വാച്ച്ടവര്‍ ഓണ്‍ലൈന്‍ ലൈബ്രറി
വാച്ച്ടവര്‍
ഓണ്‍ലൈന്‍ ലൈബ്രറി
മലയാളം
  • ബൈബിൾ
  • പ്രസിദ്ധീകരണങ്ങൾ
  • യോഗങ്ങൾ
  • g97 3/22 പേ. 24-27
  • വേലിയേറ്റസമയത്തെ തിരക്ക്‌

ഇപ്പോൾ തിരഞ്ഞതിന് ഒരു വീഡിയോയും ലഭ്യമല്ല

ക്ഷമിക്കണം, വീഡിയോ ലോഡ് ചെയ്യുന്നതിൽ ഒരു പിശകുണ്ടായി.

  • വേലിയേറ്റസമയത്തെ തിരക്ക്‌
  • ഉണരുക!—1997
  • ഉപതലക്കെട്ടുകള്‍
  • സമാനമായ വിവരം
  • അഴിമു​ഖ​ങ്ങ​ളു​ടെ പ്രാധാ​ന്യം
  • പർവ​വേ​ലി​യേ​റ്റങ്ങൾ
  • ഉയരുന്ന വേലി​യേ​റ്റ​ത്തി​ര
  • തിരക്ക്‌ ആരംഭി​ക്കു​ന്നു
  • ചേക്കേ​റുന്ന സ്ഥലം
  • നീർപ്പക്ഷികൾ ദേശാടകരിൽ അഗ്രഗണ്യർ
    ഉണരുക!—2006
  • നടക്കുന്ന മത്സ്യത്തെ നിങ്ങൾ എപ്പോഴെങ്കിലും കണ്ടിട്ടുണ്ടോ?
    ഉണരുക!—1999
  • “ആർമെറോ ഭൂപടത്തിൽനിന്ന്‌ അപ്രത്യക്ഷമായിരിക്കുന്നു!”
    ഉണരുക!—1987
  • പക്ഷിനിരീക്ഷണം—ഏവർക്കും ഏർപ്പെടാവുന്ന രസകരമായ ഒരു ഹോബിയോ?
    ഉണരുക!—1998
കൂടുതൽ കാണുക
ഉണരുക!—1997
g97 3/22 പേ. 24-27

വേലി​യേ​റ്റ​സ​മ​യത്തെ തിരക്ക്‌

ബ്രിട്ടനിലെ ഉണരുക! ലേഖകൻ

വടക്കു​പ​ടി​ഞ്ഞാ​റൻ യൂറോ​പ്പിൽ ഏകദേശം ഒരു കോടി​യോ​ളം പക്ഷികൾ ഓരോ വർഷവും ശിശി​ര​കാ​ലം ചെലവ​ഴി​ക്കാ​നെ​ത്തു​ന്നു. ഉത്തര​ധ്രുവ പ്രദേ​ശത്തെ പ്രജനന സ്ഥലങ്ങളിൽനി​ന്നു മാത്രമല്ല കാനഡ, മധ്യ സൈബീ​രിയ തുടങ്ങിയ വിദൂ​ര​ദേ​ശ​ങ്ങ​ളിൽനി​ന്നും അവ വന്നു​ചേ​രു​ന്നു. ആഫ്രി​ക്ക​യി​ലേ​ക്കുള്ള യാത്ര​യ്‌ക്കി​ട​യിൽ ബ്രിട്ടീഷ്‌ ദ്വീപ​സ​മൂ​ഹ​ങ്ങൾക്കു കുറു​കെ​യുള്ള ദേശാ​ട​ന​പ​ഥ​മായ കിഴക്കൻ അറ്റ്‌ലാൻറിക്‌ വ്യോ​മ​മാർഗ​ത്തിൽവെച്ചു മറ്റനേകം പക്ഷികൾ അവയോ​ടു ചേരുന്നു.

ശേഷി​ച്ച​വ​യ്‌ക്കു ബ്രിട്ടീഷ്‌ ഉൾക്കട​ലി​ലെ 30 വൻ അഴിമു​ഖ​ങ്ങ​ളു​ടെ പരമ്പര ആവശ്യ​മായ ഭക്ഷണവും വിശ്ര​മ​സ​ങ്കേ​ത​വും പ്രദാനം ചെയ്യുന്നു. ഇവയോ​രോ​ന്നും 20,000-ത്തിലേറെ പക്ഷികളെ പരിപാ​ലി​ക്കു​ന്നു​ണ്ടെ​ങ്കി​ലും അവയിൽ ഏറ്റം പ്രധാ​ന​മാ​യത്‌ 2.5 ലക്ഷത്തി​ലേറെ പക്ഷികൾക്ക്‌—വാൾക്കൊ​ക്ക​ന്മാ​രും ഡൺലി​നു​ക​ളും ഗോഡ്‌വി​റ്റു​ക​ളും നോട്ടു​ക​ളും കക്കാതീ​നി​ക​ളും മണൽക്കോ​ഴി​ക​ളും ചോര​ക്കാ​ലി​ക​ളും കല്ലുരു​ട്ടി​ക്കാ​ട​ക​ളും ഉൾപ്പെടെ—ആതിഥ്യ​മ​രു​ളുന്ന ഇംഗ്ലണ്ടി​ന്റെ കിഴക്കൻ തീരത്തുള്ള ദ വാഷ്‌ എന്ന അഴിമു​ഖ​മാണ്‌. അഴിമു​ഖങ്ങൾ എങ്ങനെ​യുള്ള ഭക്ഷണമാ​ണു പ്രദാനം ചെയ്യു​ന്നത്‌, അവയ്‌ക്കി​ത്ര പ്രാധാ​ന്യ​മു​ള്ള​തെ​ന്തു​കൊണ്ട്‌?

അഴിമു​ഖ​ങ്ങ​ളു​ടെ പ്രാധാ​ന്യം

അഴിമു​ഖങ്ങൾ ശുദ്ധജലം കടൽവെ​ള്ള​വു​മാ​യി കൂടി​ച്ചേ​രുന്ന ഭാഗി​ക​മാ​യി അടഞ്ഞ തീര​പ്ര​ദേ​ശ​ങ്ങ​ളാണ്‌. ലോക​ത്തി​ലുള്ള എല്ലാ സമു​ദ്ര​ങ്ങ​ളി​ലെ​യും പകുതി​യോ​ളം ജീവി​കളെ നിലനിർത്തു​ന്നത്‌ ഇത്തരം ധാതു, ജൈവ സമൃദ്ധ​മായ ഉഷ്‌ണ​ജ​ല​മാണ്‌. ചെമ്മീ​നു​ക​ളെ​യും മണൽച്ചെ​ള്ളു​ക​ളെ​യും മറ്റുചില ജീവരൂ​പ​ങ്ങ​ളെ​യും നനഞ്ഞ മണലിൽ കണ്ടെത്താൻ കഴിയു​മെ​ങ്കി​ലും, അതി​നെ​ക്കാൾ വളരെ​യേറെ വ്യത്യ​സ്‌ത​ങ്ങ​ളായ നിരവധി ജീവി​കളെ അഴിമു​ഖ​ങ്ങ​ളി​ലുള്ള ചേറു​മ​ണ്ണിൽ കാണാം.

ചേറ്‌ അതുത്ഭ​വി​ക്കുന്ന ഊറലു​കൾക്ക​നു​സ​രി​ച്ചു വ്യത്യ​സ്‌ത​മാ​യി​രി​ക്കും. ഓരോ​തരം ചേറി​ലും നീർപ്പക്ഷികൾക്കുa തിന്നാൻപ​റ്റിയ വ്യത്യ​സ്‌ത​ങ്ങ​ളായ കടൽ ജീവി​ക​ളുണ്ട്‌. ഉദാഹ​ര​ണ​ത്തിന്‌, പ്രത്യേ​ക​തരം ചേറുള്ള ഒരു ചതുര​ശ്ര​മീ​റ്റർ ചുറ്റളവു പ്രദേ​ശത്തു മൂന്നു മില്ലി​മീ​റ്റ​റിൽ താഴെ മാത്രം നീളമുള്ള ദശലക്ഷ​ക്ക​ണ​ക്കി​നു ചെറിയ ഒച്ചുക​ളു​ണ്ടാ​കും. കൂടാതെ, മൊള​സ്‌കു​ക​ളും ലഗ്‌മ​ണ്ണി​ര​ക​ളും റാഗ്‌മ​ണ്ണി​ര​ക​ളും മറ്റനേകം അകശേ​രു​കി​ക​ളും മറ്റും ചേറിൽ നന്നായി വളരു​ക​യും ചെയ്യുന്നു.

പർവ​വേ​ലി​യേ​റ്റങ്ങൾ

ഒരഴി​മു​ഖത്ത്‌ ആയിര​ക്ക​ണ​ക്കി​നു നീർപ്പ​ക്ഷി​കൾ ഉണ്ടാകു​മെ​ങ്കി​ലും, സാധാ​ര​ണ​ഗ​തി​യിൽ അവ വിസ്‌തൃ​ത​മായ പ്രദേ​ശ​ങ്ങ​ളി​ലാ​യി ചിതറി​പ്പാർക്കു​ന്ന​തി​നാൽ അവയെ കണ്ടെത്തുക പ്രയാ​സ​മാണ്‌. എന്നിരു​ന്നാ​ലും, പർവ​വേ​ലി​യേ​റ്റങ്ങൾ (spring tides) ഉണ്ടാകു​മ്പോൾ സാഹച​ര്യ​ത്തി​നു വലിയ മാറ്റം സംഭവി​ക്കു​ന്നു. വെള്ളം പൊങ്ങു​മ്പോൾ ഉണ്ടാകുന്ന തിരമാ​ലകൾ മണലി​ന്റെ​യും ചേറി​ന്റെ​യും തിണ്ടുകൾ മൂടി​പ്പോ​കാൻ ഇടയാ​ക്കു​ന്നു. ഇതു നീർപ്പ​ക്ഷി​കളെ സാൾട്ടിങ്ങുകളിലേക്കുംb മറ്റ്‌ ഉയർന്ന സ്ഥലങ്ങളി​ലേ​ക്കും പോകാൻ നിർബ​ന്ധി​ത​രാ​ക്കു​ന്നു. ഇങ്ങനെ തമ്മിൽ ഇടകലർന്ന വലിയ കൂട്ടങ്ങ​ളാ​യി ഒരുമി​ച്ചു ചേക്കേ​റുന്ന സമയത്ത്‌ അവയെ നിരീ​ക്ഷി​ക്കുക കൂടുതൽ എളുപ്പ​മാണ്‌.

ഇന്ന്‌, ഏപ്രിൽ മാസത്തി​ലെ ഈ തെളിഞ്ഞ ഊഷ്‌മള പ്രഭാ​ത​ത്തിൽ പതിവു​പോ​ലെ ഒരു പർവ​വേ​ലി​യേറ്റം ഉണ്ടായി​രി​ക്കു​ന്നു. ബ്രിട്ട​നി​ലെ സഫോക്‌ പ്രവി​ശ്യ​യി​ലൂ​ടെ വളഞ്ഞു​പു​ള​ഞ്ഞൊ​ഴു​കുന്ന ഓൾഡ്‌ നദി വടക്കൻ കടലി​നോ​ടു ചേരുന്ന പ്രകൃ​തി​ര​മ​ണീ​യ​മായ ഒരു ചെറിയ അഴിമു​ഖ​ത്തേക്കു ഞങ്ങൾ യാത്ര ചെയ്യവെ ഒരു തണുത്ത വടക്കു​കി​ഴക്കൻ കാറ്റു വീശു​ന്നു​ണ്ടാ​യി​രു​ന്നു. ഇവിടെ ശിശി​ര​കാ​ലത്ത്‌ 11,000-ത്തിലധി​കം നീർപ്പ​ക്ഷി​കൾ എത്തി​ച്ചേ​രാ​റുണ്ട്‌. അഴിമു​ഖ​ത്തി​ന്റെ വ്യാപ്‌തി കേവലം 0.8 കിലോ​മീ​റ്റർ മാത്ര​മാ​യ​തി​നാൽ ഇവിടെ അവയുടെ പ്രവർത്ത​നങ്ങൾ നിരീ​ക്ഷി​ക്കാൻ നമുക്കു കൂടുതൽ എളുപ്പ​മാ​യി​രി​ക്കും.

പലതരം വസ്‌തു​ക്കൾകൊ​ണ്ടു നിർമി​ത​മായ, അങ്ങിങ്ങു തകർന്നു​പോയ ഒരു കടൽച്ചിറ നദി​യോ​രത്തു നീളത്തിൽ കാണാം. തീരത്തി​ന്റെ ചില ഭാഗങ്ങൾ നിറയെ ഞാങ്ങണ​യും മാരം​പു​ല്ലും വളർന്നു മൂടി​യി​രി​ക്കു​ന്നു. ബാക്കി ഭാഗം വെറുതേ തടിയും കല്ലും കൊണ്ടു പണിതി​രി​ക്കു​ന്നു. നദിക്ക​ര​യി​ലൂ​ടെ അൽപ്പം മുകളി​ലേക്കു പോകു​മ്പോൾ വിക്ടോ​റി​യൻ മാതൃ​ക​യിൽ പണിത ചാരു​ത​യാർന്ന ഒരു കൂട്ടം കെട്ടി​ട​ങ്ങൾക്കു നടുവി​ലാ​യി, ഓൾഡ്‌ബറ സംഗീ​തോ​ത്സ​വ​ത്തി​ന്റെ പ്രഭവ​സ്ഥാ​ന​മായ സ്‌നേപ്‌ മാൾട്ടി​ങ്‌സ്‌ സംഗീ​ത​മ​ണ്ഡപം തലയു​യർത്തി​നിൽക്കു​ന്നതു കാണാം. പക്ഷേ, നോക്കി​നിൽക്കാൻ സമയമില്ല. ഞങ്ങൾ നദീതീ​ര​ത്തു​കൂ​ടെ താഴേക്കു നടന്ന്‌ ഒരു സുരക്ഷിത സ്ഥാനം കണ്ടുപി​ടി​ച്ചേ മതിയാ​കൂ. കാറ്റിന്‌ ഇപ്പോൾതന്നെ ശക്തികൂ​ടി​യി​രി​ക്കു​ന്നു. മരം​കോ​ച്ചുന്ന തണുപ്പും. ഞങ്ങളുടെ കണ്ണുകൾ ചുളു​ചു​ളു​ക്കാൻ തുടങ്ങി​യി​രി​ക്കു​ന്നു.

ഞങ്ങൾ നദിയു​ടെ അരികത്ത്‌ എത്തിയ​തേ​യു​ള്ളൂ. (ചിത്ര​ത്തി​ലെ പോയിൻറ്‌ A കാണുക.) അതാ ഒരു ജോഡി മറി​ക്കൊ​ക്ക​ന്മാ​രു​ടെ ഹൃദ്യ​മായ കളകൂ​ജനം ഞങ്ങളെ വരവേൽക്കു​ന്നു. അഴിമു​ഖത്ത്‌ ഞങ്ങൾ നിൽക്കുന്ന കരയിൽത​ന്നെ​യാ​യി, 40 മീറ്ററി​ലേറെ അകലെ​യ​ല്ലാ​തെ, ആ ജോഡി​കൾ കൊക്കു​കൊ​ണ്ടു തൂവൽ ചീകി​മി​നു​ക്കി​ക്കാ​ട്ടി അന്യോ​ന്യം പ്രീണി​പ്പി​ക്കുന്ന തിരക്കി​ലാണ്‌. പക്ഷികൾ രണ്ടും അവയുടെ നേർത്ത കൊക്കു​കൾ മുകളി​ലേക്കു തിരിച്ചു മേൽമാ​റി​ന്റെ വശങ്ങളി​ലുള്ള തൂവലു​കൾ മെല്ലെ കൊത്തി​വ​ലി​ച്ചു ചേഷ്ടകൾ കാട്ടു​ക​യാണ്‌. ഇതു രമണീ​യ​മായ ഒരു ദൃശ്യ​മാണ്‌. പക്ഷേ, ഇനിയും കാണാ​നേ​റെ​യു​ള്ള​തു​കൊണ്ട്‌ നാം മുന്നോ​ട്ടു പോ​കേ​ണ്ടി​യി​രി​ക്കു​ന്നു.

ഉയരുന്ന വേലി​യേ​റ്റ​ത്തി​ര

വേലി​യേ​റ്റ​ത്തിര പെട്ടെന്ന്‌ ഉയരു​ന്ന​തി​നാൽ, ഞങ്ങൾ വേഗത്തിൽ നിശ്ചയി​ച്ചു വെച്ചി​രുന്ന നിരീക്ഷണ സ്ഥലത്തേക്കു നീങ്ങുന്നു. (ചിത്ര​ത്തി​ലെ പോയിൻറ്‌ B കാണുക.) വഴിക്ക്‌—അഴിമു​ഖ​ത്തി​ന്റെ കാവൽക്കാ​രൻ എന്ന തന്റെ വിശേ​ഷ​ണ​ത്തി​നൊ​ത്തു ജീവി​ക്കുന്ന—ഒരു ചോര​ക്കാ​ലി “ടൂഹൂഹൂ-ടൂഹൂഹൂ!” എന്ന കാതു തുളയ്‌ക്കുന്ന മുന്നറി​യി​പ്പിൻ വിളി​യു​മാ​യി സാൾട്ടി​ങ്ങിൽനി​ന്നു പറന്നു​യർന്നു. അതിന്റെ ചുവന്ന കാലു​ക​ളോ​ടു വൈരു​ദ്ധ്യം പുലർത്തുന്ന ചിറകിൻതു​മ്പത്തെ തൂവെ​ള്ള​നി​റം വെയി​ലേറ്റു തിളങ്ങു​ന്നുണ്ട്‌. ലക്ഷ്യസ്ഥാ​ന​ത്തെ​ത്തിയ ഞങ്ങൾ പെട്ടെ​ന്നു​തന്നെ, സത്വരം വെള്ളം കയറി​ക്കൊ​ണ്ടി​രി​ക്കുന്ന മണലി​ന്റെ​യും ചെളി​യു​ടെ​യും തിണ്ടു​ക​ളി​ലാ​കെ ഒരു സൂക്ഷ്‌മ​പ​രി​ശോ​ധന നടത്തുന്നു.

കുറച്ചു ദൂരെ ഇരുപ​തോ​ളം ചോര​ക്കാ​ലി​ക​ളു​ടെ കൂട്ടം ചേറിൽ കൊക്ക്‌ ആഴ്‌ത്തി പതുക്കെ എകാ​ഗ്ര​മാ​യി ഇരതേ​ടു​ന്നുണ്ട്‌. ബാക്കി​യു​ള്ളവർ ഭക്ഷണം തേടി കുറെ​ക്കൂ​ടി സുരക്ഷി​ത​മായ നീർ​ക്കൈ​വ​ഴി​ക​ളി​ലേക്കു പോയി​രി​ക്കു​ന്നു. പ്രകൃ​ത​ത്തി​നു​ചേ​രുന്ന, താഴേക്കു വളഞ്ഞ കൊക്കു​ക​ളുള്ള ഡൺലി​നു​കൾ ചെറിയ കൂട്ടങ്ങ​ളാ​യി ചേർന്നു​ന​ട​ക്കു​ന്നു. എപ്പോ​ഴും വെള്ളത്തി​ന്റെ അടുത്തു​കൂ​ടി പോകാൻ ചായ്‌വു കാണി​ച്ചു​കൊ​ണ്ടു യാതൊ​രു ക്രമവു​മി​ല്ലാ​തെ ചലിച്ചു​കൊ​ണ്ടി​രി​ക്കുന്ന ഒരു നിരയാ​യി അവ തിരക്കി​ട്ടു വഴുവ​ഴുത്ത ചേറിൽ കൊത്തി​പ്പെ​റു​ക്കി മുന്നോ​ട്ടു നീങ്ങു​ക​യാണ്‌. അവിട​വി​ടെ​യാ​യി വാൾക്കൊ​ക്ക​ന്മാർ പതുപ​തുത്ത ചേറിൽ സൂക്ഷ്‌മ​ത​യോ​ടെ പരതി​ക്കൊ​ണ്ടി​രി​ക്കു​ന്നു. നദിയു​ടെ അൽപ്പം കൂടി മേൽഭാ​ഗ​ത്താ​യി, ആ പഴയ കടൽത്തീ​രത്ത്‌ അടിഞ്ഞു​ക​യ​റിയ അവശി​ഷ്ടങ്ങൾ മറിച്ചി​ടാൻ കുറി​യ​തും മുകളി​ലേക്കു നേരിയ വളവു​ള്ള​തു​മായ കൊക്കു​കൾ ഉപയോ​ഗി​ച്ചു​കൊണ്ട്‌ ഒരു ജോഡി കല്ലുരു​ട്ടി​ക്കാ​ടകൾ ഭക്ഷണം തിരഞ്ഞു​കൊ​ണ്ടി​രി​ക്കു​ന്നു.

പെട്ടെന്ന്‌, ചാരമ​ണൽക്കോ​ഴി​യു​ടെ വന്യവും വിഷാ​ദ​മൂ​ക​വു​മായ “ട്‌ളീ-യൂ-ഈ” എന്ന ത്ര്യക്ഷര കൂജന​ത്താൽ അന്തരീക്ഷം മുഖരി​ത​മാ​യി. തലയ്‌ക്കു മുകളി​ലൂ​ടെ പറന്ന അതിന്റെ അടിവ​ശത്തെ ഇളംനി​റം പശ്ചാത്ത​ല​മാ​കു​മാറ്‌ ആ പക്ഷിയു​ടെ കറുത്ത കക്ഷങ്ങൾ വ്യക്തമാ​യി കാണാം. കാറ്റിനെ അഭിമു​ഖീ​ക​രി​ച്ചു​കൊണ്ട്‌ ദീർഘ​വൃ​ത്താ​കൃ​തി​യിൽ തിങ്ങി​ക്കൂ​ടിയ നാനൂറു പൊൻമ​ണൽക്കോ​ഴി​കൾ തല ചിറകി​നു​ള്ളി​ലൊ​ളി​പ്പി​ച്ചു വിശ്ര​മി​ക്കു​ന്നു. കൊത്തു​കൂ​ടി മേൽക്കോയ്‌മ ഉറപ്പി​ക്കു​ന്ന​തി​നി​ട​യിൽ വല്ലപ്പോ​ഴു​മൊ​ക്കെ​യു​ണ്ടാ​കുന്ന ശണ്‌ഠ ചില സംഘാം​ഗ​ങ്ങൾക്കി​ട​യിൽ നടക്കു​ന്നുണ്ട്‌. ഭൂരി​പ​ക്ഷ​വും ഇപ്പോ​ഴും തങ്ങളുടെ പുള്ളി​ക്കു​ത്തു​ക​ളുള്ള ശിശി​ര​കാല തൂവൽക്കു​പ്പാ​യ​മ​ണി​ഞ്ഞി​രി​ക്കു​ന്നു—മേൽഭാ​ഗത്തു സ്വർണ​വർണ​വും കറുപ്പും ഇടകലർന്നി​രി​ക്കു​ന്നു; കണ്ണുകൾക്കു ചുറ്റി​ലും മുഖത്തും അടിവ​ശ​ത്തും മങ്ങിയ വെള്ളനി​റം; കറുത്ത കൊക്ക്‌. ദൂരദർശി​നി തിരിച്ചു നോക്കി​ക്കൊ​ണ്ടി​രി​ക്കവെ ഞങ്ങൾ മോതി​ര​ക്കോ​ഴി​ക​ളെ​യും കണ്ടെത്തു​ന്നു.

പെട്ടെ​ന്നി​താ, ഏകദേശം 1000-ത്തോളം വരുന്ന ഒരു വലിയ സംഘം തിത്തി​രി​പ്പ​ക്ഷി​കൾ എത്തി​ച്ചേർന്നി​രി​ക്കു​ന്നു. ആകാശ​ത്തു​കൂ​ടി തങ്ങളു​ടേ​തായ രീതി​യിൽ കലപി​ല​കൂ​ട്ടി ആഹ്ലാദം പ്രകടി​പ്പി​ച്ചു​കൊ​ണ്ടാണ്‌ അവയുടെ വരവ്‌. ഇഷ്ടം പോലെ തീറ്റ കിട്ടു​മാ​യി​രുന്ന തങ്ങളുടെ പ്രിയ​പ്പെട്ട പടിഞ്ഞാ​റൻ കാർഷിക മേഖല​ക​ളിൽ നന്നാണ്‌ ഈ തിത്തി​രി​പ്പ​ക്ഷി​ക​ളും സ്വർണ​മ​ണൽക്കോ​ഴി​ക​ളും വന്നിരി​ക്കു​ന്നത്‌. ഈ അഴിമു​ഖത്ത്‌ അവ എത്തിയി​രി​ക്കു​ന്നതു തീറ്റയ്‌ക്കു വേണ്ടി മാത്രമല്ല കുളി​ക്കാ​നും തൂവലു​കൾ ചീകി​മി​നു​ക്കാ​നു​മാണ്‌.

പശ്ചാത്ത​ല​ത്തിൽ മുഖ്യ​മാ​യും മുഴങ്ങുന്ന ശബ്ദങ്ങൾ വാൾക്കൊ​ക്ക​ന്മാ​രു​ടെ ഗുളു​ഗു​ളു ശബ്ദവും ചോര​ക്കാ​ലി​ക​ളു​ടെ സംതൃ​പ്‌ത​വും സംഗീ​താ​ത്മ​ക​വു​മായ ചൂളം​വി​ളി​യും ചെറിയ കടൽക്കാ​ക്ക​ക​ളു​ടെ ആരവവു​മാണ്‌. രണ്ടു വരവാലൻ ഗോഡ്‌വി​റ്റു​കൾ ചേറിൽ ആഴത്തിൽ പരതി​ക്കൊ​ണ്ടി​രി​ക്കു​ന്നു. ഓറഞ്ചും ചുവപ്പും നിറമാർന്ന തങ്ങളുടെ കടുപ്പ​മേ​റിയ കൊക്കു​ക​ളാൽ കക്കാതീ​നി​കൾ ലഗ്‌മ​ണ്ണി​ര​കളെ മണ്ണിൽനി​ന്നു വലിച്ചു പുറ​ത്തെ​ടു​ക്കു​ന്നു. ഏകാന്ത​നായ ഒരു ചാരമ​ണൽക്കോ​ഴി പ്രൗഢ​ഭാ​വ​ത്തോ​ടെ അടി​വെച്ച്‌, ഇടയ്‌ക്കൊ​ന്നു നിന്ന്‌, വലതു പാദം ഒന്നു കുടഞ്ഞ്‌, പിന്നെ തന്റെ ഇരയുടെ പിന്നാലെ പോയി അതിനെ വിഴു​ങ്ങു​ന്നു. പക്ഷേ കയറി​ക്ക​യറി വരുന്ന വേലി​യേറ്റം അവ നിൽക്കുന്ന സ്ഥലത്തെ​ത്തി​യി​രി​ക്കു​ന്നു.

തിരക്ക്‌ ആരംഭി​ക്കു​ന്നു

പെട്ടെന്നു പക്ഷികൾ കൂട്ടമാ​യി നിലത്തു​നിന്ന്‌ ഉയരുന്നു, മിക്കവാ​റും ഒരേ വർഗത്തിൽ പെട്ടവ ഒന്നിച്ച്‌. നീർപ്പ​ക്ഷി​കൾ പറ്റമായി ചേർത്ത​ടു​ക്കി​യ​തു​പോ​ലെ ഒന്നിച്ചു പറക്കു​ന്ന​തി​നാൽ ആ കാഴ്‌ച അവിസ്‌മ​ര​ണീ​യ​മായ ഒന്നാണ്‌. വശത്തു​നി​ന്നു വശത്തേക്കു ചാഞ്ഞും ചരിഞ്ഞു​മുള്ള അവയുടെ പറക്കലിൽ സൂര്യ​ര​ശ്‌മി​കൾ പതിക്കു​ന്ന​തി​ന​നു​സ​രിച്ച്‌ നിറവും മാറുന്നു—കടും​ത​വി​ട്ടു നിറത്തിൽനി​ന്നു തിളങ്ങുന്ന വെള്ളി​യു​ടെ വെൺമ​യാ​കു​ന്നു—ഒരു നിമിഷം വ്യക്തമാ​യി കാണു​ക​യും ഉത്തരക്ഷ​ണ​ത്തിൽ വേലി​യേ​റ്റ​ത്തിൽ ഉയർന്നു​കൊ​ണ്ടി​രി​ക്കുന്ന കലക്ക​വെ​ള്ള​ത്തി​ന്റെ നിറവു​മാ​യി താദാ​ത്മ്യം പ്രാപി​ക്കു​ക​യും ചെയ്യുന്നു. ഇരുണ്ട​നി​റ​ത്തിൽനി​ന്നു വെള്ളി​ത്തി​ള​ക്ക​ത്തി​ലേ​ക്കും വെള്ളി​നി​റ​ത്തിൽനി​ന്നു വീണ്ടും ഇരുണ്ട​നി​റ​ത്തി​ലേ​ക്കും, തികഞ്ഞ താളല​യ​ത്തോ​ടെ​യും അതേസ​മയം നിരന്തരം ആകൃതി​യിൽ മാറ്റം വരുത്തി​ക്കൊ​ണ്ടും—ദീർഘ​വൃ​ത്താ​കൃ​തി​യിൽ നിന്നു വൃത്താ​കൃ​തി​യി​ലേ​ക്കും അതിൽ നിന്നു സർപ്പി​ളാ​കൃ​തി​യി​ലേ​ക്കും ഒടുക്കം ലംബാ​കൃ​തി​യി​ലുള്ള ഒരു നിരയാ​യും അവ രൂപം​പ്രാ​പി​ക്കു​ന്നു. മിക്കവ​യും തിരിച്ച്‌, വേലി​യേറ്റം അതുവരെ വന്നു മൂടി​യി​ട്ടി​ല്ലാത്ത ചേറിൻ തിട്ടക​ളി​ലേക്കു താണി​റ​ങ്ങു​ന്നു.

ഞങ്ങൾ നിലയു​റ​പ്പി​ച്ചി​രുന്ന മണലി​ന്റെ​യും ചേറി​ന്റെ​യും തിട്ടയിൽ പെട്ടെ​ന്നു​തന്നെ വെള്ളം വന്നു മൂടു​മെ​ന്ന​തി​നാൽ ഞങ്ങൾ നദീതീ​ര​ത്തു​കൂ​ടി മേൽഭാ​ഗ​ത്തേക്കു തിരക്കി​ട്ടു നീങ്ങുന്നു. ഒരു കൂട്ടം നീർപ്പ​ക്ഷി​ക​ളു​ടെ നിരയും ഞങ്ങളെ അനുഗ​മി​ക്കു​ന്നുണ്ട്‌. ആദ്യം ഞങ്ങളുടെ മുമ്പിൽക്ക​യ​റി​യതു ത്വരിത ഗതിയിൽ ചിറക​ടി​ച്ചു​കൊ​ണ്ടു കാതു​തു​ള​യ്‌ക്കുന്ന, ഹ്രസ്വ​നേ​രത്തെ ചൂളം​വി​ളി​യു​മാ​യി വന്ന കൊച്ചു ഡൺലി​നു​ക​ളു​ടെ ചെറിയ കൂട്ടങ്ങ​ളാ​യി​രു​ന്നു. അടുത്ത​താ​യി കുറെ​ക്കൂ​ടി വലുപ്പ​വും ഗാംഭീ​ര്യ​വു​മേ​റിയ ചോര​ക്കാ​ലി​ക​ളു​ടെ കൂട്ടമാ​ണു കടന്നു​പോ​യത്‌. വലിയ കടൽക്കാ​ക്ക​ക​ളു​ടെ വലുപ്പ​മുള്ള വാൾക്കൊ​ക്ക​ന്മാർ തങ്ങളുടെ മനോ​ഹ​ര​മായ കളകള​ശബ്ദം പുറ​പ്പെ​ടു​വി​ച്ചു​കൊണ്ട്‌ അടുത്തു​കൂ​ടി പറന്നു​പോ​യി. നീലാ​കാ​ശ​ത്തിൽ വൈരു​ദ്ധ്യാ​ത്മക നിറങ്ങ​ളായ കറുപ്പും വെള്ളയും പ്രദർശി​പ്പി​ച്ചു​കൊണ്ട്‌ മറി​ക്കൊ​ക്ക​ന്മാർ വലിയ കൂട്ടമാ​യി അവയെ പിൻചെന്നു. അവ തങ്ങളുടെ നീണ്ട ചാര-നീല വർണമുള്ള കാലു​ക​ളു​ടെ അറ്റംമാ​ത്രം വെള്ളത്തി​നു മീതെ കാണാൻ പാകത്തിന്‌ അഴിമു​ഖ​ത്തി​ന്റെ മേൽഭാ​ഗത്തു താണി​റ​ങ്ങു​ന്നു.

ചേക്കേ​റുന്ന സ്ഥലം

അഴിമു​ഖം നേർത്തു​വ​രുന്ന കുറെ​ക്കൂ​ടി ഉയർന്ന ഒരു സ്ഥലത്തെ​ത്തു​ന്ന​തി​നു ഞങ്ങൾ വേഗത്തിൽ നടന്നു. (ചിത്ര​ത്തി​ലെ പോയിൻറ്‌ C കാണുക.) എപ്പോ​ഴു​മി​ല്ലെ​ങ്കി​ലും പക്ഷിക​ളെ​ല്ലാം മിക്കവാ​റും അതതിന്റെ തരമനു​സ​രി​ച്ചു കൂട്ടം​കൂ​ടാൻ ചായ്‌വു കാട്ടുന്നു. വേലി​യേ​റ്റ​ത്താൽ വെള്ളം ദ്രുത​ഗ​തി​യിൽ പൊങ്ങി​ക്കൊ​ണ്ടി​രി​ക്കെ, കൂടുതൽ പക്ഷികൾ കൂട്ട​ത്തോ​ടു ചേരു​ന്നുണ്ട്‌. തീരത്തു നിൽക്കാ​നുള്ള സ്ഥലം കണ്ടെത്താൻ ബുദ്ധി​മു​ട്ടേ​റും​തോ​റും അവയുടെ നിൽപ്പി​ന്റെ ക്രമത്തി​നു തുട​രെ​ത്തു​ടരെ അഴിച്ചു​പണി വേണ്ടി​വ​രു​ന്നു. താമസി​ച്ചെ​ത്തു​ന്നവർ സ്ഥലമു​ണ്ടാ​ക്കാൻ തിക്കും തിരക്കും കൂട്ടുന്നു.

ഇപ്പോൾ വേലി​യേറ്റം ഞങ്ങളുടെ അടു​ത്തെത്തി. തിത്തി​രി​പ്പ​ക്ഷി​ക​ളും പൊൻമ​ണൽക്കോ​ഴി​ക​ളും കൃഷി​സ്ഥ​ല​ങ്ങ​ളി​ലേക്കു പറന്നു​പോ​യി. ബാക്കി​യുള്ള എല്ലാ പക്ഷിക​ളും ചേറിൽനിന്ന്‌ ആ പഴയ നദിയു​ടെ തീരങ്ങ​ളി​ലേക്കു ചേക്കേ​റാൻ നിർബ​ന്ധി​ത​രാ​യി​രി​ക്കു​ന്നു. കക്കാതീ​നി​ക​ളു​ടെ നിർത്താ​തെ​യുള്ള കൂവലു​കൾ അവയുടെ അനുപാ​ത​ത്തി​നു നിരക്കാ​ത്ത​താണ്‌. ചോര​ക്കാ​ലി​ക​ളും വാൾക്കൊ​ക്ക​ന്മാ​രും പശ്ചാത്ത​ല​ത്തി​ലുള്ള കോലാ​ഹ​ല​ങ്ങ​ളോ​ടു തങ്ങളുടെ ശബ്ദവും ചേർക്കു​ന്നുണ്ട്‌. തലയ്‌ക്കു മുകളി​ലൂ​ടെ പറന്ന ഒരു വാനമ്പാ​ടി​യു​ടെ പാട്ട്‌ അതി​നെ​യെ​ല്ലാം വെല്ലുന്നു—തികച്ചും വിസ്‌മ​യാ​വ​ഹ​മായ ഒരന്തരീ​ക്ഷം.

പർവ​വേ​ലി​യേ​റ്റ​ത്തിൽനി​ന്ന​കന്ന്‌, നീർപ്പ​ക്ഷി​കൾ തങ്ങൾക്കർഹ​മായ മധ്യാഹ്ന ചേക്കേറൽ ആസ്വദി​ച്ചു​കൊ​ണ്ടി​രി​ക്കവെ ഞങ്ങൾ അവി​ടെ​നി​ന്നും വിടവാ​ങ്ങു​ന്നു. കടൽഭി​ത്തി​ക്കു പുറകി​ലാ​യി വെള്ളം കാണാ​നാ​കാത്ത വിധമാ​ണു ചിലവ​യു​ടെ ഇരി​പ്പെ​ങ്കി​ലും, പക്ഷികൾക്കു തങ്ങളുടെ ചേറിൻ തിട്ടക​ളി​ലേ​ക്കോ മണൽ നിറഞ്ഞ തീരങ്ങ​ളി​ലേ​ക്കോ എപ്പോൾ മടങ്ങണ​മെ​ന്ന​റി​യാം. കൃത്യ​നി​ഷ്‌ഠ​യും സഹജജ്ഞാ​ന​വു​മുള്ള ഇവയ്‌ക്കു വേലി​യേ​റ്റ​വും വേലി​യി​റ​ക്ക​വും എങ്ങനെ പ്രവർത്തി​ക്കു​ന്നു​വെന്നു വ്യക്തമാ​യ​റി​യാം.

അതേ, വേലി​യേറ്റ സമയത്തെ ഈ തിരക്കു കാണു​ന്നതു തികച്ചും വിസ്‌മ​യാ​വ​ഹ​മായ ഒരനു​ഭ​വ​മാണ്‌, പ്രത്യേ​കി​ച്ചും അത്‌ ആദ്യമാ​ണെ​ങ്കിൽ!

[അടിക്കു​റി​പ്പു​കൾ]

a ഐക്യനാടുകളിലും കാനഡ​യി​ലും നീർപ്പ​ക്ഷി​കൾ (കാരാ​ഡ്രി​ഫോർമിസ്‌ ഗണം), തീരപ്പ​ക്ഷി​കൾ എന്നാണ്‌ അറിയ​പ്പെ​ടു​ന്നത്‌.

b വേലി​യേ​റ്റങ്ങൾ നിമിത്തം പതിവാ​യി വെള്ളം കയറുന്ന പ്രദേശം.

[26-ാം പേജിലെ ചതുരം/ചിത്രം]

തിരക്കു കണ്ട്‌ ആസ്വദി​ക്കു​ക

വേലി​യേ​റ്റ​സ​മ​യത്തെ തിരക്കു കാണാൻ പോക​ണ​മെ​ന്നു​ണ്ടെ​ങ്കിൽ ആദ്യമാ​യി അനു​യോ​ജ്യ​മായ ഒരു അഴിമു​ഖം തിര​ഞ്ഞെ​ടു​ക്കുക. അടുത്ത​താ​യി നിങ്ങൾക്കു പ്രദേ​ശ​ത്തെ​പ്പറ്റി കുറച്ചു വിവരങ്ങൾ, അതായതു നീർപ്പ​ക്ഷി​കൾ പോകു​ന്ന​തെ​ങ്ങോട്ട്‌, എവി​ടെ​നി​ന്നാൽ അവയെ കാണാം, തുടങ്ങി​യവ ശേഖരി​ക്കേ​ണ്ടി​വ​രും. വെളു​ത്ത​വാ​വോ കറുത്ത​വാ​വോ കഴിഞ്ഞ​യു​ടനെ ഉണ്ടാകുന്ന ഒരു വലിയ പർവ​വേ​ലി​യേ​റ്റ​ത്തി​ന്റെ സമയം കണ്ടെത്തു​ന്ന​തി​നു​വേണ്ടി വേലി​യേറ്റ, വേലി​യി​റ​ക്ക​ങ്ങ​ളു​ടെ പട്ടികകൾ പരി​ശോ​ധി​ക്കുക. യാത്ര​ചെ​യ്യാ​നുള്ള സമയത്തി​നു​പു​റമേ, പക്ഷികളെ ശരിക്കും നടന്നു​കാ​ണാൻ ചുരു​ങ്ങി​യതു മൂന്നു മണിക്കൂർ സമയ​മെ​ങ്കി​ലും നീക്കി​വെ​ച്ചു​കൊണ്ട്‌, വേലി​യേ​റ്റ​ത്തി​നു രണ്ടു മണിക്കൂർ മുമ്പെ​ങ്കി​ലും സ്ഥലത്തെ​ത്തുക.

നിങ്ങൾക്ക്‌ എന്തൊക്കെ ഉപകര​ണങ്ങൾ വേണ്ടി​വ​രും? നിങ്ങൾക്കു നീർപ്പ​ക്ഷി​കളെ കണ്ടു പരിച​യ​മി​ല്ലെ​ങ്കിൽ തിരി​ച്ച​റി​യാൻ സഹായ​ക​മായ ഒരു പുസ്‌തകം കൂടെ​ക്കൊ​ണ്ടു​വ​രിക. ഒരു ജോടി ബൈ​നോ​ക്കു​ലർ വളരെ പ്രയോ​ജ​ന​പ്ര​ദ​മാ​യി​രി​ക്കും. ഓരോ നീർപ്പ​ക്ഷി​ക്കും തനതായ സവി​ശേ​ഷ​ത​ക​ളു​ണ്ടെ​ന്നും അവയുടെ കൊക്കു​ക​ളു​ടെ രൂപഘടന അനുസ​രി​ച്ചാ​യി​രി​ക്കും അവ തീറ്റ തേടുന്ന രീതി എന്നും നിങ്ങൾ താമസി​യാ​തെ മനസ്സി​ലാ​ക്കും. ഒരു ദൂരദർശി​നി അത്ര അത്യാ​വ​ശ്യ​മു​ള്ളതല്ല—എന്നാൽ, ചൂടുള്ള, വെള്ളം കടക്കാത്ത വസ്‌ത്രങ്ങൾ അത്യാ​വ​ശ്യ​മാണ്‌. അപകട​ങ്ങ​ളെ​ക്കു​റി​ച്ചു ജാഗ്ര​ത​യു​ള്ള​വ​രാ​യി​രി​ക്കുക. ചേറിൻ തിട്ടകൾ സംബന്ധി​ച്ചു നല്ല പരിച​യ​മു​ണ്ടെ​ങ്കിൽ മാത്രമേ അവയി​ലൂ​ടെ നടക്കാവൂ. പെട്ടെ​ന്നു​യ​രുന്ന വേലി​യേ​റ്റ​ത്തിൽ കുടു​ങ്ങി​പ്പോ​കാൻ എളുപ്പ​മാണ്‌. മാത്രമല്ല, കടൽകോ​ട​മ​ഞ്ഞെ​ങ്ങാ​നും പെട്ടെ​ന്നു​ണ്ടാ​യാൽ ദിശ അറിയാൻ കഴിയാ​തെ​വ​രും. കാറ്റും കണക്കി​ലെ​ടു​ക്കേ​ണ്ട​തുണ്ട്‌. കൊടു​ങ്കാ​റ്റു​കൾ വലിയ തിരമാ​ല​ക​ളും വേലി​യേ​റ്റ​വും ഉണ്ടാക്കി​യേ​ക്കാം. ഏതഴി​മു​ഖ​ത്താ​യാ​ലും ഇവ പ്രത്യേ​കി​ച്ചും അപകട​ക​ര​മാണ്‌.

[27-ാം പേജിലെ ചതുരം/ചിത്രം]

ലോകത്തിലെ പ്രധാ​ന​പ്പെട്ട അഴിമു​ഖ​ങ്ങൾ

നെതർലൻഡ്‌സി​ലെ വാഡൻസേ​യാ​ണു വേലി​യേറ്റ, വേലി​യി​റ​ക്ക​ങ്ങ​ളു​ണ്ടാ​കുന്ന യൂറോ​പ്പി​ലെ ഏറ്റവും പ്രാധാ​ന്യ​മേ​റിയ തീര​പ്ര​ദേശം. ചില സമയങ്ങ​ളിൽ അവിടെ 40 ലക്ഷത്തി​ലേറെ നീർപ്പ​ക്ഷി​കൾ വരാറുണ്ട്‌. അതു തെക്കു​പ​ടി​ഞ്ഞാ​റൻ ജറ്റ്‌ലൻഡ്‌ വരെ നീണ്ടു​കി​ട​ക്കു​ന്നു. ഈ വിശാ​ല​മായ പ്രദേ​ശത്തെ സന്ദർശ​ന​ത്തി​ന​നു​യോ​ജ്യ​മായ മനോ​ഹ​ര​മായ മൂന്നി​ടങ്ങൾ, ഡെൻമാർക്കി​ലെ രമ്മ ദ്വീപി​ലേ​ക്കുള്ള ചതുപ്പു​നി​ല​ത്തു​കൂ​ടി ഉയർത്തി​ക്കെ​ട്ടിയ പാത; ജർമനി​യി​ലെ ഒരു സുപ്ര​ധാന വേലി​യേറ്റ ചേക്കേറൽ സ്ഥലമായ ദ വെസെർ അഴിമു​ഖം; നെതർലൻഡ്‌സി​ലെ ഗ്രോ​നിം​ഗൻ ലൗവേ​ഴ്‌സ്‌ സേ എന്നിവ​യാണ്‌. ഇബീരി​യൻ ഉപദ്വീ​പി​ലെ ഏറ്റവും സുപ്ര​ധാന അഴിമു​ഖം പോർച്ചു​ഗ​ലി​ലെ ടാഗസ്‌ നദിയു​ടേ​താണ്‌.

വടക്കേ അമേരി​ക്ക​യു​ടെ​യും തെക്കേ അമേരി​ക്ക​യു​ടെ​യും പസഫിക്‌ തീരത്തുള്ള അഴിമു​ഖങ്ങൾ, ഏകദേശം 60 മുതൽ 80 ലക്ഷം വരെ ദേശാടന നീർപ്പ​ക്ഷി​കൾക്കു വേണ്ട ഭക്ഷണം പ്രദാനം ചെയ്യുന്നു. സുപ്ര​ധാന സ്ഥലങ്ങളിൽ കാലി​ഫോർണി​യ​യി​ലെ സാൻ ഫ്രാൻസി​സ്‌കോ ഉൾക്കട​ലും ഹംബോൾട്ട്‌ ഉൾക്കട​ലും, വാൻകൂ​വ​റി​ലെ ബൗണ്ടറി ഉൾക്കടൽ മുതൽ അയോണ ദ്വീപി​ന്റെ ചുറ്റു​മുള്ള സ്ഥലം വരെയുള്ള കാനഡ​യി​ലെ 200 ചതുര​ശ്ര​കി​ലോ​മീ​റ്റ​റും ബ്രിട്ടീഷ്‌ കൊളം​ബി​യ​യും, അലാസ്‌ക​യു​ടെ സ്റ്റികീൻ അഴിമു​ഖ​വും കോപ്പർ നദീത​ട​വും പെടുന്നു.

നീർപ്പ​ക്ഷി​ക​ളു​ടെ താവള​ങ്ങ​ളായ മനോ​ഹ​ര​മായ പ്രദേ​ശങ്ങൾ ബോളി​വർ നദിയു​ടെ തിട്ടയി​ലും യു.എസ്‌.എ, ടെക്‌സാ​സി​ലെ ഗാൽവെ​സ്റ്റ​ണി​ലും ഹോ​ങ്കോം​ഗി​ലെ തായ്‌പോ​വി​ലും ഓസ്‌​ട്രേ​ലി​യ​യി​ലെ കാർന​സി​ലും, വടക്കു​കി​ഴക്കൻ ഓസ്‌​ട്രേ​ലി​യ​യി​ലും, കെനി​യ​യി​ലെ മൊമ്പാ​സ​യ്‌ക്കു സമീപ​വും കാണ​പ്പെ​ടു​ന്നു.

[24-ാം പേജിലെ ചിത്രം]

അഞ്ച്‌ കക്കാതീ​നി​കൾ

[25-ാം പേജിലെ ചിത്രം]

തങ്ങളുടെ ചേക്കേറൽ താവള​ങ്ങ​ളിൽനി​ന്നു തിരക്കി​ട്ടു​പാ​യുന്ന നോട്ടു​കൾ

[25-ാം പേജിലെ ചിത്രം]

ഓൾഡ്‌ അഴിമു​ഖം, സഫോക്‌

പോയിൻറ്‌ B നിരീ​ക്ഷ​ണ​സ്ഥ​ലം

നിരീ​ക്ഷ​ണ​സ്ഥലം C

പ്രാഥ​മിക നിരീ​ക്ഷ​ണ​കേ​ന്ദ്രം A

സ്‌നേപ്‌ മാൾട്ടി​ങ്‌സ്‌ സംഗീ​ത​മ​ണ്ഡ​പം

[കടപ്പാട്‌]

Snape Maltings Riverside Centre

[26-ാം പേജിലെ ചിത്രം]

നോട്ട്‌

[26-ാം പേജിലെ ചിത്രം]

ചോരക്കാലി

വാൾക്കൊക്കൻ

[27-ാം പേജിലെ ചിത്രം]

മുകളിൽ: വാൾക്കൊ​ക്ക​ന്മാർ

    മലയാളം പ്രസിദ്ധീകരണങ്ങൾ (1970-2025)
    ലോഗ് ഔട്ട്
    ലോഗ് ഇൻ
    • മലയാളം
    • പങ്കുവെക്കുക
    • താത്പര്യങ്ങൾ
    • Copyright © 2025 Watch Tower Bible and Tract Society of Pennsylvania
    • നിബന്ധനകള്‍
    • സ്വകാര്യതാ നയം
    • സ്വകാര്യതാ ക്രമീകരണങ്ങൾ
    • JW.ORG
    • ലോഗ് ഇൻ
    പങ്കുവെക്കുക