കഥ 27
ഒരു ദുഷ്ടരാജാവ്‌ ഈജിപ്‌തു ഭരിക്കുന്നു
ഈ മനുഷ്യർ ആളുകളെക്കൊണ്ടു നിർബന്ധിച്ചു പണിയിപ്പിക്കുകയാണ്‌. ഒരു പണിക്കാരനെ ചാട്ടകൊണ്ട്‌ അടിക്കുന്ന ആ മനുഷ്യനെ കണ്ടോ! പണിക്കാരെല്ലാം യാക്കോബിന്റെ കുടുംബത്തിലുള്ളവരാണ്‌, ഇസ്രായേല്യർ എന്നാണ്‌ അവരെ വിളിക്കുന്നത്‌. അവരെ നിർബന്ധിച്ചു പണിയിപ്പിക്കുന്നവർ ഈജിപ്‌തുകാരാണ്‌. ഇസ്രായേല്യർ ഇപ്പോൾ ഈജിപ്‌തുകാരുടെ അടിമകളായി തീർന്നിരിക്കുന്നു. ഇത്‌ എങ്ങനെയാണു സംഭവിച്ചത്‌?
യാക്കോബിന്റെ വലിയ കുടുംബം കുറേക്കാലം ഈജിപ്‌തിൽ സമാധാനത്തോടെ ജീവിച്ചു. ഫറവോൻ കഴിഞ്ഞാൽ ഈജിപ്‌തിലെ ഏറ്റവും വലിയ ആളായിരുന്നല്ലോ യോസേഫ്‌. അതുകൊണ്ട്‌ അവർക്ക്‌ അവിടെ നല്ല സുഖമായിരുന്നു. പിന്നീട്‌ യോസേഫ്‌ മരിച്ചു. അതുകഴിഞ്ഞ്‌ ഇസ്രായേല്യരെ ഇഷ്ടമില്ലായിരുന്ന പുതിയ ഒരു ഫറവോൻ ഈജിപ്‌തിലെ രാജാവായി.
ദുഷ്ടനായ ഈ ഫറവോൻ ഇസ്രായേല്യരെ അടിമകളാക്കി. അവരെക്കൊണ്ട്‌ പണിയിപ്പിക്കാൻ അവൻ ദുഷ്ടരും ക്രൂരരുമായ മനുഷ്യരെ ആക്കിവെച്ചു. ഫറവോനുവേണ്ടി വലിയ വലിയ പട്ടണങ്ങൾ പണിയുന്നതിന്‌ കഷ്ടപ്പെട്ടു വേല ചെയ്യാൻ ആ മനുഷ്യർ ഇസ്രായേല്യരെ നിർബന്ധിച്ചു. എന്നിട്ടും ഇസ്രായേല്യരുടെ എണ്ണം പെരുകിക്കൊണ്ടിരുന്നു. അതുകൊണ്ട്‌ ഇസ്രായേല്യർ തങ്ങളെക്കാൾ ശക്തിയുള്ള വലിയൊരു ജനതയായി തീർന്നേക്കും എന്ന്‌ ഈജിപ്‌തുകാർ പേടിച്ചു.
അതിനാൽ ഫറവോൻ എന്തു ചെയ്‌തെന്ന്‌ അറിയാമോ? പ്രസവസമയത്ത്‌ ഇസ്രായേല്യ അമ്മമാരെ സഹായിച്ചിരുന്ന സ്‌ത്രീകളോട്‌, ‘ജനിക്കുന്ന ആൺകുഞ്ഞുങ്ങളെ എല്ലാം കൊന്നു കളയണം’ എന്നു ഫറവോൻ പറഞ്ഞു. എന്നാൽ ആ സ്‌ത്രീകൾ നല്ലവരായിരുന്നു, അവർ കുഞ്ഞുങ്ങളെ കൊല്ലുന്നില്ല.
അതുകൊണ്ട്‌ ഫറവോൻ തന്റെ ജനത്തോടെല്ലാമായി ഇങ്ങനെ കൽപ്പിക്കുന്നു: ‘യിസ്രായേല്യരുടെ ആൺകുഞ്ഞുങ്ങളെയെല്ലാം കണ്ടുപിടിച്ചു കൊന്നുകളയുവിൻ. പെൺകുഞ്ഞുങ്ങളെ കൊല്ലേണ്ട.’ എത്ര ക്രൂരമായ ഒരു കൽപ്പന, അല്ലേ? പക്ഷേ ഒരു ആൺകുഞ്ഞ്‌ സംരക്ഷിക്കപ്പെടുന്നു, അത്‌ എങ്ങനെയാണെന്നു നമുക്കു നോക്കാം.