മൊസാ​മ്പി​ക്കി​ലെ വെള്ള​പ്പൊ​ക്ക—ക്രിസ്‌ത്യാ​നി​കൾ പ്രളയ​ബാ​ധി​തരെ സഹായിച്ച വിധം

മൊസാമ്പിക്കിലെ ഉണരുക! ലേഖകൻ

പ്രളയ​ജലം കൊല​വി​ളി ഉയർത്തവേ, മരക്കൊ​മ്പു​ക​ളിൽ അള്ളിപ്പി​ടി​ച്ചി​രുന്ന മൊസാ​മ്പി​ക്കി​ലെ ആളുക​ളു​ടെ ചിത്രങ്ങൾ കഴിഞ്ഞ വർഷാ​രം​ഭ​ത്തിൽ ടെലി​വി​ഷൻ പ്രേക്ഷ​കരെ സ്‌തബ്ധ​രാ​ക്കി. മരത്തി​ലാ​യി​രി​ക്കെ പ്രസവിച്ച ഒരു സ്‌ത്രീ​യെ​യും അവരുടെ കുഞ്ഞി​നെ​യും ഹെലി​കോ​പ്‌റ്റർ എത്തി സുരക്ഷിത സ്ഥാന​ത്തേക്കു കൊണ്ടു​പോ​കു​ന്നത്‌ അതിൽ കാണി​ക്കു​ക​യു​ണ്ടാ​യി. എന്നാൽ, ആയിര​ക്ക​ണ​ക്കി​നാ​ളു​കൾ—ചിലർക്കാ​ണെ​ങ്കിൽ പാമ്പു​ക​ളും കൂട്ടു​ണ്ടാ​യി​രു​ന്നു—രക്ഷപ്പെ​ടാ​നാ​വാ​തെ ദിവസ​ങ്ങ​ളോ​ളം പ്രളയ​ബാ​ധിത പ്രദേ​ശ​ങ്ങ​ളിൽ കുടുങ്ങി പോയി​രു​ന്നു. വെള്ളം താഴു​ന്ന​തു​വരെ അല്ലെങ്കിൽ ഹെലി​കോ​പ്‌റ്റ​റു​കൾ വന്നു രക്ഷപ്പെ​ടു​ത്തും വരെ അവർക്കു പ്രളയ​ജ​ല​വു​മാ​യി മല്ലി​ടേണ്ടി വന്നു.

മൊസാ​മ്പി​ക്കി​ന്റെ തലസ്ഥാന നഗരി​യായ മാപൂ​ട്ടോ​യിൽ തകർത്തു പെയ്‌ത മഴയാണ്‌ ദുരന്ത​ത്തി​നു തുടക്കം കുറി​ച്ചത്‌. മണിക്കൂ​റു​കൾക്കു​ള്ളിൽ നഗരത്തി​ന്റെ പ്രാന്ത​പ്ര​ദേ​ശങ്ങൾ മുഴുവൻ വെള്ളത്തി​ലാ​യി. ചിലയി​ട​ങ്ങ​ളിൽ വീടു​ക​ളു​ടെ മേൽക്കൂര വരെ ജലനി​രപ്പ്‌ ഉയർന്നു. റോഡു​കൾ അലറി​പ്പാ​ഞ്ഞൊ​ഴു​കുന്ന നദിക​ളു​ടെ രൂപം കൈവ​രി​ച്ചു. വെള്ളപ്പാ​ച്ച​ലു​കൾ വലിയ ചാലുകൾ സൃഷ്ടിച്ചു. വീടുകൾ, കാറുകൾ എന്നു വേണ്ട എല്ലാ സാധന​ങ്ങ​ളും​തന്നെ ഒഴുകി​യൊ​ലി​ച്ചു പോയി. എന്നാൽ ഇതെല്ലാം ദുരന്ത​ങ്ങ​ളു​ടെ തുടക്കം മാത്ര​മാ​യി​രു​ന്നു.

രാജ്യ​ത്തി​ന്റെ തെക്കു ഭാഗത്തെ മൊത്തം വെള്ളത്തി​ലാ​ഴ്‌ത്തി​ക്കൊണ്ട്‌ മഴ തുടർന്നു. സമീപ​ത്തുള്ള ദക്ഷിണാ​ഫ്രിക്ക, സിംബാ​ബ്‌വേ, ബോട്‌സ്വാ​ന എന്നിവി​ട​ങ്ങ​ളി​ലും മഴ പെയ്‌തു. ഈ രാജ്യ​ങ്ങ​ളി​ലൂ​ടെ ഒഴുകുന്ന ഇൻകോ​മാ​റ്റി, ലിം​പോ​പോ, സാമ്പിസി എന്നീ നദികൾ മൊസാ​മ്പിക്ക്‌ കടന്നാണ്‌ സമു​ദ്ര​ത്തിൽ ചെന്നു പതിക്കു​ന്നത്‌. അതു​കൊണ്ട്‌ അവ കരകവി​ഞ്ഞൊ​ഴു​കി​യ​പ്പോൾ അത്‌ മൊസാ​മ്പി​ക്കി​ന്റെ ഒട്ടേറെ പ്രദേ​ശ​ങ്ങ​ളിൽ വിനാശം വിതച്ചു. ഈ കൊടും​വി​പ​ത്തി​ന്റെ സമയത്ത്‌ ക്രിസ്‌ത്യാ​നി​കൾ അന്യോ​ന്യം സഹായിച്ച വിധം വിശ്വാ​സത്തെ ബലപ്പെ​ടു​ത്തുന്ന ഒരു അനുഭ​വ​ക​ഥ​യാണ്‌.

ആദ്യ കെടു​തി​കൾ വിലയി​രു​ത്തു​ന്നു

കഴിഞ്ഞ വർഷം ഫെബ്രു​വരി 9-ന്‌ മാപൂ​ട്ടോ​യി​ലുള്ള യഹോ​വ​യു​ടെ സാക്ഷി​ക​ളു​ടെ ബ്രാഞ്ച്‌ ഓഫീ​സി​ന്റെ രണ്ട്‌ പ്രതി​നി​ധി​കൾ വടക്കു ഭാഗം സന്ദർശി​ക്കാ​നാ​യി യാത്ര​തി​രി​ച്ചു. രാവിലെ ഏകദേശം 9 മണി​യോ​ടെ ഷിനവാ​നി നഗരത്തി​ലെ​ത്തിയ അവർ ഇൻകോ​ലൂ​യാ​നെ നദിയി​ലെ ജലനി​രപ്പ്‌ വളരെ ഉയർന്നി​രി​ക്കു​ന്ന​താ​യി നിരീ​ക്ഷി​ച്ചു. ഗാസ പ്രവി​ശ്യ​യു​ടെ തലസ്ഥാ​ന​മായ ഷൈ-ഷൈയി​ലേക്ക്‌ യാത്ര തുടരാൻ അവർ തീരു​മാ​നി​ച്ചു. എങ്കിലും ഷോക്വെ നഗരത്തി​നു—വലിയ കാറ്റും മഴയും ഉണ്ടാകുന്ന സമയത്ത്‌ മിക്ക​പ്പോ​ഴും ഏറ്റവും വലിയ വെള്ള​പ്പൊ​ക്കം ഉണ്ടാകാ​റുള്ള സ്ഥലമാണ്‌ അത്‌—സമീപ​മെ​ത്തിയ അവർക്ക്‌ വെള്ള​പ്പൊ​ക്ക​ത്തി​ന്റെ യാതൊ​രു സൂചന​യും കാണാ​നാ​യില്ല. അതു​കൊണ്ട്‌ മാപൂ​ട്ടോ​യി​ലേക്കു മടങ്ങി​പ്പോ​കാൻ അവർ തീരു​മാ​നി​ച്ചു.

എന്നിരു​ന്നാ​ലും, മടക്കയാ​ത്ര​യിൽ ഷിനവാ​നി​ക്കു സമീപം എത്തിയ​പ്പോൾ പൊലീ​സു​കാർ അവരെ തടഞ്ഞു​നി​റു​ത്തി. ‘ദക്ഷിണാ​ഫ്രി​ക്ക​യിൽനി​ന്നു പ്രളയ​ജലം ഒഴുകി​യെ​ത്തി​യി​രി​ക്കു​ന്നു. അതിനാൽ ദേശീയ പാതയു​മാ​യുള്ള ബന്ധം വിച്ഛേ​ദി​ക്ക​പ്പെ​ട്ടി​രി​ക്കു​ക​യാണ്‌. . . . ബസ്സും ട്രക്കും ഒന്നും അതുവഴി പോകില്ല,’ പൊലീസ്‌ മുന്നറി​യി​പ്പു നൽകി. അന്നേ ദിവസം രാവിലെ അവർ കടന്നു​പോന്ന റോഡി​ന്റെ ഭാഗങ്ങൾ അപ്പോൾ പൂർണ​മാ​യും വെള്ളത്തി​ന​ടി​യി​ലാ​യി​രു​ന്നു! കുറെ​ക്കൂ​ടെ വടക്കോ​ട്ടു മാറി​യുള്ള നദിക​ളി​ലെ ജലനി​ര​പ്പും കൂടെ ഉയരാൻ തുടങ്ങി​യ​തോ​ടെ ആ പ്രദേശം രാജ്യ​ത്തി​ന്റെ ബാക്കി ഭാഗത്തു​നിന്ന്‌ ഒറ്റപ്പെ​ട്ടു​പോ​യി.

അടുത്തുള്ള മാസീ​യാ​യിൽ രാത്രി കഴിച്ചു​കൂ​ട്ടാൻ ആ രണ്ടു സഹോ​ദ​ര​ന്മാർ തീരു​മാ​നി​ച്ചു. രാത്രി​യിൽ സ്ഥിതി​ഗ​തി​കൾ ഒന്നുകൂ​ടി വഷളായി. ഷിനവാ​നി നഗരം മുഴുവൻ വെള്ളത്തി​ലാ​യി. അവിട​ത്തു​കാർക്ക്‌ സകലതും നഷ്ടപ്പെട്ടു. ആ പ്രദേ​ശ​ത്തുള്ള സാക്ഷി​കളെ മാസീ​യാ​യി​ലെ ഒരു രാജ്യ​ഹാ​ളിൽ എത്തിക്കു​ന്ന​തി​നു വേണ്ട ക്രമീ​ക​ര​ണങ്ങൾ ചെയ്‌തു. അവിടെ ഒരു താത്‌കാ​ലിക അഭയാർഥി ക്യാമ്പ്‌ സ്ഥാപി​ക്ക​പ്പെട്ടു. സാക്ഷികൾ പെട്ടെ​ന്നു​തന്നെ പണ്ടകശാ​ല​ക​ളിൽ ചെന്ന്‌ അരി, പയറ്‌, മാവ്‌, എണ്ണ തുടങ്ങിയ അത്യാ​വ​ശ്യം വേണ്ട സാധനങ്ങൾ വാങ്ങി​ക്കൊ​ണ്ടു വന്നു.

ഷോ​ക്വെ​യി​ലും സമീപ നഗരങ്ങ​ളി​ലും ഉള്ള സഹ ക്രിസ്‌ത്യാ​നി​കളെ കുറി​ച്ചാ​യി അടുത്ത ചിന്ത. ഷോ​ക്വെ​യി​ലുള്ള സഭകളി​ലെ മേൽവി​ചാ​ര​ക​ന്മാർ ഒരുമി​ച്ചു​കൂ​ടി, കൂട്ട​ത്തോ​ടെ ഒഴിഞ്ഞു പോകാ​നുള്ള ക്രമീ​ക​ര​ണങ്ങൾ ചെയ്‌തു. “ഉടനടി സ്ഥലം വിടുക, മാസീ​യാ​യി​ലേക്കു പോകുക!” എന്ന സന്ദേശം എല്ലായി​ട​ത്തും എത്തി. എന്നാൽ ഷിനവാ​നി​യി​ലുള്ള പലരും മാസീ​യാ​യിൽ എത്തി​ച്ചേർന്നി​ട്ടി​ല്ലെന്ന്‌ താമസി​യാ​തെ മനസ്സി​ലാ​ക്കാൻ കഴിഞ്ഞു. അതു​കൊണ്ട്‌ അവരുടെ കാര്യം തിരക്കാ​നാ​യി ചില സാക്ഷി​കളെ അങ്ങോട്ട്‌ അയച്ചു. ഒരു ക്രിസ്‌തീയ മൂപ്പൻ തന്റെ വീട്ടി​നു​ള്ളിൽവെച്ച്‌ മുങ്ങി മരി​ച്ചെ​ന്നും അറിവു കിട്ടി. അദ്ദേഹ​ത്തി​ന്റെ ശവസം​സ്‌കാ​ര​ത്തി​നുള്ള ക്രമീ​ക​ര​ണങ്ങൾ ചെയ്‌തു. ബാക്കി​യുള്ള സാക്ഷി​കളെ—അവരിൽ ചിലർ മേൽക്കൂ​ര​ക​ളിൽ അഭയം തേടി​യി​രു​ന്നു—കണ്ടെത്തി മാസീ​യാ​യി​ലെ​ത്തി​ച്ചു.

ഈ ക്രമീ​ക​ര​ണ​ങ്ങ​ളെ​ല്ലാം ചെയ്‌ത​ശേഷം ബ്രാഞ്ചി​ന്റെ പ്രതി​നി​ധി​കൾ ഒരു കൊച്ചു തീരദേശ നഗരമായ ബിലെ​നി​യി​ലേക്കു തിരിച്ചു. അവി​ടെ​നിന്ന്‌ അവർ വാടക​യ്‌ക്കെ​ടുത്ത ഒരു വിമാ​ന​ത്തിൽ മാപൂ​ട്ടോ​യി​ലേക്കു പോയി. നോ​ക്കെ​ത്താ​ദൂ​ര​ത്തോ​ളം വെള്ളം പൊങ്ങി​ക്കി​ട​ക്കു​ന്ന​താണ്‌ അവർക്കു കാണാൻ കഴിഞ്ഞത്‌. ഗാസ പ്രവി​ശ്യ​യിൽ തന്നെ പ്രളയ​ബാ​ധി​ത​രായ 6,00,000 പേർ ഉണ്ടെന്നാ​യി​രു​ന്നു റിപ്പോർട്ട്‌.

സ്ഥിതി​ഗ​തി​കൾ കൂടുതൽ വഷളാ​കു​ന്നു

തുടർന്നു വന്ന ഏതാനും ദിവസ​ങ്ങ​ളിൽ മഴ കൂടുതൽ ശക്തമായി പെയ്യാൻ തുടങ്ങി. അങ്ങനെ മൊസാ​മ്പി​ക്കി​ന്റെ മധ്യ പ്രവി​ശ്യ​ക​ളും പ്രളയ​ജ​ല​ത്തി​ന്റെ ഭീകര മുഖം കണ്ടു. തുടർന്ന്‌, എലൈൻ എന്നു പേരുള്ള ഒരു വലിയ ഉഷ്‌ണ​മേ​ഖലാ ചുഴലി​ക്കാറ്റ്‌ രൂപം​കൊ​ണ്ടു. ഫെബ്രു​വരി 20-ന്‌ അത്‌ ഇന്യാ​മ്പാ​നേ, സോഫാ​ളാ, മാനീക്കാ എന്നീ പ്രവി​ശ്യ​ക​ളിൽ വിനാ​ശ​ക​മായ രീതി​യിൽ മഴ പെയ്യാൻ ഇടയാക്കി. അങ്ങനെ വെള്ള​പ്പൊ​ക്ക​വും മരണവും വിനാ​ശ​വും ഒരു തുടർക്ക​ഥ​യാ​യി മാറി.

അങ്ങനെ​യി​രി​ക്കെ, ഫെബ്രു​വരി അവസാ​ന​ത്തോ​ടെ, ഷോക്വെ നഗരത്തി​ലും അതിനു ചുറ്റു​മുള്ള മുഴു പ്രദേ​ശ​ത്തും മുമ്പൊ​രി​ക്ക​ലും ഉണ്ടായി​ട്ടി​ല്ലാത്ത തരത്തി​ലുള്ള വെള്ള​പ്പൊ​ക്ക​മു​ണ്ടാ​യി. ഫെബ്രു​വരി 26 ശനിയാഴ്‌ച അർധരാ​ത്രി​യോ​ട​ടുത്ത്‌ വലിയ ഉരുൾപ്പൊ​ട്ട​ലു​ണ്ടാ​കു​മ്പോൾ സംഭവി​ക്കും പോലെ, പ്രളയ​ജലം അതിന്റെ പാതയി​ലു​ണ്ടാ​യി​രുന്ന സകലതി​നെ​യും അടി​ച്ചൊ​ഴു​ക്കി​ക്കൊണ്ട്‌ പാഞ്ഞെത്തി. “ഒരു അയൽക്കാ​രി ജനാല​യി​ലൂ​ടെ ഉച്ചത്തിൽ വിളി​ക്കു​ന്നതു കേട്ടാണ്‌ ഞങ്ങൾ ഉണർന്നത്‌,” 32 വയസ്സുള്ള ലൂയിഷ്‌ ഷിറ്റ്‌ലാ​ങ്‌ഗൂ എന്ന സാക്ഷി പറയുന്നു.

ഷിറ്റ്‌ലാ​ങ്‌ഗൂ വിവരി​ക്കു​ന്നു: “കിടക്ക​യിൽനിന്ന്‌ ചാടി​യെ​ണീറ്റ ഞങ്ങൾക്ക്‌ വെള്ളത്തി​ന്റെ ഉച്ചത്തി​ലുള്ള ഇരമ്പൽ കേൾക്കാ​മാ​യി​രു​ന്നു. ഇറങ്ങി​യോ​ടു​ന്ന​തി​നി​ട​യ്‌ക്ക്‌ ഞങ്ങൾ നിരവധി പാമ്പു​കളെ കണ്ടു. പുലർച്ചെ 6 മണി​യോ​ടെ ഞങ്ങൾ ഉയരം​കൂ​ടിയ ഒരു സ്ഥലത്തെത്തി. എന്നാൽ കുറച്ചു കഴിഞ്ഞ​പ്പോൾ നാലു പാടും വെള്ളം പൊങ്ങി​യ​തി​നാൽ ഞങ്ങൾക്കു മരങ്ങളിൽ കയറേ​ണ്ട​താ​യി വന്നു. ഞങ്ങളുടെ സംഘത്തിൽ 20 പേർ ഉണ്ടായി​രു​ന്നു.

“ആദ്യം പുരു​ഷ​ന്മാർ മരങ്ങളിൽ കയറി. അതിനു ശേഷം സ്‌ത്രീ​കൾ കുട്ടി​കളെ അവരുടെ കയ്യിൽ കൊടു​ത്തു. താഴെ വീഴാ​തി​രി​ക്കാ​നാ​യി അവരെ മരക്കൊ​മ്പു​മാ​യി ബന്ധിച്ചു. പിന്നെ സ്‌ത്രീ​കൾ കൊച്ചു കുഞ്ഞു​ങ്ങ​ളെ​യും കൊണ്ട്‌ മരങ്ങളിൽ കയറി​പ്പറ്റി. അവിടെ നിലക്കടല കൃഷി ചെയ്‌തി​രു​ന്നു​വെന്ന്‌ അറിയാ​മാ​യി​രു​ന്ന​തി​നാൽ ഞങ്ങൾ ഇടയ്‌ക്കി​ട​യ്‌ക്ക്‌ മരത്തിൽനി​ന്നി​റങ്ങി നിലക്ക​ട​ല​യ്‌ക്കാ​യി വെള്ളത്തി​ന​ടി​യിൽ പരതു​മാ​യി​രു​ന്നു.

“മൂന്നു ദിവസം കഴിഞ്ഞ​പ്പോൾ എല്ലാവ​രും ഷോ​ക്വെ​യി​ലേക്ക്‌ നടന്നു പോകാൻ തീരു​മാ​നി​ച്ചു. നെഞ്ചൊ​പ്പം വെള്ളമു​ണ്ടാ​യി​രു​ന്നു, മാത്രമല്ല ശക്തമായ ഒഴുക്കും. പോകുന്ന വഴിക്ക്‌ മരങ്ങളി​ലും പുരമു​ക​ളി​ലു​മൊ​ക്കെ നിരവധി പേർ ഇരിക്കു​ന്നതു ഞങ്ങൾ കണ്ടു. പിറ്റേന്ന്‌ വെള്ളം ഇറങ്ങി​യ​തി​നാൽ ട്രക്കു​കൾക്ക്‌ നഗരത്തി​ലേക്കു വന്ന്‌ ആളുക​ളെ​യും കൊണ്ട്‌ മാസീ​യാ​യി​ലേക്കു പോകാൻ കഴിഞ്ഞു.”

സാക്ഷി​ക​ളു​ടെ അഭയാർഥി ക്യാമ്പ്‌

മാർച്ച്‌ 4-ാം തീയതി യഹോ​വ​യു​ടെ സാക്ഷി​ക​ളു​ടെ ബ്രാഞ്ച്‌ ഓഫീസ്‌ ഒരു വിമാനം വാടക​യ്‌ക്കെ​ടുത്ത്‌ ദുരന്ത​ബാ​ധിത പ്രദേ​ശ​ത്തേക്ക്‌ പ്രതി​നി​ധി​കളെ അയച്ചു. ജനങ്ങളിൽ നല്ലൊരു ശതമാ​ന​വും മാസീ​യാ​യി​ലേക്കു പലായനം ചെയ്‌തി​രു​ന്നു. മാസീയാ ഒരു വലിയ അഭയാർഥി ക്യാമ്പാ​യി മാറി​യി​രു​ന്നു. പ്രളയ​ബാ​ധി​ത​രിൽ പലരും ഫ്‌ളൂ, വികല​പോ​ഷണം, മലമ്പനി, മറ്റു ദുരി​തങ്ങൾ എന്നിവ​മൂ​ലം കഷ്ടത അനുഭ​വി​ച്ചു.

ആ പ്രദേ​ശ​ത്തിന്‌ ഒരു യുദ്ധഭൂ​മി​യു​ടെ പ്രതി​ച്ഛാ​യ​യാണ്‌ ഉണ്ടായി​രു​ന്നത്‌. വിവിധ രാജ്യ​ങ്ങ​ളിൽ നിന്നുള്ള ഹെലി​കോ​പ്‌റ്റ​റു​കൾ ആകാശത്തെ മൂടി. അവ സാധനങ്ങൾ ഇറക്കാ​നാ​യി, ആവശ്യം പ്രമാ​ണിച്ച്‌ പെട്ടെന്ന്‌ ഉണ്ടാക്കി​യെ​ടുത്ത അവിടത്തെ റൺവേ​ക​ളിൽ പറന്നി​റങ്ങി. സാക്ഷി​ക​ളു​ടെ ദുരി​താ​ശ്വാ​സ സംഘം മാസീ​യാ​യിൽ എത്തിയ​പ്പോൾ പ്രളയ​ബാ​ധി​തർക്ക്‌ ഭക്ഷണം നൽകു​ന്ന​തി​നുള്ള ഏർപ്പാ​ടു​കൾ മാത്രമല്ല അവർ ചെയ്‌തത്‌. ഒരു ചെറിയ വൈദ്യ​സ​ഹായ കേന്ദ്ര​വും അവർ സ്ഥാപിച്ചു. എന്നാൽ അതിനു മുമ്പായി അവർ പ്രാ​ദേ​ശിക അധികാ​രി​ക​ളിൽനിന്ന്‌ അതിനുള്ള അനുമതി വാങ്ങി. സാക്ഷി​ക​ളു​ടെ മുൻ​കൈ​യെ​ടു​ത്തുള്ള ഈ പ്രവർത്ത​നത്തെ അവർ മുക്തക​ണ്‌ഠം പ്രശം​സി​ച്ചു.

700-ഓളം സാക്ഷി​ക​ളും മറ്റുള്ള​വ​രും താമസി​ച്ചി​രുന്ന സാക്ഷി​ക​ളു​ടെ ക്യാമ്പിൽ എല്ലാ ദിവസ​വും രാവിലെ 6:30-ന്‌ ഒരു ബൈബിൾ വാക്യം പരിചി​ന്തി​ച്ചി​രു​ന്നു. ക്രിസ്‌തീയ സഹോ​ദ​രി​മാർ പാകം ചെയ്യുന്ന ആഹാരം തയ്യാറാ​യി കഴിയു​മ്പോൾ കുടും​ബ​നാ​ഥ​ന്മാ​രു​ടെ പേരു വിളി​ക്കും. എത്ര പ്ലേറ്റ്‌ ഭക്ഷണം വേണ​മെന്ന്‌ ഓരോ​രു​ത്ത​രും അപ്പോൾ കൈവി​ര​ലു​കൾ ഉയർത്തി കാണി​ക്കും. തുടർന്ന്‌ ഭക്ഷണം നൽകും.

ക്യാമ്പി​ലെ എല്ലാ കാര്യ​ങ്ങ​ളും സുസം​ഘ​ടി​ത​മാ​യി​രു​ന്നു. ചിലർക്ക്‌ ആഹാര​സാ​ധ​നങ്ങൾ വാങ്ങാ​നാ​യി​രു​ന്നു നിയമ​ന​മെ​ങ്കിൽ കുടി​വെ​ള്ള​ത്തി​ന്റെ ശുചി​ത്വം ഉറപ്പു​വ​രു​ത്തൽ, കക്കൂസു​കൾ വൃത്തി​യാ​ക്കൽ തുടങ്ങി​യ​വ​യാ​യി​രു​ന്നു മറ്റു ചിലരു​ടെ നിയമ​നങ്ങൾ. സാക്ഷി​ക​ളു​ടെ നല്ല സംഘാ​ടനം ഗവൺമെന്റ്‌ അധികാ​രി​ക​ളു​ടെ ശ്രദ്ധയിൽ പെടാതെ പോയില്ല. അവർ ഇങ്ങനെ അഭി​പ്രാ​യ​പ്പെട്ടു: ‘ആയിരി​ക്കാൻ പറ്റിയ ഒരു നല്ല സ്ഥലമാണ്‌ ഇവിടം. ആർക്കും ആഹാരം കിട്ടാതെ പോകു​ന്നില്ല. ആരും ഒരു വഴക്കും ഉണ്ടാക്കു​ന്നു​മില്ല.’ ഒരു പ്രാ​ദേ​ശിക അധികാ​രി പറഞ്ഞു: ‘കാര്യങ്ങൾ എങ്ങനെ​യാണ്‌ നടക്കേ​ണ്ട​തെന്നു കാണാൻ എല്ലാവ​രും സാക്ഷി​ക​ളു​ടെ ക്യാമ്പ്‌ സന്ദർശി​ക്കേ​ണ്ട​താണ്‌.’

ദുരി​താ​ശ്വാ​സ കമ്മിറ്റി ഒരു ദിവസം ക്രിസ്‌തീയ മൂപ്പന്മാ​രെ​യെ​ല്ലാം വിളിച്ചു കൂട്ടി, വീടു​ക​ളും രാജ്യ​ഹാ​ളു​ക​ളും പുനർനിർമി​ക്കാ​നും പ്രളയ​ക്കെ​ടു​തി​കൾ അനുഭ​വി​ക്കു​ന്ന​വർക്ക്‌ മറ്റ്‌ അടിസ്ഥാന സംഗതി​കൾ ലഭ്യമാ​ക്കാ​നും ബ്രാഞ്ച്‌ ഓഫീസ്‌ ക്രമീ​ക​ര​ണങ്ങൾ ചെയ്‌തി​രി​ക്കു​ന്ന​താ​യി അറിയി​ച്ചു. പിറ്റേന്നു രാവിലെ, ബൈബിൾ വാക്യ പരിചി​ന്തന വേളയിൽ ഇതിനെ കുറി​ച്ചുള്ള അറിയി​പ്പു നടത്തി​യ​പ്പോൾ നീണ്ട കരഘോ​ഷ​മു​യർന്നു.

അധികൃ​തർ വലിയ രണ്ട്‌ കൂടാ​രങ്ങൾ നൽകി​യി​രു​ന്നെ​ങ്കി​ലും ക്യാമ്പി​ലു​ണ്ടാ​യി​രുന്ന പലരും അപ്പോ​ഴും വെളി​യിൽ കിടന്നാണ്‌ ഉറങ്ങി​യി​രു​ന്നത്‌. അതു​കൊണ്ട്‌ പ്രാ​ദേ​ശിക സഭയുടെ വക സ്ഥലത്ത്‌ ഒരു വലിയ രാജ്യ​ഹാൾ പണിയു​ന്ന​തിന്‌, പ്രളയ​ബാ​ധി​ത​രു​ടെ ഇടയിൽനിന്ന്‌ ഒരു സംഘത്തെ തിര​ഞ്ഞെ​ടു​ത്തു. ഈറ്റയും മടക്കു​ക​ളുള്ള സിങ്ക്‌ ഷീറ്റു​ക​ളും ഉപയോ​ഗി​ച്ചാണ്‌—മൊസാ​മ്പി​ക്കൻ ശൈലി—അത്‌ പണിതത്‌. 200 പേർക്കുള്ള സൗകര്യം അതിലു​ണ്ടാ​യി​രു​ന്നു. വെറും രണ്ടു ദിവസ​ത്തി​നു​ള്ളിൽ അതിന്റെ പണി പൂർത്തി​യാ​യി!

ഒറ്റപ്പെട്ടു പോയ​വരെ കണ്ടെത്തു​ന്നു

അതിനി​ട​യ്‌ക്ക്‌, മാർച്ച്‌ 5-ാം തീയതി, വെള്ളം ഏതാ​ണ്ടൊന്ന്‌ ഇറങ്ങി​ക്ക​ഴി​ഞ്ഞ​പ്പോൾ ആൽഡെയ്‌യ ഡാ ബേറാ​ഷെൻ പട്ടണത്തി​ലേക്കു പോകാ​നാ​യി ഒരു ദുരി​താ​ശ്വാ​സ സംഘത്തെ രൂപീ​ക​രി​ച്ചു. ആദ്യം വെള്ള​പ്പൊ​ക്കം ഉണ്ടാകുന്ന പ്രദേ​ശ​ങ്ങ​ളി​ലൊ​ന്നി​ലാണ്‌ അത്‌ സ്ഥിതി​ചെ​യ്യു​ന്നത്‌. അവിടെ 90-ഓളം സാക്ഷി​ക​ളുള്ള ഒരു സഭയു​ണ്ടാ​യി​രു​ന്നു. അവരെ​ക്കു​റിച്ച്‌ ഒരു അറിവും ഉണ്ടായി​രു​ന്നില്ല.

1,00,000-ത്തോളം ആളുകൾ താമസി​ക്കുന്ന ഷിഹാ​ക്കെ​ലാ​നി അഭയാർഥി ക്യാമ്പ്‌ പിന്നി​ട്ടാണ്‌ സംഘം അങ്ങോട്ടു പോയത്‌. റോഡി​ന്റെ—അതിന്റെ ചില ഭാഗങ്ങൾ ഒലിച്ചു​പോ​യി​രു​ന്നു—ഇരു വശങ്ങളി​ലും നോ​ക്കെ​ത്താ​ദൂ​ര​ത്തോ​ളം വെള്ളം പൊങ്ങി​ക്കി​ട​ന്നി​രു​ന്നു. സംഘത്തിൽ ഒരാൾ ഇങ്ങനെ അഭി​പ്രാ​യ​പ്പെട്ടു: “ഷോ​ക്വെ​യിൽ എത്തിയ ഞങ്ങളെ വല്ലാത്ത ഒരു ദൃശ്യ​മാണ്‌ വരവേ​റ്റത്‌. നഗരക​വാ​ട​ത്തി​ലുള്ള പല വീടു​ക​ളു​ടെ​യും മേൽക്കൂര വരെ അപ്പോ​ഴും വെള്ളമു​ണ്ടാ​യി​രു​ന്നു. വീടു​ക​ളിൽ ഏറിയ പങ്കും പ്രളയ​ജ​ല​ത്തിൽ അപ്പാടെ മുങ്ങി​പ്പോ​യി​രു​ന്നു. നേരം ഇരുട്ടി തുടങ്ങി​യി​രു​ന്നു. ആൽഡെയ്‌യ ഡാ ബേറാ​ഷെ​നിൽ എത്താൻ പിന്നെ​യും 25 കിലോ​മീ​റ്റർ കൂടി ഞങ്ങൾക്കു യാത്ര ചെയ്യേ​ണ്ട​തു​ണ്ടാ​യി​രു​ന്നു.”

ഒടുവിൽ സംഘം രാത്രി​യിൽ അവരുടെ ലക്ഷ്യസ്ഥാ​നത്ത്‌ എത്തി​ച്ചേർന്നു. സംഘത്തി​ലൊ​രാൾ അനുസ്‌മ​രി​ക്കു​ന്നു: “അടുത്ത​താ​യി എന്തു ചെയ്യണ​മെന്ന്‌ ആലോ​ചി​ച്ചു​കൊണ്ട്‌ ഞങ്ങൾ അവിടെ നിന്നു.” അപ്പോൾ “സഹോ​ദ​ര​ന്മാ​രേ!” എന്ന്‌ ഉറക്കെ വിളി​ച്ചു​കൊണ്ട്‌ കുറെ​പ്പേർ അവിടെ എത്തി. അവിട​മാ​കെ സന്തോഷം തുളു​മ്പുന്ന ഉച്ചത്തി​ലുള്ള ചിരി​കൊ​ണ്ടു നിറഞ്ഞു. രണ്ടു വാഹന​ങ്ങ​ളു​ടെ വെളിച്ചം കണ്ടപ്പോൾ തന്നെ അതു സഹോ​ദ​ര​ങ്ങ​ളാ​യി​രി​ക്കു​മെന്നു പ്രാ​ദേ​ശിക സാക്ഷികൾ കരുതി. അവർ മറ്റുള്ള​വ​രോട്‌ ഇതു പറയു​ക​യും ചെയ്‌തു. നിരീ​ക്ഷ​കർക്കെ​ല്ലാം വളരെ മതിപ്പു തോന്നി. അവർ പറഞ്ഞു: ‘ഈ ആളുകൾക്ക്‌ ശരിക്കും സ്‌നേ​ഹ​മുണ്ട്‌. അവർ ആഹാരം എത്തിക്കുക മാത്രമല്ല വന്നു കാണുക പോലും ചെയ്യുന്നു!’

തുടർന്നും സഹായം പ്രദാനം ചെയ്യുന്നു

ആൽഡെയ്‌യ ഡാ ബേറാ​ഷെ​നി​ലുള്ള സഹോ​ദ​ര​ങ്ങളെ മാസീ​യാ​യി​ലെ ക്യാമ്പി​ലേക്കു മാറ്റി. അവിടെ അവർക്ക്‌ ആഹാര​വും താമസ​സൗ​ക​ര്യ​വും വൈദ്യ​സ​ഹാ​യ​വും ലഭിച്ചു. അതിനി​ട​യിൽ മാസീ​യാ​യി​ലെ സ്ഥിതി​ഗ​തി​കൾ ഗുരു​തരം ആയി​ക്കൊ​ണ്ടി​രി​ക്കു​ക​യാ​യി​രു​ന്നു. ആഹാര​വും മരുന്നും ഇന്ധനവും എല്ലാം വായു​മാർഗം അയച്ചു​കൊ​ണ്ടി​രു​ന്ന​തി​നാൽ അവയ്‌ക്കു ദൗർല​ഭ്യം അനുഭ​വ​പ്പെട്ടു. മാപൂ​ട്ടോ​യു​മാ​യി കരമാർഗം ബന്ധം പുനഃ​സ്ഥാ​പി​ക്കേ​ണ്ടത്‌ അടിയ​ന്തി​ര​മാ​യി​രു​ന്നു. മാർച്ച്‌ 8-ാം തീയതി​യോ​ടെ ഇതിനു കഴിഞ്ഞു.

ഷൈ-ഷൈ വൻ നഗരം പൂർണ​മാ​യും വെള്ളത്തി​ലാ​യി​രു​ന്നു. നഗര​കേ​ന്ദ്ര​ത്തി​ന്റെ ചില ഭാഗങ്ങ​ളിൽ മൂന്നു മീറ്റർ വരെ വെള്ളമു​ണ്ടാ​യി​രു​ന്നു! അവി​ടെ​യുള്ള സഹോ​ദ​ര​ങ്ങളെ സഹായി​ക്കു​ന്ന​തി​നാ​യി സാക്ഷികൾ ഒരു ദുരി​താ​ശ്വാ​സ കമ്മിറ്റി രൂപീ​ക​രി​ച്ചു. സോഫാ​ളാ, മാനീക്കാ എന്നീ പ്രവി​ശ്യ​ക​ളിൽ സഹായം ആവശ്യ​മാ​യി​രി​ക്കു​ന്ന​വർക്കു​വേണ്ടി കരുതാ​നും കമ്മിറ്റി​കൾ സംഘടി​പ്പി​ക്ക​പ്പെട്ടു.

മറ്റു രാജ്യ​ങ്ങ​ളി​ലുള്ള സാക്ഷി​ക​ളിൽനിന്ന്‌ ദുരി​താ​ശ്വാ​സ സാധനങ്ങൾ എത്തി​ച്ചേർന്നു. ഉദാഹ​ര​ണ​ത്തിന്‌, ദക്ഷിണാ​ഫ്രിക്ക ബ്രാഞ്ച്‌ ടൺ കണക്കിന്‌ വസ്‌ത്ര​ങ്ങ​ളും കമ്പിളി​ക​ളും മറ്റു സാധന​ങ്ങ​ളും അയച്ചു കൊടു​ത്തു. ന്യൂ​യോർക്കി​ലെ ബ്രുക്ലി​നി​ലുള്ള യഹോ​വ​യു​ടെ സാക്ഷി​ക​ളു​ടെ ലോകാ​സ്ഥാ​നം ദുരന്ത​ബാ​ധി​തരെ സഹായി​ക്കു​ന്ന​തി​നു വേണ്ടി ഫണ്ടുകൾ ലഭ്യമാ​ക്കി.

വെള്ളം വേണ്ടത്ര താഴു​ക​യും പാർപ്പി​ടം നഷ്ടപ്പെ​ട്ട​വ​രു​ടെ കണക്കെ​ടു​ക്കു​ക​യും ചെയ്‌തു കഴിഞ്ഞ​പ്പോൾ, വീടു​ക​ളു​ടെ​യും രാജ്യ​ഹാ​ളു​ക​ളു​ടെ​യും പുനർനിർമാണ പ്രവർത്തനം ആരംഭി​ച്ചു. ഒരു പുനർനിർമാണ കമ്മിറ്റി രൂപീ​ക​രി​ക്ക​പ്പെട്ടു. നിരവധി സന്നദ്ധ​സേ​വകർ ഈ കമ്മിറ്റി​യെ പിന്തു​ണച്ചു. ഇവർ ഉടനടി പ്രവർത്ത​ന​മാ​രം​ഭി​ച്ചു. അന്നു മുതൽ 270-ലേറെ വീടു​ക​ളും കുറഞ്ഞ​പക്ഷം അഞ്ചു രാജ്യ​ഹാ​ളു​ക​ളും പുനർനിർമി​ക്ക​പ്പെ​ട്ടി​രി​ക്കു​ന്നു.

സാക്ഷി​ക​ളാ​യ സന്നദ്ധ​സേ​വകർ പണിത ആദ്യ ഭവനങ്ങൾ ഉയർന്നു​വ​രാൻ തുടങ്ങി​യ​പ്പോൾ ആളുകൾ അതു ശ്രദ്ധി​ക്കാ​നി​ട​യാ​യി. ഒരു അയൽക്കാ​രി ഇങ്ങനെ അഭി​പ്രാ​യ​പ്പെട്ടു: ‘നിങ്ങൾ ജീവനുള്ള ഒരു ദൈവ​ത്തെ​യാണ്‌ ആരാധി​ക്കു​ന്നത്‌. ഞങ്ങളുടെ ഇടയന്മാർ ദുരി​ത​മ​നു​ഭ​വി​ക്കുന്ന അവരുടെ ആടുകളെ മറന്നു​പോ​യി​രി​ക്കു​ന്നു. എന്നാൽ നിങ്ങൾക്കി​താ മനോ​ഹ​ര​മായ വീടുകൾ ലഭിക്കു​ന്നു.’ അത്തരം പ്രദേ​ശ​ങ്ങ​ളിൽ യഹോ​വ​യു​ടെ സാക്ഷികൾ പ്രസം​ഗി​ക്കുന്ന രാജ്യ​സ​ന്ദേശം കേൾക്കാൻ അനേക​രും മനസ്സൊ​രു​ക്കം കാണി​ച്ചി​രി​ക്കു​ന്നു; അനേകം ബൈബിൾ അധ്യയ​നങ്ങൾ തുടങ്ങാ​നും കഴിഞ്ഞി​രി​ക്കു​ന്നു.—മത്തായി 24:14; വെളി​പ്പാ​ടു 21:3-5.

സാക്ഷി​ക​ളിൽ അനേകർക്കും അവരുടെ ഭൗതിക സ്വത്തുക്കൾ മുഴുവൻ നഷ്ടമായി. എന്നാൽ ആർക്കും വിശ്വാ​സം നഷ്ടമാ​യില്ല. പകരം, യഹോ​വ​യാം ദൈവ​ത്തി​ലും ലോക​വ്യാ​പക സഹോ​ദ​ര​വർഗ​ത്തി​ലും ഉള്ള അവരുടെ വിശ്വാ​സം ബലിഷ്‌ഠ​മാ​ക്ക​പ്പെ​ടു​ക​യാ​ണു ചെയ്‌തത്‌. ഈ കൊടും വിപത്തി​നോട്‌ സത്വരം പ്രതി​ക​രിച്ച സ്‌നേഹം നിറഞ്ഞ തങ്ങളുടെ അന്തർദേ​ശീയ സഹോ​ദ​ര​വർഗ​ത്തോട്‌ അവർ നന്ദിയു​ള്ള​വ​രാണ്‌. യഹോ​വ​യു​ടെ ആർദ്ര കരുത​ലും സംരക്ഷ​ണ​വും അവർ വ്യക്തി​പ​ര​മായ ഒരു വിധത്തിൽ അനുഭ​വി​ച്ച​റി​ഞ്ഞി​രി​ക്കു​ന്നു. ‘യഹോവ വലിയവൻ’ എന്ന ബൈബി​ളി​ന്റെ പ്രസ്‌താ​വന അവർ എന്നും ഓർമി​ക്കും.—സങ്കീർത്തനം 48:1. (g01 4/22)

[22-ാം പേജിലെ ചിത്രം]

ഷൈ-ഷൈ നഗരം ചെളി​വെ​ള്ള​ത്തിൽ മുങ്ങി​പ്പോ​യി

[23-ാം പേജിലെ ചിത്രം]

ദുരിതാശ്വാസ സാധനങ്ങൾ വിമാന മാർഗം എത്തി​ച്ചേർന്നു

[24-ാം പേജിലെ ചിത്രം]

സാക്ഷികളുടെ ദുരി​താ​ശ്വാ​സ സംഘം ഒരു വൈദ്യ​സ​ഹായ കേന്ദ്രം സ്ഥാപിച്ചു

[24-ാം പേജിലെ ചിത്രം]

പുതിയ ഭവനങ്ങൾ തുടർന്നും നിർമി​ക്ക​പ്പെ​ട്ടു​കൊ​ണ്ടി​രി​ക്കു​ന്നു

[24-ാം പേജിലെ ചിത്രം]

ഏറ്റവും വലിയ അഭയാർഥി ക്യാമ്പിൽ 1,00,000 ആളുകൾ ഉണ്ടായി​രു​ന്നു