കൊല​യാ​ളി വൈറസ്‌ സയറിനെ ആക്രമി​ക്കു​ന്നു

ആഫ്രിക്കയിലെ ഉണരുക! ലേഖകൻ

ഒരു ഉഷ്‌ണ​മേ​ഖലാ മഴക്കാ​ടി​നോ​ടു ചേർന്നു വ്യാപി​ച്ചു​കി​ട​ക്കുന്ന ഒരു പട്ടണമാണ്‌ സയറിലെ കിക്ക്വിറ്റ്‌. ആ നഗരത്തി​നു വെളി​യിൽ താമസി​ച്ചി​രുന്ന നാൽപ്പ​ത്തി​രണ്ടു വയസ്സുള്ള ഗാസ്‌പാർ മെങ്കാ കിറ്റാം​ബാ​ലാ അദ്ദേഹ​ത്തി​ന്റെ കുടും​ബ​ത്തി​ലെ ഏക യഹോ​വ​യു​ടെ സാക്ഷി​യാ​യി​രു​ന്നു. മെങ്കാ ഒരു മരക്കരി വിൽപ്പ​ന​ക്കാ​ര​നാ​യി​രു​ന്നു. അദ്ദേഹം വനാന്ത​ര​ത്തിൽ പോയി മരക്കരി തയ്യാറാ​ക്കി അതു കെട്ടു​ക​ളി​ലാ​ക്കി കിക്ക്വി​റ്റി​ലേക്കു തലയിൽ ചുമന്നു​കൊ​ണ്ടു വരുമാ​യി​രു​ന്നു.

1995 ജനുവരി 6-ന്‌ അദ്ദേഹ​ത്തിന്‌ അസുഖം പിടി​പെട്ടു. വനത്തിൽനി​ന്നു വീട്ടി​ലേക്കു പോകുന്ന വഴിക്ക്‌ അദ്ദേഹം രണ്ടു തവണ നിലത്തു​വീ​ണു. വീട്ടി​ലെ​ത്തി​യ​പ്പോൾ തലവേ​ദ​ന​യും പനിയും ഉള്ളതായി അദ്ദേഹം പറഞ്ഞു.

അടുത്ത രണ്ടു ദിവസം​കൊണ്ട്‌ അദ്ദേഹ​ത്തി​ന്റെ സ്ഥിതി മോശ​മാ​യി. ജനുവരി 12-ാം തീയതി കുടും​ബം അദ്ദേഹത്തെ കിക്ക്വിറ്റ്‌ ജനറൽ ആശുപ​ത്രി​യിൽ കൊണ്ടു​പോ​യി. മെങ്കാ​യു​ടെ സഭയി​ലുള്ള സാക്ഷികൾ ആശുപ​ത്രി​യിൽവച്ച്‌ അദ്ദേഹത്തെ പരിപാ​ലി​ക്കാൻ കുടും​ബത്തെ സഹായി​ച്ചു. ദുഃഖ​ക​ര​മെന്നു പറയട്ടെ, അദ്ദേഹ​ത്തി​ന്റെ സ്ഥിതി വീണ്ടും മോശ​മാ​യി. അദ്ദേഹം രക്തം ഛർദി​ക്കാൻ തുടങ്ങി, മൂക്കിൽനി​ന്നും ചെവി​യിൽനി​ന്നും അനിയ​ന്ത്രി​ത​മാ​യി രക്തമൊ​ഴു​കി. ജനുവരി 15-ാം തീയതി അദ്ദേഹം മരണമ​ടഞ്ഞു.

പെട്ടെ​ന്നു​ത​ന്നെ മെങ്കാ​യു​ടെ ശരീര​ത്തിൽ സ്‌പർശിച്ച അദ്ദേഹ​ത്തി​ന്റെ കുടും​ബ​ത്തി​ലുള്ള മറ്റുള്ള​വർക്കും രോഗം ബാധിച്ചു. മാർച്ച്‌ ആദ്യമാ​യ​പ്പോ​ഴേ​ക്കും, മെങ്കാ​യു​ടെ ഭാര്യ​യും അവരുടെ ആറു കുട്ടി​ക​ളിൽ രണ്ടു പേരു​മുൾപ്പെടെ അദ്ദേഹ​ത്തി​ന്റെ അടുത്ത ബന്ധുക്ക​ളായ 12 പേർ മരണമ​ടഞ്ഞു.

ഏപ്രിൽ പകുതി​യാ​യ​പ്പോൾ മെങ്കാ​യെ​യും അദ്ദേഹ​ത്തി​ന്റെ കുടും​ബ​ത്തെ​യും പോലെ ആശുപ​ത്രി ജീവന​ക്കാ​രും മറ്റുള്ള​വ​രും രോഗ​ബാ​ധി​ത​രാ​യി മരിക്കാൻ തുടങ്ങി. പെട്ടെ​ന്നു​തന്നെ രോഗം ആ മേഖല​യി​ലെ മറ്റു രണ്ടു പട്ടണങ്ങ​ളി​ലേ​ക്കു​കൂ​ടി വ്യാപി​ച്ചു. സ്‌പഷ്ട​മാ​യും പുറ​മെ​നി​ന്നുള്ള സഹായം ആവശ്യ​മാ​യി​രു​ന്നു.

സയറിലെ പ്രമുഖ വൈറസ്‌ ശാസ്‌ത്ര​ജ്ഞ​നായ പ്രൊ​ഫസ്സർ മൂയെമ്പെ മേയ്‌ 1-ന്‌ കിക്ക്വി​റ്റി​ലേക്കു തിരിച്ചു. അദ്ദേഹം പിന്നീട്‌ ഉണരുക!യോട്‌ ഇങ്ങനെ പറഞ്ഞു: “കിക്ക്വിറ്റ്‌ രണ്ടു പകർച്ച​വ്യാ​ധി​ക​ളാൽ ദുരി​ത​മ​നു​ഭ​വി​ക്കു​ന്ന​താ​യി ഞങ്ങൾ നിഗമനം ചെയ്‌തു: ഒന്ന്‌ ബാക്ടീ​രിയ മൂലമുള്ള അതിസാ​ര​വും മറ്റേത്‌ ഒരു വൈറസ്‌ മൂലമുള്ള ഗുരു​ത​ര​മായ ഒരു രക്തസ്രാ​വ​പ്പ​നി​യും. തീർച്ച​യാ​യും ഞങ്ങൾക്ക്‌ ഈ രോഗ​നിർണയം സ്ഥിരീ​ക​രി​ക്കേ​ണ്ട​തു​ണ്ടാ​യി​രു​ന്നു. അതു​കൊണ്ട്‌ ഞങ്ങൾ രോഗി​ക​ളിൽനി​ന്നു കുറെ രക്തം ശേഖരിച്ച്‌ യു.എസ്‌.എ.-യിലെ അറ്റ്‌ലാ​ന്റ​യി​ലുള്ള രോഗ​നി​യ​ന്ത്ര​ണ​കേ​ന്ദ്ര​ങ്ങ​ളി​ലേക്ക്‌ (സിഡിസി) പരി​ശോ​ധ​ന​യ്‌ക്കാ​യി അയച്ചു​കൊ​ടു​ത്തു.”

മൂയെ​മ്പെ​യും സയറിലെ മറ്റു ഡോക്ടർമാ​രും അതി​നോ​ടകം സംശയി​ച്ചി​രുന്ന സംഗതി തന്നെയാ​യി​രു​ന്നു സിഡിസി സ്ഥിരീ​ക​രി​ച്ചത്‌. ഇബോ​ല​യാ​യി​രു​ന്നു രോഗം.

ഒരു മാരക രോഗം

ഇബോല വൈറസ്‌ ഭയങ്കര​മാണ്‌. അതിന്‌ എളുപ്പം കൊല്ലാൻ കഴിയും. അതി​നെ​തി​രെ വാക്‌സി​നില്ല, അതിന്റെ ഇരകളെ ചികി​ത്സി​ക്കാൻ അറിയ​പ്പെ​ടുന്ന ചികി​ത്സ​യു​മില്ല.

ഇബോ​ല​യെ ആദ്യമാ​യി തിരി​ച്ച​റി​ഞ്ഞത്‌ 1976-ൽ ആണ്‌. സയറിലെ ഒരു നദിയു​ടെ പേരുള്ള ഈ രോഗം ദക്ഷിണ സുഡാ​നെ​യും അൽപ്പനാൾ കഴിഞ്ഞ്‌ ഉത്തര സയറി​നെ​യും ആക്രമി​ച്ചു. അത്‌ 1979-ൽ സുഡാ​നിൽ ചെറി​യ​തോ​തിൽ ഒന്നുകൂ​ടി പൊട്ടി​പ്പു​റ​പ്പെട്ടു. അതിനു​ശേഷം, ഇബോ​ല​യു​ടേ​തു​പോ​ലുള്ള രോഗ​ല​ക്ഷ​ണങ്ങൾ നിമിത്തം അവിട​വി​ടെ ഏതാനും ആളുകൾ മരണമ​ട​ഞ്ഞത്‌ ഒഴിച്ചാൽ ആ രോഗം വർഷങ്ങ​ളോ​ളം അപ്രത്യ​ക്ഷ​മാ​യി​രു​ന്നു.

അറ്റ്‌ലാ​ന്റ​യിൽ ഇബോല വൈറ​സി​നെ​ക്കു​റി​ച്ചു പഠിക്കുന്ന ശാസ്‌ത്ര​ജ്ഞ​ന്മാർ, വായു​വി​ലൂ​ടെ പരക്കുന്ന ഏതു രോഗാ​ണു​വി​ന്റെ​യും രക്ഷപ്പെടൽ തടയുന്ന വാതായന സംവി​ധാ​ന​ത്തോ​ടു​കൂ​ടി പണിത പരമാ​വധി സുരക്ഷി​ത​മായ ഒരു ലബോ​റ​ട്ട​റി​യിൽവച്ച്‌ അതിനെ പഠിക്കാൻ തക്കവണ്ണം അത്ര​ത്തോ​ളം മാരക​മാണ്‌ അത്‌. ലബോ​റ​ട്ട​റി​യിൽ കയറു​ന്ന​തി​നു​മു​മ്പു ശാസ്‌ത്ര​ജ്ഞൻമാർ സംരക്ഷ​ണ​മേ​കുന്ന “സ്‌പേസ്‌ സൂട്ടുകൾ” ധരിക്കു​ന്നു. ലബോ​റ​ട്ട​റി​യിൽനിന്ന്‌ ഇറങ്ങു​മ്പോൾ അവർ അണുസം​ഹാ​രി​കൾ ഉപയോ​ഗി​ച്ചു കുളി​ക്കു​ന്നു. കിക്ക്വി​റ്റി​ലേക്കു വന്ന ഡോക്ടർമാ​രു​ടെ സംഘങ്ങൾ തങ്ങളോ​ടൊ​പ്പം സംരക്ഷ​ണാ​ത്മ​ക​മായ സാമ​ഗ്രി​കൾ കൊണ്ടു​വന്നു. ഉപയോ​ഗ​ശേഷം കളയാ​വുന്ന കൈയു​റകൾ, തൊപ്പി​കൾ, കണ്ണടകൾ, വൈറ​സി​ന്റെ നുഴഞ്ഞു കയറ്റം തടയുന്ന പുറം​വ​സ്‌ത്രങ്ങൾ എന്നിവ അവയി​ലുൾപ്പെ​ടു​ന്നു.

നേരെ​മ​റിച്ച്‌, സ്വയം സംരക്ഷി​ക്കാ​നുള്ള പരിജ്ഞാ​ന​വും സാമ​ഗ്രി​ക​ളും കിക്ക്വി​റ്റി​ലെ മിക്ക നിവാ​സി​കൾക്കും ഇല്ലായി​രു​ന്നു. മറ്റുചി​ലർ രോഗ​ത്താൽ ക്ലേശി​ക്കുന്ന പ്രിയ​പ്പെ​ട്ട​വരെ പരിപാ​ലി​ച്ചു​കൊ​ണ്ടു തങ്ങളുടെ ജീവൻ മനഃപൂർവം അപകട​പ്പെ​ടു​ത്തു​ക​യോ നഷ്ടപ്പെ​ടു​ത്തു​ക​യോ ചെയ്‌തു. സുഹൃ​ത്തു​ക്ക​ളും കുടും​ബാം​ഗ​ങ്ങ​ളും രോഗി​ക​ളെ​യും മരിച്ച​വ​രെ​യും ഒട്ടും​തന്നെ സംരക്ഷണം കൂടാതെ ചുമലി​ലും തോള​ത്തും ചുമന്നു. ജീവന്റെ ഭയങ്കര​മായ നഷ്ടമാ​യി​രു​ന്നു ഫലം; വൈറസ്‌ കുടും​ബ​ങ്ങളെ ഒന്നായി കൊ​ന്നൊ​ടു​ക്കി.

പൊട്ടി​പ്പു​റ​പ്പെടൽ നിയ​ന്ത്രി​ക്കൽ

പണവും വൈദ്യ സാമ​ഗ്രി​ക​ളും സംഭാവന ചെയ്‌തു​കൊ​ണ്ടു സഹായ​ത്തി​നാ​യുള്ള കിക്ക്വി​റ്റി​ന്റെ അഭ്യർഥ​ന​യോട്‌ അന്തർദേ​ശീയ സമൂഹം പ്രതി​ക​രി​ച്ചു. ഐക്യ​നാ​ടു​കൾ, ദക്ഷിണാ​ഫ്രിക്ക, യൂറോപ്പ്‌ എന്നിവി​ട​ങ്ങ​ളിൽനിന്ന്‌ അന്വേ​ഷ​ക​സം​ഘങ്ങൾ പറന്നെത്തി. അവരുടെ വരവിനു രണ്ട്‌ ഉദ്ദേശ്യ​ങ്ങ​ളു​ണ്ടാ​യി​രു​ന്നു: ഒന്ന്‌, പൊട്ടി​പ്പു​റ​പ്പെടൽ നിയ​ന്ത്രി​ക്കുക; രണ്ട്‌, പകർച്ച​വ്യാ​ധി​കൾക്കി​ട​യ്‌ക്കുള്ള സമയത്തു വൈറസ്‌ എവി​ടെ​യാ​ണു ജീവി​ച്ച​തെന്നു കണ്ടുപി​ടി​ക്കുക.

ആരോഗ്യ പ്രവർത്തകർ, പകർച്ച​വ്യാ​ധി അവസാ​നി​പ്പി​ക്കാ​നുള്ള ശ്രമത്തിൽ, രോഗ​ത്തി​ന്റെ ലക്ഷണങ്ങൾ പ്രകട​മാ​ക്കിയ ഏതൊ​രാ​ളെ​യും കണ്ടെത്താ​നാ​യി തെരു​വു​തോ​റും തിരച്ചിൽ നടത്തി. രോഗി​ക​ളാ​യ​വരെ ആശുപ​ത്രി​യി​ലെ​ത്തി​ച്ചു. അവിടെ അവരെ മാറ്റി​താ​മ​സി​പ്പി​ക്കാ​നും സുരക്ഷി​ത​മാ​യി പരിപാ​ലി​ക്കാ​നും കഴിഞ്ഞു. മരണമ​ട​ഞ്ഞ​വരെ പ്ലാസ്റ്റിക്‌ ഷീറ്റു​ക​ളിൽ പൊതി​ഞ്ഞു വേഗം കുഴി​ച്ചി​ട്ടു.

ആരോഗ്യ പരിപാ​ലന ജോലി​ക്കാർക്കും പൊതു​ജ​ന​ത്തി​നു പൊതു​വെ​യും രോഗ​ത്തെ​ക്കു​റി​ച്ചു കൃത്യ​മായ പരിജ്ഞാ​നം നൽകു​ന്ന​തി​നാ​യി വിപു​ല​മായ പ്രചര​ണ​പ​രി​പാ​ടി ആരംഭി​ച്ചു. കുടും​ബങ്ങൾ മരിച്ച​വരെ ആചാര​പ​ര​മാ​യി കൈകാ​ര്യം ചെയ്യു​ക​യും കഴുകു​ക​യും ചെയ്യുന്ന പരമ്പരാ​ഗത ശവസം​സ്‌കാര നടപടി​കൾക്കെ​തി​രെ സന്ദേശം ഭാഗി​ക​മാ​യി ശക്തമായ മുന്നറി​യി​പ്പു നൽകി.

ഉറവിടം തേടി

വൈറസ്‌ എവി​ടെ​നി​ന്നാ​ണു വന്നതെന്നു കണ്ടുപി​ടി​ക്കാൻ ശാസ്‌ത്ര​ജ്ഞ​ന്മാർ വെമ്പൽ കൊണ്ടു. അവയെ​ക്കു​റിച്ച്‌ ഇത്രയും മാത്രം അറിയാം: സ്വന്തമാ​യി തിന്നാ​നും കുടി​ക്കാ​നും പെരു​കാ​നും കഴിവുള്ള സ്വത​ന്ത്ര​ജീ​വി​കളല്ല വൈറ​സു​കൾ. ജീവ​കോ​ശ​ങ്ങ​ളു​ടെ സങ്കീർണ ഘടനയിൽ ആക്രമി​ച്ചു കടന്ന്‌ അതിനെ ചൂഷണം ചെയ്‌തെ​ങ്കിൽ മാത്രമേ അവയ്‌ക്ക്‌ അതിജീ​വി​ക്കാ​നും പുനരു​ത്‌പാ​ദനം നടത്താ​നും കഴിയൂ.

ഒരു വൈറസ്‌ ഒരു മൃഗത്തിൽ കടന്നു​കൂ​ടു​മ്പോൾ ആ ബന്ധം മിക്ക​പ്പോ​ഴും പരസ്‌പര സഹവർത്തി​ത്വ​ത്തി​ന്റെ ഒന്നാണ്‌—മൃഗം വൈറ​സി​നെ കൊല്ലു​ന്നില്ല, വൈറസ്‌ മൃഗ​ത്തെ​യും കൊല്ലു​ന്നില്ല. എന്നാൽ ഒരു മനുഷ്യൻ വൈറസ്‌ ബാധയുള്ള മൃഗവു​മാ​യി സമ്പർക്ക​ത്തി​ലാ​കു​മ്പോൾ വൈറസ്‌ ആ മനുഷ്യ​നിൽ എങ്ങനെ​യെ​ങ്കി​ലും കടന്നു​കൂ​ടു​ന്നു, വൈറസ്‌ മാരക​മാ​യി​ത്തീർന്നേ​ക്കാം.

ഇബോല വൈറസ്‌ ആളുക​ളെ​യും കുരങ്ങൻമാ​രെ​യും വളരെ വേഗം കൊല്ലു​ന്ന​തു​കൊണ്ട്‌ അത്‌ മറ്റൊരു ജീവി​യിൽ അതിജീ​വി​ക്കു​ന്നു​ണ്ടാ​യി​രി​ക്ക​ണ​മെന്നു ശാസ്‌ത്ര​ജ്ഞൻമാർ അനുമാ​നി​ക്കു​ന്നു. ഏതു ജീവി വർഗമാ​ണു വൈറ​സി​നെ വഹിക്കു​ന്ന​തെന്ന്‌ ആരോ​ഗ്യാ​ധി​കൃ​തർ കണ്ടുപി​ടി​ക്കു​ക​യാ​ണെ​ങ്കിൽ ഭാവി പൊട്ടി​പ്പു​റ​പ്പെ​ട​ലു​കൾ ഒഴിവാ​ക്കു​ന്ന​തി​നുള്ള നിയ​ന്ത്ര​ണാ​ത്മ​ക​വും പ്രതി​രോ​ധാ​ത്മ​ക​വു​മായ ഫലപ്രദ നടപടി​കൾ സ്വീക​രി​ക്കാൻ അവർക്കു കഴി​ഞ്ഞേ​ക്കാം. എന്നാൽ ഇബോ​ലയെ സംബന്ധിച്ച ഉത്തരം​കി​ട്ടാത്ത ചോദ്യ​മി​താണ്‌, മനുഷ്യർക്കു പകർച്ച​വ്യാ​ധി​കൾ ഉണ്ടാകു​ന്ന​തി​നി​ട​യ്‌ക്കുള്ള സമയത്തു വൈറസ്‌ എവി​ടെ​യാ​ണു കഴിയു​ന്നത്‌?

ഈ ചോദ്യ​ത്തിന്‌ ഉത്തരം കിട്ടു​ന്ന​തിന്‌, ഗവേഷ​കർക്കു വൈറ​സി​ന്റെ ഉറവി​ടം​വരെ അതിനെ പിന്തു​ട​രേ​ണ്ട​തുണ്ട്‌. ആതിഥേയ മൃഗത്തെ കണ്ടുപി​ടി​ക്കാൻ, നേരത്തത്തെ പൊട്ടി​പ്പു​റ​പ്പെ​ട​ലു​കൾക്കു ശേഷം നടത്തിയ ശ്രമങ്ങൾ പരാജ​യ​പ്പെ​ട്ടി​രു​ന്നു. എന്നാൽ കിക്ക്വിറ്റ്‌ പകർച്ച​വ്യാ​ധി പുതി​യൊ​ര​വ​സരം തുറന്നു തന്നു.

കിക്ക്വിറ്റ്‌ പകർച്ച​വ്യാ​ധി​യു​ടെ ആദ്യ ഇര ഗാസ്‌പാർ മെങ്കാ​യാ​യി​രു​ന്നു​വെന്നു ശാസ്‌ത്ര​ജ്ഞൻമാർ അനുമാ​നി​ച്ചു. എന്നാൽ അദ്ദേഹ​ത്തിന്‌ എങ്ങനെ​യാണ്‌ വൈറസ്‌ ബാധ​യേ​റ്റത്‌? അത്‌ ഏതെങ്കി​ലും മൃഗത്തിൽക്കൂ​ടി​യാ​യി​രു​ന്നെ​ങ്കിൽ അത്‌ ഏതു മൃഗ വർഗമാ​യി​രു​ന്നു? യുക്തി​യ​നു​സ​രിച്ച്‌, ഉത്തരം മെങ്കാ ജോലി ചെയ്‌ത വനത്തിൽ കണ്ടെത്താൻ കഴി​ഞ്ഞേ​ക്കും. മരക്കരി തയ്യാറാ​ക്കു​ന്ന​തി​നു​വേണ്ടി മെങ്കാ പണി​ചെയ്‌ത സ്ഥലങ്ങളിൽ ശേഖരണ സംഘങ്ങൾ 350 കണികൾ സ്ഥാപിച്ചു. കരണ്ടു​തീ​നി​കൾ, ചുണ്ടെ​ലി​കൾ, ചൊറി​ത്ത​വ​ളകൾ, പല്ലികൾ, പാമ്പുകൾ, കൊതു​കു​കൾ, മണൽ ഈച്ചകൾ, നായീ​ച്ചകൾ, മൂട്ടകൾ, പേൻ, ചിഗറു​കൾ, ചെള്ളുകൾ എന്നിങ്ങനെ മൊത്തം 2,200 ചെറു ജീവി​ക​ളെ​യും 15,000 പ്രാണി​ക​ളെ​യും അവർ പിടിച്ചു. സംരക്ഷ​ണാ​ത്മക സാമ​ഗ്രി​കൾ ധരിച്ച ശാസ്‌ത്ര​ജ്ഞൻമാർ ആ മൃഗങ്ങളെ ബോധം കെടു​ത്തുന്ന വാതകം ഉപയോ​ഗി​ച്ചു കൊന്നു. എന്നിട്ട്‌ അവർ വൈറസ്‌ ഉണ്ടോ​യെന്നു സൂക്ഷ്‌മ​പ​രി​ശോ​ധന നടത്തു​ന്ന​തി​നാ​യി ആ ജീവി​ക​ളു​ടെ ശരീര​ക​ല​ക​ളു​ടെ സാമ്പി​ളു​കൾ ഐക്യ​നാ​ടു​ക​ളി​ലേക്ക്‌ അയച്ചു.

ഒരു വൈറ​സി​ന്റെ ഒളിസ്ഥ​ലങ്ങൾ മിക്കവാ​റും അപരി​മി​ത​മാ​യ​തി​നാൽ ഉറവിടം കണ്ടുപി​ടി​ക്കു​മെ​ന്ന​തിന്‌ യാതൊ​രു ഉറപ്പു​മില്ല. രോഗ​കാ​രി​കളെ കൈകാ​ര്യ​ചെ​യ്യുന്ന സിഡിസി-യുടെ പ്രത്യേക ശാഖയു​ടെ തലവനായ ഡോ. സി. ജെ. പീറ്റേ​ഴ്‌സ്‌ ഇപ്രകാ​രം പറഞ്ഞു: “ഇബോല വൈറ​സി​ന്റെ ആതിഥേയ ജീവിയെ കണ്ടുപി​ടി​ക്കാൻ ഇപ്പോൾ 50 ശതമാ​ന​ത്തി​ലേറെ സാധ്യ​ത​യു​ണ്ടെന്നു ഞാൻ വിചാ​രി​ക്കു​ന്നില്ല.”

പകർച്ച​വ്യാ​ധി അപ്രത്യ​ക്ഷ​മാ​കു​ന്നു

പകർച്ച​വ്യാ​ധി അപ്രത്യ​ക്ഷ​മാ​യ​താ​യി ആഗസ്റ്റ്‌ 25-ന്‌ ഔദ്യോ​ഗി​ക​മാ​യി പ്രഖ്യാ​പി​ക്ക​പ്പെട്ടു. വൈറസ്‌ ബാധയു​ണ്ടാ​യ​ശേഷം രോഗം പ്രകട​മാ​കാ​നുള്ള സമയത്തി​ന്റെ ഇരട്ടി​യായ 42 ദിവസ​ത്തോ​ളം പുതിയ കേസുകൾ ഒന്നും ഉണ്ടാകാ​തി​രു​ന്ന​തി​നാ​ലാ​യി​രു​ന്നു അത്‌. രോഗം വ്യാപ​ക​മാ​കാ​ഞ്ഞത്‌ എന്തു​കൊ​ണ്ടാണ്‌? പകർച്ച​വ്യാ​ധി​യെ നിയ​ന്ത്രി​ക്കാ​നാ​യി നടത്തിയ അന്തർദേ​ശീയ വൈദ്യ ശ്രമങ്ങ​ളാ​യി​രു​ന്നു ഒരു ഘടകം. പകർച്ച​വ്യാ​ധി​യെ ഒതുക്കി​നിർത്തിയ മറ്റൊരു ഘടകം രോഗ​ത്തി​ന്റെ​തന്നെ കാഠി​ന്യ​മാ​യി​രു​ന്നു. അത്‌ വേഗത്തിൽ പ്രത്യ​ക്ഷ​മാ​യി കൊ​ന്നൊ​ടു​ക്കു​ക​യും അടുത്ത സമ്പർക്കം കൊണ്ടു മാത്രം സംക്ര​മി​ക്കു​ക​യും ചെയ്‌ത​തി​നാൽ വളരെ​യ​ധി​കം ആളുക​ളി​ലേക്കു വ്യാപി​ച്ചില്ല.

315 പേർക്കു രോഗം പിടി​പെ​ട്ടെ​ന്നും അവരിൽ 244 പേർ മരി​ച്ചെ​ന്നും—77 ശതമാനം മരണനി​രക്ക്‌—ഔദ്യോ​ഗിക രേഖകൾ കാണി​ക്കു​ന്നു. ഇബോല ഇപ്പോൾ നിഷ്‌ക്രി​യ​മാണ്‌. യഹോ​വ​യു​ടെ പുതിയ ലോക​ത്തിൽ അത്‌ എന്നെ​ന്നേ​ക്കു​മാ​യി നിഷ്‌ക്രി​യ​മാ​കും. (യെശയ്യാ​വു 33:24 കാണുക.) അതിനി​ട​യ്‌ക്ക്‌ ആളുക​ളു​ടെ സംശയം ഇതാണ്‌, ‘കൊല​യ്‌ക്കാ​യി ഇബോല വീണ്ടും തലപൊ​ക്കു​മോ?’ ഒരുപക്ഷേ തലപൊ​ക്കു​മാ​യി​രി​ക്കും. എന്നാൽ അത്‌ എവി​ടെ​യാ​യി​രി​ക്കു​മെ​ന്നോ എപ്പോ​ഴാ​യി​രി​ക്കു​മെ​ന്നോ ആർക്കും അറിയില്ല.

[25-ാം പേജിലെ ചതുരം]

പകർച്ചവ്യാധി മറ്റു രോഗ​ങ്ങ​ളു​മാ​യുള്ള ബന്ധത്തിൽ

ഇബോല ഒരു കൊല​യാ​ളി​യാണ്‌, എന്നാൽ ആഫ്രി​ക്ക​ക്കാർക്ക്‌ അതി​നേ​ക്കാ​ളേറെ ഭീഷണി​യു​ള​വാ​ക്കു​ന്നത്‌ അത്ര പ്രകടനം കാഴ്‌ച​വ​യ്‌ക്കാത്ത രോഗ​ങ്ങ​ളാണ്‌. ഇബോ​ല​യു​ടെ പൊട്ടി​പ്പു​റ​പ്പെ​ട​ലി​ന്റെ സമയത്തു മറ്റു രോഗങ്ങൾ ലോക​മ​റി​യാ​തെ ആളുകളെ കൊ​ന്നൊ​ടു​ക്കി. കിക്ക്വി​റ്റിന്‌ ഏതാനും ശതം കിലോ​മീ​റ്റർ കിഴക്കാ​യി അടുത്ത​കാ​ലത്ത്‌ 250 പേർക്ക്‌ പോളി​യോ ബാധി​ച്ച​താ​യി റിപ്പോർട്ടു ചെയ്യ​പ്പെട്ടു. വടക്കു​പ​ടി​ഞ്ഞാ​റു ഭാഗത്ത്‌, മാലി​യിൽ മാരക​മായ ഒരിനം കോളറ വിനാശം വിതച്ചു. തെക്ക്‌, അംഗോ​ള​യിൽ 30,000 പേരെ നിദ്രാ​രോ​ഗം ബാധിച്ചു. പശ്ചിമാ​ഫ്രി​ക്ക​യു​ടെ ഒരു വിസ്‌തൃത പ്രദേ​ശത്ത്‌ ആയിരങ്ങൾ മസ്‌തിഷ്‌ക ചർമവീ​ക്കം (meningitis) എന്ന പകർച്ച​വ്യാ​ധി​യാൽ മരണമ​ടഞ്ഞു. ദ ന്യൂ യോർക്ക്‌ ടൈംസ്‌ ഇപ്രകാ​രം പ്രസ്‌താ​വി​ച്ചു: “ഒട്ടുമി​ക്ക​വാ​റും തടയാ​വുന്ന രോഗ​ങ്ങ​ളു​മാ​യുള്ള [ആഫ്രി​ക്ക​യു​ടെ] ദിനം​തോ​റു​മുള്ള, മാരക​മായ ഏറ്റുമു​ട്ട​ലു​ക​ളൊ​ന്നും ലോക മനഃസാ​ക്ഷി​യെ അധിക​മൊ​ന്നും സ്‌പർശി​ക്കാ​ത്തത്‌ എന്തു​കൊണ്ട്‌ എന്ന കുഴപ്പി​ക്കുന്ന ചോദ്യ​മാണ്‌ ആഫ്രി​ക്ക​ക്കാർക്കു​ള്ളത്‌.”

[24-ാം പേജിലെ ചിത്രം]

ശാസ്‌ത്രജ്ഞൻമാർ കൊല​യാ​ളി വൈറ​സി​ന്റെ ഉറവിടം തേടുന്നു