ഭയത്തിന്റെ തടവറ​യിൽ എന്തു​കൊണ്ട്‌ ഇത്ര​യേറെ പേർ?

ഭീതി​യു​ടെ ഒരു അന്തരീക്ഷം മനുഷ്യ​രാ​ശി​യെ വലയം ചെയ്യുന്നു. അദൃശ്യ​മെ​ങ്കി​ലും അനുഭ​വ​വേ​ദ്യ​വും മിക്ക​പ്പോ​ഴും ശ്രദ്ധി​ക്ക​പ്പെ​ടാ​തെ​പോ​കു​ന്ന​തും ആയ ഈ സ്ഥിതി​വി​ശേഷം എല്ലാവ​രെ​യും​തന്നെ ബാധി​ക്കു​ന്നു. ഇത്തരം ഒരു അവസ്ഥ സംജാ​ത​മാ​കാ​നുള്ള കാരണം എന്താണ്‌? വീടു​വി​ട്ടി​റ​ങ്ങു​മ്പോൾ ചിലർക്കു പേടി തോന്നു​ന്നത്‌ എന്തു​കൊണ്ട്‌? പലർക്കും ജോലി​സ്ഥ​ലത്ത്‌ അരക്ഷി​ത​ത്വം തോന്നു​ന്ന​തി​ന്റെ കാരണ​മോ? മക്കളുടെ സുരക്ഷി​ത​ത്വ​ത്തെ​പ്രതി അനേക​രും ഉത്‌ക​ണ്‌ഠ​പ്പെ​ടു​ന്നത്‌ എന്തു​കൊ​ണ്ടാണ്‌? ആളുകൾ സ്വന്തം ഭവനത്തിൽപ്പോ​ലും ഭയത്തിൽ കഴിഞ്ഞു​കൂ​ടാൻ ഇടയാ​ക്കുന്ന ചില സാഹച​ര്യ​ങ്ങൾ ഏവ?

ഭയം ജനിപ്പി​ക്കുന്ന അസംഖ്യം സംഗതി​കൾ ഉണ്ടെങ്കി​ലും നഗരങ്ങ​ളി​ലെ അക്രമം, ലൈം​ഗിക ദുഷ്‌പെ​രു​മാ​റ്റം, ബലാത്സം​ഗം, വീട്ടി​നു​ള്ളി​ലെ അക്രമം എന്നിങ്ങനെ നിരന്തരം ആളുകളെ വേട്ടയാ​ടാൻ സാധ്യ​ത​യുള്ള നാലു സംഗതി​ക​ളെ​ക്കു​റി​ച്ചു നമുക്കി​പ്പോൾ ചിന്തി​ക്കാം. ആദ്യം​തന്നെ നഗരങ്ങ​ളി​ലെ അക്രമം. മനുഷ്യ​രിൽ പകുതി​യോ​ള​വും ഇന്നു നഗരങ്ങ​ളിൽ ജീവി​ക്കു​ന്ന​തി​നാൽ ഈ വിഷയം വിശേ​ഷാൽ കാലോ​ചി​ത​മാണ്‌.

നഗരങ്ങ​ളിൽ പതിയി​രി​ക്കുന്ന അപകടങ്ങൾ

സാധ്യ​ത​യ​നു​സ​രിച്ച്‌ സംരക്ഷ​ണ​ത്തി​നു​വേണ്ടി ആയിരു​ന്നു ആദ്യകാ​ലത്തു നഗരങ്ങൾ നിർമി​ച്ചി​രു​ന്നത്‌. എന്നാൽ ഇന്ന്‌ അവിട​ങ്ങ​ളിൽ അപകടം പതിയി​രി​ക്കു​ന്ന​താ​യി അനേകർ ഭയപ്പെ​ടു​ന്നു. ഒരിക്കൽ സംരക്ഷണം നൽകി​യി​രു​ന്നവ ഇന്നു സംഭീ​തി​യു​ടെ കേന്ദ്ര​ങ്ങ​ളാണ്‌. തിര​ക്കേ​റിയ നഗര​കേ​ന്ദ്രങ്ങൾ പിടി​ച്ചു​പ​റി​ക്കാ​രു​ടെ താവള​ങ്ങ​ളാ​യി​ത്തീർന്നി​രി​ക്കു​ന്നു. ചില നഗരങ്ങ​ളിൽ, ആവശ്യ​ത്തി​നു വഴിവി​ള​ക്കു​ക​ളും പോലീസ്‌ സഹായ​വും ഇല്ലാത്ത ദരിദ്ര മേഖലകൾ തികച്ചും അപകട​ക​ര​മാണ്‌.

മനുഷ്യർക്കു ഭയം തോന്നു​ന്ന​തി​നു ചില​പ്പോ​ഴൊ​ക്കെ തക്ക കാരണ​മുണ്ട്‌—അക്രമ​ങ്ങ​ളിൽ മരിച്ചു​വീ​ഴു​ന്ന​വ​രു​ടെ എണ്ണം ഞെട്ടി​ക്കു​ന്ന​താണ്‌. ലോകാ​രോ​ഗ്യ സംഘട​ന​യു​ടെ ഒരു റിപ്പോർട്ട്‌ അനുസ​രിച്ച്‌ ഓരോ വർഷവും 16 ലക്ഷം പേരാണ്‌ ലോക​മെ​മ്പാ​ടും ആ വിധത്തിൽ മരണമ​ട​യു​ന്നത്‌. ആഫ്രി​ക്ക​യിൽ പ്രതി​വർഷം, ഒരു ലക്ഷം ആളുക​ളിൽ 60.9 പേർക്കു വീതം അക്രമ​ത്തിൽ ജീവൻ നഷ്ടമാ​കു​ന്ന​താ​യി കണക്കാ​ക്ക​പ്പെ​ടു​ന്നു.

ഒരിക്കൽ സുരക്ഷി​ത​ത്വം പ്രദാനം ചെയ്‌തി​രുന്ന അനേകം ആളുക​ളും സ്ഥലങ്ങളും സംഘട​ന​ക​ളും ഇന്ന്‌ അതിന്‌ ഒരു ഭീഷണി​യാ​യി കാണ​പ്പെ​ടു​ന്നു. ഉദാഹ​ര​ണ​ത്തിന്‌, അനേകം കളിസ്ഥ​ല​ങ്ങ​ളും സ്‌കൂ​ളു​ക​ളും കടകളും ഇപ്പോൾ വൻ കുറ്റകൃ​ത്യ​ങ്ങ​ളു​ടെ പേടി​പ്പെ​ടു​ത്തുന്ന വിളനി​ല​ങ്ങ​ളാ​യി മാറി​യി​രി​ക്കു​ന്നു. സംരക്ഷണം നൽകേ​ണ്ട​വ​രായ മതനേ​താ​ക്ക​ളും സാമൂ​ഹിക പ്രവർത്ത​ക​രും അധ്യാ​പ​ക​രും ചില​പ്പോ​ഴൊ​ക്കെ വിശ്വാ​സ​വഞ്ചന കാണി​ച്ചി​രി​ക്കു​ന്നു. ചിലർ കുട്ടി​ക​ളോ​ടു മോശ​മാ​യി പെരു​മാ​റു​ന്നതു സംബന്ധി​ച്ചു കേൾക്കു​മ്പോൾ മക്കളെ മറ്റുള്ള​വ​രു​ടെ സംരക്ഷ​ണ​യിൽ വിടാൻ മാതാ​പി​താ​ക്കൾ മടിക്കു​ന്നു. ജനത്തിനു സുരക്ഷ പ്രദാനം ചെയ്യേണ്ട പോലീ​സു​കാർതന്നെ ചില നഗരങ്ങ​ളിൽ അഴിമ​തി​യി​ലും അധികാര ദുർവി​നി​യോ​ഗ​ത്തി​ലും മുന്നി​ട്ടു​നിൽക്കു​ന്നു. ഇനി “സുരക്ഷാ” ഭടന്മാ​രു​ടെ കാര്യ​മോ? ആഭ്യന്തര യുദ്ധങ്ങ​ളെ​ക്കു​റി​ച്ചുള്ള ഓർമകൾ ചില രാജ്യ​ങ്ങ​ളിൽ ആളുക​ളു​ടെ മനസ്സിൽ ഇന്നും ഒരു കനലായി എരിഞ്ഞു​കൊ​ണ്ടി​രി​ക്കു​ന്നു. അന്നു പട്ടാള​ക്കാർ അറസ്റ്റു ചെയ്‌തു​കൊ​ണ്ടു​പോയ തങ്ങളുടെ പ്രിയ​പ്പെ​ട്ട​വരെ പിന്നീ​ടൊ​രി​ക്ക​ലും അവർക്കു കാണാൻ കഴിഞ്ഞി​ട്ടില്ല. അങ്ങനെ, ലോക​ത്തി​ന്റെ പല ഭാഗങ്ങ​ളി​ലും പോലീ​സു​കാ​രും പട്ടാള​ക്കാ​രും ഭയത്തിന്റെ കാഠി​ന്യം കുറയ്‌ക്കു​ന്ന​തി​നു​പ​കരം അതിന്‌ ആക്കം കൂട്ടി​യി​രി​ക്കു​ന്നു.

“ലാറ്റിൻ അമേരി​ക്ക​യു​ടെ തലസ്ഥാന നഗരത്തിൽ വസിക്കു​ന്നവർ സ്ഥിരം ഭയത്തിൽ ജീവി​ക്കു​ന്നു. ലോക​ത്തിൽ ഏറ്റവും അപകട​ക​ര​മായ ചില സ്ഥിതി​വി​ശേ​ഷ​ങ്ങ​ളാണ്‌ അവർ അഭിമു​ഖീ​ക​രി​ക്കു​ന്നത്‌. വിസ്‌തൃ​ത​മായ ഈ ദേശത്ത്‌ ഓരോ വർഷവും ഏകദേശം 1,40,000 പേർ അക്രമ​ത്തിൽ മരിക്കു​ന്നു. മൂന്നി​ലൊ​ന്നു​പേർ നേരി​ട്ടോ അല്ലാ​തെ​യോ അക്രമ​ങ്ങൾക്ക്‌ ഇരയാ​കു​ക​യും ചെയ്യുന്നു” എന്ന്‌ ഭയത്തിന്റെ പൗരന്മാർ—ലാറ്റിൻ അമേരി​ക്കൻ നഗരങ്ങ​ളി​ലെ അക്രമം (ഇംഗ്ലീഷ്‌) എന്ന പുസ്‌തകം പറയുന്നു. ലോക​ത്തി​ന്റെ മറ്റു ഭാഗങ്ങ​ളി​ലും തലസ്ഥാന നഗരികൾ കൂടെ​ക്കൂ​ടെ രാഷ്‌ട്രീയ പ്രതി​ഷേ​ധ​ങ്ങൾക്കു വേദി​യാ​കു​ന്നു. അത്തരം പ്രതി​ഷേ​ധങ്ങൾ അക്രമാ​സ​ക്ത​മാ​യി മാറു​മ്പോൾ കടകൾ കൊള്ള​യ​ടി​ച്ചു​കൊണ്ട്‌ അനേക​രും സാഹച​ര്യം മുത​ലെ​ടു​ക്കു​ന്നു. അതു ക്രമസ​മാ​ധാ​നം തകരാ​റി​ലാ​ക്കു​ന്നു. കോപാ​ന്ധ​രായ ജനക്കൂട്ടം നഗരങ്ങ​ളി​ലെ വ്യാപാ​രി​ക​ളു​ടെ​മേൽ ആക്രമണം അഴിച്ചു​വി​ട്ടേ​ക്കാം.

സമ്പന്നരു​ടെ​യും ദരി​ദ്ര​രു​ടെ​യും ജീവി​ത​നി​ല​വാ​ര​ങ്ങ​ളിൽ ഉണ്ടായി​ട്ടുള്ള വൻ വിടവ്‌ അനേകം രാജ്യ​ങ്ങ​ളി​ലും ആളുക​ളിൽ നീരസം നുരഞ്ഞു​പൊ​ന്താൻ ഇടയാ​ക്കി​യി​രി​ക്കു​ന്നു. അടിസ്ഥാന ആവശ്യ​ങ്ങൾക്കു​പോ​ലും ഗതിയി​ല്ലാത്ത ജനവർഗങ്ങൾ സമ്പന്നരെ കൊള്ള​യ​ടി​ച്ചി​രി​ക്കു​ന്നു. ചില നഗരങ്ങ​ളിൽ ഇതുവരെ അങ്ങനെ സംഭവി​ച്ചി​ട്ടി​ല്ലെ​ങ്കി​ലും, അവിട​ങ്ങ​ളി​ലെ സാഹച​ര്യം തുടി​ച്ചു​കൊ​ണ്ടി​രി​ക്കുന്ന ഒരു ടൈം​ബോം​ബി​നു സമാന​മാണ്‌—അതു പൊട്ടി​ത്തെ​റി​ക്കു​മെന്ന്‌ ഉറപ്പാണ്‌, എപ്പോ​ഴാ​ണെന്ന്‌ അറിയി​ല്ലെ​ന്നു​മാ​ത്രം.

മോഷ്ടാ​ക്ക​ളു​ടെ​യും വിപ്ലവ​കാ​രി​ക​ളു​ടെ​യും ഭീഷണി പോരാ​ഞ്ഞി​ട്ടെ​ന്ന​വണ്ണം, ഉത്‌കണ്‌ഠ ഉളവാ​ക്കുന്ന മറ്റു സംഗതി​കൾ ഭയത്തിന്റെ അന്തരീ​ക്ഷത്തെ ഊട്ടി​വ​ളർത്തു​ന്നു.

ലൈം​ഗിക ദുഷ്‌പെ​രു​മാ​റ്റം സൃഷ്ടി​ക്കുന്ന ഭീതി

ചൂളമടി, അശ്ലീല ആംഗ്യങ്ങൾ, കാമ​ക്കൊ​തി പൂണ്ട നോട്ടങ്ങൾ എന്നിവ ലക്ഷക്കണ​ക്കി​നു സ്‌ത്രീ​കൾക്ക്‌ എന്നും ഒരു പേടി​സ്വ​പ്‌ന​മാണ്‌. ഏഷ്യാ വീക്ക്‌ ഇങ്ങനെ പറയുന്നു: “ജപ്പാനി​ലെ നാലു സ്‌ത്രീ​ക​ളിൽ ഒരാൾവീ​തം പൊതു​സ്ഥ​ല​ങ്ങ​ളിൽവെച്ചു ലൈം​ഗിക ദുഷ്‌പെ​രു​മാ​റ്റ​ങ്ങൾക്കു വിധേ​യ​രാ​കു​ന്നു. അവയിൽ 90 ശതമാ​ന​വും സംഭവി​ക്കു​ന്നതു ട്രെയി​നിൽവെ​ച്ചാണ്‌. . . . അത്തരം പെരു​മാ​റ്റ​ങ്ങൾക്കു വിധേ​യ​രാ​കു​ന്ന​വ​രിൽ 2 ശതമാനം മാത്രമേ എന്തെങ്കി​ലു​മൊ​ക്കെ നടപടി​കൾ സ്വീക​രി​ക്കു​ന്നു​ള്ളൂ. ദുഷ്‌പ്ര​വൃ​ത്തി​ക്കാ​രന്റെ പ്രതി​ക​രണം സംബന്ധിച്ച ഭയമാണ്‌ തങ്ങൾ മൗനം പാലി​ക്കു​ന്ന​തി​ന്റെ പ്രധാന കാരണ​മെന്ന്‌ മിക്കവ​രും അഭി​പ്രാ​യ​പ്പെട്ടു.”

ഇന്ത്യയിൽ ‘പൂവാ​ല​ശ​ല്യം’ കുതി​ച്ചു​യർന്നി​രി​ക്കു​ന്നു. ഇവി​ടെ​യുള്ള ഒരു പത്ര​പ്ര​വർത്തക പറയുന്നു: “വീട്ടിൽനി​ന്നു പുറത്തി​റ​ങ്ങി​യാൽ ഉടൻ ഭയം സ്‌ത്രീ​കളെ ഗ്രസി​ക്കു​ന്നു. . . . ഓരോ അടി മുന്നോ​ട്ടു വെക്കു​മ്പോ​ഴും മാനം​കെ​ടു​ത്തുന്ന പെരു​മാ​റ്റ​ങ്ങ​ളും അസഭ്യ​മായ കമന്റടി​ക​ളും അവൾ നേരി​ടു​ന്നു.” താരത​മ്യേന സുരക്ഷി​ത​മായ തെരു​വു​കൾ ഉള്ളതിൽ അഭിമാ​നം​കൊ​ള്ളുന്ന ഒരു ഇന്ത്യൻ നഗരത്തിൽനി​ന്നു​ള്ള​താണ്‌ പിൻവ​രുന്ന റിപ്പോർട്ട്‌: “[ഈ നഗരത്തി​ലെ] പ്രശ്‌നം തെരു​വു​ക​ളി​ലല്ല, ഓഫീ​സു​ക​ളി​ലാണ്‌. . . . സർവേ​യിൽ പങ്കെടുത്ത 35 ശതമാനം സ്‌ത്രീ​കൾ, ജോലി​സ്ഥ​ലത്തു തങ്ങൾ ലൈം​ഗിക ദുഷ്‌പെ​രു​മാ​റ്റ​ത്തി​നു വിധേ​യ​രാ​യി​ട്ടു​ണ്ടെന്നു വെളി​പ്പെ​ടു​ത്തി. . . . ജോലി​സ്ഥ​ലത്തെ ലൈം​ഗിക ദുഷ്‌പെ​രു​മാ​റ്റം സംബന്ധിച്ച ഭയം നിമിത്തം, . . . സ്‌ത്രീ​ക​ളോ​ടു​മാ​ത്രം ഇടപഴ​കേ​ണ്ടി​വ​രുന്ന, വരുമാ​നം കുറഞ്ഞ ജോലി​കൾ സ്വീക​രി​ക്കാൻ തങ്ങൾ ഇഷ്ടപ്പെ​ടു​ന്ന​താ​യി 52 ശതമാനം സ്‌ത്രീ​കൾ പറഞ്ഞു.”

ബലാത്സം​ഗ​ഭീ​തി

സ്‌ത്രീ​ക​ളു​ടെ ഭയം അവർക്കു മാന്യത കൈ​മോ​ശം​വ​രുന്ന കാര്യ​ങ്ങ​ളിൽമാ​ത്രം ഒതുങ്ങി​നിൽക്കു​ന്നില്ല. ലൈം​ഗിക ദുഷ്‌പെ​രു​മാ​റ്റ​ത്തിൽ ചില​പ്പോൾ ബലാത്സംഗ ഭീഷണി​യും ഉൾപ്പെ​ട്ടേ​ക്കാം. അനേകം സ്‌ത്രീ​ക​ളും ബലാത്സം​ഗത്തെ കൊല​പാ​ത​ക​ത്തെ​ക്കാൾ ഭയപ്പെ​ടു​ന്നു, ഇതു സ്വാഭാ​വി​ക​മാണ്‌. ചില​പ്പോൾ ഒരു സ്‌ത്രീ യാദൃ​ച്ഛി​ക​മാ​യി ഒരു സ്ഥലത്തു തനിച്ച്‌ ആയി​പ്പോ​യേ​ക്കാം. താൻ ബലാത്സം​ഗം ചെയ്യ​പ്പെ​ടു​മോ​യെന്ന ഭയം പെട്ടെന്ന്‌ അവളെ വരിഞ്ഞു​മു​റു​ക്കു​ന്നു. തനിക്കു പരിച​യ​മോ വിശ്വാ​സ​മോ ഇല്ലാത്ത ഒരു മനുഷ്യ​നെ അവൾ കണ്ടേക്കാം. ‘അയാൾ എന്താണ്‌ ചെയ്യാൻ പോകു​ന്നത്‌? ഞാൻ എവി​ടേക്ക്‌ ഓടും? അലറി വിളി​ച്ചാ​ലോ?’ എന്നൊക്കെ ചിന്തി​ച്ചു​കൊണ്ട്‌ സംഭ്രാ​ന്തി​യോ​ടെ സാഹച​ര്യം വിലയി​രു​ത്താൻ ശ്രമി​ക്കവേ അവളുടെ ഹൃദയ​മി​ടിപ്പ്‌ ഉയരുന്നു. കൂടെ​ക്കൂ​ടെ ഉണ്ടാകുന്ന അത്തരം അനുഭ​വങ്ങൾ സ്‌ത്രീ​ക​ളു​ടെ ആരോ​ഗ്യം കാർന്നു​തി​ന്നു​ന്നു. അത്തരം ഭയപ്പാ​ടു​കൾ നിമിത്തം അനേകർ നഗരങ്ങ​ളിൽ ജീവി​ക്കു​ന്ന​തോ അവിടം സന്ദർശി​ക്കു​ന്ന​തോ ഒഴിവാ​ക്കു​ന്നു.

സ്‌ത്രീ​ഭ​യം (ഇംഗ്ലീഷ്‌) എന്ന പുസ്‌തകം ഇങ്ങനെ പറയുന്നു: “അനേകം സ്‌ത്രീ​കളെ സംബന്ധി​ച്ചും ഭയം, ഉത്‌കണ്‌ഠ, മനഃ​ക്ലേശം എന്നിവ നഗരജീ​വി​ത​ത്തി​ന്റെ അവിഭാ​ജ്യ ഘടകങ്ങ​ളാണ്‌. ബലാത്സം​ഗം ചെയ്യ​പ്പെ​ടു​മെ​ന്നുള്ള ഭയം, സദാ ജാഗരൂ​ക​രും ശ്രദ്ധാ​ലു​ക്ക​ളും കരുത​ലു​ള്ള​വ​രും ആയിരി​ക്ക​ണ​മെന്നു ചിന്തി​ക്കാൻ സ്‌ത്രീ​കളെ നിർബ​ന്ധി​ത​രാ​ക്കുന്ന ഒരു വികാ​ര​മാണ്‌. പ്രത്യേ​കി​ച്ചു രാത്രി​യിൽ ആരെങ്കി​ലും ഒരു സ്‌ത്രീ​യു​ടെ പിന്നാലെ വന്നാൽ കടുത്ത ഉത്‌കണ്‌ഠ അവളെ ഗ്രസി​ക്കു​ന്ന​തി​നും ആ ഭയം ഇടയാ​ക്കു​ന്നു. സ്‌ത്രീ​കൾ ആ ഭയത്തിൽനിന്ന്‌ ഒരിക്ക​ലും പൂർണ​മാ​യി സ്വത​ന്ത്ര​രാ​കു​ന്നില്ല.”

അനേകം സ്‌ത്രീ​ക​ളും അക്രമാ​സ​ക്ത​മായ കുറ്റകൃ​ത്യ​ത്തിന്‌ ഇരയാ​കു​മ്പോൾ, എല്ലാ സ്‌ത്രീ​ക​ളും​തന്നെ അക്രമം സംബന്ധിച്ച ഭയത്തിൽ ജീവി​ക്കു​ന്ന​വ​രാണ്‌. ഐക്യ​രാ​ഷ്‌ട്ര​ങ്ങ​ളു​ടെ ഒരു പ്രസി​ദ്ധീ​ക​ര​ണ​മായ ദ സ്റ്റേറ്റ്‌ ഓഫ്‌ വേൾഡ്‌ പോപ്പു​ലേഷൻ 2000 ഇപ്രകാ​രം പറയുന്നു: “ലോക​മെ​മ്പാ​ടും കുറഞ്ഞത്‌ മൂന്നു സ്‌ത്രീ​ക​ളിൽ ഒരാൾവീ​തം മർദന​ത്തി​നോ നിർബ​ന്ധി​ച്ചുള്ള ലൈം​ഗി​ക​ബ​ന്ധ​ത്തി​നോ മറ്റേ​തെ​ങ്കി​ലും വിധത്തി​ലുള്ള ദ്രോ​ഹ​ത്തി​നോ ഇരയാ​കു​ന്നുണ്ട്‌, മിക്ക​പ്പോ​ഴും ഈ ദുഷ്‌കൃ​ത്യ​ങ്ങൾ ചെയ്യു​ന്ന​താ​കട്ടെ അവർക്ക്‌ അറിയാ​വുന്ന ഒരു വ്യക്തി​യും.” ഭീതി​യു​ടെ കരി​മേ​ഘങ്ങൾ കൂടുതൽ മേഖല​ക​ളി​ലേക്കു വ്യാപി​ച്ചി​രി​ക്കു​ക​യാ​ണോ? സ്വന്തം ഭവനങ്ങ​ളിൽ ആളുകൾ ഭയത്തിൽ കഴിഞ്ഞു​കൂ​ടു​ന്നത്‌ എത്ര​ത്തോ​ളം സാധാ​ര​ണ​മാണ്‌?

വീട്ടിലെ അക്രമം സംബന്ധിച്ച ഭയം

ഭാര്യയെ മർദിച്ച്‌ കീഴ്‌പെ​ടു​ത്തുക എന്നതു ലോക​ത്തി​ന്റെ എല്ലാ ഭാഗങ്ങ​ളി​ലും നടക്കുന്ന കടുത്ത അനീതി​യാണ്‌. വീടിന്റെ സ്വകാ​ര്യ​ത​യ്‌ക്കു​ള്ളിൽ അരങ്ങേ​റുന്ന ഈ ദുഷ്‌കൃ​ത്യം അനേക സ്ഥലങ്ങളി​ലും അടുത്ത കാലത്തു മാത്ര​മാണ്‌ ഒരു കുറ്റകൃ​ത്യ​മാ​യി അംഗീ​ക​രി​ക്ക​പ്പെ​ട്ടത്‌. “ഇന്ത്യയിൽ കുറഞ്ഞത്‌ 45 ശതമാനം സ്‌ത്രീ​കളെ ഭർത്താ​ക്ക​ന്മാർ അടിക്കു​ക​യോ തൊഴി​ക്കു​ക​യോ മർദി​ക്കു​ക​യോ ചെയ്യുന്നു” എന്ന്‌ ഇവി​ടെ​നി​ന്നുള്ള ഒരു റിപ്പോർട്ട്‌ ചൂണ്ടി​ക്കാ​ട്ടു​ന്നു. ഇണയിൽനി​ന്നുള്ള ദ്രോഹം ആഗോ​ള​മാ​യി കാണ​പ്പെ​ടുന്ന ഗുരു​ത​ര​മായ ആരോഗ്യ ഭീഷണി​യാണ്‌. കാറപ​ക​ടങ്ങൾ, പിടി​ച്ചു​പറി, ബലാത്സം​ഗങ്ങൾ എന്നിവ​യ്‌ക്ക്‌ ഇരയാ​കുന്ന മൊത്തം സ്‌ത്രീ​ക​ളെ​ക്കാൾ കൂടുതൽ സ്‌ത്രീ​കൾ വീട്ടി​നു​ള്ളി​ലെ അക്രമ​ത്താൽമാ​ത്രം ദ്രോ​ഹി​ക്ക​പ്പെ​ടു​ന്നു​ണ്ടെ​ന്നാണ്‌ ഐക്യ​നാ​ടു​ക​ളി​ലെ, 15-നും 44-നും ഇടയ്‌ക്കു പ്രായ​മുള്ള സ്‌ത്രീ​ക​ളെ​ക്കു​റിച്ച്‌ ഫെഡറൽ ബ്യൂറോ ഓഫ്‌ ഇൻവെ​സ്റ്റി​ഗേഷൻ റിപ്പോർട്ടു ചെയ്യു​ന്നത്‌. അതു​കൊണ്ട്‌, ഒന്നോ രണ്ടോ തല്ലിൽ അവസാ​നി​ക്കുന്ന വല്ലപ്പോ​ഴു​മുള്ള വാഗ്വാ​ദ​ത്തെ​ക്കാൾ വളരെ​യേറെ ഗുരു​ത​ര​മാണ്‌ വീട്ടി​നു​ള്ളി​ലെ അക്രമം. അനേകം സ്‌ത്രീ​കൾ ശാരീ​രി​ക​ദ്രോ​ഹ​വും മരണവും സംബന്ധിച്ച ഭയത്തി​ലാ​ണു കുടും​ബ​ജീ​വി​തം നയിക്കു​ന്നത്‌. വീട്ടി​നു​ള്ളി​ലെ അക്രമ​ത്തി​നു വിധേ​യ​രായ സ്‌ത്രീ​ക​ളിൽ മൂന്നിൽ ഒരു ഭാഗം, ചില​പ്പോ​ഴൊ​ക്കെ തങ്ങൾ മരിച്ചു​പോ​കു​മെന്നു ഭയപ്പെ​ട്ടി​രു​ന്ന​താ​യി കാനഡ​യിൽ നടന്ന ഒരു ദേശീയ സർവേ വെളി​പ്പെ​ടു​ത്തി. ഐക്യ​നാ​ടു​ക​ളി​ലെ രണ്ടു ഗവേഷകർ ഇങ്ങനെ നിഗമനം ചെയ്‌തു: “സ്‌ത്രീ​കളെ സംബന്ധി​ച്ചി​ട​ത്തോ​ളം ഏറ്റവും അപകട​ക​ര​മായ സ്ഥലം ഭവനമാണ്‌. മിക്ക​പ്പോ​ഴും അത്‌ ക്രൂര​ത​യ്‌ക്കും പീഡന​ത്തി​നും വേദി​യാ​യി​ത്തീ​രു​ന്നു.”

ഇത്ര​യേ​റെ സ്‌ത്രീ​കൾ അപകട​ക​ര​മായ അത്തരം ബന്ധങ്ങളിൽ തളയ്‌ക്ക​പ്പെട്ടു കിടക്കു​ന്നത്‌ എന്തു​കൊ​ണ്ടാണ്‌? ‘എന്തു​കൊണ്ട്‌ അവർ സഹായം അഭ്യർഥി​ക്കു​ന്നില്ല? എന്തു​കൊണ്ട്‌ അത്തരം സാഹച​ര്യ​ങ്ങ​ളിൽനിന്ന്‌ അവർ രക്ഷപ്പെ​ടു​ന്നില്ല?’ എന്നൊക്കെ അനേകർ ആശ്ചര്യ​പ്പെ​ടു​ന്നു. അതിനുള്ള കാരണം മിക്ക​പ്പോ​ഴും ഭയംത​ന്നെ​യാണ്‌. ഭയം വീട്ടി​നു​ള്ളി​ലെ അക്രമ​ത്തി​ന്റെ മുഖമു​ദ്ര​യാ​ണെന്നു പറയ​പ്പെ​ടു​ന്നു. മോശ​മാ​യി പെരു​മാ​റുന്ന ഭർത്താ​ക്ക​ന്മാർ ഭാര്യ​മാ​രെ നിയ​ന്ത്രി​ക്കാൻ പൊതു​വേ അക്രമം പ്രവർത്തി​ക്കു​ക​യും തുടർന്ന്‌ കൊല്ലു​മെന്നു ഭീഷണി​പ്പെ​ടു​ത്തി​ക്കൊണ്ട്‌ അവരെ നിശ്ശബ്ദ​രാ​ക്കു​ക​യും ചെയ്യുന്നു. ദ്രോ​ഹ​ത്തിന്‌ ഇരയായ ഭാര്യ സഹായം അഭ്യർഥി​ക്കാൻ ധൈര്യ​പ്പെ​ട്ടാൽപ്പോ​ലും എല്ലായ്‌പോ​ഴും അവൾക്ക്‌ അതു ലഭി​ച്ചെ​ന്നു​വ​രില്ല. മറ്റ്‌ അക്രമ​പ്ര​വർത്ത​ന​ങ്ങളെ കഠിന​മാ​യി വെറു​ക്കുന്ന ആളുകൾപോ​ലും ഭർത്താ​ക്ക​ന്മാർ ചെയ്യുന്ന അക്രമ​ങ്ങളെ നിസ്സാ​ര​മാ​യി കാണു​ക​യോ അവഗണി​ക്കു​ക​യോ ന്യായീ​ക​രി​ക്കു​ക​യോ ചെയ്യാൻ പ്രവണ​ത​യു​ള്ള​വ​രാണ്‌. തന്നെയു​മല്ല, ഭാര്യയെ ദ്രോ​ഹി​ക്കുന്ന ഒരു വ്യക്തി വീടി​നു​വെ​ളി​യിൽ ‘നല്ല പിള്ള ചമഞ്ഞേ​ക്കാം’. അയാൾ ഭാര്യയെ തല്ലുന്ന​വ​നാ​ണെന്നു വിശ്വ​സി​ക്കാൻ മിക്ക​പ്പോ​ഴും സുഹൃ​ത്തു​ക്കൾക്കു കഴിയില്ല. ആരും തങ്ങളെ വിശ്വ​സി​ക്കാ​തി​രി​ക്കു​ക​യും പോകാൻ മറ്റൊ​രി​ട​വും ഇല്ലാതി​രി​ക്കു​ക​യും ചെയ്യു​മ്പോൾ, നിരന്തരം ഭീതി​യിൽ കഴിയു​ക​യ​ല്ലാ​തെ മറ്റു പോം​വഴി ഇല്ലെന്നു ദ്രോ​ഹി​ക്ക​പ്പെ​ടുന്ന അനേകം ഭാര്യ​മാ​രും ചിന്തി​ക്കു​ന്നു.

ദ്രോഹം സഹിക്ക​വ​യ്യാ​തെ വീടു​വി​ട്ടി​റ​ങ്ങി​പ്പോ​കുന്ന ഭാര്യ​മാർ, ചില​പ്പോ​ഴൊ​ക്കെ മറ്റൊരു തരം ദുഷ്‌പെ​രു​മാ​റ്റ​ത്തിന്‌ ഇരകളാ​കു​ന്നു—ഭീഷണി​യു​മാ​യി ഭർത്താ​ക്ക​ന്മാർ അവരെ തുടർച്ച​യാ​യി പിന്തു​ട​രു​ന്നു. അടുത്ത​കാ​ലത്ത്‌ വടക്കേ അമേരി​ക്ക​യി​ലെ ലൂസി​യാന എന്ന സംസ്ഥാ​നത്ത്‌ ആയിര​ത്തി​ലേറെ സ്‌ത്രീ​കളെ ഉൾപ്പെ​ടു​ത്തി നടത്തിയ ഒരു പഠനം അനുസ​രിച്ച്‌ അവരിൽ 15 ശതമാ​ന​ത്തെ​യും ഭർത്താ​ക്ക​ന്മാർ വേട്ടയാ​ടി​യി​രു​ന്നു. അവരുടെ മനസ്സിൽ വേരോ​ടുന്ന ഭയം ഒന്നു സങ്കൽപ്പി​ച്ചു​നോ​ക്കൂ. നിങ്ങൾക്കെ​തി​രെ ഭീഷണി ഉയർത്തിയ ഒരു വ്യക്തി നിങ്ങൾ പോകു​ന്നി​ട​ത്തെ​ല്ലാം നിഴൽപോ​ലെ നിങ്ങളെ പിന്തു​ട​രു​ന്നു. അയാൾ നിങ്ങൾക്കു ഫോൺ ചെയ്യു​ക​യും നിങ്ങളു​ടെ ഓരോ ചലനവും നിരീ​ക്ഷി​ക്കു​ക​യും നിങ്ങൾക്കാ​യി കാത്തു​നിൽക്കു​ക​യും ചെയ്യുന്നു. നിങ്ങൾ ഓമനി​ക്കുന്ന വളർത്തു​മൃ​ഗത്തെ അയാൾ കൊന്നു​ക​ള​യു​ക​പോ​ലും ചെയ്‌തേ​ക്കാം. കൊടും​ഭീ​തി പരത്തുക എന്ന ലക്ഷ്യത്തി​ലുള്ള തുടർച്ച​യായ കരുനീ​ക്ക​ങ്ങൾതന്നെ!

അത്തരം ഭയത്തിൽ ജീവി​ക്കുന്ന ഒരു വ്യക്തി അല്ലായി​രി​ക്കാം നിങ്ങൾ. എന്നാൽ, ദിവസ​വും നിങ്ങൾ ചെയ്യുന്ന കാര്യ​ങ്ങ​ളു​ടെ​മേൽ ഭയം എത്ര​ത്തോ​ളം സ്വാധീ​നം ചെലു​ത്തു​ന്നുണ്ട്‌?

ഭയം നിങ്ങളു​ടെ പ്രവർത്ത​ന​ങ്ങളെ സ്വാധീ​നി​ക്കു​ന്നു​ണ്ടോ?

ഭയത്തിന്റെ ഒരു അന്തരീക്ഷം നമ്മെ ചൂഴ്‌ന്നു​നിൽക്കു​ന്ന​തി​നാൽ, ദിവസ​വും നാം കൈ​ക്കൊ​ള്ളുന്ന തീരു​മാ​ന​ങ്ങ​ളിൽ എത്ര​യെ​ണ്ണത്തെ ഭയം സ്വാധീ​നി​ക്കു​ന്നു​ണ്ടെന്ന കാര്യം നാം തിരി​ച്ച​റി​യാ​തി​രു​ന്നേ​ക്കാം. ഭയം നിങ്ങളു​ടെ പ്രവർത്ത​ന​ങ്ങളെ എത്ര കൂടെ​ക്കൂ​ടെ സ്വാധീ​നി​ക്കു​ന്നുണ്ട്‌?

അക്രമം സംബന്ധിച്ച ഭയം, നിങ്ങളോ കുടും​ബാം​ഗ​ങ്ങ​ളോ രാത്രി​യിൽ ഒറ്റയ്‌ക്കു വീട്ടി​ലേക്കു യാത്ര ചെയ്യു​ന്നത്‌ ഒഴിവാ​ക്കാൻ ഇടയാ​ക്കി​യി​ട്ടു​ണ്ടോ? പൊതു​വാ​ഹ​ന​ങ്ങ​ളിൽ സഞ്ചരി​ക്ക​ണ​മോ വേണ്ടയോ എന്ന നിങ്ങളു​ടെ തീരു​മാ​ന​ത്തിൽ ഭയം സ്വാധീ​നം ചെലു​ത്തു​ന്നു​ണ്ടോ? ദിവസേന പോയി​വ​രു​മ്പോൾ സംഭവി​ച്ചേ​ക്കാ​വുന്ന അപകട​ങ്ങ​ളോ സഹപ്ര​വർത്ത​ക​രോ​ടോ ജോലി​സ്ഥ​ലത്തു ബന്ധപ്പെ​ടേ​ണ്ടി​വ​രുന്ന മറ്റുള്ള​വ​രോ​ടോ ഉള്ള ഭയമോ, എവിടെ ജോലി ചെയ്യും അല്ലെങ്കിൽ ഏതു ജോലി ചെയ്യും എന്ന നിങ്ങളു​ടെ തീരു​മാ​നത്തെ സ്വാധീ​നി​ച്ചി​ട്ടു​ണ്ടോ? നിങ്ങളു​ടെ സാമൂ​ഹിക ജീവി​ത​ത്തി​ന്മേ​ലോ നിങ്ങൾ തിര​ഞ്ഞെ​ടു​ക്കുന്ന വിനോ​ദ​പ്ര​വർത്ത​ന​ങ്ങ​ളി​ന്മേ​ലോ ഭയം നിയ​ന്ത്രണം ചെലു​ത്തു​ന്നു​ണ്ടോ? ഒരുപക്ഷേ കുടി​യ​ന്മാ​രെ​യോ അച്ചടക്ക​മി​ല്ലാത്ത ജനക്കൂ​ട്ട​ത്തെ​യോ അഭിമു​ഖീ​ക​രി​ക്കു​ന്ന​തി​ലെ ഭയം, ചില കായിക മത്സരങ്ങൾക്കോ സംഗീ​ത​പ​രി​പാ​ടി​കൾക്കോ മറ്റോ പോകു​ന്ന​തിൽനി​ന്നു നിങ്ങളെ പിന്തി​രി​പ്പി​ക്കു​ന്നു​ണ്ടോ? സ്‌കൂ​ളി​ലെ നിങ്ങളു​ടെ പ്രവർത്ത​ന​ങ്ങളെ ഭയം സ്വാധീ​നി​ക്കു​ന്നു​ണ്ടോ? മക്കൾ വഴി​തെ​റ്റി​പ്പോ​കു​മോ​യെന്ന ഭയം, അവരെ ഏതു സ്‌കൂ​ളിൽ വിടണം എന്നു തീരു​മാ​നി​ക്കു​ന്ന​തിൽ മാതാ​പി​താ​ക്കളെ സ്വാധീ​നി​ക്കുന്ന ഒരു ഘടകമാണ്‌. പൊതു​വാ​ഹ​ന​ങ്ങ​ളി​ലോ കാൽന​ട​യാ​യോ വീട്ടിൽ തിരി​ച്ചെ​ത്താൻ പ്രാപ്‌ത​രായ കുട്ടി​ക​ളെ​പ്പോ​ലും സ്‌കൂ​ളിൽച്ചെന്നു കൂട്ടി​ക്കൊ​ണ്ടു​വ​രാൻ അവരിൽ പലരും ആഗ്രഹി​ക്കു​ന്ന​തി​ന്റെ കാരണ​വും ഭയംത​ന്നെ​യാണ്‌.

ഭയത്തിന്റെ ഒരു അന്തരീക്ഷം മനുഷ്യ​രാ​ശി​യെ വലയം ചെയ്യുന്നു എന്നതിനു സംശയ​മില്ല. വാസ്‌ത​വ​ത്തിൽ, മനുഷ്യ​ച​രി​ത്ര​ത്തി​ന്റെ സിംഹ​ഭാ​ഗ​വും അക്രമ​ഭീ​തി നിറഞ്ഞ​താ​യി​രു​ന്നി​ട്ടുണ്ട്‌. ഇക്കാര്യ​ത്തിൽ ഒരു മാറ്റം നമുക്കു യഥാർഥ​ത്തിൽ പ്രതീ​ക്ഷി​ക്കാ​നാ​കു​മോ? ഭയത്തിൽനി​ന്നുള്ള മോചനം വെറു​മൊ​രു സ്വപ്‌ന​മാ​ണോ? അതോ സകലരും നിർഭയം ജീവിതം ആസ്വദി​ക്കുന്ന ഒരു ഭാവി​ക്കാ​യി പ്രതീ​ക്ഷി​ക്കാൻ നമുക്ക്‌ ഈടുറ്റ കാരണം ഉണ്ടോ?