ലോകത്തെ വീക്ഷിക്കൽ

അവിശുദ്ധ ജലം

72-കാരി​യായ ഒരു സ്‌ത്രീക്ക്‌ തിമി​ര​ത്തി​നുള്ള ശസ്‌ത്ര​ക്രി​യ​യ്‌ക്കു തൊട്ടു​മു​മ്പാ​യി രണ്ടു തവണ കണ്ണുകൾക്ക്‌ അണുബാ​ധ​യു​ണ്ടാ​യ​പ്പോൾ അയർലൻഡി​ലെ ഒരു ശസ്‌ത്ര​ക്രി​യാ​വി​ദ​ഗ്‌ധൻ അന്ധാളി​ച്ചു​പോ​യി. എന്തായി​രു​ന്നു അണുബാ​ധ​യ്‌ക്കു കാരണം? അവർ മുഖത്തു തളിച്ച ലൂർദി​ലെ “വിശുദ്ധ” ജലം. “വിശു​ദ്ധ​ജലം മിക്ക​പ്പോ​ഴും അപകട​കാ​രി​ക​ളായ ബാക്ടീ​രി​യകൾ നിമിത്തം മലിന​മാ​ക്ക​പ്പെ​ടു​ന്നു എന്നതാണു പ്രശ്‌നം” എന്ന്‌ ദി ഐറിഷ്‌ ടൈംസ്‌ പറയുന്നു. നിശ്ചയിച്ച സമയത്തു​തന്നെ ശസ്‌ത്ര​ക്രിയ നടത്തി​യി​രു​ന്നെ​ങ്കിൽ ആ സ്‌ത്രീ നിസ്സം​ശ​യ​മാ​യും അന്ധയാ​യി​ത്തീർന്നേനേ. ദി ഐറിഷ്‌ ടൈംസ്‌ ഇങ്ങനെ തുടരു​ന്നു: “അനു​ഗ്ര​ഹം​കൊ​ണ്ടു മാത്രം രോഗാ​ണു​ക്കൾ നശിക്കു​ന്നില്ല. എന്നുത​ന്നെയല്ല, രോഗ​ശാ​ന്തി കിട്ടാ​നു​ദ്ദേ​ശി​ച്ചു തളിക്കുന്ന വിശു​ദ്ധ​ജ​ലം​തന്നെ, ചില സാഹച​ര്യ​ങ്ങ​ളിൽ ജീവനു ഭീഷണി​യാ​യി​ത്തീർന്നേ​ക്കാ​വുന്ന അണുബാധ ഉളവാ​ക്കി​യേ​ക്കാം.” ആ റിപ്പോർട്ടു​പ്ര​കാ​രം, നിങ്ങൾ ആശുപ​ത്രി​യി​ലാ​യി​രി​ക്കു​മ്പോൾ സദു​ദ്ദേ​ശ്യ​ത്തോ​ടു​കൂ​ടി നിങ്ങളു​ടെ​മേൽ “വിശുദ്ധ” ജലം തളിക്കുന്ന സുഹൃ​ത്തു​ക്ക​ളോ ബന്ധുക്ക​ളോ ആയിരി​ക്കാം “നിങ്ങളു​ടെ അതിജീ​വ​ന​ത്തിന്‌ ഏറ്റവും വലിയ ഭീഷണി.”

കുഴി​ബോം​ബു പ്രതി​സ​ന്ധി

“കുഴി​ബോം​ബു​ക​ളിൽനി​ന്നു ലോകത്തെ രക്ഷിക്കുക എന്ന ഉദ്ദേശ്യ​ത്തിൽ പ്രവർത്തി​ക്കുന്ന ആഗോള പ്രസ്ഥാനം, തങ്ങളുടെ ലക്ഷ്യം കുഴി​ബോം​ബു​ക​ളെ​പ്പോ​ലെ​തന്നെ അപ്രാ​പ്യ​വും വഴുതി​പ്പോ​കു​ന്ന​തു​മാ​ണെന്നു കണ്ടെത്തി​യി​രി​ക്കു​ന്നു” എന്ന്‌ ദ വാൾ സ്‌ട്രീറ്റ്‌ ജേർണൽ എഴുതു​ന്നു. “കുഴി​ബോം​ബു​കൾ സുരക്ഷി​ത​മാ​യി നീക്കം ചെയ്യാൻ ആവശ്യ​മായ സാമ​ഗ്രി​കൾ നിലവി​ലില്ല.” രണ്ടാം ലോക​മ​ഹാ​യു​ദ്ധ​ത്തിൽ തങ്ങളുടെ മുത്തശ്ശ​ന്മാർ ഉപയോ​ഗിച്ച അതേ പഴഞ്ചൻ സജ്ജീക​ര​ണങ്ങൾ—മണ്ണിന​ടി​യിൽ പരി​ശോ​ധി​ച്ചു വിവരം തരാൻ കഴിവുള്ള വടി​പോ​ലുള്ള ഒരുപ​ക​ര​ണ​വും ഒരു ലോഹ​സം​വേ​ദി​നി​യും—തന്നെയാണ്‌ ഇന്നത്തെ പട്ടാള​ക്കാ​രും ഉപയോ​ഗി​ക്കു​ന്നത്‌. എന്നാൽ പുതി​യ​തരം കുഴി​ബോം​ബു​ക​ളാ​കട്ടെ മിക്കവ​യും പ്ലാസ്റ്റിക്‌ നിർമി​ത​മാണ്‌, മാത്രമല്ല ഒരുപാ​ടു വ്യാജ ആപത്‌സൂ​ച​നകൾ നൽകും​വി​ധം അവ മറ്റു ബോം​ബു​ക​ളു​ടെ​യും കുഴി​ബോം​ബു​ക​ളു​ടെ​യും അവശി​ഷ്ട​ങ്ങ​ളു​ടെ കൂട്ടത്തിൽ കുഴി​ച്ചി​ടു​ക​യും ചെയ്യുന്നു. അതു​കൊ​ണ്ടൊ​ക്കെ​ത്തന്നെ അവ കണ്ടെത്തുക വളരെ പ്രയാ​സ​മാണ്‌. ലോഹ​സം​വേ​ദി​നി, ഒരു വസ്‌തു തിരി​ച്ച​റി​ഞ്ഞു കഴിയു​മ്പോൾ ഒരു ഫൈബർ ഗ്ലാസിന്റെ ദണ്ഡ്‌ സൂക്ഷ്‌മ​ത​യോ​ടെ ഒരു പ്രത്യേക കോണിൽ മണ്ണി​ലേക്ക്‌ ഇറക്കുന്നു. കുഴി​ബോം​ബി​ന്റെ വശത്തു തട്ടി കണ്ടുപി​ടി​ക്കാ​മെന്ന ഉദ്ദേശ്യ​ത്തി​ലാണ്‌ അങ്ങനെ ചെയ്യു​ന്നത്‌. എന്നാൽ കുഴി​ബോംബ്‌ ഒരു പ്രത്യേക കോണിൽ ചരിഞ്ഞി​രി​ക്കു​ക​യും വടി അതിന്റെ മുകളിൽ തൊടു​ക​യും ചെയ്‌താൽ അത്‌ ആളിന്റെ മുഖ​ത്തേ​ക്കാ​കും പൊട്ടി​ത്തെ​റി​ക്കുക. കുഴി​ബോം​ബു​കൾക്ക്‌ ഓരോ​ന്നി​നും മിക്ക​പ്പോ​ഴും 5 ഡോള​റിൽ താഴെ മാത്രം ചെലവു വരു​മ്പോൾ, അവ നീക്കം ചെയ്യു​ന്ന​തിന്‌ ഓരോ​ന്നി​നും 1,000-ത്തിലേറെ ഡോള​റു​കൾ വേണ്ടി​വ​രു​ന്നു. ഓരോ വർഷവും 15 ലക്ഷത്തി​നും 20 ലക്ഷത്തി​നു​മി​ട​യ്‌ക്ക്‌ കുഴി​ബോം​ബു​കൾ മണ്ണിൽ കുഴി​ച്ചി​ട​പ്പെ​ടു​ന്നു. ഇവമൂലം വർഷം​തോ​റും 25,000-ത്തോളം ആളുകൾക്ക്‌—നിരവധി കുട്ടി​ക​ളുൾപ്പെടെ—അംഗ​വൈ​ക​ല്യ​മോ മരണമോ സംഭവി​ക്കു​ന്നു.

കുട്ടി​കൾക്കു മോച​ന​മി​ല്ല

“യുദ്ധം സമഗ്ര​മാ​യി​ത്തീർന്ന​പ്പോൾ കുട്ടി​ക​ളും മുതിർന്ന​വ​രു​ടെ ശണ്‌ഠ​കൾക്ക്‌ ഇരകളാ​കാൻ തുടങ്ങി: ബോം​ബു​ക​ളും മി​സൈ​ലു​ക​ളും കൊല്ലു​മ്പോൾ പ്രായ​ഭേദം കാണി​ക്കാ​റില്ല” എന്ന്‌ ദി ഇക്കണോ​മിസ്റ്റ്‌ പറയുന്നു. “ആഭ്യന്തര യുദ്ധങ്ങൾ—ഈ കാലത്തു സർവസാ​ധാ​ര​ണ​മാ​യവ—മിക്ക​പ്പോ​ഴും രാജ്യ​ങ്ങളെ മൊത്തം ഗ്രസി​ക്കു​ന്നു. ചില സ്ഥലങ്ങളിൽ ദുരി​താ​ശ്വാ​സ ഏജൻസി​കൾക്ക്‌, അത്യാ​വശ്യ ഭക്ഷ്യവി​ത​ര​ണ​ത്തിന്‌ എത്രമാ​ത്രം ശ്രദ്ധ കൊടു​ക്കേ​ണ്ടി​വ​രു​ന്നു​വോ അത്രയും​തന്നെ ശ്രദ്ധ ബാല സൈനി​കരെ സൈന്യ​ത്തിൽനി​ന്നു പിന്തി​രി​പ്പി​ക്കു​ന്ന​തി​നും നൽകേ​ണ്ടി​വ​രു​ന്നു. അവർ പോകു​ന്നി​ട​ത്തെ​ല്ലാം, അഭയാർഥി​ക​ളു​ടെ​യോ മുറി​വേ​റ്റ​വ​രു​ടെ​യോ മരിച്ച​വ​രു​ടെ​യോ എല്ലാം ഇടയിൽ, കുട്ടി​കളെ പ്രതീ​ക്ഷി​ക്കാൻ കഴിയും.” എല്ലാവ​രും കുട്ടി​കളെ സ്‌നേ​ഹി​ക്കു​ന്നു​വെന്ന്‌ അവകാ​ശ​പ്പെ​ടു​ന്നെ​ങ്കി​ലും, മുമ്പെ​ന്ന​ത്തേ​ക്കാ​ളു​മ​ധി​കം ദുരി​ത​മ​നു​ഭ​വി​ക്കു​ന്നതു കുട്ടി​ക​ളാണ്‌. 18 വയസ്സിൽ താഴെ​യുള്ള 2 കോടി 40 ലക്ഷത്തോ​ളം കുട്ടി​കൾക്കു കഴിഞ്ഞ വർഷം പലായനം ചെയ്യേ​ണ്ടി​വ​ന്നെ​ന്നും ഏതാണ്ട്‌ 20 ലക്ഷം പേർ കഴിഞ്ഞ പത്തു വർഷങ്ങ​ളി​ലാ​യി കൊല്ല​പ്പെ​ട്ടെ​ന്നും ദുരി​താ​ശ്വാ​സ ഏജൻസി​കൾ കണക്കാ​ക്കു​ന്നു. കൂടാതെ 40 ലക്ഷത്തി​നും 50 ലക്ഷത്തി​നും ഇടയ്‌ക്കു കുട്ടി​കൾക്ക്‌ അംഗ​വൈ​ക​ല്യം സംഭവി​ച്ചു. മാനസി​ക​മാ​യി എത്ര​ത്തോ​ളം ബാധി​ച്ചി​രി​ക്കു​ന്നു​വെ​ന്നത്‌ ഊഹി​ക്കാൻ മാത്രമേ കഴിയൂ,” ദി ഇക്കണോ​മിസ്റ്റ്‌ പറയുന്നു.

ബ്രഹ്മചര്യ വിവാദം

“പുരോ​ഹി​ത​ന്മാർ ബ്രഹ്മച​ര്യം പാലി​ക്ക​ണ​മെന്ന റോമൻ കത്തോ​ലി​ക്കാ സഭയുടെ കടും​പി​ടി​ത്തം നിമിത്തം പരിശീ​ലി​ത​രായ നിരവധി ജോലി​ക്കാ​രെ നഷ്ടമാ​കു​ക​യാണ്‌” എന്ന്‌ ഇഎൻഐ ബുള്ളറ്റി​നിൽ പ്രസി​ദ്ധീ​ക​രിച്ച ഒരു റിപ്പോർട്ട്‌ പറയുന്നു. ലോക​മെ​മ്പാ​ടു​മാ​യി 1,00,000 റോമൻ കത്തോ​ലി​ക്കാ പുരോ​ഹി​ത​ന്മാർ ബ്രഹ്മച​ര്യം ഉപേക്ഷി​ക്കു​ക​യും പൗരോ​ഹി​ത്യം വേണ്ടെ​ന്നു​വെ​ക്കു​ക​യും ചെയ്‌തി​രി​ക്കു​ന്നു​വെന്ന്‌ ബ്രസി​ല്യ​യിൽവെച്ചു നടത്തപ്പെട്ട, വിവാ​ഹിത പുരോ​ഹി​ത​ന്മാ​രു​ടെ നാലാ​മത്തെ സാർവ​ദേ​ശീയ സമ്മേള​ന​ത്തിൽ റിപ്പോർട്ടു ചെയ്യ​പ്പെട്ടു. ബ്രസില്യ സർവക​ലാ​ശാ​ല​യിൽ പ്രൊ​ഫ​സ​റും ഒരു മുൻ പുരോ​ഹി​ത​നു​മായ ഷോർഷേ പോൻസ്യാ​നൂ റിബേ​രൂ​വി​ന്റെ അഭി​പ്രാ​യ​മ​നു​സ​രിച്ച്‌ ഓരോ 5 പുരോ​ഹി​ത​ന്മാ​രി​ലും ഒരാൾ വീതം വിവാഹം ചെയ്യു​ന്ന​തി​നാ​യി പൗരോ​ഹി​ത്യം ഉപേക്ഷി​ക്കു​ന്നു. ബ്രസീ​ലിൽതന്നെ 3,500 പുരോ​ഹി​ത​ന്മാർ വിവാ​ഹി​ത​രാ​യി. റിബേരൂ ഇങ്ങനെ പറഞ്ഞു: “ബ്രഹ്മച​ര്യം നിർബ​ന്ധി​ത​മാ​ക്കി​യതു സഭയും പുരോ​ഹി​ത​ന്മാ​രു​ടെ പിന്മു​റ​ക്കാ​രും തമ്മിലുള്ള പ്രശ്‌നങ്ങൾ ഒഴിവാ​ക്കാ​നാണ്‌. അല്ലാതെ, ലൈം​ഗി​ക​ബ​ന്ധ​ങ്ങ​ളിൽ ഏർപ്പെ​ടാ​ത്ത​വർക്കു കൂടുതൽ മെച്ചമാ​യി ദൈവ​വ​ചനം പ്രചരി​പ്പി​ക്കാ​നാ​കും എന്നതു​കൊ​ണ്ടല്ല.”

ആക്രമ​ണ​കാ​രി​ക​ളായ കുട്ടി​യാ​ന​കൾ

“സമൂഹ​ത്തിൽ ഉത്തരവാ​ദി​ത്വ​മുള്ള അംഗങ്ങ​ളാ​യി വളരണ​മെ​ങ്കിൽ, കുട്ടി​ക​ളെ​പ്പോ​ലെ, കുട്ടി​യാ​ന​കൾക്കും ശിക്ഷണം ആവശ്യ​മാണ്‌” എന്ന്‌ ന്യൂ സയൻറിസ്റ്റ്‌ പ്രസ്‌താ​വി​ക്കു​ന്നു. “ദക്ഷിണാ​ഫ്രി​ക്ക​യി​ലെ പിലാൻസ്‌ബർഗ്‌ വന്യജീ​വി സംരക്ഷണ കേന്ദ്ര​ത്തി​ലെ അനാഥ​രായ കുട്ടി​ക്കൊ​മ്പ​ന്മാ​രെ മര്യാദ പഠിപ്പി​ക്കാൻ മുതിർന്ന ആനകൾ ഇല്ലാ​തെ​പോ​യ​താണ്‌ അവ ആക്രമ​ണ​കാ​രി​ക​ളാ​യി​ത്തീർന്ന​തി​നു കാരണ​മെന്ന്‌ വന്യമൃഗ ജീവശാ​സ്‌ത്ര​ജ്ഞ​ന്മാർ പറയുന്നു.” അലഞ്ഞു​തി​രി​ഞ്ഞു നടക്കുന്ന ആനകൾ മനുഷ്യ​രെ ആക്രമി​ക്കു​ക​യും കഴിഞ്ഞ മൂന്നു വർഷങ്ങ​ളി​ലാ​യി 19 വെള്ള കാണ്ടാ​മൃ​ഗ​ങ്ങളെ കുത്തി​ക്കൊ​ല്ലു​ക​യും കാണ്ടാ​മൃ​ഗ​ങ്ങ​ളു​മാ​യി ഇണചേ​രാൻ ശ്രമി​ക്കു​ക​പോ​ലും ചെയ്‌തി​രി​ക്കു​ന്നു. ഒരു കൂട്ടം വിനോ​ദ​സ​ഞ്ചാ​രി​കളെ വിരട്ടി​യോ​ടിച്ച ഉപദ്ര​വ​കാ​രി​യായ ആനയെ വെടി​വെ​ക്കാ​നയച്ച ഒരു പ്രൊ​ഫ​ഷണൽ വേട്ടക്കാ​ര​നുൾപ്പെടെ രണ്ടു പേർ കൊല്ല​പ്പെട്ടു. ഓരോ കേസി​ലും ആക്രമ​ണ​കാ​രി​യായ മൃഗം, ആനകളു​ടെ ജനസംഖ്യ നിയ​ന്ത്രി​ക്കു​ന്ന​തി​നാ​യി കൂട്ടത്തി​ലുള്ള മറ്റ്‌ ആനക​ളെ​യെ​ല്ലാം കൊന്ന​ശേഷം ക്രൂഗർ നാഷണൽ പാർക്കിൽനി​ന്നു റിസർവ്‌ വനത്തി​ലേക്കു കൊണ്ടു​വിട്ട കുട്ടി​യാ​ന​ക​ളു​ടെ കൂട്ടത്തി​ലു​ള്ള​വ​യാ​യി​രു​ന്നു. ആനകൾക്കു സമ്മർദ​മു​ള​വാ​ക്കുന്ന ഒരുപാ​ടു ഘടകങ്ങ​ളു​ണ്ടെ​ന്നു​വ​രി​കി​ലും, ആനക്കു​ടും​ബ​ങ്ങ​ളു​ടെ സാധാരണ ജീവി​ത​ത്തി​ന്റെ ഒരു പ്രമു​ഖ​വി​ശേ​ഷ​ത​യായ, മൂത്തവ​രിൽനി​ന്നുള്ള ശിക്ഷണ​ത്തി​ന്റെ​യും പരിശീ​ല​ന​ത്തി​ന്റെ​യും അഭാവ​മാ​ണു ഭാഗി​ക​മാ​യെ​ങ്കി​ലും അവയുടെ താന്തോ​ന്നി​ത്ത​ര​ത്തി​നു കാരണ​മെ​ന്നാ​ണു ശാസ്‌ത്ര​ജ്ഞ​ന്മാർ കരുതു​ന്നത്‌. കുട്ടി​ക്കൊ​മ്പ​ന്മാർക്ക്‌ “ആവശ്യ​മാ​യി​രി​ക്കുന്ന കണിശ​മായ ശിക്ഷണം അവയുടെ മാതാ​പി​താ​ക്ക​ളിൽനി​ന്നു തുടർന്നു ലഭിക്കു​ന്ന​തി​നാ​യി” ഇനിമു​തൽ ആനകളു​ടെ കുടും​ബത്തെ മുഴു​വ​നാ​യി മാത്രമേ പുനര​ധി​വ​സി​പ്പി​ക്കു​ന്നു​ള്ളൂ എന്നു ലേഖനം പറയുന്നു.

ബഹിരാ​കാ​ശത്തു കൂട്ടി​യി​ടി നടന്നി​ട്ടും യാത്ര​തു​ട​രു​ന്നു—ആദ്യമാ​യി

ബഹിരാ​കാ​ശത്ത്‌, കൂട്ടി​യി​ടി​ച്ചി​ട്ടും യാത്ര തുടർന്ന​താ​യി സ്ഥിരീ​ക​രി​ക്ക​പ്പെട്ട ആദ്യത്തെ സംഭവം ഭൂമിക്കു മുകളിൽ 700 കിലോ​മീ​റ്റർ അകലെ നടന്നതാ​യി ന്യൂ സയൻറിസ്റ്റ്‌ റിപ്പോർട്ടു ചെയ്യുന്നു. ഫ്രഞ്ച്‌ ഉപഗ്ര​ഹ​മായ സെറീ​സി​ന്റെ തുലനാ​വസ്ഥ നിലനിർത്താൻ പുറ​ത്തേക്കു തള്ളി നിൽക്കുന്ന ദണ്ഡു പോലുള്ള ഒരുപ​ക​ര​ണ​ത്തിൽ അതേ ഉയരത്തിൽ മണിക്കൂ​റിൽ 50,000 കിലോ​മീ​റ്റർ വേഗത്തിൽ സഞ്ചരി​ക്കുന്ന പത്തുവർഷം പഴക്കമുള്ള ഒരു ഏരിയൻ റോക്ക​റ്റി​ന്റെ വലിയ ഒരു കഷണം കൂട്ടി​യി​ടി​ച്ച​പ്പോൾ ഉപഗ്രഹം കരണം മറിയു​ക​യും അതിന്റെ തുലനാ​വസ്ഥ നിലനിർത്തുന്ന ഭാഗം തകർന്നു തരിപ്പ​ണ​മാ​കു​ക​യും ചെയ്‌തു. ഭൂമി​യു​ടെ ഭ്രമണ​പ​ഥ​ത്തി​ലെ അവശി​ഷ്ട​ങ്ങ​ളു​ടെ അളവു വർധി​ച്ചു​വ​രു​ന്ന​തി​ന​നു​സ​രിച്ച്‌ അത്തരം കൂട്ടി​യി​ടി​ക​ളു​ണ്ടാ​കാ​നുള്ള സാധ്യ​ത​യും വർധി​ക്കു​ന്നു. ഇപ്പോൾത്തന്നെ അറിയ​പ്പെ​ടുന്ന ബഹിരാ​കാശ പാഴ്‌വ​സ്‌തു​ക്ക​ളു​ടെ 20,000-ത്തിലേറെ കഷണങ്ങൾ ഗോള​ത്തി​നു ചുറ്റും അതി​വേ​ഗ​ത്തിൽ കറങ്ങു​ന്നുണ്ട്‌. കുറെ​ക്കൂ​ടി താഴ്‌ന്ന ഭ്രമണ​പ​ഥ​ങ്ങ​ളി​ലു​ള്ളവ അന്തരീ​ക്ഷ​ത്തി​ന്റെ വികസി​ക്കൽ പോലുള്ള സ്വാഭാ​വിക പ്രക്രി​യകൾ നടക്കു​മ്പോൾ നീക്കം ചെയ്യ​പ്പെ​ടു​മെ​ങ്കി​ലും, ഉയർന്ന ഭ്രമണ​പ​ഥ​ങ്ങ​ളി​ലു​ള്ളവ അവി​ടെ​ത്തന്നെ ആയിര​ക്ക​ണ​ക്കി​നു വർഷങ്ങൾ നിലനി​ന്നേ​ക്കാം. അവ മറ്റ്‌ അവശി​ഷ്ട​ങ്ങ​ളു​ടെ കഷണങ്ങ​ളു​മാ​യി കൂട്ടി​യി​ടി​ക്കു​മ്പോൾ, ഒരു ബഹിരാ​കാശ യാത്രി​കന്റെ വസ്‌ത്ര​ത്തി​ലോ ശൂന്യാ​കാ​ശ​വാ​ഹന കവചത്തി​ലോ തുളഞ്ഞു കയറാൻ സാധ്യ​മാ​കും​വി​ധം നേർത്ത നിരവധി കഷണങ്ങ​ളാ​യി ചിതറു​ന്നു. പെയിൻറി​ന്റെ തരികൾ പോലും അപകട​ങ്ങൾക്കു കാരണ​മാ​യേ​ക്കാം. ഇപ്പോൾ, പ്രവർത്ത​ന​ക്ഷ​മ​മായ ഒരു ഉപഗ്ര​ഹ​ത്തിന്‌ പ്രവർത്ത​ന​ര​ഹി​ത​മായ 4 ഉപഗ്ര​ഹ​മെന്ന കണക്കിൽ അവ ഭ്രമണ​പ​ഥ​ത്തിൽ കറങ്ങുന്നു. അറിയ​പ്പെ​ടുന്ന ബഹിരാ​കാശ അവശി​ഷ്ട​ങ്ങ​ളു​ടെ കാര്യ​ത്തി​ലാ​ണെ​ങ്കിൽ അവയുടെ നാലി​ലൊ​രു​ഭാ​ഗം തകർന്നു​പോയ റോക്ക​റ്റു​ക​ളു​ടെ കഷണങ്ങ​ളാണ്‌.

സ്‌പഞ്ചു​കൾക്ക്‌ അതു നേര​ത്തേ​യു​ണ്ടാ​യി​രു​ന്നു

“മമനു​ഷ്യ​ന്റെ വിദഗ്‌ധ​മായ പല ആശയങ്ങ​ളും പ്രകൃ​തി​യു​ടെ പഴയ സൂത്രങ്ങൾ തന്നെയാ​ണെന്നു തെളി​യു​ന്നു” എന്ന്‌ ദ വാഷി​ങ്‌ടൺ പോസ്റ്റ്‌ പ്രസ്‌താ​വി​ക്കു​ന്നു. “ഉദാഹ​ര​ണ​മാ​യി, ഫൈബർ ഓപ്‌റ്റി​ക്‌സി​ന്റെ കാര്യ​മെ​ടു​ക്കുക. ശാസ്‌ത്ര​ജ്ഞ​ന്മാർ വെളിച്ചം പിടി​ച്ചെ​ടു​ക്കു​ന്ന​തി​നും വഹിച്ചു​കൊ​ണ്ടു​പോ​കു​ന്ന​തി​നു​മാ​യി കണ്ണാടി പോലുള്ള നാരുകൾ 1951-ൽ കണ്ടുപി​ടി​ച്ചു. എന്നാൽ ഇതേ സംഗതി​യാണ്‌ അൻറാർട്ടി​ക്ക​യി​ലെ റോസ്‌ കടലിലെ ആഴക്കടൽ സ്‌പഞ്ചു​കൾ അനിശ്ചി​ത​കാ​ല​മാ​യി ചെയ്‌തു​വ​ന്നത്‌.” വെള്ളത്തിൽ 100 അടിവരെ ആഴത്തിൽ കാണുന്ന ഈ വലിയ സ്‌പഞ്ചു​കൾക്ക്‌, വെളിച്ചം പിടി​ച്ചെ​ടു​ക്കാ​നും അതിന്റെ ശരീര​ത്തി​ന്റെ അന്തർഭാ​ഗത്തു വസിക്കുന്ന പ്രകാ​ശ​സം​ശ്ലേഷക പായലിന്‌, 90 ഡിഗ്രി അക്ഷത്തിൽപോ​ലും അതു സംക്ര​മി​പ്പി​ച്ചു നൽകാ​നും ഉതകുന്ന പുറ​ത്തേക്കു തള്ളിനിൽക്കുന്ന നാരു​പോ​ലുള്ള മുള്ളു​ക​ളുണ്ട്‌. ചരിഞ്ഞു പല അക്ഷത്തിൽ പതിക്കുന്ന വെളി​ച്ചം​പോ​ലും ശേഖരി​ക്ക​പ്പെ​ടു​ന്നെന്നു പരീക്ഷ​ണങ്ങൾ തെളി​യി​ക്കു​ന്നു. സ്‌പഞ്ചി​ന്റെ വശങ്ങളി​ലുള്ള മുള്ളുകൾ പോലും പായലി​നു വെളിച്ചം നൽകാൻ പ്രവർത്തി​ക്കു​ന്നു​വെ​ന്നാണ്‌ ഇതിൽനി​ന്നു മനസ്സി​ലാ​ക്കാ​വു​ന്നത്‌.

ചൂതാ​ട്ട​ക്കാ​രു​ടെ നഷ്ടം

“ഉടമസ്ഥർക്കു യാതൊ​രു വിധത്തി​ലും നഷ്ടമു​ണ്ടാ​കാത്ത രീതി​യി​ലാ​ണു ചൂതാ​ട്ട​കേ​ന്ദ്ര​ങ്ങ​ളു​ടെ നിർമി​തി” എന്നു ബ്രസീ​ലി​ലെ ധനതത്ത്വ​ശാ​സ്‌ത്ര​ജ്ഞ​നായ റികാർഡൂ ഗേസെൽ പറയുന്നു. “ചൂതു​ക​ളി​യിൽനി​ന്നും ഒരു വ്യക്തിക്കു പണം ലഭിക്കാ​നുള്ള ഗണിത​ശാ​സ്‌ത്ര സാധ്യത തുലോം തുച്ഛമാണ്‌.” ചൂതാ​ട്ട​കേ​ന്ദ്രങ്ങൾ വ്യാപ​ക​മാ​യി ഉള്ളതി​നാൽ കൂടുതൽ ചൂതാട്ട ആസക്തരെ അതുള​വാ​ക്കു​മെന്നു മുന്നറി​യി​പ്പു തന്നു​കൊണ്ട്‌ ഗേസൽ ഇങ്ങനെ കൂട്ടി​ച്ചേർക്കു​ന്നു: “വലിയ അധ്വാ​ന​മൊ​ന്നും കൂടാതെ പണമു​ണ്ടാ​ക്കാ​മെന്ന മായിക വാഗ്‌ദാ​നം അതു നൽകുന്നു. അപ്രതീ​ക്ഷി​ത​മാ​യി ഭാഗ്യം തെളി​യാ​നും തങ്ങൾ വളരെ​വേഗം പണക്കാ​രാ​യി​ത്തീ​രാ​നു​മുള്ള സാധ്യ​ത​യെ​പ്പറ്റി ആളുകൾ സ്വപ്‌നം കാണുന്നു.” സഭയോ ഗവൺമെ​ന്റോ ഇതിനെ കുറ്റം വിധി​ക്കാ​ത്ത​തി​നെ അപലപി​ച്ചു​കൊ​ണ്ടുള്ള അദ്ദേഹ​ത്തി​ന്റെ പിൻവ​രുന്ന വാക്കുകൾ വേഴാ ഉദ്ധരി​ക്കു​ന്നു: “രാജ്യത്തെ ഏറ്റവും വലിയ ചൂതാട്ട സ്ഥാപനം ഗവൺമെ​ന്റു​ത​ന്നെ​യാണ്‌. കേന്ദ്ര ഗവൺമെൻറി​ന്റെ വകയാ​യി​ത്തന്നെ ആറു വ്യത്യസ്‌ത ഭാഗ്യ​ക്കു​റി​ക​ളുണ്ട്‌. സംസ്ഥാന ഭാഗ്യ​ക്കു​റി​ക​ളു​ടെ കാര്യം പറയാ​തി​രി​ക്കു​ക​യാ​ണു ഭേദം. ചൂതാട്ടം നിയമാ​നു​സൃ​ത​മാ​ക്കു​ന്ന​തി​നെ സഭയ്‌ക്കു കുറ്റം പറയാ​നാ​വില്ല. കാരണം ഇടവക​ക​ളു​ടെ സമ്പാദ്യം വർധി​പ്പി​ക്കാൻ സഭതന്നെ, വിശ്വാ​സി​കൾ വാതു​വെച്ചു പണം നഷ്ടപ്പെ​ടു​ത്തി​ക്കൊ​ണ്ടി​രി​ക്കുന്ന, സദാ വിൽപ്പ​ന​ന​ട​ക്കുന്ന കൊച്ചു സ്റ്റാൻറു​കൾ ചന്തകളിൽ സ്ഥാപി​ച്ചു​കൊണ്ട്‌ ആ ശീലം വളർത്താൻ സഹായി​ക്കു​ന്നു.” ‘സഹായം സ്വീക​രി​ക്കാത്ത അനിയ​ന്ത്രിത ചൂതാ​ട്ട​ക്കാർ, അവസാനം ജയിലി​ലെ​ത്തു​ക​യോ ആത്മഹത്യ ചെയ്യു​ക​യോ ഭ്രാന്തു​പി​ടി​ക്കു​ക​യോ ചെയ്യു​ന്ന​തി​നുള്ള അപകട ഭീഷണി​യി​ലാ​ണെ​ന്നാ​ണു വിദഗ്‌ധ​രു​ടെ അഭി​പ്രാ​യം’ എന്നും ഗേസൽ പറയുന്നു.

സർപ്പ-വാഹി​ക​ളായ കൊള്ള​ക്കാർ

മനാഗ്വാ​യ്‌ക്ക്‌ 50 കിലോ​മീ​റ്റർ തെക്കുള്ള ഒരു നിക്കരാ​ഗ്വൻ പട്ടണമായ ഡറിയാം​ബാ​യി​ലെ നിവാ​സി​കളെ, കള്ളന്മാർ വിഷപ്പാ​മ്പു​കളെ ഉപയോ​ഗിച്ച്‌ ഉപദ്ര​വി​ച്ചു​വ​രി​ക​യാ​യി​രു​ന്നു. എൽ ന്വെവോ ഡ്യാർയോ എന്ന വർത്തമാ​ന​പ​ത്രം റിപ്പോർട്ടു​ചെ​യ്‌ത​പ്ര​കാ​രം, സംഘം അടുത്തുള്ള വയലു​ക​ളിൽനി​ന്നു റാറ്റിൽ സർപ്പങ്ങളെ പിടിച്ച്‌ അവയുടെ വിഷ​മെ​ടു​ത്തു കളഞ്ഞ​ശേഷം, പട്ടണത്തി​നു പുറത്തുള്ള റോഡു​ക​ളി​ലൂ​ടെ യാത്ര​ചെ​യ്യുന്ന ആളുകളെ പാമ്പി​നെ​ക്കൊ​ണ്ടു കടിപ്പി​ക്കു​മെന്നു ഭീഷണി​പ്പെ​ടു​ത്തി കൊള്ള​യ​ടി​ക്കു​ന്നു. പാമ്പിന്റെ വിഷപ്പ​ല്ലു​കണ്ടു മോഹാ​ല​സ്യ​പ്പെട്ട ഒരു പെൺകു​ട്ടി ബോധം തെളി​ഞ്ഞ​പ്പോൾ തന്റെ സ്വർണ​മാല മോഷണം പോയ​താ​യി മനസ്സി​ലാ​ക്കി. സംഘം കൃഷി​ക്കാ​രിൽനി​ന്നും ഭക്ഷണസാ​ധ​ന​ങ്ങ​ളും പണവും തട്ടി​യെ​ടു​ത്തു.