മേലാൽ കഷ്ടപ്പാ​ടു​കൾ ഇല്ലാതി​രി​ക്കു​മ്പോൾ

കഷ്ടപ്പാ​ടു​കൾ മനുഷ്യ കുടും​ബ​ത്തി​നുള്ള ദൈവ​ത്തി​ന്റെ ആദി​മോ​ദ്ദേ​ശ്യ​ത്തി​ന്റെ ഭാഗമാ​യി​രു​ന്നില്ല. അവൻ അത്‌ ഉദ്ദേശി​ച്ചില്ല, അവൻ അത്‌ ആഗ്രഹി​ക്കു​ന്നു​മില്ല. ‘അങ്ങനെ​യെ​ങ്കിൽ, അതെങ്ങനെ ആരംഭി​ച്ചു, ഇപ്പോൾവരെ അതു തുടരാൻ ദൈവം അനുവ​ദി​ച്ചി​രി​ക്കു​ന്നത്‌ എന്തു​കൊണ്ട്‌?’ എന്നു നിങ്ങൾ ചോദി​ച്ചേ​ക്കാം.—യാക്കോബ്‌ 1:13 താരത​മ്യം ചെയ്യുക.

മനുഷ്യ ചരി​ത്ര​ത്തി​ന്റെ ഏറ്റവും പുരാതന രേഖയിൽ, ബൈബി​ളിൽ, വിശേ​ഷി​ച്ചും ഉല്‌പത്തി പുസ്‌ത​ക​ത്തിൽ അതിനുള്ള ഉത്തരമുണ്ട്‌. പിശാ​ചായ സാത്താൻ ദൈവ​ത്തി​നെ​തി​രെ മത്സരി​ച്ച​പ്പോൾ നമ്മുടെ ആദ്യ മാതാ​പി​താ​ക്ക​ളായ ആദാമും ഹവ്വായും അവനെ പിൻപ​റ്റി​യെന്ന്‌ അതു പറയുന്നു. അവരുടെ പ്രവൃ​ത്തി​കൾ സാർവ​ത്രിക ക്രമസ​മാ​ധാ​ന​ത്തി​ന്റെ അടിത്ത​റ​യെ​ത്തന്നെ ആക്രമിച്ച മൗലിക പ്രശ്‌നങ്ങൾ ഉയർത്തി. നന്മയും തിന്മയും എന്തെന്നു തീരു​മാ​നി​ക്കാ​നുള്ള അവകാശം തങ്ങൾക്കാ​ണെന്ന്‌ അവകാ​ശ​പ്പെ​ടു​ക​വഴി അവർ വെല്ലു​വി​ളി​ച്ചത്‌ ദൈവ​ത്തി​ന്റെ പരമാ​ധി​കാ​ര​ത്തെ​യാ​യി​രു​ന്നു. ഭരിക്കാ​നും “നന്മതിന്മക”ളുടെ ഒരേ​യൊ​രു ന്യായാ​ധി​പൻ ആയിരി​ക്കാ​നു​മുള്ള അവന്റെ അവകാ​ശത്തെ അവർ ചോദ്യം ചെയ്‌തു.—ഉല്‌പത്തി 2:15-17; 3:1-5.

എന്തു​കൊണ്ട്‌ തന്റെ ഹിതം ഉടനടി നടപ്പാ​ക്കി​യില്ല?

‘അപ്പോൾ ദൈവം എന്തു​കൊണ്ട്‌ തന്റെ ഹിതം ഉടനടി നടപ്പാ​ക്കി​യില്ല?’ എന്നു നിങ്ങൾ ചോദി​ച്ചേ​ക്കാം. സംഗതി വളരെ ലളിത​മാ​യാണ്‌ അനേകർക്കും തോന്നു​ന്നത്‌. ‘ദൈവ​ത്തിന്‌ അതിനുള്ള ശക്തിയു​ണ്ടാ​യി​രു​ന്നു. അവൻ അത്‌ മത്സരി​കളെ നശിപ്പി​ക്കാൻ ഉപയോ​ഗി​ക്ക​ണ​മാ​യി​രു​ന്നു,’ അവർ പറയുന്നു. (സങ്കീർത്തനം 147:5) എന്നാൽ നിങ്ങ​ളോ​ടു​തന്നെ ചോദി​ക്കുക, ‘ശ്രേഷ്‌ഠാ​ധി​കാ​രം ഉപയോ​ഗിച്ച്‌ തങ്ങളുടെ ഹിതം നടപ്പാ​ക്കുന്ന എല്ലാവ​രെ​യും ഞാൻ അന്ധമായി അംഗീ​ക​രി​ക്കു​മോ? ഒരു ഏകാധി​പതി ചാവേർപ്പ​ടയെ അയച്ചു ശത്രു​ക്കളെ വകവരു​ത്തു​മ്പോൾ സഹജമാ​യി​ത്തന്നെ എനിക്കു വിരക്തി തോന്നു​ക​യി​ല്ലേ?’ ന്യായ​ബോ​ധ​മുള്ള മിക്കയാ​ളു​ക​ളും അത്തര​മൊ​രു സംഗതി അംഗീ​ക​രി​ക്കു​ക​യില്ല.

‘എന്നാൽ ദൈവം ആ അധികാ​രം ഉപയോ​ഗി​ക്കു​ന്നെ​ങ്കിൽ, ആരും അവന്റെ നടപടി​കളെ ചോദ്യം ചെയ്യു​ക​യില്ല’ എന്നു നിങ്ങൾ പറഞ്ഞേ​ക്കാം. നിങ്ങൾക്ക്‌ ഉറപ്പു​ണ്ടോ? ദൈവം അധികാ​രം ഉപയോ​ഗി​ക്കു​ന്ന​തി​നെ ആളുകൾ ചോദ്യം ചെയ്യു​ന്നു​വെ​ന്നതു വസ്‌തു​ത​യല്ലേ? ദുഷ്ടത വെച്ചു​പൊ​റു​പ്പി​ക്കുന്ന സംഗതി​യി​ലേ​തു​പോ​ലെ, ചില​പ്പോ​ഴെ​ല്ലാം അവൻ അത്‌ എന്തു​കൊണ്ട്‌ ഉപയോ​ഗി​ച്ചില്ല എന്ന്‌ അവർ ചോദി​ക്കു​ന്നു. മറ്റു സമയങ്ങ​ളിൽ അവൻ അത്‌ എന്തിന്‌ ഉപയോ​ഗി​ച്ചു എന്നും അവർ ചോദി​ക്കു​ന്നു. വിശ്വ​സ്‌ത​നായ അബ്രാ​ഹാ​മി​നു​പോ​ലും ദൈവം തന്റെ ശത്രു​ക്കൾക്കെ​തി​രെ ശക്തി ഉപയോ​ഗി​ക്കു​ന്നതു സംബന്ധി​ച്ചു ബുദ്ധി​മു​ട്ടു തോന്നി. ദൈവം സോ​ദോ​മി​നെ നശിപ്പി​ക്കാൻ തീരു​മാ​നിച്ച അവസരം അനുസ്‌മ​രി​ക്കുക. മോശം ആളുക​ളോ​ടൊ​പ്പം നല്ലയാ​ളു​ക​ളും മരിക്കു​മെന്ന തെറ്റി​ദ്ധാ​ര​ണ​യിൽനിന്ന്‌ ഉടലെ​ടുത്ത ഭയമാ​യി​രു​ന്നു അബ്രാ​ഹാ​മിന്‌. അവൻ പറഞ്ഞു: “ഇങ്ങനെ നീ ഒരുനാ​ളും ചെയ്യു​ന്ന​ത​ല്ല​ല്ലോ? നീതി​മാൻ ദുഷ്ട​നെ​പ്പോ​ലെ ആകത്തക്ക​വണ്ണം ദുഷ്ട​നോ​ടു​കൂ​ടെ നീതി​മാ​നെ നീ ഒരുനാ​ളും കൊല്ലു​ക​യില്ല.” (ഉല്‌പത്തി 18:25) സമ്പൂർണ അധികാ​രം ദുരു​പ​യോ​ഗി​ക്കി​ല്ലെന്ന ഉറപ്പ്‌ അബ്രാ​ഹാ​മി​നെ​പ്പോ​ലെ ശരിയായ മനോ​നി​ല​യുള്ള ആളുകൾക്കു​പോ​ലും ആവശ്യ​മാണ്‌.

തീർച്ച​യാ​യും, ദൈവ​ത്തിന്‌ ആദാമി​നെ​യും ഹവ്വാ​യെ​യും സാത്താ​നെ​യും ഉടനടി നശിപ്പി​ക്കാ​മാ​യി​രു​ന്നു. എന്നാൽ അത്‌ മറ്റു ദൂതന്മാ​രെ അല്ലെങ്കിൽ പിൽക്കാ​ലത്ത്‌ അവന്റെ പ്രവൃ​ത്തി​ക​ളെ​ക്കു​റിച്ച്‌ അറിയു​മാ​യി​രുന്ന ഭാവി സൃഷ്ടി​കളെ എങ്ങനെ ബാധി​ക്കു​മാ​യി​രു​ന്നു​വെന്നു ചിന്തി​ക്കുക. ദൈവ​ത്തി​ന്റെ ഭരണം ശരിയാ​ണോ അല്ലയോ എന്നതി​നെ​ക്കു​റി​ച്ചുള്ള ചോദ്യ​ങ്ങൾ അവരെ അലട്ടു​മാ​യി​രു​ന്നി​ല്ലേ? വാസ്‌ത​വ​ത്തിൽ, തന്നെ എതിർക്കുന്ന ആരെയും നിർദയം ഉന്മൂലനം ചെയ്യുന്ന, നീഷേ വർണി​ച്ച​തു​പോ​ലുള്ള സർവാ​ധി​കാ​രി​യായ ഒരു സ്വേച്‌ഛാ​ധി​പ​തി​യാണ്‌ ദൈവം എന്ന ആരോ​പ​ണ​ത്തിന്‌ അവൻ വിധേ​യ​നാ​കു​മാ​യി​രു​ന്നി​ല്ലേ?

ആളുക​ളെ​ക്കൊണ്ട്‌ ശരി ചെയ്യി​ക്ക​രു​തോ?

‘ദൈവ​ത്തിന്‌ ആളുക​ളെ​ക്കൊ​ണ്ടു ശരി ചെയ്യി​ക്ക​രു​തോ?’ എന്നു ചിലർ ചോദി​ക്കു​ന്നു. കൊള്ളാം, ഇതും പരിചി​ന്തി​ക്കുക. ചരി​ത്ര​ത്തി​ലു​ട​നീ​ളം, ആളുകളെ തങ്ങളുടെ ചിന്ത​യോട്‌ ഇണക്കു​വാൻ ഗവൺമെൻറു​കൾ ശ്രമി​ച്ചി​ട്ടുണ്ട്‌. ഒരുപക്ഷേ മയക്കു​മ​രു​ന്നോ ശസ്‌ത്ര​ക്രി​യ​യോ ഉപയോ​ഗിച്ച്‌, അല്ലെങ്കിൽ പ്രജക​ളു​ടെ ഇച്‌ഛാ​ശക്തി എന്ന അത്ഭുത​ക​ര​മായ പ്രാപ്‌തി കവർന്നെ​ടു​ത്തു​കൊണ്ട്‌ ചില ഗവൺമെൻറു​ക​ളോ ഭരണാ​ധി​പ​ന്മാ​രോ പല വിധത്തി​ലുള്ള മസ്‌തി​ഷ്‌ക​പ്ര​ക്ഷാ​ളന പരിപാ​ടി​കൾ നടത്തി​യി​ട്ടുണ്ട്‌. സ്വതന്ത്ര ധാർമിക കാര്യ​സ്ഥ​ന്മാർ ആയിരി​ക്കാ​നുള്ള പ്രാപ്‌തി​യെ, ദുർവി​നി​യോ​ഗ​ത്തി​നു സാധ്യ​ത​യു​ണ്ടെ​ങ്കിൽക്കൂ​ടി, നാം വിലമ​തി​ക്കു​ന്നി​ല്ലേ? ആ സ്വാത​ന്ത്ര്യം എടുത്തു​ക​ള​യാ​നുള്ള ഏതെങ്കി​ലും ഗവൺമെൻറി​ന്റെ​യോ ഭരണാ​ധി​പ​ന്റെ​യോ ശ്രമത്തെ നിങ്ങൾ അംഗീ​ക​രി​ക്കു​മോ?

തന്റെ നിയമം ഉടനടി ബലം​പ്ര​യോ​ഗി​ച്ചു നടപ്പാ​ക്കു​ന്ന​തി​നു​പ​കരം ദൈവ​ത്തി​നു വേറെ എന്തു മാർഗ​മു​ണ്ടാ​യി​രു​ന്നു? തന്റെ നിയമം തിരസ്‌ക​രി​ച്ച​വർക്കു തന്റെ ഭരണത്തിൽനി​ന്നു താത്‌കാ​ലി​ക​മാ​യി സ്വാത​ന്ത്ര്യം അനുവ​ദി​ച്ചു​കൊ​ടു​ക്ക​ലാണ്‌ മത്സരത്തെ ഏറ്റവും നന്നായി നേരി​ടേണ്ട വിധ​മെന്ന്‌ യഹോ​വ​യാം ദൈവം തീരു​മാ​നി​ച്ചു. ഇതു മുഖാ​ന്തരം ആദാമിൽനി​ന്നും ഹവ്വായിൽനി​ന്നു​മുള്ള മനുഷ്യ കുടും​ബ​ത്തി​നു ദൈവ​ത്തി​ന്റെ നിയമ​ത്തി​നു കീഴ്‌പെ​ടാ​തെ തങ്ങളെ​ത്തന്നെ ഭരിക്കാ​നാ​കുന്ന ഒരു പരിമിത കാലഘട്ടം ലഭിക്കു​മാ​യി​രു​ന്നു. എന്തിനാണ്‌ അവൻ ഇതു ചെയ്‌തത്‌? എന്തെന്നാൽ അപരി​മിത ശക്തി ഉപയോ​ഗി​ച്ചു തന്റെ ഹിതം നടത്തി​യാൽപ്പോ​ലും, തന്റെ ഭരണവി​ധം, എല്ലായ്‌പോ​ഴും ശരിയും നീതി​നി​ഷ്‌ഠ​വും ആണെന്നും തനി​ക്കെ​തി​രായ ഏതൊരു മത്സരവും ഉടനെ​യോ പിന്നീ​ടോ ദുരന്ത​ത്തിൽ കലാശി​ക്കു​മെ​ന്നും തെളി​യി​ക്കുന്ന അവിതർക്കി​ത​മായ തെളിവു കാല​ക്ര​മ​ത്തിൽ കുന്നു​കൂ​ടു​മെന്ന്‌ അവന്‌ അറിയാ​മാ​യി​രു​ന്നു.—ആവർത്ത​ന​പു​സ്‌തകം 32:4; ഇയ്യോബ്‌ 34:10-12; യിരെ​മ്യാ​വു 10:23.

എല്ലാ നിഷ്‌ക​ള​ങ്ക​രു​ടെ​യും കാര്യ​മോ?

‘അതിനി​ടെ, എല്ലാ നിഷ്‌ക​ള​ങ്ക​രു​ടെ​യും കാര്യ​മോ?’ എന്നു നിങ്ങൾ ചോദി​ച്ചേ​ക്കാം. ‘വാസ്‌ത​വ​ത്തിൽ അവരെ വേദനി​പ്പി​ച്ചി​ട്ടാ​ണോ നിയമ​ത്തി​ന്റെ ഏതെങ്കി​ലു​മൊ​രു വിശദാം​ശം തെളി​യി​ക്കു​ന്നത്‌?’ നിയമ​ത്തി​ന്റെ ഏതോ ഒരു അവ്യക്ത വിശദാം​ശം തെളി​യി​ക്കു​ന്ന​തി​നല്ല ദൈവം ദുഷ്ടത നിലനിൽക്കാൻ അനുവ​ദി​ച്ചി​രി​ക്കു​ന്നത്‌. മറിച്ച്‌, താൻ മാത്ര​മാ​ണു പരമാ​ധി​കാ​രി​യെ​ന്നും എല്ലാ സൃഷ്ടി​ക​ളു​ടെ​യും നിലനിൽക്കുന്ന സമാധാ​ന​ത്തി​നും സന്തോ​ഷ​ത്തി​നും തന്റെ നിയമങ്ങൾ അനുസ​രി​ക്കേ​ണ്ടത്‌ അത്യന്താ​പേ​ക്ഷി​ത​മാ​ണെ​ന്നു​മുള്ള അടിസ്ഥാന സത്യം എന്നന്നേ​ക്കു​മാ​യി സ്ഥാപി​ക്കു​ന്ന​തി​നാണ്‌.

മനുഷ്യ കുടും​ബ​ത്തിന്‌ ഇതു വരുത്തി​യേ​ക്കാ​വുന്ന ഏതൊരു ഹാനി​യും തനിക്കു പൂർണ​മാ​യും പരിഹ​രി​ക്കാ​വു​ന്ന​തേ​യു​ള്ളൂ​വെന്നു ദൈവ​ത്തി​ന​റി​യാ​മെ​ന്നത്‌ മനസ്സിൽപ്പി​ടി​ക്കേണ്ട നിർണാ​യക സംഗതി​യാണ്‌. വേദന​യു​ടെ​യും കഷ്ടപ്പാ​ടു​ക​ളു​ടെ​യും താത്‌കാ​ലിക കാലഘ​ട്ട​ത്തി​നു പ്രയോ​ജ​ന​പ്ര​ദ​മായ ഒരു അനന്തര​ഫലം ഉണ്ടാകു​മെന്ന്‌ അവനറി​യാം. കുട്ടി​യു​ടെ ജീവൻ അപകട​പ്പെ​ടു​ത്തി​യേ​ക്കാ​വുന്ന ഏതോ രോഗ​ത്തി​നെ​തി​രെ സംരക്ഷണം നൽകാൻ ഡോക്ടർ രോഗ​പ്ര​തി​രോധ കുത്തി​വ​യ്‌പ്പു നടത്തു​മ്പോൾ കുട്ടിക്കു വേദനി​ക്കു​ന്നു. എന്നാൽ അപ്പോ​ഴും സ്വന്തം കുട്ടിയെ കുത്തി​വ​യ്‌പ്പി​നാ​യി ബലം​പ്ര​യോ​ഗി​ച്ചു പിടി​ച്ചു​കൊ​ടു​ക്കുന്ന മാതാ​വി​ന്റെ കാര്യ​മോ? കുട്ടിക്കു വേദനി​ക്ക​ണ​മെന്ന്‌ ഒരു മാതാ​വും ആഗ്രഹി​ക്കില്ല. രോഗിക്ക്‌ അസ്വാ​സ്ഥ്യ​മു​ണ്ടാ​ക്കാൻ ഒരു ഡോക്ട​റും ആഗ്രഹി​ക്കില്ല. താൻ എന്തിനു വേദന അനുഭ​വി​ക്കു​ന്നു​വെന്ന്‌ കുട്ടിക്ക്‌ അപ്പോൾ മനസ്സി​ലാ​കു​ന്നി​ല്ലെ​ങ്കി​ലും അത്‌ അനുവ​ദി​ച്ച​തി​ന്റെ കാരണം പിൽക്കാ​ലത്ത്‌ അവനു മനസ്സി​ലാ​യി​ക്കൊ​ള്ളും.

കഷ്ടപ്പെ​ടു​ന്ന​വർക്കു യഥാർഥ ആശ്വാസം?

ഈ സംഗതി​കൾ അറിയു​ന്ന​തു​കൊ​ണ്ടൊ​ന്നും കഷ്ടപ്പെ​ടു​ന്ന​വർക്കു കാര്യ​മായ ആശ്വാ​സ​മി​ല്ലെന്നു ചിലർക്കു തോന്നി​യേ​ക്കാം. “പട്ടിണി കിടക്കുന്ന മനുഷ്യ​നോട്‌ ആഹാര​സാ​ധ​ന​ങ്ങ​ളു​ടെ രസത​ന്ത്ര​ത്തെ​ക്കു​റി​ച്ചു പ്രസം​ഗി​ക്കു​ന്നത്‌ അയാളെ സഹായി​ക്കു”മെന്നു പറയു​ന്ന​തു​പോ​ലെ​യാണ്‌ “കഷ്ടമനു​ഭ​വി​ക്കു​ന്ന​വ​നോ​ടു” കഷ്ടപ്പാ​ടു​കൾ എന്തു​കൊ​ണ്ടെ​ന്ന​തി​നുള്ള യുക്തി​സ​ഹ​മായ വിശദീ​ക​ര​ണ​മെന്ന്‌ ഹാൻസ്‌ ക്യുങ്‌ പ്രസ്‌താ​വി​ക്കു​ന്നു. “കഷ്ടപ്പാ​ടിൽ മിക്കവാ​റും തളർന്നു​പോയ മനുഷ്യന്‌ വിദഗ്‌ധ​മായ ന്യായ​വാ​ദം വാസ്‌ത​വ​ത്തിൽ പ്രോ​ത്സാ​ഹ​ന​മാ​കു​മോ?” എന്ന്‌ അദ്ദേഹം ചോദി​ക്കു​ന്നു. ആകട്ടെ, ദൈവ​വ​ച​ന​മായ ബൈബി​ളി​നെ അവഗണി​ക്കുന്ന മനുഷ്യ​രു​ടെ എല്ലാ ‘വിദഗ്‌ധ ന്യായ​വാ​ദ​വും’ കഷ്ടപ്പാ​ടു​കൾ അനുഭ​വി​ക്കു​ന്ന​വർക്കു പ്രോ​ത്സാ​ഹനം കൊടു​ത്തി​ട്ടി​ല്ല​ല്ലോ. മനുഷ്യൻ കഷ്ടപ്പാ​ടു​കൾ അനുഭ​വി​ക്ക​ണ​മെന്ന്‌ ദൈവം ഉദ്ദേശി​ച്ചി​ട്ടു​ള്ള​താ​ണെ​ന്നും അവസാനം സ്വർഗ​ത്തിൽ ജീവൻ നേടു​ന്ന​വർക്കാ​യുള്ള കണ്ണീർത്താ​ഴ്‌വ​ര​യാ​യി അഥവാ ഒരു പരീക്ഷാ​സ്ഥ​ല​മാ​യി രൂപകൽപ്പന ചെയ്‌തി​രി​ക്കു​ന്ന​താണ്‌ ഭൂമിയെ എന്നും അർഥമാ​ക്കുന്ന അത്തരം മാനു​ഷിക ന്യായ​വാ​ദം​കൊ​ണ്ടു പ്രശ്‌നം വഷളാ​കാ​നേ ഉതകി​യി​ട്ടു​ള്ളൂ. എന്തൊരു ദൈവ​ദൂ​ഷണം!

എന്നാൽ യഥാർഥ ആശ്വാസം ബൈബിൾ നൽകു​ന്നുണ്ട്‌. കഷ്ടപ്പാ​ടു​കൾക്കുള്ള യുക്തി​സ​ഹ​മായ വിശദീ​ക​രണം നൽകുക മാത്രമല്ല, കഷ്ടപ്പാ​ടു​കൾ താത്‌കാ​ലി​ക​മാ​യി അനുവ​ദി​ച്ച​തി​നാൽ ഉണ്ടായ സകല ഹാനി​യും താൻ പരിഹ​രി​ക്കു​മെന്ന ദൈവ​ത്തി​ന്റെ ഉറപ്പുള്ള വാഗ്‌ദ​ത്ത​ത്തിൽ അതു വിശ്വാ​സം പടുത്തു​യർത്തു​ക​യും ചെയ്യുന്നു.

“എല്ലാ സംഗതി​ക​ളു​ടെ​യും പുനഃ​സ്ഥാ​പനം”

ആദ്യ മനുഷ്യ​സൃ​ഷ്ടി​കൾ മത്സരി​ക്കു​ന്ന​തി​നു​മുമ്പ്‌ താൻ ഉദ്ദേശി​ച്ചി​രുന്ന അതേ അവസ്ഥയി​ലേക്കു ദൈവം താമസി​യാ​തെ സംഗതി​കൾ പുനഃ​സ്ഥി​തീ​ക​രി​ക്കും. മനുഷ്യൻ സ്വത​ന്ത്ര​മാ​യി ഭരിക്കാൻ ദൈവം അനുവ​ദി​ച്ചു​കൊ​ടുത്ത സമയം തീരാ​റാ​യി. “യേശു​വി​നെ” ദൈവം അയയ്‌ക്കാ​നി​രി​ക്കുന്ന കാലഘ​ട്ട​ത്തി​ലാ​ണു നാം ജീവി​ക്കു​ന്നത്‌. “പുരാതന കാലത്തെ തന്റെ വിശുദ്ധ പ്രവാ​ച​ക​ന്മാ​രു​ടെ വായി​ലൂ​ടെ ദൈവം അരുളി​ച്ചെയ്‌ത എല്ലാ സംഗതി​ക​ളു​ടെ​യും പുനഃ​സ്ഥാ​പന കാലം​വരെ സ്വർഗം” അവനെ “തീർച്ച​യാ​യും അതിനു​ള്ളിൽത്തന്നെ നിർത്തേ​ണ്ട​താ​കു​ന്നു.”—പ്രവൃ​ത്തി​കൾ 3:20, 21, NW.

യേശു​ക്രി​സ്‌തു എന്തു ചെയ്യും? അവൻ ദൈവ​ത്തി​ന്റെ എല്ലാ ശത്രു​ക്ക​ളെ​യും ഭൂമി​യിൽനി​ന്നു തുടച്ചു​നീ​ക്കും. (2 തെസ്സ​ലൊ​നീ​ക്യർ 1:6-10) അതു മനുഷ്യ ഏകാധി​പ​തി​കൾ നടപ്പാ​ക്കു​ന്ന​തു​പോ​ലെ തകൃതി​യാ​യു​ള്ളൊ​രു വധനിർവ​ഹ​ണ​മാ​യി​രി​ക്കു​ക​യില്ല. തന്റെ ഹിതം നടപ്പാ​ക്കാൻ തന്റെ അപരി​മിത ശക്തി താമസി​യാ​തെ​തന്നെ ഉപയോ​ഗി​ക്കു​ന്ന​തിൽ ദൈവ​ത്തി​ന്റെ പക്ഷത്ത്‌ തികഞ്ഞ ന്യായ​മു​ണ്ടെന്ന്‌ മനുഷ്യ​ന്റെ ദുർഭ​ര​ണ​ത്തി​ന്റെ ദാരുണ ഭവിഷ്യ​ത്തു​കൾ നൽകുന്ന തെളി​വു​ക​ളു​ടെ വൻകൂ​മ്പാ​രം പ്രകട​മാ​ക്കും. (വെളി​പ്പാ​ടു 11:17, 18) ഇതിനർഥം ഭൂമി​യിൽ മുമ്പ്‌ ഒരിക്ക​ലും ഉണ്ടായി​ട്ടി​ല്ലാ​ത്ത​ത​ര​ത്തി​ലുള്ള “ഉപദ്രവം” ആദ്യം ഉണ്ടാകു​മെ​ന്നാണ്‌. നോഹ​യു​ടെ നാളിലെ പ്രളയ​വു​മാ​യി സാമ്യ​മു​ണ്ടെ​ങ്കി​ലും ഇത്‌ അതി​നെ​ക്കാൾ വളരെ വലുതാ​യി​രി​ക്കും. (മത്തായി 24:21, 29-31, 36-39, NW) ഈ “മഹോ​പ​ദ്രവ”ത്തെ അതിജീ​വി​ക്കു​ന്നവർ “തന്റെ വിശുദ്ധ പ്രവാ​ച​ക​ന്മാ​രു​ടെ വായി​ലൂ​ടെ” ദൈവം കൊടുത്ത എല്ലാ വാഗ്‌ദ​ത്ത​ങ്ങ​ളു​ടെ​യും നിവൃത്തി കാണു​മ്പോൾ “ആശ്വാ​സ​കാ​ലങ്ങൾ” അനുഭ​വി​ക്കും. (പ്രവൃ​ത്തി​കൾ 3:19; വെളി​പ്പാ​ടു 7:14-17, NW) ദൈവം എന്താണു വാഗ്‌ദാ​നം ചെയ്‌തി​രി​ക്കു​ന്നത്‌?

യുദ്ധവും രക്തച്ചൊ​രി​ച്ചി​ലും വരുത്തി​ക്കൂ​ട്ടി​യി​ട്ടുള്ള കഷ്ടപ്പാ​ടു​കൾ അവസാ​നി​ക്കു​മെന്ന്‌ ദൈവ​ത്തി​ന്റെ പുരാതന പ്രവാ​ച​ക​ന്മാർ പറയുന്നു. ഉദാഹ​ര​ണ​ത്തിന്‌, സങ്കീർത്തനം 46:9 നമ്മോടു പറയുന്നു: “അവൻ ഭൂമി​യു​ടെ അറ്റംവ​രെ​യും യുദ്ധങ്ങളെ നിർത്തൽചെ​യ്യു​ന്നു.” നിഷ്‌ക​ള​ങ്ക​രായ ഇരകളും ദയനീ​യാ​വ​സ്ഥ​യി​ലായ അഭയാർഥി​ക​ളും, ബലാൽസം​ഗ​ത്തിന്‌ ഇരയാ​യ​വ​രും വൈക​ല്യ​മു​ള്ള​വ​രും ക്രൂര​മായ യുദ്ധങ്ങ​ളിൽ കശാപ്പു​ചെ​യ്യ​പ്പെ​ടു​ന്ന​വ​രും മേലാൽ ഉണ്ടായി​രി​ക്കു​ക​യില്ല! യെശയ്യാ പ്രവാ​ചകൻ പറയുന്നു: “ജാതി ജാതിക്കു നേരെ വാളോ​ങ്ങു​ക​യില്ല; അവർ ഇനി യുദ്ധം അഭ്യസി​ക്ക​യും ഇല്ല.”—യെശയ്യാ​വു 2:4.

കുറ്റകൃ​ത്യ​ങ്ങ​ളും അനീതി​യും നിമി​ത്ത​മു​ണ്ടായ കഷ്ടപ്പാ​ടു​ക​ളും അവസാ​നി​ക്കു​മെ​ന്നും പ്രവാ​ച​ക​ന്മാർ മുൻകൂ​ട്ടി​പ്പ​റ​യു​ന്നു. “നേരു​ള്ളവർ ദേശത്തു വസിക്കു”മെന്നും വേദന​യും കഷ്ടപ്പാ​ടു​ക​ളും വരുത്തു​ന്നവർ “അതിൽനി​ന്നു നിർമ്മൂ​ല​മാ​കു”മെന്നും സദൃശ​വാ​ക്യ​ങ്ങൾ 2:21, 22 വാഗ്‌ദാ​നം ചെയ്യുന്നു. ഇനിമേൽ ‘മനുഷ്യൻ മനുഷ്യ​ന്റെ​മേൽ അവന്റെ ദോഷ​ത്തി​നാ​യി അധികാ​രം’ പ്രയോ​ഗി​ക്കു​ക​യില്ല. (സഭാ​പ്ര​സം​ഗി 8:9) എല്ലാ ദുഷ്ടന്മാ​രും എന്നേക്കു​മാ​യി നീക്കം​ചെ​യ്യ​പ്പെ​ടും. (സങ്കീർത്തനം 37:10, 38) കഷ്ടപ്പാ​ടു​കൾ ഒന്നുമി​ല്ലാ​തെ എല്ലാവർക്കും സമാധാ​ന​ത്തി​ലും സുരക്ഷി​ത​ത്വ​ത്തി​ലും ജീവി​ക്കാ​നാ​കും.—മീഖാ 4:4.

കൂടാതെ, ശാരീ​രി​ക​വും വൈകാ​രി​ക​വു​മായ രോഗങ്ങൾ വരുത്തിയ കഷ്ടപ്പാ​ടും അവസാ​നി​ക്കു​മെന്നു പ്രവാ​ച​ക​ന്മാർ വാഗ്‌ദാ​നം ചെയ്യുന്നു. (യെശയ്യാ​വു 33:24) അന്ധരും ബധിര​രും വികലാം​ഗ​രും മറ്റെല്ലാ​വിധ രോഗ​ബാ​ധി​ത​രും സൗഖ്യ​മാ​ക്ക​പ്പെ​ടു​മെന്ന്‌ യെശയ്യാവ്‌ വാഗ്‌ദാ​നം ചെയ്യുന്നു. (യെശയ്യാ​വു 35:5, 6) ദൈവം മരണത്തി​ന്റെ ഫലങ്ങൾപോ​ലും നീക്കും. “കല്ലറക​ളിൽ ഉള്ളവർ എല്ലാവ​രും അവന്റെ ശബ്ദം കേട്ടു . . . പുനരു​ത്ഥാ​നം ചെയ്യു”മെന്ന്‌ യേശു മുൻകൂ​ട്ടി​പ്പ​റഞ്ഞു. (യോഹ​ന്നാൻ 5:28, 29) “പുതിയ ആകാശ​വും പുതിയ ഭൂമി”യും സംബന്ധി​ച്ചുള്ള ദർശന​ത്തിൽ “ദൈവം . . . അവരുടെ കണ്ണിൽനി​ന്നു കണ്ണുനീർ എല്ലാം തുടെ​ച്ചു​ക​ള​യും. ഇനി മരണം ഉണ്ടാക​യില്ല; ദുഃഖ​വും മുറവി​ളി​യും കഷ്ടതയും ഇനി ഉണ്ടാക​യില്ല” എന്നു യോഹ​ന്നാ​നോ​ടു പ്രസ്‌താ​വി​ക്ക​പ്പെട്ടു. (വെളി​പ്പാ​ടു 21:1-5എ) അതൊന്നു വിഭാവന ചെയ്യൂ! വേദന​യില്ല, കണ്ണീരില്ല, മുറവി​ളി​യില്ല, മരണമില്ല—മേലാൽ കഷ്ടപ്പാ​ടു​കൾ ഇല്ല!

താത്‌കാ​ലി​ക​മാ​യി ദുഷ്ടത അനുവ​ദി​ച്ച​തി​ന്റെ ഫലമാ​യു​ണ്ടായ എല്ലാ ദുരന്ത​ങ്ങൾക്കും പരിഹാ​ര​മു​ണ്ടാ​ക്കും. ദൈവം ഒരിക്ക​ലും ഉദ്ദേശി​ച്ചി​രു​ന്നി​ട്ടി​ല്ലാത്ത മനുഷ്യ വേദന​യു​ടെ​യും കഷ്ടപ്പാ​ടു​ക​ളു​ടെ​യും ഓർമ​കൾപോ​ലും പൂർണ​മാ​യും മായ്‌ച്ചു​ക​ള​യും. “മുമ്പി​ലത്തെ കഷ്ടങ്ങൾ മറന്നു​പോ​ക​യും . . . മുമ്പി​ലത്തവ ആരും ഓർക്കു​ക​യില്ല,” യെശയ്യാവ്‌ മുൻകൂ​ട്ടി​പ്പ​റഞ്ഞു. (യെശയ്യാ​വു 65:16, 17) പറുദീ​സാ ഭൂമി​യിൽ തികഞ്ഞ സമാധാ​ന​ത്തി​ലും സന്തോ​ഷ​ത്തി​ലും ജീവി​ക്കുന്ന പൂർണ​ത​യുള്ള മനുഷ്യ​കു​ടും​ബം എന്ന ദൈവ​ത്തി​ന്റെ ആദി​മോ​ദ്ദേ​ശ്യം പൂർണ​മാ​യും സാക്ഷാ​ത്‌ക​രി​ക്ക​പ്പെ​ടും. (യെശയ്യാ​വു 45:18) അവന്റെ പരമാ​ധി​കാ​ര​ത്തി​ലുള്ള ഉറപ്പ്‌ പരിപൂർണ​മാ​യി​രി​ക്കും. ദൈവം മനുഷ്യ കഷ്ടപ്പാ​ടു​കൾക്ക്‌ അന്തംവ​രു​ത്തുന്ന സമയത്ത്‌, നീഷേ ആരോ​പി​ച്ച​തു​പോ​ലെ, താൻ ഏതോ തരത്തിൽ ‘സ്വേച്‌ഛാ​ധി​പ​തി​യും തട്ടിപ്പു​കാ​ര​നും വഞ്ചകനും വധനിർവാ​ഹ​ക​നും’ അല്ല, മറിച്ച്‌ താൻ എല്ലായ്‌പോ​ഴും സ്‌നേ​ഹ​സ​മ്പ​ന്ന​നും ജ്ഞാനി​യും സമ്പൂർണ അധികാ​രം പ്രയോ​ഗി​ക്കു​ന്ന​തിൽ ന്യായം കാട്ടു​ന്ന​വ​നു​മാ​ണെന്ന്‌ അവൻ തെളി​യി​ക്കുന്ന സമയത്തു ജീവി​ക്കു​ന്നത്‌ എന്തൊരു പദവി​യാണ്‌!

[5-ാം പേജിലെ ചിത്രം]

പ്രജകളുടെ ഇച്‌ഛാ​ശക്തി കവർന്നെ​ടു​ത്തു​കൊണ്ട്‌ ചില ഭരണാ​ധി​പ​ന്മാർ മസ്‌തി​ഷ്‌ക​പ്ര​ക്ഷാ​ളന പരിപാ​ടി​കൾ നടത്തി​യി​ട്ടുണ്ട്‌

[കടപ്പാട]

UPI/Bettmann

[7-ാം പേജിലെ ചിത്രം]

മേലാൽ കഷ്ടപ്പാ​ടു​കൾ ഇല്ലാതി​രി​ക്കുന്ന സമയത്ത്‌ നാമെ​ല്ലാം ജീവിതം അതിന്റെ തികവിൽ ആസ്വദി​ക്കും