ന്യൂസി​ലൻഡി​ലെ കൊച്ചു പ്രകാ​ശ​വാ​ഹ​കർ

ന്യൂസി​ലൻഡി​ലെ ഉണരുക! ലേഖകൻ

സമയം രാത്രി, ചന്ദ്രനോ മേഘങ്ങ​ളോ ഇല്ല, കുറ്റാ​ക്കു​റ്റി​രുട്ട്‌. ക്യാമ്പി​ലെ ലൈറ്റു​കൾ അണഞ്ഞ​പ്പോൾ ഞങ്ങൾ തിളങ്ങുന്ന നക്ഷത്ര​ങ്ങ​ളു​ടെ ഒരു പ്രപഞ്ച​ത്തിൽ നിൽക്കു​ന്ന​തു​പോ​ലെ തോന്നി. ഒരു ഇടുങ്ങിയ മലയി​ടു​ക്കി​ന്റെ അടിവാ​ര​ത്തുള്ള ഉഷ്‌ണ​ജലം നിറഞ്ഞ ഒരു കുളത്തി​ലേ​ക്കു​പോ​കുന്ന കുത്ത​നെ​യുള്ള ഒരു ഇറക്കത്തി​ലൂ​ടെ ഞങ്ങൾ മുന്നോ​ട്ടു നീങ്ങി. ആവി പൊങ്ങുന്ന വെള്ളത്തി​ന്റെ ഇരുക​ര​ക​ളി​ലും ചെടികൾ വളരു​ന്നു​ണ്ടാ​യി​രു​ന്നു. ദിവസം മുഴുവൻ നീണ്ടു​നിന്ന യാത്ര​യ്‌ക്കു​ശേഷം ഞങ്ങൾ വെള്ളത്തി​ലി​റങ്ങി ഒന്നു മുങ്ങി​പ്പൊ​ങ്ങി ആശ്വസി​ച്ചു. നിലത്തു​നിന്ന്‌ ഉറവെ​ടു​ക്കുന്ന പ്രകൃ​തി​ജ​ന്യ​മായ ഉഷ്‌ണ​ജലം നിറഞ്ഞ ഈ കുളം, ഒരു മോ​ട്ടോർ ക്യാമ്പി​ലെ ഞങ്ങളുടെ രാത്രി കഴിച്ചു​കൂ​ട്ടാ​നുള്ള അതേ സ്ഥലത്താ​യി​രു​ന്നു.

ആകാശ​ത്തി​നു കുറുകെ ഒരു നക്ഷത്രം അതി​വേഗം സഞ്ചരി​ക്കു​ന്നതു കണ്ട്‌, ഭാര്യ​യോട്‌ അതേപ്പറ്റി പറയാൻ തിരിഞ്ഞ ഞാൻ പെട്ടെന്നു കാലി​ടറി വെള്ളം തെറി​പ്പി​ച്ചു വലിയ ഒച്ചയു​ണ്ടാ​ക്കി. എന്നെ അമ്പരപ്പി​ച്ചു​കൊ​ണ്ടു നിരവധി നക്ഷത്രങ്ങൾ പെട്ടെന്ന്‌ അണഞ്ഞു—അന്തർധാ​നം ചെയ്‌തു! അത്ഭുത​ത്തോ​ടെ ഞാൻ സംസാ​രി​ച്ച​പ്പോൾ ഒരു കൂട്ടം മുഴുവൻ അപ്രത്യ​ക്ഷ​മാ​യി. പ്രപഞ്ച​ത്തിൽ ഒരു തുളയു​ണ്ടാ​കു​വാൻ ഞാൻ കാരണ​മാ​യ​തു​പോ​ലെ തോന്നി!

സംഭവി​ച്ച​തെ​ന്താ​ണെന്നു നിഗമനം ചെയ്യാൻ ഞാൻ ശ്രമി​ക്കവെ, നക്ഷത്രങ്ങൾ ഒന്നൊ​ന്നാ​യി വീണ്ടും പ്രത്യ​ക്ഷ​പ്പെട്ടു. എന്നുത​ന്നെയല്ല, ഒരു നക്ഷത്ര​ക്കൂ​ട്ടം മറ്റു നക്ഷത്ര​ങ്ങ​ളു​ടെ പ്രധാന കൂട്ടത്തിൽനി​ന്നും അകന്ന്‌ എന്നോടു കുറെ​ക്കൂ​ടി അടുത്തു നിൽക്കു​ന്ന​താ​യും ഞാൻ കണ്ടു. വാസ്‌ത​വ​ത്തിൽ, കൈനീ​ട്ടി​യാൽ തൊടാ​വു​ന്നത്ര അടുത്താ​യി​രു​ന്നു ചിലത്‌. ഞങ്ങൾ ആദ്യമാ​യി ന്യൂസി​ലൻഡി​ലെ മിനു​ങ്ങും​പു​ഴു​ക്കളെ കണ്ടുമു​ട്ടി​യി​രി​ക്കു​ന്നു. അവ ഇരുട്ടിൽ അദൃശ്യ​മായ പച്ചത്തഴ​പ്പിൽനി​ന്നു താഴേക്കു തൂങ്ങി​ക്കി​ട​ക്കു​ക​യാ​യി​രു​ന്നു. അവയുടെ നനുത്ത പ്രകാശം നക്ഷത്ര​നി​ബി​ഡ​മായ ആകാശ പശ്ചാത്ത​ല​വു​മാ​യി ഇടകലർന്നി​രു​ന്നു.

ന്യൂസി​ലൻഡി​ലെ മിനു​ങ്ങും​പു​ഴു ഒരു പുഴുവല്ല, പകരം ഒരു പ്രാണി​യാണ്‌. ലോക​ത്തി​ന്റെ ഇതര ഭാഗങ്ങ​ളി​ലുള്ള മിനു​ങ്ങും​പു​ഴു​ക്ക​ളിൽനി​ന്നും മിന്നാ​മി​നു​ങ്ങു​ക​ളിൽനി​ന്നും അതു വ്യത്യ​സ്‌ത​മാണ്‌. അരക്‌നോ​കാ​മ്പാ ലൂമി​നോ​സാ എന്ന അതിന്റെ പേര്‌, അതൊ​രു​തരം പ്രകാ​ശി​ക്കുന്ന എട്ടുകാ​ലി​യാ​ണെന്ന ധാരണ നിങ്ങളി​ലു​ള​വാ​ക്കി​യേ​ക്കാം. പക്ഷേ അതും സത്യമല്ല.

ഞങ്ങളുടെ ആകസ്‌മി​ക​മായ ആദ്യത്തെ കൂടി​ക്കാ​ഴ്‌ച​യ്‌ക്കു ശേഷം, അധികം താമസി​യാ​തെ ന്യൂസി​ലൻഡി​ന്റെ വടക്കൻ ദ്വീപി​ലുള്ള വൈ​റ്റോ​മോ ഗുഹക​ളിൽ വെച്ച്‌, ഞങ്ങൾ മിനു​ങ്ങും​പു​ഴു​ക്കളെ വീണ്ടും കണ്ടുമു​ട്ടി. ആ മിനു​ങ്ങും​പു​ഴു​ഗു​ഹ​യി​ലേ​ക്കുള്ള ഞങ്ങളുടെ യാത്ര​യെ​ക്കു​റി​ച്ചു ഞാൻ വിശദീ​ക​രി​ക്കട്ടെ. ഈ കൊച്ചു ജീവി​കളെ കാണു​ന്ന​തി​നു​വേണ്ടി ഒരു ബോട്ടി​ലാണ്‌ ഞങ്ങളെ കൊണ്ടു​പോ​യത്‌.

വൈ​റ്റോ​മോ ഗുഹ

ആയിര​ക്ക​ണ​ക്കി​നു വർഷങ്ങൾകൊ​ണ്ടു രൂപം​കൊണ്ട, മുകളിൽനി​ന്നു തൂങ്ങി​ക്കി​ട​ക്കു​ന്ന​വ​യും നിലത്തു​നിന്ന്‌ ഉയർന്നു നിൽക്കു​ന്ന​വ​യു​മായ ചുണ്ണാമ്പു രൂപങ്ങ​ളു​ടെ ശിൽപ്പ​ചാ​തു​ര്യം എടുത്തു കാട്ടു​ന്ന​തി​നാ​യി മനോ​ഹ​ര​മാ​യി ദീപാ​ല​ങ്കാ​രം നടത്തിയ മിനു​ങ്ങും​പു​ഴു​ഗുഹ ഒരു അത്ഭുതം തന്നെയാണ്‌. ഞങ്ങൾ ഓരോ സ്ഥലത്തെ​യും സമീപി​ക്കു​ന്ന​തി​ന​നു​സ​രിച്ച്‌ ഞങ്ങളുടെ വഴികാ​ട്ടി ദീപങ്ങൾ തെളിച്ചു. ഭൂമി​ക്ക​ടി​യി​ലെ ആ അപ്രതീ​ക്ഷി​ത​വും വിചി​ത്ര​വു​മായ അത്ഭുത ലോക​ത്തിൽ ഉരുവാ​യി​രി​ക്കുന്ന രൂപങ്ങ​ളും തുരങ്ക​ങ്ങ​ളും കണ്ടു ഞങ്ങൾ അത്ഭുത​പ​ര​ത​ന്ത്ര​രാ​യി. ഇരുളി​ലേക്കു മറയുന്ന പടികൾ താണ്ടി മുകളിൽ ഒത്തു​ചേർന്ന​പ്പോൾ ഞങ്ങളുടെ പാദപ​ത​ന​ശ​ബ്ദങ്ങൾ ഭീകര​മാ​യി പ്രതി​ധ്വ​നി​ച്ചു. കണ്ണുകൾ ഇരുട്ടു​മാ​യി പരിചി​ത​മാ​യ​പ്പോൾ, ഞങ്ങൾ അങ്ങു മുകളിൽ ചെറിയ പച്ച പ്രകാ​ശങ്ങൾ മിന്നു​ന്നതു കണ്ടു. മിനു​ങ്ങും​പു​ഴു​ക്കൾ!

ഞങ്ങൾ ഒരു ബോട്ടു​ജെ​ട്ടി​യി​ലെത്തി ഒരു ബോട്ടിൽ കയറി. ജെട്ടി​യിൽനി​ന്നും അകന്ന്‌ ഞങ്ങൾ ഇരുട്ടി​ലേക്കു തുഴഞ്ഞു. ഒരു വളവു​തി​രി​ഞ്ഞ​പ്പോൾ, ആകാശ ഗംഗയു​ടെ ഒരു ചെറിയ പതി​പ്പെന്നു മാത്രം എനിക്കു വർണി​ക്കാ​നാ​കു​ന്നത്‌, ഞങ്ങളുടെ തലയ്‌ക്കു തൊട്ടു മുകളി​ലാ​യി പ്രത്യ​ക്ഷ​പ്പെട്ടു—ഗുഹയു​ടെ മേൽക്കൂര മൊത്തം മിനു​ങ്ങും​പു​ഴു​ക്ക​ളാൽ മൂട​പ്പെ​ട്ടി​രു​ന്നു. എഴുത്തു​കാ​ര​നായ ജോർജ്‌ ബെർണാഡ്‌ ഷാ ഈ സ്ഥലത്തെ “എട്ടാമത്തെ ലോകാ​ത്ഭു​തം” എന്നു വിളിച്ചു.

ചേതോ​ഹ​ര​മായ മിനു​ങ്ങും​പു​ഴു

വിനോ​ദ​യാ​ത്ര അവസാ​നി​ച്ച​പ്പോൾ, മിനു​ങ്ങും​പു​ഴു​വി​നെ​പ്ര​തി​യുള്ള ഞങ്ങളുടെ വിസ്‌മയം അതി​നെ​പ്പറ്റി കൂടുതൽ പഠിക്കാൻ ഞങ്ങളെ പ്രേരി​പ്പി​ച്ചു. ഞങ്ങൾ പഠിച്ചതു ഞങ്ങൾ കണ്ടതു​പോ​ലെ​തന്നെ ചേതോ​ഹ​ര​മാ​യി​രു​ന്നു. വാലറ്റത്തു പ്രകാ​ശ​മുള്ള ഒരു കുഞ്ഞു ലാർവ​യാ​യി ജീവി​ത​മാ​രം​ഭി​ക്കുന്ന ന്യൂസി​ലൻഡി​ലെ മിനു​ങ്ങും​പു​ഴു അതിന്റെ വായിലെ വ്യത്യസ്‌ത ഗ്രന്ഥി​ക​ളിൽനി​ന്നു ശ്രവി​ക്കുന്ന ശ്ലേഷ്‌മ​വും സിൽക്കും ഉപയോ​ഗിച്ച്‌ ഒരു ആവരണ​മു​ണ്ടാ​ക്കി അത്‌ ഗുഹയു​ടെ മച്ചി​നോ​ടു ചേർത്തു ബന്ധിക്കു​ന്നു. ഈ ആവരണം വാസ്‌ത​വ​ത്തിൽ ലാർവ​യ്‌ക്ക്‌ അങ്ങോ​ട്ടു​മി​ങ്ങോ​ട്ടും നീങ്ങാൻ കഴിയുന്ന ഒരു തുരങ്ക​മാണ്‌.

ജീവി​ക്കാ​നാ​വ​ശ്യ​മായ ഭക്ഷണത്തി​നാ​യി മിനു​ങ്ങും​പു​ഴു​ക്കൾ ആറുമു​തൽ ഒമ്പതു​വ​രെ​യുള്ള മാസങ്ങ​ളിൽ ഇരപി​ടി​ക്കു​ന്നു. അവയുടെ ഇരകൾ ജലോ​പ​രി​ത​ല​ത്തി​ലൂ​ടെ​യാണ്‌ ഒഴുകി വരുന്ന​തെ​ങ്കി​ലും, ഇരപി​ടി​ത്തം നടക്കു​ന്നതു വായു​വി​ലാണ്‌. വെളി​ച്ച​ത്തി​ലേക്ക്‌ ആകർഷി​ക്ക​പ്പെ​ടുന്ന മിഡ്‌ജു​കൾ, കൊതു​കു​കൾ, കൽത്തു​മ്പി​കൾ, മെയ്‌ തുമ്പികൾ തുടങ്ങി​യ​വയെ എത്തിച്ചു​കൊ​ടു​ക്കു​ന്ന​തിൽ ഒഴുക്കു​വെള്ളം ഒരു നിർണാ​യ​ക​മായ പങ്കുവ​ഹി​ക്കു​ന്നു. അവയെ പിടി​ക്കു​ന്ന​തി​നാ​യി മിനു​ങ്ങും​പു​ഴു അതിന്റെ ആവരണ​ത്തിൽനിന്ന്‌ ഒരു നിര സിൽക്കു ചൂണ്ടച്ച​ര​ടു​കൾ (ചില​പ്പോൾ 70 വരെ) താഴേക്കു തൂക്കി​യി​ടു​ന്നു. ഓരോ ചൂണ്ടച്ച​ര​ടി​ലും തുല്യ അകലത്തിൽ, അതിന്റെ ഒട്ടിപ്പി​ടി​ക്കുന്ന ശ്ലേഷ്‌മ​ത്തി​ന്റെ ഓരോ തുള്ളി​വീ​തം സ്ഥാപി​ച്ചി​രി​ക്കു​ന്നു. കണ്ടാൽ ചെറിയ മുത്തു മാലകൾ താഴേക്കു തൂങ്ങി​ക്കി​ട​ക്കു​ന്ന​തു​പോ​ലെ തോന്നും.

ഈ ഇരപി​ടി​ക്കുന്ന ചൂണ്ടച്ച​ര​ടു​കളെ പ്രകാ​ശ​മു​ള്ള​താ​ക്കുന്ന മിനു​ങ്ങും​പു​ഴു​വി​ന്റെ വെളി​ച്ച​മാണ്‌ അതിന്റെ ഏറ്റവും വശ്യമായ ഭാഗം. പ്രകാ​ശ​ത്തിന്‌ നാഡീ​വ്യൂ​ഹ​ത്തോ​ടു ബന്ധമി​ല്ലാത്ത തരം പ്രാണി​ക​ളിൽപ്പെ​ടുന്ന ഒന്നാണ്‌ ന്യൂസി​ലൻഡി​ലെ മിനു​ങ്ങും​പു​ഴു. എങ്കിലും, ആഗ്രഹി​ക്കു​മ്പോ​ഴെ​ല്ലാം പ്രകാശം അണയ്‌ക്കാൻ അതിനു സാധി​ക്കു​ന്നു. പ്രകാശം പുറ​പ്പെ​ടു​വി​ക്കുന്ന അവയവം അതിന്റെ വിസർജ​നാ​വ​യ​വ​ങ്ങ​ളു​ടെ അറ്റത്തായി സ്ഥാപി​ച്ചി​രി​ക്കു​ന്നു. പ്രകാശം താഴേക്ക്‌ അയയ്‌ക്കു​ന്ന​തി​നാ​യി അതിന്റെ ശ്വസനാ​വയവ വ്യവസ്ഥ ഒരു പ്രതി​ഫ​ല​നി​യാ​യും ഉതകുന്നു. പ്രകാശം ഉത്‌പാ​ദി​പ്പി​ക്കാൻ ആവശ്യ​മായ ഓക്‌സി​ജ​നോ രാസവ​സ്‌തു​ക്ക​ളോ നിയ​ന്ത്രി​ക്കു​ന്ന​തി​ലൂ​ടെ​യാണ്‌ അതു പ്രകാശം അണയ്‌ക്കു​ന്നത്‌.

എന്നിരു​ന്നാ​ലും, മിനു​ങ്ങും​പു​ഴു​വി​ന്റെ തുരങ്ക​ത്തി​ന്റെ അറ്റത്തു പ്രകാ​ശി​ക്കുന്ന വെളിച്ചം, പ്രാണി പ്രതീ​ക്ഷി​ക്കു​ന്ന​തു​പോ​ലെ പ്രത്യാ​ശാ​നിർഭ​ര​മായ ഒരു അടയാ​ളമല്ല. അത്‌ ആ മരണക​ര​മായ കർട്ടന്റെ അടു​ത്തേക്കു പറന്നു​ചെ​ല്ലു​ക​യും അവി​ടെ​വെച്ച്‌, ഒരു രാസവ​സ്‌തു അതിനെ ക്രമേണ മരവി​പ്പി​ക്കു​ക​യും ചെയ്യു​ന്നു​ണ്ടാ​യി​രി​ക്കണം എന്നു ചിലർ അഭി​പ്രാ​യ​പ്പെ​ടു​ന്നു. ഇരയുടെ പിടച്ചിൽ നിമി​ത്ത​മു​ണ്ടാ​കുന്ന കമ്പനങ്ങൾ തിരി​ച്ച​റി​യുന്ന ലാർവ, അതിന്റെ ആവരണ​ത്തിൽ തൂങ്ങി​ക്കി​ട​ന്നു​കൊണ്ട്‌, ശരീരം ചുരു​ക്കു​ക​യും നിവിർത്തു​ക​യും ചെയ്‌ത്‌, ചൂണ്ടച്ച​രട്‌ അതിന്റെ വായി​ലേക്കു വലിക്കു​ന്നു.

ആറുമു​തൽ ഒമ്പതു​വ​രെ​യുള്ള മാസങ്ങ​ളിൽ ഇരപി​ടി​ച്ചും തിന്നും കഴിഞ്ഞ​തി​നു​ശേഷം, ലാർവ പ്യൂപ്പ​രൂ​പ​ത്തി​ലാ​കു​ക​യും അതിനു​ശേഷം വളർച്ച​യെ​ത്തിയ പ്രാണി​യെന്ന നിലയ്‌ക്കുള്ള ജീവിതം ആസ്വദി​ക്കു​ക​യും ചെയ്യുന്നു. വളർച്ച​യെ​ത്തിയ പ്രാണി​യാ​ണോ വാസ്‌ത​വ​ത്തിൽ ജീവിതം അധികം ആസ്വദി​ക്കു​ന്നത്‌ എന്ന കാര്യ​ത്തിൽ സംശയ​മുണ്ട്‌. വളർച്ച​യെ​ത്തിയ പ്രാണി​ക്കു വായി​ല്ലാ​ത്ത​തി​നാൽ അതിന്‌ ആഹാരം കഴിക്കാൻ പറ്റില്ല എന്നതി​നാൽ അത്തരം ജീവിതം വെറും രണ്ടോ മൂന്നോ ദിവസം മാത്രമേ നീണ്ടു​നിൽക്കു​ക​യു​ള്ളൂ. അതിന്റെ ശേഷിച്ച ജീവിതം പുനരു​ത്‌പാ​ദ​ന​ത്തി​നാ​യി സമർപ്പി​ക്ക​പ്പെ​ട്ടി​രി​ക്കു​ന്നു. വളർച്ച​യെ​ത്തിയ ആൺകീ​ടങ്ങൾ, പെൺകീ​ടങ്ങൾ പട്ടുപു​ഴു​ക്കൂ​ടു​ക​ളിൽനി​ന്നു പുറത്തു​വ​രുന്ന സമയത്തു​തന്നെ ബീജസ​ങ്ക​ലനം നടത്തുന്നു. പെൺകീ​ടം മുട്ടകൾ ഒന്നൊ​ന്നാ​യി ഇടുന്ന​തിന്‌ ഒരു ദിവസം മുഴുവൻ എടു​ത്തേ​ക്കാം. അതിനു​ശേഷം അതു ചത്തു​പോ​കു​ന്നു. മനുഷ്യർക്ക്‌ അളവറ്റ സന്തോഷം നൽകുന്ന ഒരു മിന്നുന്ന നക്ഷത്ര​വ്യൂ​ഹ​ത്തിന്‌ അതി​ന്റേ​തായ സംഭാവന നൽകി​യ​ശേഷം, 10 മുതൽ 11 വരെ മാസം ദൈർഘ്യ​മുള്ള ന്യൂസി​ലൻഡി​ലെ കൊച്ചു പ്രകാ​ശ​വാ​ഹ​ക​രു​ടെ ജീവച​ക്രം അവസാ​നി​ക്കു​ന്നു.

[16-ാം പേജിലെ ചിത്രം]

എതിർ പേജിൽ: മിനു​ങ്ങും​പു​ഴു​ഗു​ഹ​യി​ലേക്കു പ്രവേ​ശി​ക്കു​ന്നു

[17-ാം പേജിലെ ചിത്രം]

മുകളിൽ: മിനു​ങ്ങും​പു​ഴു​ക്ക​ളു​ടെ ദീപ്‌തി​യാൽ തിളങ്ങുന്ന ഗുഹയു​ടെ മച്ച്‌

[17-ാം പേജിലെ ചിത്രം]

വലത്ത്‌: മിനു​ങ്ങും​പു​ഴു​വി​ന്റെ ചൂണ്ടച്ച​ര​ടു​കൾ

[16-ാം പേജിലെ ചിത്ര​ത്തിന്‌ കടപ്പാട്‌]

Pictures on pages 16-17: Waitomo Caves Museum Society Inc.