നമുക്കു ദുഷ്ടമാ​യ​തി​നെ വെറു​ക്കാം

യഹോവ പരിശു​ദ്ധ​നായ ദൈവ​മാണ്‌. പുരാതന നാളു​ക​ളിൽ അവൻ “യിസ്രാ​യേ​ലി​ന്റെ പരിശുദ്ധ”നായി​രു​ന്നു. അതു​കൊ​ണ്ടു​തന്നെ യിസ്രാ​യേ​ല്യർ ശുദ്ധി​യു​ള്ള​വ​രും കളങ്കര​ഹി​ത​രും ആയിരി​ക്ക​ണ​മെന്ന്‌ അവൻ ആവശ്യ​പ്പെട്ടു. (സങ്കീർത്തനം 89:18) തന്റെ തിര​ഞ്ഞെ​ടു​ക്ക​പ്പെട്ട ജനത്തോട്‌ അവൻ പറഞ്ഞു: “ഞാൻ വിശു​ദ്ധ​നാ​ക​യാൽ നിങ്ങളും വിശു​ദ്ധ​ന്മാ​രാ​യി​രി​ക്കേണം.” (ലേവ്യ​പു​സ്‌തകം 11:45) ‘യഹോ​വ​യു​ടെ പർവ്വത​ത്തിൽ കയറാൻ’ ആഗ്രഹിച്ച ഏതൊ​രു​വ​നും “വെടി​പ്പുള്ള കയ്യും നിർമ്മ​ല​ഹൃ​ദ​യ​വും” ഉള്ളവൻ ആയിരി​ക്കേ​ണ്ടി​യി​രു​ന്നു. (സങ്കീർത്തനം 24:3, 4) അതു കേവലം പാപപൂർണ പ്രവൃ​ത്തി​കൾ ഒഴിവാ​ക്കു​ന്ന​തി​ലു​മ​ധി​കം അർഥമാ​ക്കി. അതു “ദോഷത്തെ വെറു​ക്കുന്ന”തിനെ അർഥമാ​ക്കി.—സദൃശ​വാ​ക്യ​ങ്ങൾ 8:13.

യിസ്രാ​യേൽ ജനതയ്‌ക്കു തെറ്റു മനസ്സി​ലാ​ക്കി അത്‌ ഒഴിവാ​ക്കാൻ കഴി​യേ​ണ്ട​തി​നു യഹോവ സ്‌നേ​ഹ​പൂർവം വിശദ​മായ നിയമങ്ങൾ ഏർപ്പെ​ടു​ത്തി. (റോമർ 7:7, 12) ഈ നിയമ​ങ്ങ​ളിൽ ധാർമി​കത സംബന്ധി​ച്ചു കർശന​മായ മാർഗ​നിർദേ​ശങ്ങൾ ഉൾപ്പെ​ട്ടി​രു​ന്നു. വ്യഭി​ചാ​രം, സ്വവർഗ​രതി, നിഷി​ദ്ധ​ബ​ന്ധു​വേ​ഴ്‌ചാ​പ​ര​മായ ബന്ധങ്ങൾ, മൃഗസം​ഭോ​ഗം എന്നിവ​യെ​ല്ലാം അവിശു​ദ്ധ​മായ ആത്മീയ മാലി​ന്യ​ങ്ങ​ളാ​യി തിരി​ച്ച​റി​യി​ക്ക​പ്പെ​ട്ടി​രു​ന്നു. (ലേവ്യ​പു​സ്‌തകം 18:23; 20:10-17) അത്തരം അധമ​പ്ര​വൃ​ത്തി​കൾക്കു കുറ്റക്കാ​രാ​യ​വരെ യിസ്രാ​യേൽ ജനത്തിൽനി​ന്നു ഛേദി​ച്ചു​ക​ള​ഞ്ഞി​രു​ന്നു.

അഭിഷിക്ത ക്രിസ്‌ത്യാ​നി​ക​ളു​ടെ സഭ ‘ദൈവ​ത്തി​ന്റെ യിസ്രാ​യേൽ’ ആയിത്തീർന്ന​പ്പോൾ, സമാന​മായ ധാർമിക നിലവാ​രങ്ങൾ അവർക്കു ലഭിച്ചു. (ഗലാത്യർ 6:16) ക്രിസ്‌ത്യാ​നി​ക​ളും “ദുഷ്ടമാ​യ​തി​നെ വെറുക്കേ”ണ്ടിയി​രു​ന്നു. (റോമർ 12:9, NW) യിസ്രാ​യേ​ലി​നുള്ള യഹോ​വ​യു​ടെ വാക്കു​ക​ളും അവർക്കു ബാധക​മാ​യി: “ഞാൻ വിശുദ്ധൻ ആകയാൽ നിങ്ങളും വിശു​ദ്ധ​രാ​യി​രി​പ്പിൻ.” (1 പത്രൊസ്‌ 1:15, 16) പരസംഗം, വ്യഭി​ചാ​രം, സ്വവർഗ​രതി, മൃഗസം​ഭോ​ഗം, നിഷി​ദ്ധ​ബ​ന്ധു​വേഴ്‌ച എന്നിങ്ങ​നെ​യുള്ള അവിശുദ്ധ നടപടി​കൾ ക്രിസ്‌തീയ സഭയെ ദുഷി​പ്പി​ക്കാൻ പാടി​ല്ലാ​യി​രു​ന്നു. അത്തരം സംഗതി​ക​ളിൽ ഏർപ്പെ​ടു​ന്നതു നിർത്താൻ കൂട്ടാ​ക്കാ​ത്തവർ ദൈവ​രാ​ജ്യ​ത്തിൽനിന്ന്‌ ഒഴിവാ​ക്ക​പ്പെ​ടും. (റോമർ 1:26, 27; 2:22; 1 കൊരി​ന്ത്യർ 6:9, 10; എബ്രായർ 13:4) ഈ “അവസാന നാളു​ക​ളിൽ,” അതേ നിലവാ​രങ്ങൾ “വേറെ ആടുകൾ”ക്കും ബാധക​മാണ്‌. (2 തിമൊ​ഥെ​യൊസ്‌ 3:1; യോഹ​ന്നാൻ 10:16) തത്‌ഫ​ല​മാ​യി, അഭിഷിക്ത ക്രിസ്‌ത്യാ​നി​ക​ളും വേറെ ആടുക​ളും ശുദ്ധി​യു​ള്ള​വ​രും ആരോ​ഗ്യ​മു​ള്ള​വ​രു​മായ ആളുക​ളാണ്‌. അങ്ങനെ, യഹോ​വ​യു​ടെ സാക്ഷികൾ എന്നനി​ല​യിൽ അവർ അവന്റെ നാമം വഹിക്കാൻ യോഗ്യ​രാണ്‌.—യെശയ്യാ​വു 43:10.

സഭയെ ശുദ്ധമാ​യി സൂക്ഷിക്കൽ

നേർവി​പ​രീ​ത​മാ​യി, ലോകം എല്ലാവിധ അധാർമി​ക​ത​യും വെച്ചു​പൊ​റു​പ്പി​ക്കു​ന്നു. സത്യ​ക്രി​സ്‌ത്യാ​നി​കൾ വ്യത്യ​സ്‌ത​രാ​ണെ​ങ്കി​ലും, ഇപ്പോൾ യഹോ​വയെ സേവി​ക്കുന്ന അനേക​രും ഒരിക്കൽ ലോക​ത്തി​ലാ​യി​രു​ന്നു​വെന്ന കാര്യം അവർ മറക്കരുത്‌. നമ്മുടെ പരിശു​ദ്ധ​നായ ദൈവത്തെ അറിയു​ന്ന​തി​നു​മുമ്പ്‌, ‘ദുർന്ന​ട​പ്പി​ന്റെ കവിച്ചി​ലിൽ’ കിടന്നു​രുണ്ട്‌, വീഴ്‌ച​ഭ​വിച്ച തങ്ങളുടെ ജഡത്തിന്റെ അഭിലാ​ഷ​ങ്ങ​ളി​ലും മിഥ്യാ​സ​ങ്കൽപ്പ​ങ്ങ​ളി​ലും മുഴു​കാ​തി​രി​ക്കാൻ യാതൊ​രു കാരണ​വും കാണാ​തി​രുന്ന അനേക​രുണ്ട്‌. (1 പത്രൊസ്‌ 4:4) ജാതി​ക​ളി​ലെ അധമരായ ആളുക​ളു​ടെ മ്ലേച്ഛമായ ആചാരങ്ങൾ വർണി​ച്ച​ശേഷം, പൗലൊസ്‌ അപ്പോ​സ്‌തലൻ പറഞ്ഞു: “നിങ്ങളും ചിലർ ഈ വകക്കാ​രാ​യി​രു​ന്നു.” അവൻ തുടർന്നി​ങ്ങനെ പറഞ്ഞു: “എങ്കിലും നിങ്ങൾ കർത്താ​വായ യേശു​ക്രി​സ്‌തു​വി​ന്റെ നാമത്തി​ലും നമ്മുടെ ദൈവ​ത്തി​ന്റെ ആത്മാവി​നാ​ലും നിങ്ങ​ളെ​ത്തന്നേ കഴുകി ശുദ്ധീ​ക​ര​ണ​വും നീതീ​ക​ര​ണ​വും പ്രാപി​ച്ചി​രി​ക്കു​ന്നു.”—1 കൊരി​ന്ത്യർ 6:11.

എത്ര ആശ്വാ​സ​പ്ര​ദ​മായ പ്രസ്‌താ​വ​ന​യാ​ണത്‌! ജീവി​ത​ത്തി​ന്റെ ആദ്യകാ​ല​ങ്ങ​ളിൽ ഒരു വ്യക്തി എന്തു ചെയ്‌താ​ലും, ക്രിസ്‌തു​വി​നെ സംബന്ധിച്ച മഹത്ത്വ​മാർന്ന സുവാർത്ത ഹൃദയ​ത്തിൽ തട്ടുന്ന​തോ​ടെ അയാൾ മാറ്റം വരുത്തു​ന്നു. അയാൾ വിശ്വാ​സം പ്രകട​മാ​ക്കു​ക​യും യഹോ​വ​യാം ദൈവ​ത്തി​നു തന്നെത്തന്നെ സമർപ്പി​ക്കു​ക​യും ചെയ്യുന്നു. ദൈവ​ത്തി​ന്റെ ദൃഷ്ടി​യിൽ കഴുകി ശുദ്ധീ​ക​രി​ക്ക​പ്പെട്ട്‌ അയാൾ അന്നുമു​തൽ ധാർമി​ക​മാ​യി നിർമല ജീവിതം നയിക്കു​ന്നു. (എബ്രായർ 9:14) അയാൾ മുമ്പു ചെയ്‌ത പാപങ്ങൾക്കു മോചനം ലഭിക്കു​ന്നു. ‘മുമ്പി​ലു​ള്ള​തി​ന്നാ​യി ആഞ്ഞു’മുന്നേ​റാൻ അയാൾക്കാ​വും.a—ഫിലി​പ്പി​യർ 3:13, 14; റോമർ 4:7, 8.

കൊല​പാ​ത​ക​ത്തി​നും വ്യഭി​ചാ​ര​ത്തി​നും ശേഷം ദാവീദ്‌ അനുതാ​പം പ്രകട​മാ​ക്കി​യ​പ്പോൾ യഹോവ ക്ഷമിച്ചു. അധാർമിക വിഗ്ര​ഹാ​രാ​ധ​ന​യി​ലും വലിയ രക്തച്ചൊ​രി​ച്ചി​ലി​ലും ഏർപ്പെട്ട മനശ്ശെ അനുതാ​പം കാട്ടി​യ​പ്പോ​ഴും അവൻ ക്ഷമിച്ചു. (2 ശമൂവേൽ 12:9, 13; 2 ദിനവൃ​ത്താ​ന്തം 33:2-6, 10-13) ആത്മാർഥ​ത​യോ​ടും താഴ്‌മ​യോ​ടും​കൂ​ടെ അനുത​പിച്ച്‌ അവനെ സമീപി​ക്കു​ന്നെ​ങ്കിൽ നമ്മോ​ടും ക്ഷമിക്കാൻ അവനു മനസ്സൊ​രു​ക്ക​മു​ണ്ടെ​ന്ന​തിൽ നമുക്കു ശരിക്കും നന്ദിയു​ള്ള​വ​രാ​യി​രി​ക്കാം. എന്നാൽ യഹോവ ദാവീ​ദി​നോ​ടും മന ശ്ശെയോ​ടും ക്ഷമിച്ചു​വെ​ങ്കി​ലും ഈ രണ്ടു മനുഷ്യ​രും—അവരോ​ടൊ​പ്പം യിസ്രാ​യേ​ല്യ​രും—തങ്ങളുടെ പാപപൂർണ പ്രവൃ​ത്തി​ക​ളു​ടെ ഭവിഷ്യ​ത്തു​ക​ളും പേറി ജീവി​ക്കേ​ണ്ടി​വന്നു. (2 ശമൂവേൽ 12:11, 12; യിരെ​മ്യാ​വു 15:3-5) സമാന​മായ ഒരു വിധത്തിൽ, അനുതാ​പ​മുള്ള പാപി​ക​ളോ​ടു യഹോവ ക്ഷമിക്കു​ന്നു​വെ​ങ്കി​ലും, അവരുടെ പ്രവൃ​ത്തി​കൾക്ക്‌ ഭവിഷ്യ​ത്തു​കൾ ഉണ്ടാകും, അവ ഒഴിവാ​ക്കാ​നാ​വില്ല.

ഒഴിവാ​ക്കാ​നാ​വാത്ത ഭവിഷ്യ​ത്തു​കൾ

ഉദാഹ​ര​ണ​ത്തിന്‌, അധാർമി​ക​ത​യിൽ മുങ്ങി​ത്തു​ടിച്ച്‌ എയ്‌ഡ്‌സ്‌ പിടി​പെ​ട്ട​യാൾ സത്യം സ്വീക​രിച്ച്‌ സമർപ്പ​ണ​ത്തി​ന്റെ​യും സ്‌നാ​പ​ന​ത്തി​ന്റെ​യും ഘട്ടത്തോ​ളം ജീവി​ത​ത്തിൽ മാറ്റങ്ങൾ വരുത്തി​യേ​ക്കാം. അയാളി​പ്പോൾ ആത്മീയ​മാ​യി ശുദ്ധി​യുള്ള ഒരു ക്രിസ്‌ത്യാ​നി​യാണ്‌. ദൈവ​വു​മാ​യി നല്ല ബന്ധവും ഭാവി​യെ​ക്കു​റി​ച്ചുള്ള അത്ഭുത​ക​ര​മായ പ്രത്യാ​ശ​യു​മുണ്ട്‌. പക്ഷേ അയാൾക്ക്‌ എയ്‌ഡ്‌സു​മുണ്ട്‌. പ്രസ്‌തുത രോഗം​മൂ​ലം അയാൾ അവസാനം മരി​ച്ചേ​ക്കാം. ദുഃഖ​പൂർണ​മെ​ങ്കി​ലും അതു മുൻന​ട​ത്ത​യു​ടെ ഒഴിവാ​ക്കാ​നാ​വാത്ത ഭവിഷ്യ​ത്താണ്‌. ചില ക്രിസ്‌ത്യാ​നി​ക​ളു​ടെ കാര്യ​ത്തിൽ മുൻകാ​ലത്തെ കൊടിയ അധാർമി​ക​ത​യു​ടെ ഫലങ്ങൾ മറ്റുവി​ധ​ങ്ങ​ളിൽ നിലനി​ന്നേ​ക്കാം. സ്‌നാ​പനം കഴിഞ്ഞ്‌ വർഷങ്ങൾ പിന്നി​ട്ടാ​ലും, ഒരുപക്ഷേ ഈ വ്യവസ്ഥി​തി​യി​ലെ ശേഷിച്ച ജീവി​ത​കാ​ല​മൊ​ക്കെ​യും തങ്ങളുടെ മുൻകാല അധാർമിക ജീവി​ത​രീ​തി​യി​ലേക്കു തിരി​ച്ചു​പോ​കാ​നുള്ള ജഡത്തിലെ പ്രേര​ണ​ക​ളു​മാ​യി അവർക്കു പോരാ​ടേ​ണ്ടി​വ​ന്നേ​ക്കാം. യഹോ​വ​യു​ടെ ആത്മാവി​ന്റെ സഹായ​ത്താൽ, അനേക​രും ചെറു​ത്തു​നിൽക്കു​ന്ന​തിൽ വിജയി​ക്കു​ന്നുണ്ട്‌. എന്നാൽ നിരന്ത​ര​മായ ഒരു പോരാ​ട്ടം​തന്നെ അവർ നടത്തേ​ണ്ടി​വ​രും.—ഗലാത്യർ 5:16, 17.

തങ്ങളുടെ പ്രേര​ണ​കൾക്കു കടിഞ്ഞാ​ണി​ടു​ന്നി​ട​ത്തോ​ളം കാലം അത്തരക്കാർ പാപം ചെയ്യു​ന്നില്ല. എന്നാൽ അവർ പുരു​ഷ​ന്മാ​രെ​ങ്കിൽ, ശക്തമായ ജഡിക പ്രേര​ണ​ക​ളോ​ടു പോരാ​ടേ​ണ്ട​തു​ള്ള​പ്പോൾത്തന്നെ, സഭയിലെ ഉത്തരവാ​ദി​ത്വം ‘കാംക്ഷി​ക്കാ’തിരി​ക്കാൻ അവർ ജ്ഞാനപൂർവം തീരു​മാ​നി​ച്ചേ​ക്കാം. (1 തിമൊ​ഥെ​യൊസ്‌ 3:1) എന്തു​കൊണ്ട്‌? എന്തെന്നാൽ സഭ മൂപ്പന്മാ​രിൽ അർപ്പി​ക്കുന്ന വിശ്വാ​സം അവർക്ക്‌ അറിവു​ള്ള​താണ്‌. (യെശയ്യാ​വു 32:1, 2; എബ്രായർ 13:17) വ്യക്തി​പ​ര​വും സ്വകാ​ര്യ​വു​മായ അനേകം കാര്യങ്ങൾ മൂപ്പന്മാ​രു​മാ​യി കൂടി​യാ​ലോ​ചി​ക്കു​ന്നു​ണ്ടെ​ന്നും അവർക്കു ലോല​മായ സ്ഥിതി​വി​ശേ​ഷങ്ങൾ കൈകാ​ര്യം ചെയ്യേ​ണ്ട​തു​ണ്ടെ​ന്നും അവർ തിരി​ച്ച​റി​യു​ന്നു. അത്തരം ഉത്തരവാ​ദി​ത്വ സ്ഥാനത്തി​നാ​യി കാംക്ഷി​ക്കു​ന്നത്‌ അശുദ്ധ​മായ ജഡിക മോഹ​ങ്ങ​ളു​മാ​യി നിരന്തരം പോരാ​ടുന്ന ഒരാളെ സംബന്ധി​ച്ചി​ട​ത്തോ​ളം സ്‌നേ​ഹ​പൂർവ​ക​മോ ജ്ഞാനപൂർവ​ക​മോ ന്യായ​യു​ക്ത​മോ ആയിരി​ക്കു​ക​യില്ല.—സദൃശ​വാ​ക്യ​ങ്ങൾ 14:16; യോഹ​ന്നാൻ 15:12, 13; റോമർ 12:1.

സ്‌നാ​പ​ന​മേൽക്കു​ന്ന​തി​നു​മുമ്പ്‌ ബാലപീ​ഡ​ക​നാ​യി​രുന്ന ഒരാൾക്ക്‌ മറ്റു ഭവിഷ്യ​ത്തും നേരി​ട്ടേ​ക്കാം. സത്യം പഠിക്കു​മ്പോൾ അയാൾ അനുത​പി​ച്ചു മാറ്റം വരുത്തു​ന്നു. ആ ഹീനമായ പാപം അയാൾ സഭയിൽ ആവർത്തി​ക്കു​ന്നില്ല. അതിനു​ശേഷം അയാൾ നല്ല പുരോ​ഗതി വരുത്തി തന്റെ തെറ്റായ പ്രചോ​ദ​ന​ങ്ങളെ പൂർണ​മാ​യി നിയ​ന്ത്രി​ക്കു​ക​യും സഭയിലെ ഉത്തരവാ​ദി​ത്വ സ്ഥാനം ‘കാംക്ഷി​ക്കാൻ’ ചായ്‌വു കാട്ടു​ക​യും പോലും ചെയ്‌തേ​ക്കാം. ഒരു മുൻബാ​ല​പീ​ഡകൻ എന്നനി​ല​യിൽ സമുദാ​യ​ത്തി​ലുള്ള കുപ്ര​സി​ദ്ധി മാറ്റി​യെ​ടു​ക്കാൻ അയാൾ ഇനിയും പ്രവർത്തി​ക്കേ​ണ്ട​തു​ണ്ടെ​ന്നു​വ​രു​കി​ലോ? അയാൾ “നിരപ​വാ​ദ്യ”നും “പുറ​മെ​യു​ള്ള​വ​രോ​ടു നല്ല സാക്ഷ്യം പ്രാപി​ച്ച​വ​നും” “അനിന്ദ്യ”നും ആയിരി​ക്കു​മോ? (1 തിമൊ​ഥെ​യൊസ്‌ 3:1-7, 10; തീത്തൊസ്‌ 1:7) ഇല്ല. ആയിരി​ക്കു​ക​യില്ല. അതു​കൊണ്ട്‌, അയാൾ സഭാപ​ദ​വി​കൾക്കു യോഗ്യ​നാ​കു​ക​യില്ല.

ഒരു സമർപ്പിത ക്രിസ്‌ത്യാ​നി പാപം​ചെ​യ്യു​മ്പോൾ

നാം ബലഹീ​ന​രാ​ണെ​ന്നും സ്‌നാ​പ​ന​ത്തി​നു​ശേ​ഷ​വും പാപം ചെയ്‌തേ​ക്കാ​മെ​ന്നും യഹോ​വ​യ്‌ക്ക​റി​യാം. യോഹ​ന്നാൻ അപ്പോ​സ്‌തലൻ തന്റെ നാളിലെ ക്രിസ്‌ത്യാ​നി​കൾക്ക്‌ എഴുതി: “നിങ്ങൾ പാപം ചെയ്യാ​തി​രി​പ്പാൻ ഞാൻ ഇതു നിങ്ങൾക്കു എഴുതു​ന്നു. ഒരുത്തൻ പാപം ചെയ്‌തു എങ്കിലോ, നീതി​മാ​നായ യേശു​ക്രി​സ്‌തു എന്ന കാര്യസ്ഥൻ നമുക്കു പിതാ​വി​ന്റെ അടുക്കൽ ഉണ്ടു. അവൻ നമ്മുടെ പാപങ്ങൾക്കു പ്രായ​ശ്ചി​ത്തം ആകുന്നു; നമ്മു​ടേ​തി​ന്നു മാത്രം അല്ല, സർവ്വ​ലോ​ക​ത്തി​ന്റെ പാപത്തി​ന്നും തന്നേ.” (1 യോഹ​ന്നാൻ 2:1, 2) അതേ, പാപത്തിൽ വീഴുന്ന സ്‌നാ​പ​ന​മേറ്റ ക്രിസ്‌ത്യാ​നി​ക​ളോ​ടു യഹോവ, യേശു​വി​ന്റെ ബലിയു​ടെ അടിസ്ഥാ​ന​ത്തിൽ, ക്ഷമിക്കും—പക്ഷേ അവർ തങ്ങളുടെ തെറ്റായ ഗതി​യെ​ക്കു​റിച്ച്‌ അനുത​പി​ക്കു​ക​യും അത്‌ ഉപേക്ഷി​ക്കു​ക​യും വേണം.

ഇതി​നൊ​രു ഉദാഹ​ര​ണ​മാണ്‌ ഒന്നാം നൂറ്റാ​ണ്ടിൽ കൊരി​ന്ത്യ സഭയിൽ കണ്ടത്‌. ആ പുതിയ സഭയിൽ ഒരുവൻ നിഷിദ്ധ ബന്ധു​വേ​ഴ്‌ച​യിൽ ഏർപ്പെ​ട്ടി​രി​ക്കു​ന്ന​താ​യി പൗലൊസ്‌ അപ്പോ​സ്‌തലൻ കേട്ടു. അതു ചെയ്യുന്ന വ്യക്തിയെ പുറത്താ​ക്കാൻ അവൻ നിർദേശം കൊടു​ത്തു. പിന്നീട്‌, ആ പാപി അനുത​പി​ച്ചു. തുടർന്ന്‌ അവനെ തിരി​ച്ചെ​ടു​ക്കാൻ പൗലൊസ്‌ സഭയോട്‌ ആവശ്യ​പ്പെട്ടു. (1 കൊരി​ന്ത്യർ 5:1, 13; 2 കൊരി​ന്ത്യർ 2:5-9) അങ്ങനെ, യഹോ​വ​യു​ടെ സ്‌നേ​ഹ​ദ​യ​യു​ടെ സൗഖ്യ​മാ​ക്കൽശ​ക്തി​യാ​ലും യേശു​വി​ന്റെ മറുവി​ല​യാ​ഗ​ത്തി​ന്റെ വൻമൂ​ല്യ​ത്താ​ലും പ്രസ്‌തുത മനുഷ്യൻ പാപത്തിൽനി​ന്നു ശുദ്ധീ​ക​രി​ക്ക​പ്പെട്ടു. അത്തരം സംഗതി​കൾ ഇന്നും സംഭവി​ക്കാം. എന്നിരു​ന്നാ​ലും, ഗുരു​ത​ര​മായ പാപം ചെയ്യുന്ന സ്‌നാ​പ​ന​മേറ്റ ഒരു വ്യക്തി അനുത​പി​ക്കു​ക​യും യഹോ​വ​യു​ടെ ദൃഷ്ടി​യിൽ ക്ഷമ ലഭിച്ച​വ​നാ​യി​രി​ക്കു​ക​യും ചെയ്‌താ​ലും അയാളു​ടെ പാപത്തി​നു നിലനിൽക്കുന്ന ഭവിഷ്യ​ത്തു​കൾ ഉണ്ടാ​യേ​ക്കാം.—സദൃശ​വാ​ക്യ​ങ്ങൾ 10:16, 17; ഗലാത്യർ 6:7.

ഉദാഹ​ര​ണ​ത്തിന്‌, ഒരു സമർപ്പിത പെൺകു​ട്ടി പരസംഗം ചെയ്യു​ന്നെ​ങ്കിൽ, തന്റെ പ്രവൃ​ത്തി​യെ​പ്രതി അവൾ അങ്ങേയറ്റം ദുഃഖി​ക്കു​ക​യും അവസാനം സഭയുടെ സഹായ​ത്താൽ ആത്മീയാ​രോ​ഗ്യ​ത്തി​ലേക്കു പുനഃ​സ്ഥി​തീ​ക​രി​ക്ക​പ്പെ​ടു​ക​യും ചെയ്‌തേ​ക്കാം. എന്നാൽ അധാർമി​ക​ത​നി​മി​ത്തം അവൾ ഗർഭി​ണി​യാ​കു​ന്നെ​ങ്കി​ലോ? താൻ ചെയ്‌ത പ്രവൃ​ത്തി​ഹേ​തു​വാ​യി തന്റെ മുഴു​ജീ​വി​ത​വും അനിവാ​ര്യ​മാം​വി​ധം മാറ്റി​മ​റി​ക്ക​പ്പെ​ടു​ന്നു. വ്യഭി​ചാ​രം ചെയ്യുന്ന ഒരു മനുഷ്യൻ അനുത​പി​ക്കു​ന്ന​തി​നാൽ പുറത്താ​ക്ക​പ്പെ​ടാ​തി​രു​ന്നേ​ക്കാം. എന്നാൽ അയാളു​ടെ നിഷ്‌ക​ള​ങ്ക​യായ ഇണയ്‌ക്ക്‌ അയാളിൽനി​ന്നു വിവാ​ഹ​മോ​ചനം നേടാ​നുള്ള തിരു​വെ​ഴു​ത്തു കാരണ​ങ്ങ​ളുണ്ട്‌, അവർ ചില​പ്പോൾ അങ്ങനെ ചെയ്‌തെ​ന്നു​മി​രി​ക്കും. (മത്തായി 19:9) അവർ അങ്ങനെ ചെയ്യു​ന്നെ​ങ്കിൽ, ആ മനുഷ്യൻ ശേഷിച്ച ജീവി​ത​കാ​ല​മൊ​ക്കെ​യും തന്റെ പാപത്തി​ന്റെ ദാരുണ ഭവിഷ്യ​ത്തു​ക​ളും​പേറി ജീവി​ക്കേ​ണ്ടി​വ​രും.—1 യോഹ​ന്നാൻ 1:9.

മറ്റൊരു സ്‌ത്രീ​യെ വിവാഹം കഴിക്കു​ന്ന​തി​നാ​യി നിർദാ​ക്ഷി​ണ്യം ഭാര്യയെ വിവാ​ഹ​മോ​ചനം ചെയ്യുന്ന മനുഷ്യ​ന്റെ കാര്യ​മോ? ഒരുപക്ഷേ അവസാനം അയാൾ അനുത​പി​ക്കു​ക​യും സഭയിൽ പുനഃ​സ്ഥി​തീ​ക​രി​ക്ക​പ്പെ​ടു​ക​യും ചെയ്‌തേ​ക്കാം. വർഷങ്ങൾകൊണ്ട്‌ അയാൾ പുരോ​ഗതി വരുത്തു​ക​യും “പക്വത​യി​ലേക്കു മുന്നേറു”കയും ചെയ്‌തേ​ക്കാം. (എബ്രായർ 6:1, NW) എന്നാൽ അദ്ദേഹ​ത്തി​ന്റെ ആദ്യ ഭാര്യ ഇണയി​ല്ലാ​തെ ജീവി​ക്കു​ന്നി​ട​ത്തോ​ളം​കാ​ലം, സഭയിൽ ഒരു ഉത്തരവാ​ദി​ത്വ സ്ഥാനത്തു സേവി​ക്കാൻ അയാൾ യോഗ്യ​നാ​യി​രി​ക്കു​ക​യില്ല. ആദ്യ ഭാര്യ​യിൽനി​ന്നു വിവാ​ഹ​മോ​ചനം നേടു​ന്ന​തി​നുള്ള തിരു​വെ​ഴു​ത്തു​പ​ര​മായ അടിസ്ഥാ​ന​മി​ല്ലാ​തി​രു​ന്ന​തു​കൊണ്ട്‌ അയാൾ “ഏകഭാ​ര്യ​യു​ടെ ഭർത്താവു” അല്ല.—1 തിമൊ​ഥെ​യൊസ്‌ 3:2, 12.

ക്രിസ്‌ത്യാ​നി ദുഷ്ടമാ​യ​തി​നോ​ടു വെറുപ്പു നട്ടുവ​ളർത്തേ​ണ്ടത്‌ എന്തു​കൊണ്ട്‌ എന്നതി​നുള്ള ശക്തമായ കാരണ​ങ്ങ​ളല്ലേ ഇവ?

ബാലപീ​ഡ​കന്റെ കാര്യ​മോ?

പ്രായ​പൂർത്തി​യായ, സ്‌നാ​പ​ന​മേറ്റ ഒരു ക്രിസ്‌ത്യാ​നി ഒരു കുട്ടിയെ ലൈം​ഗി​ക​മാ​യി പീഡി​പ്പി​ക്കു​ന്നെ​ങ്കി​ലോ? യഹോവ അയാ​ളോട്‌ ഒരിക്ക​ലും ക്ഷമിക്കു​ക​യി​ല്ലാ​ത്ത​വി​ധം അത്രയ്‌ക്കു ദുഷ്ടനാ​ണോ ആ പാപി? അങ്ങനെ ആയിരി​ക്ക​ണ​മെ​ന്നില്ല. ‘പരിശു​ദ്ധാ​ത്മാ​വി​ന്റെ നേരെ​യുള്ള ദൂഷണം’ പൊറു​ക്ക​ത്ത​ക്ക​ത​ല്ലെന്ന്‌ യേശു പറഞ്ഞു. സത്യം അറിഞ്ഞി​ട്ടും മനഃപൂർവം പാപം ചെയ്യു​ന്നത്‌ ശീലമാ​ക്കുന്ന വ്യക്തി​ക്കു​വേണ്ടി ഒരു ബലിയും അവശേ​ഷി​ക്കു​ന്നി​ല്ലെന്ന്‌ പൗലൊസ്‌ പറഞ്ഞു. (ലൂക്കൊസ്‌ 12:10; എബ്രായർ 10:26, 27, NW) എന്നാൽ നിഷി​ദ്ധ​ബ​ന്ധു​വേ​ഴ്‌ചാ​പ​ര​മോ അല്ലാത്ത​തോ ആയാലും ഒരു കുട്ടി​യോ​ടു ലൈം​ഗി​ക​ദു​ഷ്‌പെ​രു​മാ​റ്റം നടത്തുന്ന പ്രായ​പൂർത്തി​യായ ഒരു ക്രിസ്‌ത്യാ​നി​യോ​ടു ക്ഷമിക്കാ​വു​ന്ന​ത​ല്ലെന്നു ബൈബിൾ ഒരിട​ത്തും പറയു​ന്നില്ല. തീർച്ച​യാ​യും, ഹൃദയ​ത്തിൽനിന്ന്‌ ആത്മാർഥ​മാ​യി അനുത​പിച്ച്‌ തന്റെ പ്രവൃ​ത്തി​കൾ ഉപേക്ഷി​ക്കു​ന്നെ​ങ്കിൽ അയാളു​ടെ പാപങ്ങൾ കഴുകി ശുദ്ധീ​ക​രി​ക്കാ​വു​ന്ന​താണ്‌. എന്നിരു​ന്നാ​ലും, താൻ വളർത്തി​യെ​ടുത്ത തെറ്റായ ജഡിക പ്രചോ​ദ​ന​ങ്ങ​ളോട്‌ അയാൾ അപ്പോ​ഴും പോരാ​ടേ​ണ്ട​തു​ണ്ടാ​യി​രി​ക്കാം. (എഫെസ്യർ 1:7) അയാൾക്ക്‌ ഒഴിവാ​ക്കാ​നാ​വാത്ത ഭവിഷ്യ​ത്തു​ക​ളും ഉണ്ടാ​യേ​ക്കാം.

ബാലപീ​ഡ​കൻ പാർക്കുന്ന രാജ്യത്തെ നിയമ​മ​നു​സ​രിച്ച്‌, അയാൾ തടവിൽ കിടക്കു​ക​യോ ഗവൺമെൻറി​ന്റെ മറ്റു ശിക്ഷാ​വി​ധി​കൾ നേരി​ടു​ക​യോ ചെയ്യേ​ണ്ടി​വ​ന്നേ​ക്കാം. ഇതിൽനി​ന്നു സഭ അയാളെ സംരക്ഷി​ക്കു​ക​യില്ല. കൂടാതെ, അയാൾ ഒരു ഗുരു​ത​ര​മായ ബലഹീനത വെളി​പ്പെ​ടു​ത്തി​യി​രി​ക്കു​ക​യാണ്‌. അതു​കൊ​ണ്ടു​തന്നെ ഭാവി​യിൽ അതും കണക്കി​ലെ​ടു​ക്കേ​ണ്ടി​വ​രും. അയാൾക്ക്‌ അനുതാ​പ​മു​ണ്ടെന്നു തോന്നു​ന്ന​പക്ഷം, ആത്മീയ പുരോ​ഗ​തി​വ​രു​ത്താ​നും വയൽസേ​വ​ന​ത്തി​ലും ദിവ്യാ​ധി​പത്യ ശുശ്രൂ​ഷാ സ്‌കൂ​ളി​ലും പങ്കെടു​ക്കാ​നും സേവന​യോ​ഗ​ത്തിൽ പഠിപ്പി​ക്കൽ ഒഴിച്ചുള്ള ഭാഗങ്ങൾ നിർവ​ഹി​ക്കാ​നും അയാളെ പ്രോ​ത്സാ​ഹി​പ്പി​ക്കും. എങ്കിലും, സഭയിൽ ഉത്തരവാ​ദി​ത്വ സ്ഥാനത്തു സേവി​ക്കു​ന്ന​തിന്‌ അയാൾ യോഗ്യത നേടു​മെന്ന്‌ ഇതിനർഥ​മില്ല. ഇതിനുള്ള തിരു​വെ​ഴു​ത്തു കാരണങ്ങൾ എന്തെല്ലാ​മാണ്‌?

ഒരു കാരണം, മൂപ്പൻ “ആത്മനി​യ​ന്ത്ര​ണ​മുള്ള” ആളായി​രി​ക്കണം എന്നതാണ്‌. (തീത്തൊസ്‌ 1:8) നമുക്കാർക്കും പൂർണ ആത്മനി​യ​ന്ത്രണം ഇല്ലെന്നതു ശരിതന്നെ. (റോമർ 7:21-25) എന്നാൽ കുട്ടി​ക​ളോ​ടുള്ള ലൈം​ഗി​ക​ദു​ഷ്‌പെ​രു​മാ​റ്റം എന്ന പാപം ചെയ്യുന്ന പ്രായ​പൂർത്തി​യായ ഒരു സമർപ്പിത ക്രിസ്‌ത്യാ​നി അസ്വാ​ഭാ​വി​ക​മായ ജഡിക ബലഹീനത വെളി​ച്ച​ത്താ​ക്കു​ന്നു. പ്രായ​പൂർത്തി​യെ​ത്തിയ അത്തര​മൊ​രാൾ മറ്റു കുട്ടി​ക​ളോ​ടും ലൈം​ഗി​ക​ദു​ഷ്‌പെ​രു​മാ​റ്റം നടത്താ​നി​ട​യു​ണ്ടെന്ന്‌ അനുഭവം പ്രകട​മാ​ക്കു​ന്നു. കുട്ടി​ക​ളോട്‌ ലൈം​ഗി​ക​ദു​ഷ്‌പെ​രു​മാ​റ്റം കാട്ടുന്ന സകലരും ആ പാപം ആവർത്തി​ക്കു​ന്നി​ല്ലെ​ന്നതു ശരിയാ​ണെ​ങ്കി​ലും, അനേക​രും അതു ചെയ്യു​ന്നുണ്ട്‌. കുട്ടി​ക​ളോ​ടു ലൈം​ഗി​ക​ദു​ഷ്‌പെ​രു​മാ​റ്റം ആരെല്ലാം ആവർത്തി​ക്കും ആരെല്ലാം ആവർത്തി​ക്കു​ക​യില്ല എന്നെല്ലാം പറയാൻ സഭയ്‌ക്കു ഹൃദയങ്ങൾ പരി​ശോ​ധി​ക്കാ​നാ​വില്ല. (യിരെ​മ്യാ​വു 17:9) അതു​കൊണ്ട്‌ തിമൊ​ഥെ​യൊ​സി​നുള്ള പൗലൊ​സി​ന്റെ ബുദ്ധ്യു​പ​ദേശം കുട്ടി​ക​ളോ​ടു ലൈം​ഗി​ക​ദു​ഷ്‌പെ​രു​മാ​റ്റം കാട്ടി​യി​ട്ടുള്ള സ്‌നാ​പ​ന​മേറ്റ പ്രായ​പൂർത്തി​യാ​യ​വ​രു​ടെ കാര്യ​ത്തിൽ പ്രത്യേ​കി​ച്ചും ബാധക​മാണ്‌: “യാതൊ​രു​ത്തന്റെ മേലും വേഗത്തിൽ കൈ​വെ​ക്ക​രു​തു; അന്യന്മാ​രു​ടെ പാപങ്ങ​ളിൽ ഓഹരി​ക്കാ​ര​നാ​ക​യു​മ​രു​തു.” (1 തിമൊ​ഥെ​യൊസ്‌ 5:22) നമ്മുടെ കുട്ടി​ക​ളു​ടെ സംരക്ഷ​ണ​ത്തെ​പ്രതി, കുട്ടി​ക​ളോ​ടു ലൈം​ഗി​ക​ദു​ഷ്‌പെ​രു​മാ​റ്റം ചെയ്യു​ന്ന​തിൽ കുപ്ര​സി​ദ്ധ​നായ ഒരാൾ സഭയിൽ ഉത്തരവാ​ദി​ത്വ സ്ഥാനത്തി​നു യോഗ്യത നേടു​ന്നില്ല. കൂടാതെ, അയാൾക്ക്‌ ഒരു പയനിയർ ആകാനോ മറ്റേ​തെ​ങ്കി​ലും പ്രത്യേക, മുഴു​സമയ സേവന​ത്തിൽ ഏർപ്പെ​ടാ​നോ കഴിയു​ക​യില്ല.—പുറപ്പാ​ടു 21:28, 29-ലെ തത്ത്വം താരത​മ്യം ചെയ്യുക.

‘മറ്റുത​ര​ത്തി​ലുള്ള പാപങ്ങൾ ചെയ്യു​ക​യും അനുതാ​പം പ്രകട​മാ​ക്കി എന്നു തോന്നു​ക​യും ചെയ്‌ത ചിലർ പിന്നീട്‌ അതേ പാപം ആവർത്തി​ച്ചി​ട്ടി​ല്ലേ?’ എന്നു ചിലർ ചോദി​ച്ചേ​ക്കാം. ഉണ്ട്‌, അങ്ങനെ സംഭവി​ച്ചി​ട്ടുണ്ട്‌, എന്നാൽ പരിഗ​ണി​ക്കേണ്ട മറ്റു ഘടകങ്ങ​ളു​മുണ്ട്‌. ഉദാഹ​ര​ണ​ത്തിന്‌, ഒരു വ്യക്തി പ്രായ​പൂർത്തി​യായ മറ്റൊ​രാ​ളു​ടെ​നേരെ അധാർമിക മുന്നേ​റ്റങ്ങൾ നടത്തു​ന്നു​വെ​ങ്കിൽ, പ്രായ​പൂർത്തി​യായ ആ വ്യക്തിക്ക്‌ അയാളു​ടെ അല്ലെങ്കിൽ അവളുടെ മുന്നേ​റ്റ​ങ്ങളെ ചെറു​ക്കാ​നുള്ള പ്രാപ്‌തി​യു​ണ്ടാ​യി​രി​ക്കണം. എന്നാൽ കുട്ടി​കളെ കബളി​പ്പി​ക്കാ​നോ ആശയക്കു​ഴ​പ്പ​ത്തി​ലാ​ക്കാ​നോ ഭയപ്പെ​ടു​ത്താ​നോ വളരെ എളുപ്പ​മാണ്‌. കുട്ടി​കൾക്കു ജ്ഞാനമി​ല്ലാ​ത്ത​തി​നെ​ക്കു​റി​ച്ചു ബൈബിൾ പറയു​ന്നുണ്ട്‌. (സദൃശ​വാ​ക്യ​ങ്ങൾ 22:15; 1 കൊരി​ന്ത്യർ 13:11) താഴ്‌മ​യോ​ടു​കൂ​ടിയ നിഷ്‌ക​ള​ങ്ക​ത​യു​ടെ മാതൃ​ക​യാ​യി യേശു കുട്ടി​കളെ ചൂണ്ടി​ക്കാ​ട്ടി. (മത്തായി 18:4; ലൂക്കൊസ്‌ 18:16, 17) അനുഭ​വ​ജ്ഞാ​നം തീരെ ഇല്ല എന്നതും കുട്ടി​യു​ടെ നിഷ്‌ക​ള​ങ്ക​ത​യിൽ ഉൾപ്പെ​ടു​ന്നു. മിക്ക കുട്ടി​ക​ളും തുറന്നി​ട​പെ​ടു​ന്ന​വ​രും പ്രസാ​ദി​പ്പി​ക്കാൻ ഉത്സുക​രു​മാണ്‌. അതു​കൊ​ണ്ടു​തന്നെ തങ്ങൾക്കു പരിച​യ​മു​ള്ള​വ​രും തങ്ങൾ വിശ്വ​സി​ക്കു​ന്ന​വ​രു​മായ പ്രായ​പൂർത്തി​യാ​യ​വ​രു​ടെ കെണി​യി​ല​ക​പ്പെട്ട്‌ അവർ ദുഷ്‌പെ​രു​മാ​റ്റ​ത്തി​നു വിധേ​യ​മാ​കു​ന്നു. അതു​കൊണ്ട്‌, സഭയ്‌ക്ക്‌ അതിന്റെ കുട്ടി​കളെ യഹോ​വ​യു​ടെ മുമ്പാകെ സംരക്ഷി​ക്കു​ന്ന​തി​നുള്ള ഉത്തരവാ​ദി​ത്വ​മുണ്ട്‌.

നല്ല പരിശീ​ലനം ലഭിച്ച കുട്ടികൾ മാതാ​പി​താ​ക്ക​ളെ​യും മൂപ്പന്മാ​രെ​യും പ്രായ​പൂർത്തി​യായ മറ്റുള്ള​വ​രെ​യും അനുസ​രി​ക്കാ​നും ആദരി​ക്കാ​നും പഠിക്കു​ന്നു. (എഫെസ്യർ 6:1, 2; 1 തിമൊ​ഥെ​യൊസ്‌ 5:1, 2; എബ്രായർ 13:7) പ്രായ​പൂർത്തി​യായ ഈ പ്രമു​ഖ​രിൽ ഒരാൾ കുട്ടി​യു​ടെ ആ നിഷ്‌ക​ള​ങ്ക​മായ വിശ്വാ​സത്തെ മുത​ലെ​ടുത്ത്‌ ലൈം​ഗിക പ്രവൃ​ത്തി​കൾക്കാ​യി അവനെ​യോ അവളെ​യോ വശീക​രി​ക്കു​ക​യോ അതിനു​നേരെ ബലപ്ര​യോ​ഗം നടത്തു​ക​യോ ചെയ്യു​ന്നെ​ങ്കിൽ അത്‌ അമ്പരപ്പി​ക്കുന്ന ഒരു വികട​ത്ത​രം​ത​ന്നെ​യാ​യി​രി​ക്കും. ഈ വിധം ലൈം​ഗി​ക​ദു​ഷ്‌പെ​രു​മാ​റ്റ​ത്തി​നു വിധേ​യ​മാ​ക്ക​പ്പെ​ട്ടി​രി​ക്കു​ന്ന​വർക്ക്‌ അതിന്റെ ഫലമാ​യുള്ള വൈകാ​രിക പീഡയു​മാ​യി പലപ്പോ​ഴും വർഷങ്ങ​ളോ​ളം പോരാ​ടേ​ണ്ടി​വ​രു​ന്നു. അതു​കൊണ്ട്‌, ഒരു ബാലപീ​ഡകൻ സഭാപ​ര​മായ കടുത്ത ശിക്ഷണ​ന​ട​പ​ടി​ക്കും വിലക്കു​കൾക്കും വിധേ​യ​നാ​വും. പ്രമു​ഖ​വ്യ​ക്തി എന്നനി​ല​യി​ലുള്ള അയാളു​ടെ പദവിയല്ല പ്രധാനം, മറിച്ച്‌ സഭയുടെ കളങ്കര​ഹി​ത​മായ ശുദ്ധി​യാണ്‌.—1 കൊരി​ന്ത്യർ 5:6; 2 പത്രൊസ്‌ 3:14.

ഒരു ബാലപീ​ഡകൻ ആത്മാർഥ​മാ​യി അനുത​പി​ക്കു​ന്നെ​ങ്കിൽ, ബൈബിൾ തത്ത്വങ്ങൾ ബാധക​മാ​ക്കു​ന്ന​തി​ലെ ജ്ഞാനം അയാൾ അംഗീ​ക​രി​ക്കും. ദുഷ്ടമാ​യ​തി​നെ വെറു​ക്കാൻ അയാൾ ശരിക്കും പഠിക്കു​ന്നെ​ങ്കിൽ, അയാൾ താൻ പ്രവർത്തി​ച്ച​തി​നെ വെറു​ക്കു​ക​യും തന്റെ പാപം ആവർത്തി​ക്കു​ന്നത്‌ ഒഴിവാ​ക്കാൻ പോരാ​ടു​ക​യും ചെയ്യും. (സദൃശ​വാ​ക്യ​ങ്ങൾ 8:13; റോമർ 12:9) കൂടാതെ, യഹോ​വ​യു​ടെ സ്‌നേ​ഹ​ത്തി​ന്റെ മാഹാ​ത്മ്യ​ത്തിന്‌ അയാൾ തീർച്ച​യാ​യും അവനോ​ടു നന്ദിയു​ള്ള​വ​നാ​യി​രി​ക്കും. ആ സ്‌നേ​ഹ​ത്തി​ന്റെ ഫലമായി അയാ​ളെ​പ്പോ​ലെ അനുതാ​പ​മു​ള്ളൊ​രു പാപിക്കു തുടർന്നും നമ്മുടെ പരിശു​ദ്ധ​നായ ദൈവത്തെ ആരാധി​ക്കാ​നും ഭൂമി​യിൽ എന്നേക്കും വസിക്കാ​നി​രി​ക്കുന്ന “നേരു​ള്ള​വരു”ടെ കൂട്ടത്തിൽ ആയിരി​ക്കു​ന്ന​തി​നു പ്രത്യാ​ശി​ക്കാ​നും കഴിയും.—സദൃശ​വാ​ക്യ​ങ്ങൾ 2:21.

[അടിക്കു​റിപ്പ്‌]

[28-ാം പേജിലെ ആകർഷ​ക​വാ​ക്യം]

അനുതാപമുള്ള പാപി​ക​ളോ​ടു യഹോവ ക്ഷമിക്കു​മ്പോൾത്തന്നെ, അവരുടെ പ്രവൃ​ത്തി​കൾക്ക്‌ ഒഴിവാ​ക്കാ​നാ​വാത്ത ഭവിഷ്യ​ത്തു​കൾ ഉണ്ടാ​യേ​ക്കാം