തകരുന്ന ജീവിതം, പൊലി​യുന്ന ജീവൻ

“വലിയ കൂടങ്ങൾ (കൂറ്റൻ ചുറ്റി​കകൾ) പോ​ലെ​യാണ്‌ മയക്കു​മ​രു​ന്നു​കൾ,” ഡോ. എറിക്‌ നെസ്‌ലർ അഭി​പ്രാ​യ​പ്പെ​ടു​ന്നു. അതേ, ഈ രാസ കൂടങ്ങ​ളു​ടെ ഒരൊറ്റ ഡോസു പോലും മാരക​മാ​യി​രു​ന്നേ​ക്കാം. “ഉദാഹ​ര​ണ​ത്തിന്‌, ക്രാക്ക്‌ കൊ​ക്കെയ്‌ൻ ഉപയോ​ഗിച്ച ആദ്യ തവണ തന്നെ ആളുകൾ മരണമ​ട​ഞ്ഞി​ട്ടുണ്ട്‌” എന്ന്‌ മയക്കു​മ​രു​ന്നു​കൾ അമേരി​ക്ക​യിൽ എന്ന പുസ്‌തകം പറയുന്നു.

കൃത്രിമ മയക്കു​മ​രു​ന്നു​ക​ളു​ടെ പുതിയ തരംഗം അത്രയും തന്നെ ഭീഷണി​യു​യർത്തു​ന്നു. “‘റേവ്‌’ പാർട്ടി​യിൽ സംബന്ധി​ക്കുന്ന എട്ടും പൊട്ടും തിരി​യാത്ത ചെറു​പ്പ​ക്കാർക്ക്‌, അവിടെ വാങ്ങാൻ കിട്ടുന്ന ഏതു രാസമി​ശ്രി​ത​മാണ്‌ തങ്ങളുടെ മസ്‌തി​ഷ്‌കത്തെ തകർക്കാൻ പോന്നത്‌ എന്നറി​യാൻ യാതൊ​രു വഴിയു​മില്ല” എന്ന്‌ ഐക്യ​രാ​ഷ്‌ട്ര സംഘട​ന​യു​ടെ വേൾഡ്‌ ഡ്രഗ്‌ റിപ്പോർട്ട്‌ മുന്നറി​യി​പ്പു നൽകുന്നു. എന്നിരു​ന്നാ​ലും, മിക്ക യുവജ​ന​ങ്ങ​ളി​ലും മയക്കു​മ​രു​ന്നു​ക​ളോ​ടുള്ള ആസക്തി വളർന്നു​വ​രു​ന്നത്‌ ക്രമാ​നു​ഗ​ത​മാ​യി​ട്ടാണ്‌. പിൻവ​രുന്ന ഉദാഹ​ര​ണങ്ങൾ അതാണു തെളി​യി​ക്കു​ന്നത്‌.

“യാഥാർഥ്യ​ത്തിൽ നിന്നുള്ള ഒളി​ച്ചോ​ട്ടം”

കുടും​ബ​ത്തി​ലെ ഒമ്പതു മക്കളിൽ ഒരാളാ​യി​രു​ന്നു പേത്രൂ.a സ്‌പെ​യി​നി​ലെ കോർഡോബ നഗരത്തിൽ വഴക്കും ബഹളവും നിറഞ്ഞ ഒരു ചുറ്റു​പാ​ടി​ലാ​യി​രു​ന്നു അവൻ ജനിച്ചത്‌. മദ്യപാ​നി​യാ​യി​രുന്ന പിതാവ്‌ അവന്റെ ബാല്യം ദുരി​ത​പൂർണ​മാ​ക്കി​ത്തീർത്തു. പേത്രൂ​വിന്‌ 14 വയസ്സു​ള്ള​പ്പോ​ഴാ​യി​രു​ന്നു ഒരു കസിൻ അവനു ഹഷീഷി​ന്റെ ലോകം പരിച​യ​പ്പെ​ടു​ത്തി കൊടു​ത്തത്‌. ഒരു മാസത്തി​നു​ള്ളിൽ അവൻ അതിന്‌ അടിമ​യാ​യി​ത്തീർന്നു.

“മയക്കു​മ​രു​ന്നു​കൾ കഴിക്കു​ന്നത്‌ എനിക്ക്‌ ഒരു നേര​മ്പോ​ക്കാ​യി​രു​ന്നു,” പേത്രൂ പറയുന്നു. “യാഥാർഥ്യ​ത്തിൽ നിന്ന്‌ ഒളി​ച്ചോ​ടാ​നുള്ള മാർഗ​മാ​യി​രു​ന്നു അതെന്നു മാത്രമല്ല, സംഘത്തിൽ അംഗമാ​യി​രി​ക്കു​ന്ന​തിന്‌ അത്‌ ആവശ്യ​വു​മാ​യി​രു​ന്നു. 15 വയസ്സാ​യ​പ്പോ​ഴേ​ക്കും, ഞാൻ ഹഷീഷി​ന്റെ ഒപ്പം എൽഎസ്‌ഡി-യും ആംഫി​റ്റാ​മി​നു​ക​ളും കഴിക്കാൻ തുടങ്ങി. എനിക്ക്‌ ഏറ്റവും പ്രിയം എൽഎസ്‌ഡി ആയിരു​ന്നു. അതു വാങ്ങാ​നുള്ള പണത്തിനു വേണ്ടി ഞാൻ ചെറിയ തോതിൽ മയക്കു​മ​രു​ന്നു വ്യാപാ​രം തുടങ്ങി. കൂടു​ത​ലും ഹഷീഷി​ന്റെ ഇടപാ​ടു​ക​ളാ​യി​രു​ന്നു എനിക്ക്‌ ഉണ്ടായി​രു​ന്നത്‌. ഒരു ദിവസം, എൽഎസ്‌ഡി കണക്കി​ല​ധി​കം കഴിച്ചതു നിമിത്തം, രാത്രി മുഴുവൻ എനിക്കു​റ​ങ്ങാ​നേ കഴിഞ്ഞില്ല. എനിക്കു ഭ്രാന്തു​പി​ടി​ച്ചെന്നു തന്നെ ഞാൻ കരുതി. ആ അനുഭവം എന്നെ വല്ലാതെ ഭയപ്പെ​ടു​ത്തി. മയക്കു​മ​രു​ന്നു​കൾ ഉപേക്ഷി​ക്കാത്ത പക്ഷം ഒന്നുകിൽ അഴി​യെ​ണ്ണേണ്ടി വരും അല്ലെങ്കിൽ മരിച്ചു​പോ​കും എന്ന്‌ എനിക്കു മനസ്സി​ലാ​യി. പക്ഷേ, മയക്കു​മ​രു​ന്നു​ക​ളോട്‌ ഉണ്ടായി​രുന്ന ഭ്രാന്ത​മായ ആവേശ​ത്തെ​ക്കാൾ വലുതാ​യി​രു​ന്നില്ല ഈ ഭയം. ഞാൻ കടുത്ത എൽഎസ്‌ഡി ആസക്തനാ​യി​ത്തീർന്നു. ലഹരി പിടി​ക്ക​ണ​മെ​ങ്കിൽ കഴിക്കുന്ന മയക്കു​മ​രു​ന്നു​ക​ളു​ടെ അളവു കൂട്ടി​ക്കൊ​ണ്ടേ​യി​രി​ക്കണം എന്ന സ്ഥിതി​യിൽ ഞാനെത്തി. അനുഭ​വി​ക്കേണ്ടി വന്ന പരിണ​ത​ഫ​ലങ്ങൾ ഭയാന​ക​മാ​യി​രു​ന്നെ​ങ്കി​ലും മയക്കു​മ​രു​ന്നു​കൾ ഉപേക്ഷി​ക്കാൻ എനിക്കു കഴിയു​ന്നി​ല്ലാ​യി​രു​ന്നു. ഈ കുരു​ക്കിൽ നിന്ന്‌ എങ്ങനെ രക്ഷപ്പെ​ട​ണ​മെന്ന്‌ എനിക്ക്‌ അറിഞ്ഞു​കൂ​ടാ​യി​രു​ന്നു.

“എൽഎസ്‌ഡി-ക്കു നല്ല വിലയു​ണ്ടാ​യി​രു​ന്നു. അതു​കൊണ്ട്‌, ആഭരണ​ക്ക​ടകൾ കവർച്ച ചെയ്യാ​നും വിനോ​ദ​സ​ഞ്ചാ​രി​ക​ളു​ടെ ഹാൻഡ്‌ബാ​ഗു​ക​ളും വഴി​പോ​ക്ക​രു​ടെ വാച്ചു​ക​ളും പേഴ്‌സു​ക​ളു​മൊ​ക്കെ തട്ടി​യെ​ടു​ക്കാ​നും ഞാൻ പഠിച്ചു. 17 വയസ്സാ​യ​പ്പോ​ഴേ​ക്കും, ഒരു മയക്കു​മ​രുന്ന്‌ ഇടപാ​ടു​കാ​രൻ എന്ന നിലയിൽ എന്റെ പ്രദേ​ശത്ത്‌ ഞാൻ പേരെ​ടു​ത്തു കഴിഞ്ഞി​രു​ന്നു. ചില​പ്പോ​ഴൊ​ക്കെ ആയുധങ്ങൾ ഉപയോ​ഗി​ച്ചുള്ള കൊള്ള​ക​ളി​ലും ഞാൻ പങ്കെടു​ക്കു​മാ​യി​രു​ന്നു. അക്രമാ​സ​ക്ത​നായ കുറ്റവാ​ളി ആയി ചുറ്റു​പാ​ടെ​ങ്ങും അറിയ​പ്പെ​ട്ടി​രു​ന്ന​തി​നാൽ എനിക്ക്‌ ഒരു ഇരട്ട​പ്പേ​രും കിട്ടി, എൽ ടോർസീ​ഡോ. അതിന്റെ അർഥം ‘തല തിരി​ഞ്ഞവൻ’ എന്നാണ്‌.

“മയക്കു​മ​രു​ന്നു​കൾ മദ്യ​ത്തോ​ടൊ​പ്പം കഴിക്കു​ക​യാ​ണെ​ങ്കിൽ അതു നിങ്ങളു​ടെ വ്യക്തി​ത്വ​ത്തെ​ത്തന്നെ മാറ്റി​മ​റി​ക്കും, മിക്ക​പ്പോ​ഴും അതു നിങ്ങളെ അക്രമാ​സ​ക്ത​നാ​ക്കി തീർക്കു​ന്നു. മയക്കു​മ​രു​ന്നു​കൾ വീണ്ടും വീണ്ടും കിട്ടാ​നുള്ള ആഗ്രഹം അങ്ങേയറ്റം തീവ്ര​മാ​യ​തി​നാൽ നിങ്ങൾ മനഃസാ​ക്ഷി​യു​ടെ ശബ്ദം കേട്ടി​ല്ലെന്നു നടിക്കും. ഒരു റോളർകോ​സ്റ്റർ സവാരി പോ​ലെ​യാ​യി​ത്തീ​രും ജീവിതം. ഒരു ഉന്മാദ അവസ്ഥയിൽ നിന്നു മറ്റൊ​ന്നി​ലേക്ക്‌ ഉള്ള യാത്ര​യാ​ണത്‌.”

‘മയക്കു​മ​രു​ന്നു​ക​ളു​ടെ ലോകത്തു കുരു​ങ്ങി​പ്പോ​കൽ’

പേത്രൂ​വി​ന്റെ ഭാര്യ, ആന്നായും സ്‌പെ​യി​നി​ലാണ്‌ വളർന്നു വന്നത്‌. വളരെ നല്ല ഒരു കുടും​ബാ​ന്ത​രീ​ക്ഷ​മാ​യി​രു​ന്നു അവൾക്കു​ണ്ടാ​യി​രു​ന്നത്‌. 14 വയസ്സു​ണ്ടാ​യി​രു​ന്ന​പ്പോൾ, അടുത്തുള്ള ഒരു സ്‌കൂ​ളി​ലെ ഹഷീഷ്‌ വലിക്കുന്ന ഏതാനും ചില ആൺകു​ട്ടി​കളെ അവൾ കണ്ടുമു​ട്ടി. ആദ്യ​മൊ​ക്കെ, അവരുടെ വിചി​ത്ര​മായ പെരു​മാ​റ്റം കണ്ടപ്പോൾ അവൾക്ക്‌ അവരോ​ടു വെറുപ്പു തോന്നി. എന്നാൽ ആന്നായു​ടെ ഒരു കൂട്ടു​കാ​രി​യാ​യി​രുന്ന റോസാ​യ്‌ക്ക്‌ അതി​ലൊ​രു ആൺകു​ട്ടി​യോട്‌ ഇഷ്ടം തോന്നി. ഹഷീഷ്‌ വലിക്കു​ന്നതു കൊണ്ട്‌ കുഴപ്പ​മൊ​ന്നു​മു​ണ്ടാ​കില്ല എന്നു മാത്രമല്ല അവൾക്ക്‌ അത്‌ ഇഷ്ടമാ​കു​ക​യും ചെയ്യു​മെന്ന്‌ അവൻ റോസാ​യെ പറഞ്ഞു വിശ്വ​സി​പ്പി​ച്ചു. അങ്ങനെ, റോസാ സിഗരറ്റ്‌ വലിച്ചു നോക്കി​യിട്ട്‌ അത്‌ ആന്നായ്‌ക്കും നൽകി.

“അതു സുഖക​ര​മായ ഒരു അനുഭ​വ​മാ​യി​രു​ന്നു. ഏതാനും ആഴ്‌ച​കൾക്കു​ള്ളിൽ, ഞാൻ ദിവസ​വും ഹഷീഷ്‌ വലിക്കാൻ തുടങ്ങി,” ആന്നാ പറയുന്നു. “ഒരു മാസമോ മറ്റോ കഴിഞ്ഞ​പ്പോ​ഴേ​ക്കും, ഹഷീഷ്‌ വലിച്ചാൽ വലിയ ലഹരി​യൊ​ന്നും കിട്ടില്ല എന്ന സ്ഥിതി​യിൽ ആയിത്തീർന്നു ഞാൻ. അങ്ങനെ, ഹഷീഷ്‌ വലിക്കു​ന്ന​തോ​ടൊ​പ്പം ഞാൻ ആംഫി​റ്റാ​മി​നു​ക​ളും ഉപയോ​ഗി​ക്കാൻ തുടങ്ങി.

“താമസി​യാ​തെ, മയക്കു​മ​രു​ന്നു​ക​ളു​ടെ ലോകത്തു പൂർണ​മാ​യും കുരു​ങ്ങി​പ്പോയ അവസ്ഥയി​ലാ​യി, ഞാനും കൂട്ടു​കാ​രും. യാതൊ​രു കുഴപ്പ​വും കൂടാതെ ഏറ്റവും കൂടുതൽ മയക്കു​മ​രു​ന്നു​കൾ ഉപയോ​ഗി​ക്കാൻ കഴിയു​ന്നത്‌ ആർക്കാണ്‌ എന്നതിനെ കുറി​ച്ചും ഏറ്റവു​മ​ധി​കം ലഹരി​കി​ട്ടി​യത്‌ ആർക്കാണ്‌ എന്നതിനെ കുറി​ച്ചു​മൊ​ക്കെ ഞങ്ങൾ സംസാ​രി​ക്കു​മാ​യി​രു​ന്നു. പതിയെ പതിയെ, ഞാൻ ഈ ലോക​ത്തിൽ നിന്നു സ്വയം ഒറ്റപ്പെ​ടു​ത്താൻ തുടങ്ങി. സ്‌കൂ​ളിൽ പോക്കും വല്ലപ്പോ​ഴു​മൊ​രി​ക്ക​ലാ​യി. എനിക്കു ഹഷീഷും ആംഫി​റ്റാ​മി​നു​ക​ളും ഒന്നും പോരെന്ന സ്ഥിതി​യാ​യി. അങ്ങനെ, ഒരു മോർഫിൻ ഉത്‌പന്നം പല മരുന്നു​ക​ട​ക​ളിൽ നിന്നായി സംഘടി​പ്പിച്ച്‌ ഞാൻ ശരീര​ത്തിൽ കുത്തി​വെ​ക്കാൻ തുടങ്ങി. വേനൽക്കാ​ലത്ത്‌, തുറസ്സായ സ്ഥലങ്ങളിൽ വെച്ചു നടത്തുന്ന റോക്ക്‌ സംഗീ​ത​ക്ക​ച്ചേ​രി​കൾക്കും ഞങ്ങൾ പോകു​മാ​യി​രു​ന്നു. അവി​ടെ​യാ​കു​മ്പോൾ, എൽഎസ്‌ഡി പോലുള്ള മയക്കു​മ​രു​ന്നു​കൾ എപ്പോ​ഴും സുലഭ​മാ​യി​രു​ന്നു.

“ഒരിക്കൽ ഹഷീഷ്‌ വലിക്കു​മ്പോൾ അമ്മ എന്നെ കയ്യോടെ പിടി​കൂ​ടി. എന്നെ സംരക്ഷി​ക്കാൻ മാതാ​പി​താ​ക്കൾ ആവുന്നത്ര ശ്രമിച്ചു നോക്കി. മയക്കു​മ​രു​ന്നു​കൾ ഉപയോ​ഗി​ച്ചാ​ലുള്ള അപകട​ങ്ങളെ കുറിച്ചു പറഞ്ഞു​ത​രിക മാത്രമല്ല അവർ ചെയ്‌തത്‌. എന്നോട്‌ അവർക്കുള്ള സ്‌നേ​ഹ​ത്തെ​യും കരുത​ലി​നെ​യും കുറിച്ച്‌ അവർ എനിക്ക്‌ ഉറപ്പും തന്നു. പക്ഷേ, എന്റെ ജീവി​ത​ത്തിൽ അവർ അനാവ​ശ്യ​മാ​യി കൈക​ട​ത്തു​ന്നതു പോ​ലെ​യാണ്‌ എനിക്കു തോന്നി​യത്‌. 16 വയസ്സാ​യ​പ്പോൾ വീടു​വി​ട്ടു പോകാൻ തന്നെ ഞാൻ തീരു​മാ​നി​ച്ചു. സ്‌പെ​യി​നിൽ ഉടനീളം കൈ​കൊ​ണ്ടു​ണ്ടാ​ക്കിയ നെക്‌ലേ​സു​കൾ കൊണ്ടു നടന്നു വിൽക്കു​ക​യും മയക്കു​മ​രു​ന്നു​കൾ ഉപയോ​ഗി​ക്കു​ക​യും ചെയ്യുന്ന ഒരു കൂട്ടം ചെറു​പ്പ​ക്കാ​രു​ടെ കൂടെ ഞാനും കൂടി. രണ്ടു മാസങ്ങൾക്കു ശേഷം, മാലഗ​യിൽ വെച്ചു പൊലീസ്‌ എന്നെ അറസ്റ്റു​ചെ​യ്‌തു.

“പൊലീസ്‌ എന്നെ മാതാ​പി​താ​ക്ക​ളു​ടെ പക്കൽ ഏൽപ്പി​ച്ച​പ്പോൾ, അവർ രണ്ടു കൈയും നീട്ടി എന്നെ സ്വീക​രി​ച്ചു. ചെയ്‌ത കാര്യ​ങ്ങളെ കുറിച്ച്‌ ഓർത്ത​പ്പോൾ എനിക്കു വല്ലാത്ത നാണ​ക്കേടു തോന്നി. ജീവി​ത​ത്തിൽ ആദ്യമാ​യി, എന്റെ പിതാവ്‌ കരയു​ന്നതു ഞാൻ കണ്ടു. മാതാ​പി​താ​ക്കളെ വിഷമി​പ്പി​ച്ച​തിൽ എനിക്കു സങ്കടമു​ണ്ടാ​യി​രു​ന്നു. പക്ഷേ, ആ പശ്ചാത്താ​പം മയക്കു​മ​രു​ന്നു​ക​ളു​ടെ ലോകം ഉപേക്ഷി​ച്ചു പോകാൻ എന്നെ പ്രേരി​പ്പി​ക്കാൻ മാത്രം ശക്തമല്ലാ​യി​രു​ന്നു. ദിവസ​വും മയക്കു​മ​രു​ന്നു​കൾ ഉപയോ​ഗി​ക്കുന്ന ശീലം ഞാൻ തുടർന്നു. എന്നാൽ, ലഹരി​യു​ടെ പിടി​യിൽ അല്ലാതി​രുന്ന ചില സമയങ്ങ​ളിൽ ഞാൻ അതിന്റെ അപകട​ങ്ങളെ കുറിച്ചു ചിന്തി​ക്കു​മാ​യി​രു​ന്നു, കുറച്ചു സമയ​ത്തേക്കു മാത്രം.”

ഇഷ്ടിക​പ്പ​ണി​ക്കാ​രൻ മയക്കു​മ​രു​ന്നു വ്യാപാ​രി​യാ​കു​ന്നു

ഹോ​സേയെ പരിച​യ​പ്പെ​ടുക. സൗഹൃ​ദ​മ​ന​സ്‌ക​നായ ഒരു കുടു​ബ​സ്ഥ​നാണ്‌ അദ്ദേഹം. മൊ​റോ​ക്കോ​യിൽ നിന്നു സ്‌പെ​യി​നി​ലേക്ക്‌ കഞ്ചാവു കടത്തുന്ന ജോലി​യിൽ അദ്ദേഹം അഞ്ചു വർഷം ഏർപ്പെട്ടു. അദ്ദേഹം എങ്ങനെ​യാണ്‌ ഈ രംഗത്തു വന്നു പെട്ടത്‌? “ഇഷ്ടിക കെട്ടുന്ന പണിയിൽ ഏർപ്പെ​ട്ടി​രി​ക്കുന്ന സമയത്ത്‌ എന്റെ കൂടെ പണിയുന്ന ആൾ മയക്കു​മ​രു​ന്നു വ്യാപാ​രം തുടങ്ങി,” അദ്ദേഹം വിശദീ​ക​രി​ക്കു​ന്നു. “എനിക്കു പണം ആവശ്യ​മാ​യി​രു​ന്നതു കൊണ്ട്‌, ‘എന്തു​കൊണ്ട്‌ എനിക്കും ഇതു തന്നെ ചെയ്‌തു​കൂ​ടാ?’ എന്നു ഞാൻ ചിന്തിച്ചു.

“മൊ​റോ​ക്കോ​യിൽ നിന്നു കഞ്ചാവു വാങ്ങാൻ ഒരു പ്രയാ​സ​വു​മി​ല്ലാ​യി​രു​ന്നു. എനിക്കു കൈകാ​ര്യം ചെയ്യാൻ പറ്റുന്ന​ത്ര​യും എനിക്കു വാങ്ങാൻ കഴിയു​മാ​യി​രു​ന്നു. പൊലീ​സി​നെ എളുപ്പ​ത്തിൽ വെട്ടിച്ചു കടന്നു​ക​ള​യാൻ പറ്റുന്ന തരത്തി​ലുള്ള ഒരു സ്‌പീഡ്‌ ബോട്ട്‌ എനിക്കു​ണ്ടാ​യി​രു​ന്നു. മയക്കു​മ​രു​ന്നു​കൾ സ്‌പെ​യി​നിൽ എത്തിച്ച​തി​നു ശേഷം ഞാൻ അവ വലിയ അളവിൽ—ഏകദേശം 600 കിലോ വീതം—വിറ്റു. എനിക്ക്‌ ആകെ മൂന്നോ നാലോ ഇടപാ​ടു​കാർ മാത്രമേ ഉണ്ടായി​രു​ന്നു​ള്ളൂ. പക്ഷേ, എനിക്ക്‌ എന്തുമാ​ത്രം മയക്കു​മ​രു​ന്നു​കൾ കൊടു​ക്കാൻ പറ്റുമാ​യി​രു​ന്നോ അത്രയും എടുക്കാൻ അവർ തയ്യാറാ​യി​രു​ന്നു. പൊലീ​സി​ന്റെ നിരീ​ക്ഷ​ണ​വ​ലയം ഭേദിച്ച്‌ മയക്കു​മ​രു​ന്നു​കൾ എല്ലായ്‌പോ​ഴും ലക്ഷ്യസ്ഥാ​നത്ത്‌ എത്തിക്കാൻ ഞങ്ങൾക്കു കഴിഞ്ഞു. മയക്കു​മ​രു​ന്നു വ്യാപാ​രി​ക​ളായ ഞങ്ങൾക്ക്‌ പൊലീ​സി​നെ​ക്കാൾ മെച്ചപ്പെട്ട ഉപകര​ണ​ങ്ങ​ളും മറ്റും ഉണ്ടായി​രു​ന്നു.

“ഞാൻ എളുപ്പ​ത്തിൽ വളരെ​യേറെ പണം സമ്പാദി​ച്ചു. സ്‌പെ​യി​നിൽ നിന്ന്‌ ഉത്തരാ​ഫ്രി​ക്ക​യി​ലേക്ക്‌ ഒരൊറ്റ തവണ പോയാൽ എന്റെ കയ്യിൽ വന്നിരു​ന്നത്‌ 25,000-ത്തിനും 30,000-ത്തിനും ഇടയ്‌ക്കു ഡോളർ [10 ലക്ഷത്തി​നും 12 ലക്ഷത്തി​നും ഇടയ്‌ക്കു രൂപ] ആയിരു​ന്നു. അധികം താമസി​യാ​തെ, എന്റെ കീഴിൽ 30 ആളുകൾ പ്രവർത്തി​ക്കാൻ തുടങ്ങി. ഞാൻ ഒരിക്ക​ലും പൊലീ​സി​ന്റെ പിടി​യിൽ അകപ്പെ​ട്ടില്ല. കാരണം, എന്റെ പ്രവർത്ത​നങ്ങൾ നിരീക്ഷണ വിധേ​യ​മാ​കു​ന്നു​ണ്ടെ​ങ്കിൽ അക്കാര്യം എന്നെ അറിയി​ക്കു​ന്ന​തി​നു വേണ്ടി പണം കൊടുത്ത്‌ ഞാൻ ഒരാളെ ഏർപ്പാ​ടാ​ക്കി​യി​രു​ന്നു.

“ഈ മയക്കു​മ​രു​ന്നു​ക​ളെ​ല്ലാം മറ്റുള്ള​വരെ എങ്ങനെ​യാ​യി​രി​ക്കും ബാധി​ക്കുക എന്നു ചില​പ്പോ​ഴൊ​ക്കെ ഞാൻ ചിന്തി​ക്കാ​റു​ണ്ടാ​യി​രു​ന്നു. എന്നാൽ, കഞ്ചാവ്‌ അത്രയ്‌ക്ക്‌ വിനാ​ശ​കാ​രി​യായ മയക്കു​മ​രു​ന്നല്ല എന്നും അത്‌ ആരെയും കൊല്ലു​ക​യില്ല എന്നും എന്നോടു തന്നെ പറഞ്ഞു​കൊണ്ട്‌ ഞാൻ ആശ്വസി​ക്കാൻ ശ്രമിച്ചു. എനിക്കു ധാരാളം പണം കിട്ടു​ന്നു​ണ്ടാ​യി​രു​ന്നതു കൊണ്ടു ഞാൻ അതേ കുറിച്ച്‌ അധിക​മൊ​ന്നും ചിന്തി​ക്കാ​റി​ല്ലാ​യി​രു​ന്നു. എന്നാൽ ഞാൻ, ഒരിക്കൽ പോലും മയക്കു​മ​രുന്ന്‌ ഉപയോ​ഗി​ച്ചില്ല.”

നിങ്ങളു​ടെ പണവും ജീവനും!

ഈ ഉദാഹ​ര​ണങ്ങൾ കാണി​ക്കു​ന്നതു പോലെ, മയക്കു​മ​രു​ന്നു​കൾ ആളുക​ളു​ടെ ജീവി​ത​ങ്ങളെ അമ്മാന​മാ​ടു​ന്നു. ഒരിക്കൽ അതിന്റെ കെണി​യിൽ അകപ്പെ​ട്ടാൽ പിന്നെ രക്ഷപ്പെടൽ പ്രയാ​സ​ക​ര​മാ​ണെന്നു മാത്രമല്ല, വേദനാ​ജ​ന​ക​വു​മാണ്‌. മയക്കു​മ​രു​ന്നു​കൾ അമേരി​ക്ക​യിൽ എന്ന പുസ്‌തകം ചൂണ്ടി​ക്കാ​ട്ടു​ന്നതു പോലെ, “പടിഞ്ഞാ​റൻ ഐക്യ​നാ​ടു​ക​ളിൽ പണ്ടൊക്കെ കൊള്ള​ക്കാർ ആളുക​ളു​ടെ മുഖ​ത്തേക്കു തോക്കു ചൂണ്ടി​യിട്ട്‌ ഇങ്ങനെ ചോദി​ക്കു​മാ​യി​രു​ന്നു, ‘ജീവൻ വേണോ അതോ പണം വേണോ?’ എന്നാൽ മയക്കു​മ​രു​ന്നു​കൾ ഈ കൊള്ള​ക്കാ​രെ​ക്കാൾ ഭയങ്കര​ന്മാ​രാണ്‌. അവ ഇവ രണ്ടും അപഹരി​ക്കു​ന്നു.”

മയക്കു​മ​രുന്ന്‌ എന്ന ഈ ഉഗ്ര സംഹാ​ര​മൂർത്തി​യെ പ്രതി​രോ​ധി​ക്കാൻ പര്യാ​പ്‌ത​മായ എന്തെങ്കി​ലു​മു​ണ്ടോ? പിൻവ​രുന്ന ലേഖനം ചില പരിഹാ​ര​മാർഗങ്ങൾ ചർച്ച ചെയ്യും.

[അടിക്കു​റി​പ്പു​കൾ]

[8-ാം പേജിലെ ആകർഷ​ക​വാ​ക്യം]

“പടിഞ്ഞാ​റൻ ഐക്യ​നാ​ടു​ക​ളിൽ പണ്ടൊക്കെ കൊള്ള​ക്കാർ ആളുക​ളു​ടെ മുഖ​ത്തേക്കു തോക്കു ചൂണ്ടി​യിട്ട്‌ ഇങ്ങനെ ചോദി​ക്കു​മാ​യി​രു​ന്നു, ‘ജീവൻ വേണോ അതോ പണം വേണോ?’ എന്നാൽ മയക്കു​മ​രു​ന്നു​കൾ ഈ കൊള്ള​ക്കാ​രെ​ക്കാൾ ഭയങ്കര​ന്മാ​രാണ്‌. അവ ഇവ രണ്ടും അപഹരി​ക്കു​ന്നു”

[10-ാം പേജിലെ ചതുരം/ചിത്രം]

നിങ്ങളുടെ കുട്ടി മയക്കു​മ​രു​ന്നു​കൾ വേണ്ട എന്നു പറയു​മോ?

ഏതുതരം കൗമാ​ര​പ്രാ​യ​ക്കാർക്കാണ്‌ ഏറ്റവും അപകട സാധ്യത?

എ. തങ്ങൾക്കു മറ്റാരു​ടെ​യും തണൽ ആവശ്യ​മി​ല്ലെ​ന്നും തങ്ങൾ എന്തു സാഹസ​ത്തി​നും തയ്യാറാ​ണെ​ന്നും ലോക​ത്തി​നു തെളി​യി​ച്ചു കൊടു​ക്കാൻ താത്‌പ​ര്യ​പ്പെ​ടു​ന്നവർ.

ബി. പഠനത്തി​ലോ ആത്മീയ കാര്യ​ങ്ങ​ളി​ലോ യാതൊ​രു താത്‌പ​ര്യ​വു​മി​ല്ലാ​ത്തവർ.

സി. സമൂഹ​വു​മാ​യി പൊരു​ത്ത​പ്പെ​ടാൻ കഴിയാ​ത്തവർ.

ഡി. തെറ്റും ശരിയും സംബന്ധിച്ച്‌ വ്യക്തമായ ധാരണ​യി​ല്ലാ​ത്തവർ.

ഇ. മാതാ​പി​താ​ക്കൾ തങ്ങളെ സ്‌നേ​ഹി​ക്കു​ന്നി​ല്ലെന്നു കരുതു​ന്നവർ, മയക്കു​മ​രു​ന്നു​കൾ പരീക്ഷി​ച്ചു​നോ​ക്കാൻ നിർബ​ന്ധി​ക്കുന്ന കൂട്ടു​കാർ ഉള്ളവർ. “കൗമാ​ര​പ്രാ​യ​ത്തി​ലുള്ള ഒരു കുട്ടിയെ മയക്കു​മ​രു​ന്നു​കൾ ഉപയോ​ഗി​ക്കു​ന്ന​തിൽ നിന്നു തടയുന്ന ഏറ്റവും ഫലപ്ര​ദ​മായ ഘടകം, അവന്‌ തന്റെ മാതാ​പി​താ​ക്ക​ളു​മാ​യുള്ള ബന്ധത്തിന്റെ ആഴമാണ്‌” എന്ന കാര്യം ഗവേഷ​ക​രു​ടെ ശ്രദ്ധയിൽ പെട്ടി​ട്ടുണ്ട്‌.—ചെരി​ച്ചെ​ഴു​തി​യി​രി​ക്കു​ന്നതു ഞങ്ങൾ.

നിങ്ങളുടെ കുട്ടി​കളെ എങ്ങനെ സംരക്ഷി​ക്കാൻ കഴിയും?

എ. അവരു​മാ​യി ഒരു ഉറ്റ ബന്ധവും നല്ല ആശയവി​നി​മ​യ​വും ഉണ്ടായി​രി​ക്കു​ന്ന​തി​ലൂ​ടെ.

ബി. ശരിയും തെറ്റും സംബന്ധിച്ച്‌ അവരുടെ മനസ്സിൽ ഒരു വ്യക്തമായ ധാരണ പതിപ്പി​ക്കു​ന്ന​തി​ലൂ​ടെ.

സി. വ്യക്തമായ ലക്ഷ്യങ്ങൾ ഉണ്ടായി​രി​ക്കാൻ അവരെ സഹായി​ക്കു​ന്ന​തി​ലൂ​ടെ.

ഡി. സ്‌നേ​ഹ​മുള്ള ഒരു കുടും​ബ​ത്തി​ന്റെ, ഊഷ്‌മ​ള​ത​യുള്ള ഒരു സമൂഹ​ത്തി​ന്റെ, ഭാഗമാ​ണു തങ്ങൾ എന്ന്‌ അവർക്ക്‌ അനുഭ​വ​പ്പെ​ടാൻ ഇടയാ​ക്കു​ന്ന​തി​ലൂ​ടെ.

ഇ. മയക്കു​മ​രു​ന്നു​കൾ ഉപയോ​ഗി​ച്ചാ​ലുള്ള അപകട​ങ്ങളെ കുറിച്ച്‌ അവരെ പറഞ്ഞു മനസ്സി​ലാ​ക്കു​ന്ന​തി​ലൂ​ടെ. തങ്ങൾ എന്തു​കൊ​ണ്ടാണ്‌ മയക്കു​മ​രു​ന്നു​കൾ വേണ്ടെന്നു വെക്കേ​ണ്ടത്‌ എന്നു കുട്ടികൾ വ്യക്തമാ​യി അറിഞ്ഞി​രി​ക്കണം.

[കടപ്പാട]

ഉറവിടം: ഐക്യ​രാ​ഷ്‌ട്ര സംഘട​ന​യു​ടെ വേൾഡ്‌ ഡ്രഗ്‌ റിപ്പോർട്ട്‌

[9-ാം പേജിലെ ചിത്രം]

ജിബ്രാൾട്ടറിൽ വെച്ച്‌ പിടി​ച്ചെ​ടുത്ത മയക്കു​മ​രു​ന്നു​കൾ

[കടപ്പാട]

Courtesy of Gibraltar Police

[10-ാം പേജിലെ ചിത്രം]

ഇതുപോലെ ഒരു സ്‌പീ​ഡ്‌ബോട്ട്‌ എനിക്ക്‌ ഉണ്ടായി​രു​ന്നു. അത്‌ ഉപയോ​ഗിച്ച്‌ എനിക്കു പൊലീ​സി​നെ എളുപ്പ​ത്തിൽ വെട്ടിച്ചു കടന്നു​ക​ള​യാൻ കഴിയു​മാ​യി​രു​ന്നു

[കടപ്പാട]

Courtesy of Gibraltar Police

[9-ാം പേജിലെ ചിത്ര​ത്തിന്‌ കടപ്പാട]

Godo-Foto