നമീബി​യ​യി​ലെ മാറി​ക്കൊ​ണ്ടി​രി​ക്കുന്ന ശിൽപ്പങ്ങൾ

ദക്ഷിണാഫ്രിക്കയിലെ ഉണരുക! ലേഖകൻ

ശിൽപ്പി​യു​ടെ രചനാ​ശൈലി സദാ മാറി​ക്കൊ​ണ്ടി​രി​ക്കു​ന്നു എങ്കിലും ശിൽപ്പങ്ങൾ മനോ​ഹ​ര​മാണ്‌. മണലിൽ തീർത്ത ഈ ശിൽപ്പ​ങ്ങ​ളു​ടെ ശിൽപ്പി ആരെന്നല്ലേ? ചലിക്കുന്ന മണൽക്കു​ന്നു​കളെ വിശേ​ഷ​പ്പെട്ട ആകൃതി​ക​ളിൽ മെനയുന്ന കാറ്റു​തന്നെ. ഈ വ്യത്യസ്‌ത ആകൃതി​ക​ളിൽ ഏറ്റവും പ്രസിദ്ധം ചന്ദ്രക്ക​ല​യു​ടെ ആകൃതി​യാണ്‌. കാറ്റിന്‌ അഭിമു​ഖ​മാ​യുള്ള വശത്ത്‌ “ശിൽപ്പ​ത്തിന്‌” ചെരിവു കുറവാണ്‌. കാറ്റു തട്ടാത്ത വശത്തി​നാ​കട്ടെ ഉയരം കുറവും ചെരിവു കൂടു​ത​ലും. ഇതിന്റെ മുകൾഭാ​ഗം നല്ല മൂർച്ച​യു​ള്ള​താ​യി കാണ​പ്പെ​ടു​ന്നെ​ങ്കി​ലും കാലെ​ങ്ങാ​നും അറിയാ​തെ ഒന്നു കൊണ്ടാൽമതി ഒക്കെ തകർന്നു​വീ​ഴാൻ.

തെക്കു​പ​ടി​ഞ്ഞാ​റൻ ആഫ്രി​ക്ക​യി​ലെ നമീബ്‌ മരുഭൂ​മി മാറി​ക്കൊ​ണ്ടി​രി​ക്കുന്ന ഇത്തരം ശിൽപ്പ​ങ്ങളെ നിരീ​ക്ഷി​ക്കാൻ പറ്റിയ ഒരു സ്ഥലമാണ്‌. ലോക​ത്തി​ലെ ഏറ്റവും ഉയരമുള്ള മണൽക്കു​ന്നു​ക​ളിൽ ചിലവ—400 മീറ്ററിൽ കൂടുതൽ ഉയരമു​ള്ളവ—ഇവി​ടെ​യുണ്ട്‌. എങ്കിലും, ലോക​ത്തി​ലെ വലിയ മരുഭൂ​മി​കളെ അപേക്ഷിച്ച്‌ നമീബ്‌ മരുഭൂ​മിക്ക്‌ വിസ്‌തീർണം കുറവാണ്‌. അറ്റ്‌ലാ​ന്റിക്‌ സമു​ദ്ര​ത്തിൽനിന്ന്‌ കരയി​ലേക്ക്‌ വ്യാപി​ച്ചു കിടക്കുന്ന അതിന്‌ 1,900 കിലോ​മീ​റ്റർ നീളമുണ്ട്‌. ഏറ്റവും കൂടിയ വീതി ഏകദേശം 160 കിലോ​മീ​റ്റർ ആണ്‌.

രചനയിൽ ഏർപ്പെ​ട്ടി​രി​ക്കുന്ന മറ്റു ശിൽപ്പി​കൾ

ഈ വിദൂര ‘ശിൽപ്പ​പ്ര​ദർശ​ന​ശാല’യിലെ ശിൽപ്പ​ങ്ങ​ളു​ടെ പിന്നിൽ കാറ്റു മാത്രമല്ല ശിൽപ്പി​യാ​യി പ്രവർത്തി​ച്ചി​ട്ടു​ള്ളത്‌. ഈ മണൽക്കു​ന്നു​കളെ ഒന്നുകൂ​ടെ അടുത്തു പരി​ശോ​ധി​ച്ചാൽ മറ്റു ശിൽപ്പി​ക​ളു​ടെ വ്യതി​രി​ക്ത​ങ്ങ​ളായ കലാസൃ​ഷ്ടി​ക​ളും നമുക്കു കാണാൻ സാധി​ക്കും. ഉദാഹ​ര​ണ​ത്തിന്‌, നല്ല ഭംഗി​യും നീളവു​മുള്ള ഒരു മാല മണലിൽ അലസമാ​യി എറിഞ്ഞി​രി​ക്കു​ന്ന​തു​പോ​ലെ തോന്നുന്ന ഒരു രൂപം നിങ്ങൾ കണ്ടേക്കാം. അവി​ടെ​ത്തന്നെ കുറെ​സ​മയം കാത്തു നിൽക്കു​ന്നെ​ങ്കിൽ, ആ രചനയി​ലേർപ്പെ​ട്ടി​രി​ക്കുന്ന ശിൽപ്പി​ക​ളെ​യും നിങ്ങൾക്കു കാണാൻ കഴി​ഞ്ഞേ​ക്കും. ഈ “മാല” ഉണ്ടായി​രി​ക്കു​ന്നത്‌ എങ്ങനെ​യാ​ണെ​ന്നോ? രാത്രി​യിൽ മണലി​ലൂ​ടെ കടന്നു​പോയ വണ്ടുക​ളു​ടെ കാൽപ്പാ​ടു​ക​ളാൽ. “മാല”യിൽനിന്ന്‌ അധികം ദൂരെ​യ​ല്ലാ​തെ മണലിൽ കൊച്ചു​കൊ​ച്ചു കുഴി​ക​ളു​ടെ ഒരു നിരതന്നെ നിങ്ങൾക്കു കാണാൻ കഴിയും, ഏതാണ്ട്‌ ഒരേ​പോ​ലുള്ള കുഴികൾ. അതാകട്ടെ, തന്റെ ലക്ഷ്യസ്ഥാ​ന​ത്തേക്കു ചാടി​ച്ചാ​ടി​പ്പോയ ഒരു ആനപ്പ​ന്തെ​ലി​യു​ടെ കാൽപ്പാ​ടു​ക​ളാണ്‌. തരിശാ​യി കാണ​പ്പെ​ടുന്ന, ഈ വിദൂര ശിൽപ്പ​പ്ര​ദർശ​ന​ശാല ജീവജാ​ല​ങ്ങ​ളാൽ സമൃദ്ധ​മാ​ണെന്ന്‌ പെട്ടെ​ന്നു​തന്നെ നിങ്ങൾക്കു മനസ്സി​ലാ​കു​ന്നു.

വടക്കോ​ട്ടു മാറി, സ്‌കെ​ലി​ട്ടൻ കോസ്റ്റിൽ മരുഭൂ​മി​യി​ലെ മറ്റു ശിൽപ്പി​ക​ളു​ടെ നിർമി​തി​കൾ നിങ്ങൾക്കു കാണാൻ കഴിയും. മണലിനെ യാതൊ​രു മയവു​മി​ല്ലാ​തെ​യാണ്‌ അവ കൈകാ​ര്യം ചെയ്യു​ന്നത്‌. ഫലമോ? ആകെ അലങ്കോ​ല​പ്പെട്ട കുറെ ശിൽപ്പങ്ങൾ. അതാ നോക്കൂ! മണൽക്കു​ന്നു​ക​ളി​ലൂ​ടെ ചാടി​മ​റിഞ്ഞ്‌ അവ എത്തിക്ക​ഴി​ഞ്ഞ​ല്ലോ. ഒന്നുറ​പ്പാണ്‌, അവ തങ്ങളുടെ നിർമാ​ണ​പ്ര​വർത്തനം ശരിക്കും ആസ്വദി​ക്കു​ന്നുണ്ട്‌. നാനാ​ദി​ശ​ക​ളി​ലേ​ക്കും മണൽവാ​രി എറിഞ്ഞു​കൊണ്ട്‌ അമ്പരപ്പി​ക്കുന്ന വേഗത്തി​ലാണ്‌ ഈ വലിയ ജീവികൾ മണൽക്കു​ന്നു​ക​ളി​ലൂ​ടെ ഓടി​യി​റങ്ങി വരുന്നത്‌. ഓട്ടം​കൊ​ണ്ടു​മാ​ത്രം തൃപ്‌ത​രാ​വാ​തെ അവ മണലിൽ ചാലുകൾ കീറി​ക്കൊണ്ട്‌ പിൻകാ​ലു​കൾ വലിച്ചി​ഴച്ച്‌ ഊർന്നി​റ​ങ്ങു​ന്നു​മുണ്ട്‌. പിന്നെ അവ അടുത്തുള്ള ഒരു ജലാശ​യ​ത്തി​ലേക്കു കുതി​ക്കു​ക​യാ​യി. വെള്ളത്തിൽച്ചാ​ടി അവ കളിച്ചു​തി​മിർക്കു​ക​യാണ്‌, സന്തോഷം കൊണ്ട്‌ തുള്ളി​ച്ചാ​ടുന്ന കുട്ടി​ക​ളെ​പ്പോ​ലെ. ഇവർ ആരാ​ണെന്ന്‌ അറി​യേണ്ടേ? മറ്റാരു​മല്ല, ആഫ്രിക്കൻ ആനകൾ. ഈ ശിൽപ്പി​കൾക്ക്‌ ഓരോ​ന്നി​നും ഏകദേശം ആറു ടൺ ഭാരമു​ണ്ടാ​കും!

അത്രതന്നെ പരുക്ക​ന​ല്ലെ​ങ്കി​ലും, കൗതു​ക​ക​ര​മായ രീതികൾ ഉപയോ​ഗി​ക്കുന്ന മറ്റൊരു വിചിത്ര ശിൽപ്പി​യാണ്‌ പേരിൻഗ്വേസ്‌ അണലി. മണലിൽ ഇവ കോറി​യി​ടുന്ന വ്യക്തമായ ചിത്രങ്ങൾ കണ്ടാൽ വളഞ്ഞ കമ്പുകൾ നിരത്തി​വെ​ച്ചി​രി​ക്കു​ക​യാ​ണെന്നേ തോന്നൂ. ഇവ ഉടൽ ഒരു പ്രത്യേ​ക​രീ​തി​യിൽ ചലിപ്പിച്ച്‌ വശങ്ങളി​ലേക്ക്‌ നീങ്ങു​മ്പോൾ അവശേ​ഷി​ക്കുന്ന പാടു​ക​ളാണ്‌ ഈ ചിത്രങ്ങൾ. പെട്ടെ​ന്നതാ ഈ പാടുകൾ അവസാ​നി​ക്കു​ന്നു, അവി​ടെ​ങ്ങും അണലി​യു​ടെ ഒരു സൂചന പോലു​മില്ല. അത്‌ എവി​ടെ​പ്പോ​യി? വളരെ ശ്രദ്ധാ​പൂർവം നോക്കി​യാൽ കാണാം, കൊച്ചു​വി​ട​വു​കൾ പോലെ തോന്നി​ക്കുന്ന രണ്ടു കണ്ണുകൾ മണലി​ലൂ​ടെ നിങ്ങളെ സൂക്ഷി​ച്ചു​നോ​ക്കു​ന്നത്‌. പാമ്പ്‌ അതിന്റെ ബാക്കി​ഭാ​ഗം മുഴു​വ​നും മണലിൽ പൂഴ്‌ത്തി​വെ​ച്ചി​രി​ക്കു​ക​യാണ്‌. ഇങ്ങനെ തന്നെത്താൻ ഒളിപ്പി​ച്ചു​വെച്ച്‌ അത്‌ തന്റെ ഇരയ്‌ക്കാ​യി ക്ഷമാപൂർവം കാത്തു​കി​ട​ക്കു​ക​യാണ്‌. അതിലേ കടന്നു​പോ​കുന്ന പല്ലിവർഗ​ത്തിൽപ്പെട്ട ഒരു ജീവി​യാ​യി​രി​ക്കാം മിക്കവാ​റും ആ പാവം ഇര.

മണലിൽ കാണുന്ന മറ്റൊരു ചിത്രം ഒരുപക്ഷേ അത്രതന്നെ സുന്ദര​മ​ല്ലാ​ത്ത​താണ്‌. മരുഭൂ​മി​യി​ലെ യാത്ര​യ്‌ക്കാ​യി പ്രത്യേ​കം രൂപകൽപ്പന ചെയ്‌ത മൂന്നു ചക്രങ്ങ​ളുള്ള മോ​ട്ടോർ​സൈ​ക്കി​ളു​ക​ളു​ടെ ടയറുകൾ വീഴ്‌ത്തിയ വീതി കൂടിയ പാടു​ക​ളാണ്‌ അവ. മനുഷ്യ​നും അവിടെ തന്റേതായ മുദ്രകൾ പതിപ്പി​ച്ചി​രി​ക്കു​ന്നു.

രൂപ​ഭേദം വരുത്തി​ക്കൊ​ണ്ടേ​യി​രി​ക്കുന്ന ഒരു ശിൽപ്പി

മണലിൽ തങ്ങളു​ടേ​തായ മുദ്രകൾ പതിപ്പി​ക്കുന്ന വേറെ​യും ജീവി​ക​ളുണ്ട്‌. വളരെ​യേറെ ഉള്ളതി​നാൽ എല്ലാറ്റി​നെ​യും പേരെ​ടു​ത്തു പരാമർശി​ക്കാ​നാ​വില്ല. സ്‌കെ​ലി​ട്ടൻ കോസ്റ്റ്‌ വന്യമൃ​ഗ​സം​രക്ഷണ കേന്ദ്ര​ത്തി​ലും മറ്റിട​ങ്ങ​ളി​ലും കാണ​പ്പെ​ട്ടേ​ക്കാ​വുന്ന കാണ്ടാ​മൃ​ഗങ്ങൾ, സിംഹങ്ങൾ, ജിറാ​ഫു​കൾ, കുറു​ക്ക​ന്മാർ എന്നിവ​യൊ​ക്കെ അതിൽപ്പെ​ടു​ന്നു.

എന്നാൽ, മുഖ്യ​ശിൽപ്പി കാറ്റു​ത​ന്നെ​യാണ്‌. പ്രദർശ​ന​ശാല കാഴ്‌ച​യ്‌ക്ക്‌ പൊതു​വെ എങ്ങനെ​യി​രി​ക്ക​ണ​മെന്നു തീരു​മാ​നി​ക്കു​ക​യും തനിക്കു തോന്നിയ രീതി​യിൽ ശിൽപ്പ​ങ്ങ​ളു​ടെ ആകൃതി​ക്കു വ്യതി​യാ​നം വരുത്തു​ക​യും ചെയ്യു​ന്നത്‌ കാറ്റാണ്‌. അത്‌ എന്നും മാറ്റങ്ങൾ വരുത്തി​ക്കൊ​ണ്ടേ​യി​രി​ക്കു​ന്നു. ഒരു വർഷത്തി​നു​ശേഷം വീണ്ടും നിങ്ങൾ ഈ പ്രദർശ​ന​ശാല സന്ദർശി​ക്കു​ക​യാ​ണെ​ങ്കിൽ ചില മണൽക്കു​ന്നു​കൾക്ക്‌ 30 മീറ്റർവരെ സ്ഥാനമാ​റ്റം സംഭവി​ച്ചി​രി​ക്കു​ന്ന​താ​യി നിങ്ങൾ കണ്ടേക്കാം! അതാണ്‌ നമീബി​യ​യി​ലെ കാറ്റിന്റെ വിരുത്‌. (g01 3/8)

[15-ാം പേജിലെ ഭൂപടം]

(പൂർണ​രൂ​പ​ത്തിൽ കാണു​ന്ന​തിന്‌ പ്രസി​ദ്ധീ​ക​രണം നോക്കുക)

ആഫ്രിക്ക

നമീബിയ

[14-ാം പേജിലെ ചിത്രങ്ങൾ]

ആനപ്പന്തെലി

[14-ാം പേജിലെ ചിത്ര​ങ്ങൾക്ക്‌ കടപ്പാട്‌]

Des and Jen Bartlett