടങ്ങി. പ്രസം​ഗ​വേ​ല​യിൽ ഞാൻ അവരോ​ടൊ​പ്പം ചേർന്നു. റഷ്യാ​ക്കാ​രു​ടെ ഊഷ്‌മളത മൂലം അതു വളരെ ആസ്വാ​ദ്യ​മാ​യി​രു​ന്നു. എന്നെ റഷ്യൻ പുസ്‌ത​കാ​ധ്യ​യ​ന​കൂ​ട്ട​ത്തി​ലേക്കു മാറ്റാ​മോ​യെന്നു ഞാൻ സേവന ഡിപ്പാർട്ടു​മെൻറിന്‌ എഴുതി ചോദി​ച്ചു. അവർ അതിനു സമ്മതി​ച്ച​പ്പോൾ എനിക്കു സന്തോ​ഷ​മാ​യി.

ഒരു ദിവസം ബെഥേ​ലിൽ പ്രഭാ​താ​രാ​ധ​ന​യു​ടെ സമയത്ത്‌, ഒരു പ്രത്യേക റിപ്പോർട്ടു​ണ്ടാ​യി​രി​ക്കു​ന്ന​താ​ണെന്നു വാച്ച്‌ ടവർ ബൈബിൾ ആൻഡ്‌ ട്രാക്‌റ്റ്‌ സൊ​സൈ​റ്റി​യു​ടെ പ്രസി​ഡൻറ്‌ മിൽട്ടൺ ജി. ഹെൻഷൽ കുടും​ബ​ത്തോ​ടു പറഞ്ഞു. പിന്നീട്‌, യഹോ​വ​യു​ടെ സാക്ഷികൾ റഷ്യയിൽ നിയമാ​നു​സൃ​ത​മാ​യി അംഗീ​ക​രി​ക്ക​പ്പെ​ട്ടി​രി​ക്കു​ന്നു​വെ​ന്നും നമ്മുടെ സഹോ​ദ​രങ്ങൾ ആരാധനാ സ്വാത​ന്ത്ര്യം ആസ്വദി​ക്കു​മെ​ന്നും അദ്ദേഹം പ്രസ്‌താ​വി​ച്ചു. അത്രയും വിസ്‌മ​യ​ക​ര​മാ​യൊ​രു വാർത്ത കേട്ട​പ്പോൾ ഞങ്ങൾക്ക​നു​ഭ​വ​പ്പെട്ട ആഹ്ലാദം ബെഥേ​ലിൽ ആരെങ്കി​ലും മറക്കു​മെന്ന്‌ എനിക്കു തോന്നു​ന്നില്ല. വിസ്‌തൃ​ത​മായ ആ പുതിയ പ്രദേ​ശ​ത്തി​ന്റെ ഭാഗമാ​കാൻ സാധി​ക്കുക എന്നതു വലി​യൊ​രു പദവി​യാ​യി​രി​ക്കു​മെന്ന്‌ ആ നിമിഷം എനിക്കു തോന്നി.

റഷ്യയി​ലെ ക്രസ്‌ന​ഡാ​റി​ലുള്ള വളോഡ്യ എന്നൊരു സഹോ​ദ​ര​നു​മാ​യി ഞാൻ കത്തിട​പാ​ടു​കൾ നടത്താൻ തുടങ്ങി. അദ്ദേഹം റഷ്യ സന്ദർശി​ക്കാൻ എന്നെ ക്ഷണിച്ചു. അങ്ങനെ 1992 ജൂണിൽ എന്റെ സാമ​ഗ്രി​കൾ അടുക്കി​ക്കെട്ടി ഞാൻ മോസ്‌ക്കോ​യി​ലേക്കു തിരിച്ചു. അവിടെ വിമാ​ന​ത്താ​വ​ള​ത്തിൽ വളോഡ്യ സഹോ​ദരൻ കാത്തു​നിൽക്കു​ന്നതു കണ്ടപ്പോൾ എനിക്കു വലിയ ആഹ്ലാദം തോന്നി. സ്റ്റെഫാൻ ലവിൻസ്‌കി സഹോ​ദ​ര​നോ​ടൊ​പ്പ​മാ​ണു ഞാൻ താമസി​ച്ചത്‌—45 വർഷമാ​യി അദ്ദേഹം സത്യത്തി​ലാ​യി​രു​ന്നു. ഞാൻ മോസ്‌ക്കോ​യിൽ കണ്ടുമു​ട്ടിയ ആദ്യത്തെ സാക്ഷി​യാ​യി​രു​ന്നു അദ്ദേഹം. സത്യത്തി​നു വേണ്ടി​യുള്ള അദ്ദേഹ​ത്തി​ന്റെ നിലപാ​ടു മൂലം അനേകം വർഷങ്ങൾ അദ്ദേഹം തടവിൽ കിടന്നി​ട്ടുണ്ട്‌. സഹോ​ദ​ര​ങ്ങ​ളു​ടെ ആതിഥ്യം തീർച്ച​യാ​യും അത്ഭുതാ​വ​ഹ​മാ​യി​രു​ന്നു.

ഭാഷയിൽ കാര്യ​മായ പിടി​പാ​ടൊ​ന്നും ഇല്ലായി​രു​ന്നെ​ങ്കി​ലും ഞാൻ അങ്ങനെ മോസ്‌ക്കോ​യി​ലാ​യി. ആ സമയത്ത്‌ അവിടെ നാലു സഭകൾ മാത്രമേ ഉണ്ടായി​രു​ന്നു​ള്ളൂ. അതിനാൽ സഹോ​ദ​ര​ങ്ങൾക്കെ​ല്ലാ​വർക്കും പരസ്‌പരം അറിയാ​മാ​യി​രു​ന്നു. അന്നുമു​തൽ പലതും പരീക്ഷി​ച്ചു നോക്കി എന്റെ വിസ നീട്ടി​യെ​ടു​ക്കാൻ എനിക്കു സാധിച്ചു. എന്റെ ചെലവു നികത്താൻ കൂടെ​ക്കൂ​ടെ ജോലി ചെയ്യാ​നും എനിക്കു കഴിയു​ന്നുണ്ട്‌. ആശയവി​നി​യമം നടത്തു​ന്ന​തി​നും യോഗ​ങ്ങ​ളിൽ ആത്മീയ​മാ​യി പരി​പോ​ഷി​പ്പി​ക്ക​പ്പെ​ടു​ന്ന​തി​നും മതിയായ റഷ്യൻഭാഷ പഠിക്കു​ക​യെ​ന്ന​താ​യി​രു​ന്നു എനിക്കു​ണ്ടാ​യി​രുന്ന ഏറ്റവും വലിയ ബുദ്ധി​മുട്ട്‌. സാവധാ​നം പുരോ​ഗതി കൈവന്നു. തീർച്ച​യാ​യും, ഞാൻ അതിനാ​യി ഇപ്പോ​ഴും പരി​ശ്ര​മി​ച്ചു​കൊ​ണ്ടി​രി​ക്കു​ക​യാണ്‌.

വളരെ​യേ​റെ കൺ​വെൻ​ഷ​നു​ക​ളിൽ സംബന്ധി​ക്കു​ന്ന​തി​നും വിസ്‌മ​യി​പ്പി​ക്കത്തക്ക വളർച്ച​ക്കും വൻതോ​തി​ലുള്ള സ്‌നാ​പ​ന​ങ്ങൾക്കും സാക്ഷ്യം വഹിക്കു​ന്ന​തി​നു​മുള്ള പദവി എനിക്കു​ണ്ടാ​യി​ട്ടുണ്ട്‌. നമ്മുടെ ഇവി​ടെ​യുള്ള സഹോ​ദ​ര​ങ്ങ​ളു​ടെ കറകളഞ്ഞ തീക്ഷ്‌ണത കാണു​ന്നത്‌ വിശ്വാ​സത്തെ അത്യധി​കം ബലിഷ്‌ഠ​മാ​ക്കുന്ന ഒരനു​ഭ​വ​മാണ്‌. ഒന്നിനു വേണ്ടി​യും ഞാൻ അതു കൈമാ​റ്റം ചെയ്യില്ല. ഞാൻ വന്നപ്പോൾ പഠിച്ചു​കൊ​ണ്ടി​രു​ന്ന​വ​രോ ആയിടെ സ്‌നാ​പ​ന​പ്പെ​ട്ട​വ​രോ ആയി ഞാൻ കണ്ടുമു​ട്ടിയ സഹോ​ദ​രങ്ങൾ ഇപ്പോൾ മുഴു​സ​മ​യ​പ​യ​നി​യർമാ​രോ ശുശ്രൂ​ഷാ​ദാ​സ​ന്മാ​രോ അല്ലെങ്കിൽ റഷ്യയി​ലെ സെൻറ്‌ പീറ്റേ​ഴ്‌സ്‌ബർഗി​ന​ടു​ത്തുള്ള സോൾനെ​ച്ച്‌നോ​യെ​യിൽ ബെഥേ​ലം​ഗ​ങ്ങ​ളോ ആണ്‌.

ഞാൻ സംബന്ധി​ച്ചു​കൊ​ണ്ടി​രി​ക്കുന്ന സഭയിൽ എല്ലാ ഞായറാ​ഴ്‌ച​യും 530 പേർ തിങ്ങി​ക്കൂ​ടു​ന്നു. കൂടാതെ, എല്ലാ മാസവും ശരാശരി 12 പുതിയ സ്‌നാ​പ​ന​മേൽക്കാത്ത പ്രസാ​ധ​ക​രും. 380 പ്രസാ​ധകർ, 3 മൂപ്പന്മാർ, 7 ശുശ്രൂ​ഷാ​ദാ​സ​ന്മാർ എന്നിങ്ങ​നെ​യാണ്‌ ഏറ്റവും ഒടുവി​ലാ​യി കണക്കാ​ക്കിയ സംഖ്യ. 486-ലധികം ഭവന​ബൈ​ബി​ള​ധ്യ​യ​നങ്ങൾ ഞങ്ങളുടെ സഭ റിപ്പോർട്ടു ചെയ്യു​ന്നുണ്ട്‌. 1995 ഫെബ്രു​വ​രി​യിൽ സേവന​പ്ര​സം​ഗം നടത്തു​ന്ന​തി​നാ​യി ഞങ്ങളുടെ 29 പുസ്‌ത​കാ​ധ്യ​യ​ന​കൂ​ട്ടങ്ങൾ സന്ദർശി​ക്കാ​നുള്ള പദവി എനിക്കു ലഭിച്ചു. ആഴ്‌ച​യിൽ നാലു കൂട്ടങ്ങൾ വീതം ഞാൻ സന്ദർശി​ച്ചി​രു​ന്നു. കൂടാതെ, ഓരോ കൺ​വെൻ​ഷനു മുമ്പും സ്‌നാ​പ​നാർഥി​കൾക്കാ​യുള്ള ചോദ്യ​ങ്ങ​ളു​മാ​യി ഞങ്ങൾ വളരെ തിരക്കി​ലാ​യി​രി​ക്കും. 1995 മേയിൽ ഒരു പ്രത്യേക സമ്മേളന ദിനം ഞങ്ങൾക്കു​ണ്ടാ​യി​രു​ന്നു, ഞങ്ങളുടെ സഭയിൽനിന്ന്‌ 30 പേർ സ്‌നാ​പ​ന​മേറ്റു. ആ സമ്മേള​ന​ത്തിൽ മൊത്തം 607 പേർ സ്‌നാ​പ​ന​മേൽക്കു​ക​യും ഏകദേശം 10,000 പേർ ഹാജരാ​വു​ക​യും ചെയ്‌തു. വേനൽക്കാ​ലത്തെ ഡിസ്‌ട്രി​ക്‌റ്റ്‌ കൺ​വെൻ​ഷ​നിൽ 877 പേർ സ്‌നാ​പ​ന​മേ​റ്റ​തിൽ 24 പേർ ഞങ്ങളുടെ സഭയിൽ നിന്നാ​യി​രു​ന്നു! ഞങ്ങളുടെ സഭയിൽ 13 പയനി​യർമാ​രും 3 പ്രത്യേക പയനി​യർമാ​രു​മുണ്ട്‌. അവർ മൊത്തം 110 അധ്യയ​നങ്ങൾ റിപ്പോർട്ടു ചെയ്യുന്നു. ഇപ്പോൾ ഞങ്ങളുടെ സഭയിൽ 132 സ്‌നാ​പ​ന​മേൽക്കാത്ത പ്രസാ​ധ​ക​രുണ്ട്‌.

1995-ലെ സസ്‌മാ​ര​ക​ത്തിന്‌ 1,012 പേർ ഹാജരു​ണ്ടാ​യി​രു​ന്നു! അടുത്ത​യി​ടെ സൊ​സൈറ്റി മറ്റിഷ്‌ എന്നൊരു പോളീഷ്‌ സഹോ​ദ​രനെ അയച്ചു. അദ്ദേഹം ശുശ്രൂ​ഷാ പരിശീ​ലന സ്‌കൂ​ളിൽനി​ന്നും ബിരു​ദ​മെ​ടു​ത്ത​യാ​ളാണ്‌, അദ്ദേഹം നല്ലൊരു സഹായ​മാ​യി​രി​ക്കും. ഇപ്പോൾ ഞങ്ങൾക്കു മൂന്നു മൂപ്പന്മാ​രുണ്ട്‌. അതു​കൊണ്ട്‌, ഒരു സഭകൂടെ രൂപീ​ക​രി​ക്ക​പ്പെ​ടു​ക​യും പത്തുല​ക്ഷ​ത്തി​ന​ടു​ത്തു ജനസം​ഖ്യ​യുള്ള ഞങ്ങളുടെ പ്രദേശം രണ്ടായി വിഭജി​ക്ക​പ്പെ​ടു​ക​യും ചെയ്യും. ഓരോ സഭക്കും ഏതാണ്ട്‌ 200 പ്രസാ​ധകർ വീതമു​ണ്ടാ​വും. ഒരു സഭക്കു രണ്ടു മൂപ്പന്മാ​രും മറ്റേതിന്‌ ഒരു മൂപ്പനും ഉണ്ടായി​രി​ക്കും. ഞങ്ങൾക്കു മറ്റൊരു സമ്മേളനം അടുത്തു​വ​രു​ന്നുണ്ട്‌. അതു​കൊണ്ട്‌ അടുത്ത സമ്മേള​ന​ത്തി​നു സ്‌നാ​പ​ന​മേൽക്കാൻ തയ്യാറാ​കുന്ന 44 പേർക്കുള്ള ചോദ്യ​ങ്ങൾ ഞങ്ങളി​പ്പോൾ നടത്തി​ക്കൊ​ണ്ടി​രി​ക്കു​ക​യാണ്‌. അവിശ്വ​സ​നീ​യ​മാ​യി തോന്നു​ന്നു! തീർച്ച​യാ​യും ഒരാത്മീയ പറുദീസ! ഇത്‌ വിസ്‌മ​യാ​വ​ഹ​മാണ്‌! വാസ്‌ത​വ​മാ​യും യഹോ​വ​യു​ടെ കരങ്ങളാണ്‌ ഇതു നിർവ​ഹി​ക്കു​ന്നത്‌. ഈ സമയത്തു രഥം റഷ്യയി​ലൂ​ടെ അതിശീ​ഘ്രം സഞ്ചരി​ച്ചു​കൊ​ണ്ടി​രി​ക്കു​ക​യാ​ണെ​ന്നതു പോലെ തോന്നു​ന്നു. 1995 ഒക്ടോ​ബ​റി​ലെ കണക്കനു​സ​രിച്ച്‌ മോസ്‌ക്കോ​യിൽ ഏതാണ്ട്‌ 40 സഭകളുണ്ട്‌. വേണ്ടത്ര മൂപ്പന്മാ​രു​ണ്ടെ​ങ്കിൽ എളുപ്പ​ത്തിൽ ഇത്‌ ഇരട്ടി​യാ​കും.

ഉപയോ​ഗി​ച്ച സാധനങ്ങൾ വിൽക്കുന്ന കമ്പോ​ള​ത്തി​ലെ ഞങ്ങളുടെ ശുശ്രൂ​ഷ​യു​ടെ ദിനങ്ങൾ ഭൂതകാ​ല​സം​ഗ​തി​ക​ളാണ്‌. സ്‌ക്കോട്ട്‌ ബ്രുക്ക്‌ളിൻ ബെഥേ​ലി​ലാണ്‌, സ്റ്റീവ്‌ മോസ്‌ക്കോ​യി​ലെ ഒരു സഭയിൽ മൂപ്പനാണ്‌—ദൈവത്തെ കണ്ടെത്താൻ അവൻ ഞങ്ങളെ അനുവ​ദി​ച്ച​തിൽ ഞങ്ങൾ അവനോട്‌ വളരെ നന്ദിയു​ള്ള​വ​രാണ്‌. ലക്ഷങ്ങൾ ഇനിയും അവനെ അന്വേ​ഷി​ക്ക​ട്ടെ​യെ​ന്നും തന്നെ കണ്ടെത്താൻ ദൈവം അവരെ അനുവ​ദി​ക്ക​ട്ടെ​യെ​ന്നും ഞങ്ങൾ പ്രാർഥി​ക്കു​ന്നു.—സ്‌ക്കോ​ട്ടും സ്റ്റീവും പറഞ്ഞ​പ്ര​കാ​രം.

[അടിക്കു​റിപ്പ്‌]

[12-ാം പേജിലെ ചിത്രം]

സ്‌ക്കോട്ട്‌

[13-ാം പേജിലെ ചിത്രം]

സ്റ്റീവ്‌

[14-ാം പേജിലെ ചിത്രം]

എല്ലാ ഞായറാ​ഴ്‌ച​യും ഒരു മോസ്‌ക്കോ സഭയിലെ ഹാജർ 530-ലധിക​മാണ്‌.